ހިތްހެޔޮކަން

މި ދުނިޔެއަކީ ކިހައި ދުވަހަކު ދިރިއުޅެން ލިބިފައިވާ ތަނެއް ކަމެއް އެކަކަށް ވެސް ނޭނގެއެވެ. އެތައް ކަމެއް ރާވައި އެތައް އުއްމީދެއް ކޮށްގެން ހުއްޓައި މިއަދު ވެސް މިރޭ ވެސް މާދަމާ ވެސް މަރުވެދާނެއެވެ. މަރުވުމުން މި ދުނިޔެއާ ވަކިވީއެވެ. އާޚިރަތުގެ ޙަޔާތުގެ ދުވަސްތައް ފެށުނީއެވެ.

އެހެންވީމާ ދުނިޔޭގައި އުޅެން ލިބިފައިމިވާ ހިނދުކޮޅުގައި ތިމާގެ ނަފުސާ މެދު ތިމާގެ ޢާއިލާއާ މެދު ތިމާގެ އެކުވެރިންނާ މެދު ތިމާގެ އަވަށްޓެރިންނާ މެދު ހިތްހެޔޮކަން ބާއްވާށެވެ.

ހިތްހެޔޮކަމަކީ ލޯބިވާކަމުގެ ސިފައެކެވެ. ތިމާގެ ހިތް ސާފުކަމުގެ ހެއްކެކެވެ. ތިމާގެ އެތެރެހަށީގެ ހަސަދައެއް ނަފުރަތެއް ރުޅިވެރިކަމެއް ނެތްކަމުގެ ހެއްކެކެވެ. އިސްލާމް ދީނުގައި އެކަކު އަނެކަކާ ބައްދަލުވުމުން އައްސަލާމް ޢަލައިކުމް ބުނެލަނީ އަމާންކަމާއި ހަމަޖެހުން ޙަޤީޤަތުގައި ވެސް އޮތްކަން ބުނެލަދިނުމަށެވެ. ހިތްހެޔޮކަމަކީ އެހެން މީހުންނަށް އިޙްތިރާމްކުރާކަމުގެ ނިޝާނެކެވެ.

ކިތަންމެ އަވަދިނެތި އުޅުނަސް މީހުންނާ ބައްދަލުވާ ހިނދު ހިނިތުންވެލާށެވެ. ކިހިނެއްތޯ އަހައިލާށެވެ. ވަގުތު އޮތްނަމަ ޢާއިލާގެ ޙާލުއަހުވާލު ސާފުކޮށްލާށެވެ. ދުނިޔެއަކީ އެވަރަކުން ދެކޮޅުވެރިކަން ބާއްވަން ޖެހޭ ތަނެއް ނޫނެވެ. ހިތްހެޔޮކަމުން ތިމާގެ ނަފުސު ލުއިކޮށްލަދެއެވެ.

ޤައުމެއްގެ ސިފައިންނާއި ފުލުހުންނަކީ ރައްޔިތުންގެ ސަލާމަތާއި ރައްކައުތެރިކަން ކަށަވަރުކޮށްދިނުމަށް ތިބޭ ބައެކެވެ. މީހުންގެ ގެދޮރާއި މުދައު ރައްކައުތެރިކޮށްދޭން ތިބޭ ބައެކެވެ. ގިނަފަހަރަށް ބައެއް މީހުންނަށް އެ ކަން އިޙުސާސް ކުރެވޭހެނެއް ހިޔެއްނުވެއެވެ. ބައެއް މީހުން ފޫހިވާ ބަޔަކަށް ސިފައިންނާއި ފުލުހުންވެއެވެ. އެއީ ހަމައެކަނި ދިވެހީންގެ ތެރޭގައި އޮންނަ ކަމެއް ނޫނެވެ. ގިނަ ޤައުމުތަކުގައި ވެސް އެކަން އޮންނަނީ އެހެންނެވެ. އެހެންވީމާ ތިމާގެ ޖަޒުބާތަށް ދޫނުކޮށްލައި ކޮންމެ ޙާލަތެއްގައި ވެސް އެހެން މީހުންނަށް ހިތް ހެޔޮކަން ބޭއްވުމަކީ ކުރަންޖެހޭ ކަމެކެވެ. އެހެން މީހުންނަށް ޤަދަރުނުކޮށް އެހެން މީހުންނަށް އިޙްތިރާމްނުކޮށް ތިމާއަށް ޙައްޤުވެގެންވާ ޤަދަރާއި އިޙްތިރާމެއް ނުލިބޭނެއެވެ. އެއީ އިންސާނީ ތަބީޢަތެވެ.

