އަޙްމަދު ވިޝާން
“80 އިންސައްތަ ނަތީޖާ ނެރުމަށް ޓަކައި ބޭނުންވަނީ 20 އިންސައްތަ މަސައްކަތެވެ.” މިއީ ވިލްފްރެޑޯ ޕަރޭޓޯގެ “80/20 ރޫލް” ނޫންނަމަ “ޕަރޭޓޯ ޕްރިންސިޕަލް” އެވެ.
ވިލްފްރެޑޯ ޕަރޭޓޯއަކީ، 1848 ވަނަ އަހަރު ދުނިޔެއަށް އުފަންވި ކުޅަދާނަ އިކޮނޮމިސްޓެއްގެ އިތުރުން ފިލޯސަފަރެކެވެ. މި ޕްރިންސިޕަލްގެ އަސްލު ގުޅިފައި އޮތީ ޕަރޭޓޯގެ ބަގީޗާގައި ހެދިފައިވާ ގަސްތަކަކާއެވެ. މުޅި ބަގީޗާގައި ހެދިފައިވާ 80 އިންސައްތަ ފީސް ފޮޑްސް ހެދުމަށް މެދުވެރިވީ އެންމެ 20 އިންސައްތަ ގަސްކޮޅުތަކެކެވެ. މީގެ ދެވަނަ މިސާލެއް އޭނާއަށް ފެނިގެންދިޔައީ އިޓަލީވިލާތުގެ މުއްސަނދިކަން ބެހިފައިވާ ގޮތް ފެނުމުންނެވެ. މުޅި އިޓަލީވިލާތުގެ މުއްސަނދިކަމުގެ 80 އިންސައްތަ ޙައްޤުވެރިންނަކީ އެންމެ 20 އިންސައްތަ މީހުންނެވެ. އަދި ހަމައެއާއެކު އިޓަލީވިލާތުގެ އުފެއްދުންތެރިކަމުގެ ސިނާއަތުގެ ބޮޑު ބައެއް ނިސްބަތް ވަނީ މަދު ކުންފުނިތަކަކަށެވެ.
ޕަރޭޓޯގެ ޕްރިންސިޕަލްގައި ބުނެފައިވާ ގޮތުން، ކަމެއްކުރުމަށް ބޭނުންވާ “އިންޕުޓް” އަދި އޭގެ ސަބަބުން ނުކުންނަ “އައުޓްޕުޓް” ހަމަހަމައެއް ނޫނެވެ.
މި ޙަޤީޤަތް އިތުރަށް ބަލައިލަމާތޯއެވެ. ފޯނު ކުންފުންޏެއްގެ ސޭލް އިތުރުވުމުގެ ފަހަތުގައި ތިބެނީ ހީވާގިކަމާއެކު މަސައްކަތްކުރާ 20 އިންސައްތަ ސޭލްސް ރެޕުންނެވެ. އެންމެންނެއް ނޫނެވެ. ނިކަން ޓެކްނޮލޮޖީއާ މެދު ވިސްނާލަމާތޯއެވެ. ކޮންޕިއުޓަރ ސިސްޓަމްތަކަށް ބޮޑެތި ގެއްލުންދެނީ ދުނިޔޭގައިވާ ހުރިހާ ވައިރަސްތަކެއްގެ ބަދަލުގައި ވަރުގަދަ މަދު ވައިރަސްތަކެކެވެ. ތިމާގެ އަތުގައި އެތަކެއް ރީތި ހެދުމެއް ހުރި ކަމުގައި ވީނަމަވެސް، އޮފީހަށް، އިންޓަރވިއުއަކަށް ނުވަތަ ރަސްމީ ޖަލްސާއަކަށް ދިޔުމަށް ޓަކައި އޭގެ ތެރެއިން ބޭނުން ކުރެވޭނީ 20 އިންސައްތަ ހެދުމެވެ. މި ބަޔާންކުރެވުނު ކަންކަމުން ވެސް ދޭހަވަނީ މި ޕްރިންސިޕަލެވެ. ބޮޑު ބަދަލެއް، ނަތީޖާއެއް ނުވަތަ އަސަރެއް ގެނުވަނީ ވަރަށް މަދު އިންސައްތައެއްގެ ކަންކަމުންނާއި ތަކެތިންނެވެ.
