މަޑުލު މުޙައްމަދު ވަޙީދު
ދިވެހިރާއްޖޭގެ ސިފައިންގެ ދުވަހަކީ އޭޕްރިލް މަހުގެ 21 ވަނަ ދުވަހެވެ. ދުވަހުގެ ހެޔޮއެދުމާއި ތަހުނިޔާ ސިފައިންގެ ވެރީންނަށާއި އޮފިސަރުންނަށާއި އެކި ދަރަޖަތަކުގެ މަޤާމުތަކުގައި ތިއްބެވި ބޭފުޅުންނަށާއި ޢާންމުކޮށް ހުރިހާ ސިފައިންނަށް ރައްދުކުރަމެވެ.
ދުނިޔޭގެ ފެންވަރުގައި ވެސް ރާއްޖޭގެ ފެންވަރުގައި ވެސް ފާހަގަކުރާ ދުވަސްތަކެއް ހުރެއެވެ. ޝަހީދުންގެ ދުވަހެވެ. ޤައުމީ ދުވަހެވެ. އަންހެނުންގެ ދުވަހެވެ. މާދަރީބަހުގެ ދުވަހެވެ. މަސްވެރީންގެ ދުވަހެވެ. ހަމައެންމެ ސިފައިންގެ ދުވަހެވެ.
އަޅުގަނޑުގެ ސުވާލަކީ، މި ފަދަ ދުވަސްދުވަސް ފާހަގަކުރުމުގެ ބޭނުމަކީ ކޮބައި ބާވައެވެ؟ ދުވަހެއް ފާހަގަކުރުމުން އަރާކުރިއެރުމަކީ ކޮބައި ބާވައެވެ؟
އަޅުގަނޑު ހިތުން، ބޭނުމަކީ އަދި މަޤްޞަދަކީ، އޯޑިޓްކޮށްލުމެވެ. މި ދެންނެވީ ކޮން ދިމާއަކަށްތޯ ބަލައިލާނަމެވެ. މި ކުރެވެނީ ކީއްތޯއާ މެދު ވިސްނައިލުމެވެ. މަޤްޞަދު ހާސިލުވޭތޯ ވަޒަންކުރުމެވެ. ރައްޔިތުން ދެކެނީ ކޮން ގޮތަކަށްތޯ އަހައިލުމެވެ. ރަނގަޅު ކުރާންވީ ކޮންކޮން ކަންތައްތަކެއްތޯ ދެނެގަތުމެވެ. ރަނގަޅުކުރާންވީ ކަންތައްތައް ރަނގަޅުކުރުމަށް ރާވައިލައިގެން އެ ކަންކަން ކުރުމެވެ.
އަޅުގަނޑަކީ ފަހަރުގައި ވެސް އެކިއެކި ދުވަސް ފާހަގަކުރުމާ ދެކޮޅު މީހަކީމެއް ނޫނެވެ. އެހެންނަމަވެސް އެ ދުވަހެއް ފާހަގަކޮށްލައި ޚަބަރެއް ކިޔާލުމުން ފުދުނީކަމަށް ދުށުމަކީ އަޅުގަނޑަށް ކަމުދާ ކަމަކަށް ނުވެއެވެ.
އެ ދުވަހެއް ފާހަގަކުރުމާ ގުޅިގެން އަންނަ ބަދަލެއް، އަންނަ ތަރައްޤީއެއް ނުފެންނަ ނަމަ، އެއީ ނަމަކަށް ކޮށްލާ ކަމެއްކަމުގައި ހެދުން އަޅުގަނޑަށް ހަމަ ކަމުނުދަނީއެވެ.
ތެދުފުޅެކެވެ. އެ ދުވަހަކާ މެދު ހަނދާންތަކެއް އައުކޮށްދެއެވެ. އެ ދުވަހުގެ ބޭނުމާމެދު ފިކުރުކޮށްލެވެއެވެ.
އަޅުގަނޑު ވާހަކަ މި ދައްކަނީ، ސިފައިންގެ އަހަރީ ދުވަހާ ބެހޭގޮތުންނެވެ. ސިފައިންގެ މީހެކޭ ބުނުމުން ހިތުގައި ހަރުދަނާކަމުގެ އިޙްސާސެއް ކުރެވެއެވެ. ސުމާޓުކޮށް ހެދުން އަޅައި، ބޫޓު ވެސް ޕޮލިޝްކޮށް ބަކަލްތައް އޮފުއަރުވާފައިވާ މީހެއްގެ ތަޞައްވުރު ހިތަށް ވަދެއެވެ. މީހުންނަށް އިޙްތިރާމްކޮށް ޤަދަރުކުރާ މީހެއްކަން ވިސްނެއެވެ. ސުމާޓުކޮށް ހުންނަ، ދީނަށް ކަމޭހިތާ، ބަރާބަރަށް ނަމާދުކުރާ މީހެއްގެ ސިފަ ހިތަށް ގެނެވެއެވެ.
އާދޭހެވެ. ފާހަގަކުރާ ދުވަސްދުވަސް އެހައި ކަންފަސޭހަކޮށް ފާހަގަކުރުމުގެ ބަދަލުގައި ކުރާ އޯޑިޓެއްގެ ގޮތުގައި ބަލަމާ ހިނގާށެވެ. ވާޖިބުތަކާއި މަސްޢޫލިއްޔަތު ފުރިހަމައަށް އަދާކުރުމަށް ބާރު އަޅަމާ ހިނގާށެވެ. މިވެނިކަމެއް ކުރަން އެވެނިކަމެއް ނުކުރަން އަޒުމު ކަނޑައަޅަމާ ހިނގާށެވެ. ބޭނުންކުރާ ބަހުރުވަ މާތްކުރުމަށާއި، މީހުންނާ ކުރާ މުޢާމަލާތު ރަނގަޅުކުރަން ވިސްނަމާ ހިނގާށެވެ. އެހީތެރިކަން ބޭނުންވެފައިވާ ފަރާތްތަކަށް އެހީތެރިވުމުގައި އިސްނަގާ މީހަކަށް ވަމާ ހިނގާށެވެ. ސިފައިންގެ ތަމްރީނާއި ތަރުބިއްޔަތުގެ އަސަރުތައް އެ މީހުންގެ ޢާއިލާއިން ވެސް ދައްކުވައިދޭ ގޮތަކަށް ކަންތައްތައް ކުރަމާ ހިނގާށެވެ.