މާތްﷲ ގެ ހެޔޮރަޙުމަތާއި އޯގާވަންތަވެރިކަން އަބަދުވެސް ވާކަން ހަނދާން ބަހައްޓާނަމަ، ތިމާގެ ނަފުސަށާއި ތިމާގެ ޢާއިލާއަށާއި ތިމާގެ އަވަށްޓެރިންނަށް ހިތްހެޔޮކަން ބާއްވާނެއެވެ. ދުނިޔެއާމެދު ހިތްހެޔޮކަން ބާއްވާނެއެވެ. އޭރުން ތިމާވެށްޓަށް ގެއްލުންދިނުމަށް ހިތެއް ނުރުހޭނެއެވެ.

އަމިއްލަ ނަފުސު ސީދާކޮށް ބެހެއްޓުމަކީ ތިމާގައި ހިތްހެޔޮކަން އަށަގަންނާނޭ ކަމަކެވެ. ނުބައި އާދަތަކުން ދުރުހެލިވެ މާގިނައިން ނުނިދައި މާގިނައިން ނުކައި މަސްތުވާ ތަކެއްޗާ ދުރުހެލިވުމަކީ ނަފުސާމެދު އޮތް ހިތްހެޔޮކަން އަންގައިދޭ ކަންތައްތަކެވެ. ލިބޭ މިންވަރަކުން ފުއްދައިގެން އުޅެން ދަސްކުރާށެވެ. އެހެންނޫނީ ޙައްޤުގޮތް ނޫން ގޮތްގޮތުން ވެސް އެއްޗެއްސަށް ދަހިވެތިވުން ނުހުއްޓުވޭނެއެވެ. މާތްﷲ އަށް އަބަދުވެސް ކިޔަމަންތެރިވާށެވެ. ތިމާކުރާ ޢަމަލުތައް މަލާއިކަތުން ލިޔުއްވާކަން ދަންނަނަމަ ތެދުމަގުގައި ހުރުމަށް ބާރަކަށްވާނެއެވެ. ނަމާދަށް ފަރުވާކުޑަނުކުރުމަކީ ދިރިއުޅުމުގެ ބިންގާކަމުގައި ހަދާށެވެ. އެހެން ހަދައިފިނަމަ ފައިތިލަ ސާބިތުވެ ނުބައި މަގަކުން ނުގޮސް، ޝައިޠާނާއަށް ނުހެއްލި ދިރިއުޅެވިދާނެއެވެ.

ހިތްހެޔޮކަމަކީ ވާރުތަކުރުވާ ކަމަކަށް ހަދާށެވެ. ރުޅިވެރިކަމާއި ނަފުރަތުން އެހެން މީހުންނަށް ނުބައި އަސަރުތައް ފޯރާނަމަ ހިތްހެޔޮކަމާއި އޯގާތެރިކަމުން އެހެން މީހުންނަށް ރަނގަޅު އަސަރުކުރާނެއެވެ. ރަނގަޅު ރޫޙެއް އުފައްދާނެއެވެ. އަބަދުވެސް މަޑުމައިތިރިކަމާއި އޯގާތެރިކަމާ އެކު  ވާހަކަދައްކައި ހަދާށެވެ. އެއީ އޭނާގެ މިޒާޖޭ ބުނެ ދޫކޮށްލުމަށްވުރެ އެ މިޒާޖު އާލާވިޔަ ނުދޭން ބާރުއަޅާށެވެ. އެއީ ތަބީޢީ ގޮތުން ހަރުލައްވާ ކަމަކަށް ހަދާށެވެ.

ރަނގަޅު ވެރީން ރަނގަޅު ވެރީންނަށް ވެފައިވަނީ މަސައްކަތަށް ފަރުވާތެރިވާތީ އެކަންޏެއް ނޫނެވެ. އިންސާނުންނަކީ އިންސާނުންކަން ދަނެގެންވެސްމެއެވެ. އެފަދަ ވެރީންދެކެ މުއައްޒަފުން ލޯބިވަނީ މުއައްޒަފުންދެކެ އެ ވެރީންވެސް ލޯބިވާތީއެވެ. ހިތްހެޔޮކަމުންނެވެ. އެހެން މީހުންގެ އިޙުސާސަތައް ދަންނަ އެހެން މީހުންނަށް ކަމޭހިތާ ހިތްހެޔޮ މީހުނަށް ވާތީއެވެ. ދުނިޔެ އުފައުވެރި ތަނަކަށް ހަދާނީ ތިމާގެ އަމިއްލަ މަސައްކަތުންނެވެ. ދުނިޔެއަކީ ވޭންހުރި ތަނަކަށް ހަދަނީ ވެސް ހަމަ ތިމާގެ ޢަމަލުތަކުންނެވެ. އޯގާތެރިވާށެވެ. ލޯބިވާށެވެ. ހިތްހެޔޮކަން ބާއްވާށެވެ. އެފަދަ ދިރިއުޅުމެއް ޚިޔާރުކޮށްފިނަމަ މަރާ ކުރިމަތިލާނީވެސް ހިތްހަމަޖެހުމާ އެކުގައެވެ.