ޗިއާ ސީޑްސް ބޭނުންކުރުމުން ހަށިގަނޑަށް ލިބޭ ފައިދާ

ޗިއާ ސީޑްސްއަކީ “ސަލްވިއާ ހިސްޕަނިކާ” ނުވަތަ ޗިއާ ޕްލާންޓް ނަމަކަށް ކިޔާ ކުދީނާ ޢާއިލާގެ މާ އަޅާ ގަހެއްގައި އަޅާ އޮށެކެވެ. އޮށުގެ ހުރަސްދިގުކޮށް ގާތްގަނޑަކަށް 2 މިލިމީޓަރު ހުންނަ، އޯވަލްކޮށް އަދި ހުދާއިކަޅު ތިކިތަކެއް ޖަހާފައި ހުންނަ މި ކުޑަ އޮށަކީ، ކިތަންމެ ކުޑައަކަސް އޭގައި އިންސާނާގެ ހަށިގަނޑަށް ބޭނުންވާ ވަރަށް ގިނަ ފައިދާތައް އެކުލެވިގެންވާ އޮށެކެވެ.

ރާއްޖޭގެ ބާޒާރުގައި ޗިއާ ސީޑްސްއަކީ ވަރަށް އަގުހުރި، އަދި ވަރަށް ގިނަ މީހުން ހަށިގަނޑުގެ ބަރުދަން ލުއިކުރުމަށް ބޭނުންކުރަމުން އަންނަ ކާނާއެކެވެ. ފެނަށް އަޅައި މި އޮށް ފޯވުމުން އިސްބަގުލްހެން އޮށުގެ ވަށައިގެން އޮޅަ ފަށަލައެއްލާފައި ހުންނަ މި އޮށަކީ އޭގައި އެއްވެސް ރަހައެއް ލާ އެއްޗެއް ނޫނެވެ. ނަމަވެސް އޭގައި ގިނަ އަދަދެއްގެ ވިޓަމިންސްއާއި މިނަރެލްސް އެކުލެވޭތީ އެ ބޭނުންކުރުމުން އިންސާނާގެ ހަށިގަނޑަށް ވަރަށް ގިނަގުނަ ފައިދާތަކެއް ލިބެއެވެ. ނަމަވެސް ޗިއާ ސީޑްސް ބޭނުންކުރުމުގައި އެ ބޭނުންކުރާ މިންވަރާމެދު ސަމާލުވެލެއްވުމަށް ޑައިޓީޝަނުންނާއި ނިއުޓްރިޝަނުން ލަފާދެއްވައެވެ. އެގޮތުން އެއްފަހަރާ ބޭނުންކުރަން އެންމެ ރަނގަޅު މިންގަަނޑަކީ ޗިއާ ސީޑްސްގެ ދެ މޭޒުމަތީ ސަމުސާއެވެ. އަދި ހުހައި ކެއުމުގެ ބަދަލުގައި އަބަދުވެސް ކެއުންބުއިމުގައި ބޭނުންކުރާ ކޮންމެވެސް އެއްޗަކާ އެއްކޮށްގެން އެ ބޭނުންކުރުމަށް ވެސް ޑައިޓީޝަނުންނާއި ނިއުޓްރިޝަނުން ލަފާދެއްވައެވެ. ހުހައި ބޭނުންކުރުމުން ހަޖަމުގެ ނިޒާމުގެ މައްސަލަތައް ދިމާވެދާނެއެވެ. އޭގެ ބަދަލުގައި ޗިއާ ސީޑްސް ފެނަށް ނުވަތަ ޕްލާންޓް-ބޭސްޑް މިލްކްގައި ފޯކުރަން އިރުގަނޑަކު ބެހެއްޓުމަށްފަހު ބުއިމާއި، ޗިއާ ސީޑް ހިމުންކޮށް ފުނޑައިގެން، ފިހެގެން ކާޒާތުގެ ކާނާގެ ތެރޭގައި ހިމަނައިގެން ބޭނުންކުރުމާއި، ސްމޫތީ ފަދަ ޖޫހާއި، ޕުޑިންގެ ތެރެއަށް އަޅައިގެން ވެސް ބޭނުންކުރެވިދާނެއެވެ. ވީހާވެސް ބޮޑަށް ފޯކޮށްގެން އެ ބޭނުންކުރުމަކީ އޭގެއިން ލިބޭ ފައިދާ އިތުރުވާނެ ކަމެކެވެ.

ޗިއާ ސީޑްސްއަކީ އޭގައި “އޮމެގާ 3” މުއްސަނދި ގޮވާމެކެވެ. އޮމެގާ 3 އަކީ އަލްފާ ލިނޮލެނިކް ނަމަކަށް ކިޔާ ފެޓީ އެސިޑެކެވެ. އެގޮތުން ޗިއާ ސީޑްސް ބޭނުންކުރާނަމަ ހިތުގެ މައްސަލަތަކުންނާއި ހަމުގެ ބަލިތަކުން ރައްކާތެރިކަން މަގުފަހި ކޮށްދޭނެއެވެ. ގަސްގަހުން ލިބޭ ކާނާގެ ތެރެއިން އެންމެ ގިނަ އަދަދަކަށް އޮމެގާ 3 ލިބޭ އެކައްޗަކީ ވެސް ޗިއާ ސީޑެވެ.

ޗިއާ ސީޑްސްގައި ފައިބަރގެ މާއްދާ ވެސް ވަރަށް ބޮޑަށް އެކުލެވިގެންވެއެވެ. އެ ގޮތުން ދެ މޭޒުމަތީ ސަމުސާ ޗިއާ ސީޑްސްގައި ގާތްގަނޑަކަށް 10 ގްރާމްގެ ޑައިޓްރީ ފައިބާ ހިމެނެއެވެ. އެއީ އާފަލަކުން ލިބޭ ފައިބާގެ ދެގުނަ މިންވަރެވެ. ފައިބާ ގިނައިން އެކުލެވޭ ކެއުންތަކުން މައިދާއާއި ހަޖަމުގެ ނިޒާމަށް ލުއި ފަސޭހަ ލިބެއެވެ. ޗިއާ ސިޑްސްގައި ފައިބާ ގިނައިން އެކުލެވޭތީ އެ ކެއުމުން ބަނޑުހައި ނުވެ ގިނައިރު ހިފަހައްޓައިދެއެވެ.

ޗިއާ ސީޑްގެ މައިގަނޑު އެއް ފައިދާއަކީ، ގްލުޓެން ފްރީ، އަދި މަޗް ބޭނުން ނުކުރާ ތަރުކާރީ ޑައިޓް ބޭނުންކުރާ މީހުންނަށް ވެސް ހަށިގަނޑަށް ބޭނުންވާ ޕްރޮޓީން ލިއްބައިދޭނެ ކާނާއަކަށް ވުމެވެ.

ސޯޔާ ބީންއާއި ކިނޯއާ ފަދަ ކެއުންތަކާ އެއްވަރަށް ޕްރޮޓީން ނުހިމެނުނަސް، މަހުގެ ބަދަލުގައި ބޭނުންކުރުމަށް ވެސް ޗިއާ ސީޑްސްއަކީ އެންމެ ރަނގަޅު ސަބްސްޓިޓިއުޓެކެވެ.

މަޢުލޫމާތު:

https://en.wikipedia.org/wiki/Chia_seed

https://health.clevelandclinic.org/benefits-of-chia-seeds

https://adhadhu.com/article/28745