މި ރޫލް ބޭނުން ކުރުމުގައި ޚާއްޞަކޮށް ސަމާލުކަން ދޭންވީ، 20 އިންސައްތައަކީ ކޮބައިކަން ހޯދުމެވެ. ޕަރޭޓޯ ޕްރިންސިޕަލްގައި “ވައިޓަލް ފިއު” އަދި “ޓްރިވިއަލް މެނީ” މިހެން ލިޔެވިފައިވެއެވެ. ފުރަތަމަ އެ ބުނާ “ވައިޓަލް ފިއު” ނޫނީ “މުހިންމު މަދު” ކަންކަމަކީ 20 އިންސައްތަ ތެރޭގައިވާ ކަންތައްތަކެވެ. ވައިޓަލް ފިއުއަކީ ކޮންމެހެން ވެސް ސަމާލުކަންދޭން ޖެހޭ ކަންކަމެވެ. ވައިޓަލް ފިއު، މިއީ ހާސިލުކުރަން ފަސޭހަނޫން ނަމަވެސް ހާސިލުވުމުގެ ސަބަބުން ބޮޑު ބަދަލެއް، އަސަރެއް، ނުވަތަ ނަތީޖާއެއް ނެރެވޭނެ ކަންކަމެވެ. ދެވަނައަށް އޮތް “ޓްރިވިއަލް މެނީ” ނޫނީ “އަގުދަށް ގިނަ”، މިއީ ކުރިން ބަޔާންކުރެވުނު ހުރިހާ ސިފަތަކަކާ އިދިކޮޅު ކަންކަމެވެ. ޓްރިވިއަލް މެނީގެ ގިންތިއަށް ފެތޭ ވަރަށް ގިނަ ކަންކަން އުނދަގުލަކާ ނުލައި ހާސިލު ކުރެވިދާނެއެވެ. ނަމަވެސް ކިތަންމެ ގިނަ އަދަދަކުން މި ކަންކަން ހާސިލު ކުރިކަމުގައި ވީނަމަވެސް ވައިޓަލް ފިއުގެ ގިންތީގެ ތެރޭގައިވާ ތަކެއްޗާ، އަޅާ ނުކިޔޭނެކަން ދަންނަން ވާނެއެވެ.
ވިލްފްރެޑޯގެ ޕްރިންސިޕަލަކީ ވަރަށް ފުޅާ ދާއިރާއެއްގައި އޭގެ ބޭނުން ހިފޭ ޕްރިންސިޕަލެކެވެ. މަސައްކަތްތައް ރޭވުމުގައި، ޓައިމް މެނޭޖްމަންޓް، ވިޔަފާރި، ދިރިއުޅުން ބިނާކުރުން ފަދަ ކޮންމެ ކަމެއްގައި ވެސް މި ޕްރިންސިޕަލްގެ ބޭނުން ހިފޭނެއެވެ. މި ޕްރިންސިޕަލްގެ ބޭނުންހިފުމުގައި ވިސްނަންޖެހޭ ވަރަށް މުހިންމު އެއް ކަމެއްވެއެވެ. އެކަމަކީ، 80 އާއި 20 އަކީ ކަނޑައެޅިފައިވާ ވަކި ނަންބަރުތަކެއްގެ ގޮތުގައި ދެކުމުގެ ބަދަލުގައި އޭގެން ރަމްޒުކޮށްދޭ މާނަ ރަނގަޅަށް ދޭހަވުމެވެ. 20 ރަމްޒުކޮށްދެނީ ވައިޓަލް ފިއުއެވެ. ހަމަ އެގޮތަށް 80 އޭގެ ސަބަބުން ނުކުންނާނެ ނަތީޖާ، ނުވަތަ ކުރާ އަސަރެވެ.
އަޅުގަނޑުމެންގެ މަސައްކަތުގެ މާހައުލަކީ، ވަރަށް ހަލަބޮލި، އަދި ކުރަން ޖެހިފައިވާ ކަންތައްތައް ގިނަ މާހައުލެކެވެ. މިފަދަ ހަލަބޮލި މާހައުލެއްގައި ލިބިފައިވާ ކުޑަ ވަގުތުކޮޅުގެ ތެރޭގައި މަސައްކަތްތައް ތަރުތީބުކޮށްލާފައި އޮތުން މުހިންމެވެ. މިގޮތަށް ކުރެވޭ ތަރުތީބުގައި ފިލްޕްރެޑޯގެ މި ޕްރިންސިޕަލް ބޭނުން ކުރެވިދާނެ ނޫންތޯއެވެ. މިހާރު ހުރި މަޤާމުން ކޮންމެހެން ހަދާފައި ވެސް އަދާކުރަންޖެހޭ ވައިޓަލް ފިއު ދެނެގަންނަންޖެހެއެވެ. އަދި ޓްރިވިއަލް މެނީ ކަންކަން ކުރުމަށް ޓަކައި ސްޓާފުންނަށް ޑެލިގޭޓްކުރުން މާ ރަނގަޅެވެ. ވައިޓަލް ފިއުއިން އަންނަ ބަދަލާއި، ކުރާ އަސަރު ބޮޑެވެ. 80 އިންސައްތަ ހާސިލުކުރުމަށް ބޭނުންވަނީ ހަމަ އެންމެ 20 އިންސައްތައެވެ.
