އަޙްމަދު ނިލާމް
އަޅުގަނޑުމެންނަކީ 12 ވަނަ ޤަރުނުން ފެށިގެން ސައްތައިން ސައްތަ މުސްލިމު ބައެއްގެ ގޮތުގައި މި ހިސާބަށް އައި ބަޔެކެވެ. ދިގުދެމިގެންވީ ސަޤާފަތެއްގައި ދެމިތިބެ ބަޔަކަށް ވެވުނުކަމީ ވަރަށް ވެސް އުފާކުރަންޖެހޭ ކަމެކެވެ. މިއަދު އަޅުގަނޑުމެން ފަޚުރުވެރި މި ވަނީ ދިގު މުއްދަތަކަށް އެއްބައެއްވަންތަކަން ދެމެހެއްޓުމުގެ ރިކޯޑެއް ލިބިފައިވާ ބަޔަކު ކަމުގައި ވީތީއެވެ. އެއް ބަހަކުން ވާހަކަދައްކާ، އަމިއްލަވަންތަ އަކުރުތަކެއް އަޅުގަނޑުމެންގެ ތެރޭގައި ފަރުމާކޮށް ލިޔެހަދާ އަދި ބޭނުންކުރުމުގެ ކުޅަދާނަކަން ލިބިފައިވާ ބަޔަކަށް ވީތީއެވެ. ތަފާތެއް ނެތް އެއްކަހަލަ މާހައުލެއްގައި ދިރިއުޅެން ލިބުމުގެ ނަޞީބުވެރި ބަޔަކަށް ވީތީއެވެ.
ކޮންމެ މުޖުތަމަޢެއްގައި ވަކި ބޭނުމަކަށް ދެ މީހަކު ނުވަތަ ގިނަ ބަޔަކު ޤަބޫލުވެ ކަމަކާ އެއްބަސްވުމުން އެއްބަޔަކަށް ވެވުނީއެވެ. މިގޮތަށް އެއް ނިޔަތެއްގައި ތަނަކަށް އެއްވުމުން ނުވަތަ ވަކިން އެކި ތަންތަނުގައި ތިބެ އެއްކަމަކަށް ހިތު ނިޔަތް ގަތް ކަމުގައި ވިޔަސް، ހަމަ އެއްބަޔަކަށް ވެވުނީއެވެ. ކަންމިހެން އޮތްއިރު ވަގުތީ ޙާލަތްތަކުގައި އެއްބައެއްވަންތަ ބަޔަކަށް ވަނީކީ ވެސް މަދު ފަހަރަކު ނޫނެވެ.
އެއްބައެއްވަންތަކަން ދެމިގެން ވަނީ ތަފާތު ވައްތަރުތަކެއްގެ ގުޅުންތަކެއްގެ މައްޗަށެވެ. އާއިލީ ގުޅުމާއި ރަޙްމަތްތެރިކަމުގެ ގުޅުމާއި އަދި މިނޫނަސް ޖަމިއްޔާއެއްގެ މެމްބަރަކަށް ވީތީ އޮންނަ ގުޅުން ފަދަ ގުޅުންތަކުގެ މައްޗަށެވެ. ކޮންމެއަކަސް މިއަށްވުރެ މަތީ ދަރަޖައެއް ލިބިފައިވާ ހަރުދަނާ ގުޅުމެއްގެ މައްޗަށް ބިނާވެފައިވާ، މުޅި ޤައުމަށް އޮތް ގުޅުމެއް ކަމުގައި އެއްބައެއްވަންތަކަމުގެ ގުޅުން ވާންޖެހެއެވެ. އެއީ މިފަދަ ދެވަނައެއް ނެތް ވެށްޓަކަށް އަޅުގަނޑުމެންގެ މި ރާއްޖެ ވީތީއެވެ.
