އިސްމާޢީލް އާތިފް އަޙްމަދު
ދުނިޔޭގެ ރެކޯޑު ފޮތުން ޖާގަ ހޯދާފައިވާ “ބަމްބަލް ބީ” އަކީ ދުނިޔޭގައި މިހާތަނަށް އުފެއްދި އެންމެ ކުޑަ މަތިންދާބޯޓެވެ. 1988 ވަނަ އަހަރު ރެކޯޑް ފޮތުން ޖާގަ ހޯދި އެ މަތިންދާބޯޓު އުފެއްދި ބާނީއަކީ، ރޮބަޓް ސްޓަރއެވެ. އޭނާ ވަނީ، ދުނިޔޭގެ ރެކޯޑް ފޮތުން “ބަމްބަލް ބީ” އަށް ޖާގަ ލިބުމުގެ ކުރިން އެފަދަ ކުޑަ މަތިންދާބޯޓްތަކެއް “ބޭބީ ބާޑް” ގެ ނަމުގައި އުފެއްދުމަށް 1949 ވަނަ އަހަރުގެ ފަހުން ދެ ފަހަރެއްގެ މަތިން ކުރި މަސައްކަތްތަކުގައި ވެސް ޢަމަލީ ގޮތުން ބައިވެރިވެފައެވެ. ނަމަވެސް އެކަމުގެ އެއްވެސް ކްރެޑިޓެއް “ބޭބީ ބާޑް” އުފެއްދި ކުންފުނި “ޑޯނާލްޑް ސްޓިސްޓް” އިން ރޮބަޓް ސްޓަރއަށް ދީފައެއް ނުވެއެވެ. އަދި “ބޭބީ ބާޑް” އުފައްދަން ރޮބަޓް ސްޓަރ ކުރި އެއްވެސް މަސައްކަތެއްގެ އަގުވަޒަން ނުކުރުމުން އެކަމާ ރޮބަޓް ސްޓަރ ވަރަށް ހިތްހަމަނުޖެހުނު ކަމަށް ވެއެވެ.
“ޑޯނާލްޑް ސްޓިސްޓް” ކުންފުނިން ރޮބަޓް ސްޓަރ ކުރި މަސައްކަތްތަކުގެ އަގުވަޒަން ނުކުރުމުގެ ނަތީޖާއަކަށްވީ، އަމިއްލަ މަސައްކަތުން ދުނިޔޭގެ ރެކޯޑު ފޮތުން ޖާގަ ހޯދޭނެވަރުގެ ކުޑަ މަތިންދާބޯޓެއް އުފެއްދުމަށް 1979 ވަނަ އަހަރަށް ފަހު ރޮބަޓް ސްޓަރ މަސައްކަތް ފެށުމެވެ. އެގޮތުން ރޮބަޓް ސްޓަރ، އަމިއްލަ ސިކުނޑީގައި ކުރަހާލި ތަސްވީރުގައި ކުލަޖައްސައި، ޙަޤީޤަތަކަށް ހެދުމަށް ފަސް އަހަރު ދުވަސް ވާންދެން ވަރަށް ބުރަ މަސައްކަތްތަކެއް ކުރިއެވެ. އެ ކުރެވުނު މަސައްކަތުން ފުރަތަމަ ފަހަރަށް “ބަމްބަލް ބީ” އުފައްދައި، އެ މަތިންދާބޯޓު އުދުއްސާލެވުނީ 1984 ވަނަ އަހަރުގެ ޖަނަވަރީ 28 ވަނަ ދުވަހު، އެމެރިކާގެ އެރިޒޯނާގައެވެ. ރޮބަޓް ސްޓަރގެ މި ކާމިޔާބު މަސައްކަތާ އެކު، “ބަމްބަލް ބީ” ވެގެން ދިޔައީ ދުނިޔޭގެ ތާރީޚުގައި އުފެއްދި އެންމެ ކުޑަ މަތިންދާބޯޓަށެވެ.
އޭގެ ފަހުން ރޮބަޓް ސްޓަރގެ ކުރީގެ އެކުވެރިއެއް ވަނީ “ބަމްބަލް ބީ” އަށް ވުރެ ކުޑަ މަތިންދާބޯޓެއް އުފައްދައި “ބަމްބަލް ބީ” ގެ ރެކޯޑް މުގުރާލާފައެވެ. ނަމަވެސް އެ ރެކޯޑު މާގިނަ ދުވަހެއް ވަންދެން ދެމިނުއޮތެވެ. ސަބަބަކަށްވީ އެ މަތިންދާބޯޓު ދުއްވުމުގެ ތެރޭގައި ވެއްޓި އެއްކޮށް ހަލާކުވުމާ ގުޅިގެންނެވެ.
ރޮބަޓް ސްޓަރ ވަނީ އޭނާގެ ކާމިޔާބީ މަސައްކަތް އިތުރަށް ފުޅާކުރުމުގެ ގޮތުން، “ބަމްބަލް ބީ 2” ގެ ނަމުގައި 1988 ވަނަ އަހަރު މަތިންދާބޯޓެއް ވުޖޫދަށް ގެނެސް، އޭނާގެ އަތުގައި ކުރިން އޮތް ރިކޯޑް އައުކޮށްފައެވެ. އަދި އެންމެ ފުރަތަމަ ރޮބަޓް ސްޓަރ އުފެއްދި “ބަމްބަލް ބީ” ވަނީ، 1990 ވަނަ އަހަރު މިޔުޒިއަމްއަކަށް ހަދިޔާ ކޮށްފައެވެ. އެ މަތިންދާބޯޓު އޮތީ، ޕިމާ އެއާރ އެންޑް ސްޕޭސް މިއުޒިއަމްގައެވެ.
“ބަމްބަލް ބީ” އަކީ 9 ފޫޓް 4 އިންޗި ދިގުމިން ހުންނަ އަދި އުސްމިނުގައި 4 ފޫޓް 1 އިންޗި ހުންނަ އުޅަނދެކެވެ. އަދި “ބަމްބަލް ބީ” ގެ ފިޔައިގެ ދިގުމިނުގައި 6 ފޫޓް 6 އިންޗި ހުރެއެވެ. ބަރުދަނުގައި 328 ކިލޯ ހުންނައިރު، “ބަމްބަލް ބީ” އަކީ ގަޑިއަކު 180 މޭލު ބާރުމިނުގައި ދަތުރުކުރުމުގެ ޤާބިލުކަން ލިބިފައިވާ މަތިންދާބޯޓެކެވެ. އަދި އެ މަތިންދާބޯޓަކީ، ބިމުގެ ފަށަލައިން 3000 ފޫޓް އުސްމިނުގައި ދުއްވޭ އަދި 20 މޭލު ގެ ދުރު ރާސްތާއެއް ކަނޑައްތުކުރުމުގެ ޤާބިލުކަން ލިބިފައިވާ އުޅަނދެކެވެ. “ބަމްބަލް ބީ” ގައި ދަތުރުކުރެވޭނީ ހަމައެންމެ މީހަކަށެވެ.
