ޤައުމީ ސަލާމަތް

ޤައުމީ ސަލާމަތަކީ ކޮންމެ ޤައުމެއް ވެސް މިނިވަންކަންމަތީ އަބަދަށް، ޞުލްޙަވެރިކަމާއެކު ބޭއްވުމަށްޓަކައި ހިފަހައްޓައިގެން އެއަށް ރައްކައުތެރިވާންޖެހޭ އެންމެ މުހިންމު އެއް ކަންތަކެެވެ. އެކި ޤައުމުތަކުގައި މިކަން ދެމެހެއްޓުމަށްޓަކައި މަސައްކަތް ކުރަނީ އެކި ފެންވަރުގައި އެކި ގޮތަށެވެ. މައިގަނޑު ގޮތެއްގައި ކޮންމެ ޤައުމެއްގައި ވެސް ކަނޑާއި، ވަޔާއި އަދި އެއްގަމުގެ ސިފައިން ހަރަކާތްތެރިވެއެވެ.

ޤައުމު ކިތަންމެ ބޮޑުނަމަވެސް ނުވަތަ ކިތަންމެ ކުޑަނަމަވެސް މި ކަމަކީ މުހިންމު ކަމެކެވެ. ސަބަބަކީ ޤައުމީ ސަލާމަތަކީ ޤައުމަށް ބޭރުން އަންނަ ޙަމަލާތަކުންނާއި އެހެނިހެން ވެސް ޢުދުވާންތަކުން ރައްޔިތުންނާއި ޤައުމު ސަލާމަތްކޮށްދޭ މުހިންމު ވަޞީލަތެވެ.

ޤައުމީ ސަލާމަތުގައި ވިސްނަންޖެހޭ މައިގަނޑު ތިންބައި ކަމަށްވާ ކަނޑާއި، ވަޔާއި އެއްގަމު ރަނގަޅަށް ހިމާޔަތް ކުރެވިއްޖެ ކަމަށްވަންޏާ އަޅުގަނޑުމެންގެ ޤައުމަށް ބޭރުން އަންނަހާ ޙަމަލާތަކުން ފަސޭހަކަމާއެކު ސަލާމަތްކުރެވިދާނެއެވެ. އަޅުގަނޑުމެންނަށް ފުރިހަމަ މިނިވަންކަން ލިބުމުގެ ކުރީގައި ވެސް އަދި ފަހުން ވެސް ޢުދުވާނީ ޙަމަލާތައް އަޅުގަނޑުމެންގެ މި ޤައުމަށް އަންނަމުންދެއެވެ. މިހެން ޢުދުވާންތައް އަޅުގަނޑުމެންނަށް ކުރިމަތިވި ކޮންމެ ފަހަރަކު ވެސް، އަޅުގަނޑުމެންގެ ޤައުމުގެ ސަލާމަތަށް ބަލަހައްޓަައިގެން ސަލާމަތްކުރުމަށް ތިބި ބަޔެއްގެ މުހިންމުކަން ހާމަވެގެން ދެއެވެ. އަދި އެ ބަޔެއްގެ ތެދުވެރިކަމާއި އިޚްލާޞްތެރި މަސައްކަތް މުޅި ޤައުމަށް ބޭނުންވާ ވަރު ހާމަވެގެންދެއެވެ. މިފަދަ ކަންތައްތައް ލޮލުންފެނި އިހުސާސްވާ ކޮންމެ ފަހަރަކު ވެސް ވިސްނި ހާމަވަނީ އެންމެ ކަމެކެވެ. އާދޭހެވެ! ހަމަ އެފަދަ ބައެއްގެ މުހިންމުކަމެވެ.

ސަރަހައްދީ ހަމަނުޖެހުމާއި ޤައުމުގެ އެެތެރޭގެ ކަންތައްތައް ހަމަޖެއްްސުމަށްޓަކައި އަޅުގަނޑުމެން ކުރަން ހަމަޖެހިފައިވާ މަސައްކަތުގެ އަގު ކިތަންމެހައި ވެސް ބޮޑެވެ. އެހެންކަމުން ދުލުން ބޭރުކޮށްލެވޭ ބަހަށާއި ކުރެވޭ ހަރަކާތަކަށާއި ޢަމަލުތަކަށް އަޅުގަނޑުމެން ނިކަން ފުންކޮށް ވިސްނަން ޖެހެއެވެ. އަޅުގަނޑުމެންގެ ޤައުމުގެ އާބާދީގެ ކޮންމެ ފަރުދަކީ ވެސް ޞުލްޙައަށް ލޯބިކުރާ ޤާނޫނާއި ޤަވާޢިދުތަކަށް ބޯލަނބާ ބައެއް ކަމުގައި ވެދާނެއެވެ.

އާދެ! ކޮންމެ ޤައުމެއް ބިނާ ކުރުމުގައި އެންމެ މުހިންމު ރޯލެއް އަދާކުރާ އެއް ބަޔަކީ އެ ޤައުމެއްގެ އަފުރާދުންނެވެ. އެ އަފުރާދުންނަކީ މިޒާޖު ރަނގަޅު ބައެއްނަމަ ޤައުމީ ސަލާމަތް ހިފަހައްޓައި ދެމެހެއްޓުމަށް ފަސޭހަ ވެދާނެއެވެ. އަދި ހަމަ އެހެންމެ ޤައުމުގެ އަފުރާދުންނަކީ މިޒާޖު ގޯސް ބައެއްނަމަ ޤައުމީ ސަލާމަތް ހިފަަހައްޓަން ތިބޭ ބަޔަކަށް އެކަން ދެމެހެއްޓުމަށް އުނދަގޫ ވާނެއެވެ. އެހެންކަމުން މިއިން އެނގޭ އެއްޗަކީ ޤައުމެއްގެ އަފުރާދުންގެ އަޚްލާޤާއި ސުލޫކު ރަނގަޅުވެއްޖެނަމަ، އެ ޤައުމަކަށް ކާމިޔާބު ލިބޭނެކަން އެއީ ކަށަވަރު ކަމެކެވެ. އެ ޤައުމެއްގެ ދުޝްމިނުންގެ ޢަދަދު ކިތަންމެ ގިނަވިޔަސް މެއެވެ.

ދަޢުލަތުގެ ބަޖެޓުގެ ނިޞްބަތުން ބޮޑު ބަޔަކުން އަޅުގަނޑުމެންނަށް ކުރާ ޚަރަދުގެ ޖުމްލަ ޢަދަދު، ހިސާބުކޮށްފިނަމަ އަޑުއަހާލަން ނުވަަތަ ކިޔާލަން ބޮޑުވެދާނެއެވެ. ނަމަވެސް ޤައުމީ ސަލާމަތުގެ މުހިންމުކަމާއި އޭގެ ބޭނުން ވިސްނައިފިނަމަ އެއީ އެހާ ހައިރާންވާންވީ ވަރު ކަމަކަށް ނުވާނެއެވެ. އަޅުގަނޑުމެން ސިފައިންނަކީ ޤައުމުގެ ސަލާމަތްތެރިކަން ދެމެހެއްޓުމުގެ ބުރަ މަސްޢޫލިއްޔަތު ބޮލުގައި އަޅައިގެން ތިބި، ޒިންމާދާރު ބަޔަކަށް ވީހިނދު މިކަމުގެ މުހިންމުކަމަށާއި، މިކަން ރަނގަޅަށް ރައްކާތެރި ކުރުމަށްޓަކައި، އަޅުގަނޑުމެން އެންމެން ވިސްނައި ޢަމަލުތައް ސީދާކުރަން ޖެހެއެވެ.