މިކަން ދެމެހެއްޓުމަށް ބޭނުންވަނީ ކޮން ކަމެއްތޯއެވެ؟ އަނެކާގެ ނުވަތަ ބައެއްގެ އިޙުސާސްތައް ދެނެގަތުމެވެ. ހަމައެހެންމެ އެއްބައެއްގެ ކަންތައްތައް އަނެއްބަޔަކު ބަލައިގަތުމެވެ. އެކަކު އަނެކާއަށް އަޅާލާ ގޮތަށް އެއްބަޔަކު އަނެއްބަޔަކާ އަޅާލެވިގެންނެވެ. ހަމްދަރުދީގެ ނަޒަރަކުން ބެލިގެންނެވެ. ކަންކަމުގައި މަޝްވަރާކުރެވި ޚިޔާލު ބަދަލު ކުރެވިގެންނެވެ. އެއްބަޔަކު އަނެއްބަޔަކާ ޙަމްދަރުދީއާއި ކުލުނު ބޭއްވިގެންނެވެ. އެއް ވިސްނުމަކަށް އާދެވިގެންނެވެ. ފަޚުރުވެރިވާ ކަންތައްތަކެއް ތާރީޚްގައި ހިނގާފައިވާތީ އެ ފަޚުރުވެރިކަން ދަމަހައްޓަން ވެސް އެނގިގެންނެވެ. އަދި މަސައްކަތްތަކެއް ކުރެވިގެންނެވެ.
މިފަދަ ގުޅުންތައް ރޫޅިގެންދާ ކަންކަމަށް ބަލާލާއިރު ފެންނަނީ މުޅިން ވެސް އަމިއްލަ އެދުންތައް ގިނަވުމާއި، ރުޅިވެރިކަން އަދި ދެކޮޅުވެރިކަން ދެމެހެއްޓުމާއި، އެކަހެރިވުމާއި މިފަދަ ކަންތައްތަކެވެ. އިންޞާފު ކުޑަވުމާއި ހަމަޖެހިފައިވާ އުޞޫލުތަކުން ދެވިފައިވާ ދަރަޖަތަކަށް، ހަމަހަމަކަމުގެ އިންތަކުން ބޭރުވެ ކަންކަން ދިޔުމުގެ ސަަބަބުންނެވެ. މިއިން ކޮންމެ ސިފައަކީ ވެސް އަޅުގަނޑުމެންގެ ދީން އެ ކަމަކަށް ތާއީދު ނެތް ކަންކަމެވެ. ކޮންމެއަކަސް މިއީ ދުނިޔެވީ ކަންތައްތަކަކަށް ހެއްލުމުން ނިކުންނަ ނަތީޖާއެއްގެ ރަހަތައް ކަމުގައި ނޫނީ ނުވާނެއެވެ.
އަބަަދުވެސް ރަނގަޅު މާހައުލެއް ބިނާވެފައިވާ ތަންތަނުން ފެންނާނީ އެއްބައެއްވަންތަކަމުގެ ނިޝާންތަކެވެ. ޤައުމީ ދިދަތަކާއި އަދި ވަޠަނީ ބަސްތަކުން ފަވާލެވިފައި ފޮތިތައް ހުންނަ ތަނެވެ. އެކި މުނާޞަބާތަކުގައި އަޅާ ސަގާފީ ހެދުންތަކާއި ގެންގުޅޭ އާދަކާދަތަކާއި އަދި އެންމެން ތަބާވާ އުޞޫލުތަކުން ފުރިގެންވާ ތަނެވެ. އަދި އެކި ދަރަޖައިގެ ޚިދުމަތްތެރިން ވެސް އިޚްލާޞްތެރިކަންމަތީ ރައްޔިތުންގެ ޚިދުމަތްތެރީންގެ ގޮތުގައި ދެމިތިބޭ ތަނެވެ. އެ ތަނެއްގެ އަހުލުވެރިން ފަޚުރުވެރިކަންމަތީ އުފަލުގައި ދިރިތިބޭ ތަނެވެ.
ކޮންމެއަކަސް މިފަދަ ބޭނުންތެރިކަމެއް އަޅުގަނޑުމެންގެ ތެރޭގައި ދެމެހެއްޓުމަށް ބޭނުންވާ ރަނގަޅު ވެއްޓެއް އެބައޮތް ކަމުގައި ދެކެމެވެ. މީގެކުރިން ވެސް ދިވެހީންގެ ތާރީޚުގައި ވާފަދައިން، އެއްބައިވަންތަކަން ނަގާލާފައިވާ ކޮންމެ ފަހަރަކު އެކަން އަނބުރާ ގެނައުމަށް މަސައްކަތްކޮށްފައިވަނީ އަދި އެކަން ކާމިޔާބުކޮށްފައިވަނީ ވަރަށް ފުރިހަމަ އެއްބައިވަންތަ ކަމަކާ އެކުގައިކަން މި ފުރުޞަތުގައި ފާހަގަ ކުރަމެވެ.
