ހަނާ މުޙައްމަދު
ކޮންމެ ފަރުދަކު ސިފައިންގެ މީހަކާ ތަފާތު ވަނީ އެ މީހާއަށް ދެވޭ ޓްރެއިނިންގއާ ލައިދެވޭ ޢިލްމުގެ ތެރެއިން އޭނާގެ ވިސްނުމަށާއި ފިކުރަށް އަންނަ ނުވަތަ ގެނުވާ ބަދަލުތަކެއްގެ ސަބަބުންނެވެ. އެހެން ގޮތަކަށް ދަންނަވާނަމަ ސިފައިންގެ މީހެއްނަމަ އޭނާގެ ކިބައިގައި ޚާއްޞަ ހުނަރުތަކަކާއި ސިފަތަކެއް ހުންނަންޖެހެއެވެ.
ސިފައިންގެ ތަމްރީނުތަކަކީ ވެސް އެކަމަށް އެކަށޭނަ މާހައުލަކާއި، އާލާތްތައް ފުރިހަމަނުވެ އެންމެ ރަނގަޅަށް ކުރެވޭނެ ކަމެއް ނޫނެވެ. ސިފައިން ތަމްރީނު ކުރުމުގައި ހުރި ދަތިކަން އިހުސާސް ކުރެވޭނީ މި ދާއިރާގައި މަސައްކަތްކުރާ މީހުންނަށެވެ. އެކަމަޑޭޝަންއާއި، ކްލާސްރޫމްތަކާއި، ޕީޓީ ބެލްޓާއި، މެސްރޫމްއާ މިހެންގޮސް ހުރިހާ އިންފްރާސްޓްރަކްޗަރއަކީ އަބަދުވެސް ހެޔޮބަދަލަކަށް އެދިއެދި ތިބޭ ތަންތަނެވެ. ބައެއް ހާލަތްތަކުގައި ޓްރެއިނިންގއެއް ނިންމާލެވޭއިރު އޮންނަނީ، ރާއްޖޭގެ ހުރިހާ އޭރިއާއަކަށް ދަތުރު ކުރެވިފައެވެ. މިކަމުގެ ސަބަބުން ޓްރެއިނިންގއިން އެތައް ވަގުތެއް ގެއްލިގެންދިޔުން އެއްކިބައިގައި އޮއްވާ މިއީ ފިސާރި ޚަރަދު ވެސް ބޮޑު ކަމެކެވެ. އެހެންނަމަވެސް ރަނގަޅު ޓްރެއިނިންގ ބެޗެއް ހިންގަން ބޭނުންވެއްޖެނަމަ، އެ ޓްރެއިނިންގއަކާ އެންމެ އެކަށޭނަ މާހައުލަކާއި ތަކެތި ލިބެންހުރި ތަނަކަށް ދާންޖެހެއެވެ.
އިންޑިއާ ސަރުކާރުގެ ހިލޭ އެހީގެ ދަށުން ޅ.މާފިލާފުށީގައި ތަރައްޤީ ކުރެވެމުންދާ އެމްއެންޑީއެފްގެ ކޮމްޕޮސިޓް ޓްރެއިނިންގ ސެންޓަރަކީ އެތައް ބަޔަކު ދެކެމުން އައި ހުވަފެނެކެވެ. މި ސެންޓަރުގެ ފޭސް 1 އަދި ފޭސް 1 އަށް އިތުރުކުރި އެނެކްސް ނިމުނުއިރު އެއްފަހަރާ 400 މީހުން ތަމްރީނު ކުރެވޭވަރުގެ ޤާބިލުކަން މިހާރު ވެސް މި ސެންޓަރަށް ވަނީ ލިބިފައެވެ. ކޮމްޕޮސިޓް ޓްރެއިނިންގ ސެންޓަރ ފުރިހަމަވެ ނިމުމުން، ތަމްރީނުގެ ދާއިރާއަށް ހީނުކުރާވަރުގެ ހެޔޮ ބަދަލެއް އަންނާނެއެވެ. އަދި ހަމައެޔާއެކު މިހާރު ޓްރެއިނިންގތަކަށް ކުރާ ޚަރަދު ބޮޑުތަނުން ލުއިވެގެން ދާނެއެވެ.
މިހާރު އަޅުގަނޑުމެންގެ ތަމްރީނުތައް ހިންގަމުން މިދަނީ ލ.ކައްދޫގަޔާއި އައްޑޫސިޓީ ގަމުގަޔާއި އަދި ޅ.މާފިލާފުށީގައެވެ. މިއިން ކޮންމެ ތަނަކަށް އިންފްރާސްޓްރަކްޗަރ ބޭނުންވެއެވެ. ލިބިފައިވާ މަދު ވަސީލަތްތަކުން ބައިއަޅަން ޖެހެއެވެ. އަދި އެޔަށްވުރެ ވެސް ބޮޑު ބުރައަކަށް ވަނީ، މީހުން މަދުކަމުގެ ޝަކުވާ ކޮށްކޮށް ތިއްބައި، ކޮންމެ ތަމްރީނަކަށް ޔުނިޓުތަކުން މުދައްރިބުން ނަގަންޖެހޭ ޖެހުމެވެ. ކޮމްޕޮސިޓް ޓްރެއިނިނގ ސެންޓަރ ފުރިހަމަވެ ނިމޭއިރު ކޯސްޓްގާޑު ބޭސިކް ސްކޫލާއި މެރިން ކޯރ ބޭސިކް ސްކޫލާއި އަދި ދަ ބޭސިކް ސްކޫލު، ފުރިހަމަ އިންފްރާސްޓްރަކްޗަރާއެކު ހިންގަމުންދާނީ މި ސެންޓަރުގައެވެ. ލިބިފައިވާ ވަސީލަތްތައް ވެގެންދާނީ އެންމެންނަށް ބޭނުންކުރެވޭނެ އެއްޗިއްސާއި ތަންތަން ކަމުގައެވެ. އަދި ހަމަ އެއާއެކު ތަމްރީނު ހިންގާ ކޮންމެ ރަށަކަށް އިންސްޓްރަކްޓަރުންގެ ސެޓެއް ނެގުމުގެ ބަދަލުގައި ގުޅިގެން ތަމްރީނުތައް ހިންގުމަށް މަގުފަހިވެގެންދާނެއެވެ. ތަމްރީނުތައް ހިންގޭ ރަށްތަކަށް ލޮޖިސްޓިކް ފޯރުކޮށްދިނުމަށްޓަކައި ކުރަންޖެހޭ ދަތުރުތައް މަދުވެ، މިހާރަށްވުރެ ވަރަށް ބޮޑުތަން ޚަރަދު ކުޑަވެގެންދާނެއެވެ. މިއަށްވުރެ ވެސް ބޮޑު ހިތްހަމަ ޖެހުމަކަށްވާނީ ހުއްޓުމެއްނެތި، ހަމަޖެހިލައިގެންތިބެ މީހުން ތަމްރީނު ކުރެވޭނެ ފުރިހަމަ މާހައުލެއް ލިބިގެން ދިޔުމެވެ. އެމްއެންޑީއެފް ކޮމްޕޮސިޓް ޓްރެއިނިންގ ސެންޓަރ މިއީ މުޅި މުއައްސަސާއަށް ލިބިގެންދާނެ އަގުނުކުރެވޭފަދަ ބޮޑު ކުރިއެރުމަކަށް ވެގެންދާނެކަން ޔަޤީނެވެ.
