އަޙްމަދު ނާފިޢު
ނޯޓް: މިއީ ޙަޤީޤީ ހާދިސާއެއް ނަމަވެސް މި ހާދިސާގައި ބޭނުންކޮށްފައިވާ ނަންނަމާއި ތަންތަނަކީ އަސްލެއް ނޫނެވެ.
އޭރު އަހަރެންގެ އުމުރުން އެންމެ 14 އަހަރެވެ. އަހަރެން އުޅެމުން ދިޔައީ މަންމައާއެކު ދޮންބައްޕަ ކައިރީގައި މާލޭގައެވެ. އަހަރެންގެ އިތުރުން ދޮންބައްޕައަށް ލިބިފައިވާ 7 އަހަރުގެ އަންހެން ކޮއްކޮއެއް މަންމަގެ ހުރެއެވެ. ދޮންބައްޕައާއި އަހަރެން މުޚާޠަބުކޮށް ހަދަނީ ބައްޕަގެ ނަމުންނެވެ. ދޮންބައްޕަ ގޭގައި އަހަރެމެން އުޅެމުންދާއިރު އަހަރެންނާ އަހަރެންގެ ކޮއްކޮ ނިދާ ހަދަނީ މަންމަމެންނާ ވަކިން އެހެން ކޮޓަރިއެއްގައެވެ. މިގޮތުން އެއްރޭ ދަންވަރު އަހަރެން ފިލާވަޅު ދަސްކުރަން ކޮޓަރީގައި އިންދާ ގޭތެރޭގައި އަޑުގަދަވެގެން އުޅޭތީ ކޮޓަރިން ބޭރަށް އަހަރެން ނިކުތީމެވެ. ނުކުތްއިރު މަންމަ ބުރުގާ އަޅައިގެން، މަންމަ އުޅޭ ކޮޓަރިން ނުކުމެގެން ބޭރަށްދާން އުޅެނިކޮށް ފެނުނެވެ. މަންމަގެ ފަހަތުން ދޮންބައްޕަ ވެސް ދިޔަތަން ފެނުމުން އަހަރެން އެނބުރި ކޮޓަރިއަށް ވަނީމެވެ. ކޮޓަރިތެރެއަށް ވަދެ ކޮޓަރިތެރޭގައި އޮއްވާ “އައްދިއްޔޯ” އޭ ކިޔާފަ މަންމަ ހަޅޭލަވައިގަތް އަޑު އިވުނެވެ. އެހެންވެ ދެވަނަ ފަހަރަށް އަހަރެން ބޭރަށް ނިކުތީމެވެ. ނިކުތްއިރު މަންމަގެ ގައިގާ އަތްއަޅައި ދޮންބައްޕަ ކޮއްޕާލި ތަން އަހަންނަށް ފެނުނެވެ. އެ ވަގުތު މަންމައަށް ވީ ތަދުންނާއި ވީ ދެރައިން މަންމަ ގިސްލަގިސްލާފައި ރޮމުން ދިޔައެވެ. ދޮންބައްޕަ، މަންމައަށް އަނިޔާކުރާ މަންޒަރު ބަލަން އަހަރެންގެ ހިތަކަށް ކެތެއް ނުވިއެވެ. އެ ދެ މީހުންގެ ދެމެދަށް އަހަރެން ވަނީމެވެ. އެވަގުތު މަންމަ ގައިގާ ޖަހަން ބައްޕަ ހޫރާލި އަތުން އަހަރެންގެ ކަރުގައި ޖެހި، ބައްޕަގެ އަތުގެ ނިޔަފަތިތައް އަހަރެންގެ ކަރުގައި އެޅުނެވެ. ނިޔަފަތިތައް ޖެހުނު ތަންތަނުން ހަންމަށައިގެން ދިޔައެވެ. އޭރު ބައްޕަ ހުރީ ބަނގުރާ ބޮއެގެން މަސްތުވެފައެވެ. އެހެންނަމަވެސް މަންމައާއި ބައްޕަ ބޭރުގައި ތިބެގެން ހަމަނުޖެހުން ހިންގާތީ މަންމަ ގޮވައިގެން ގޭތެރެއަށް ވަންނަން އަހަރެން އުޅުމުން ދޮންބައްޕަ އަހަރެންގެ ގައިގާ އަތްއަޅާ ކޮއްޕާލުމުން އަހަންނާއި މަންމައާ ދެ މީހުން ބިންމައްޗަށް ވެއްޓުނެވެ. އެވަގުތު ދޮންބައްޕަގެ ސަބަބުން މަންމައަށް ލިބެމުންދިޔަ އަނިޔާ ފެނިފައި ފެންކަޅިވެ އަހަންނަށް ރޮވުނެވެ. އަހަރެން ބިންމައްޗަށް ވެއްޓުނު ވަގުތު ބިންމަތީގައި އަޅާފައި ހުރި ގާތަށް މަތީ އަހަރެންގެ ބޯ ޖެހުމުގެ ސަބަބުން ބޯ ފަޅައިގެންގޮސް ލޭ ވެސް އައެވެ. އޭގެ ކުޑައިރުކޮޅެއް ފަހުން ފުލުހުން އެތަނަށް އައިސް އަހަރެމެން ގެންދިޔައެވެ. އަދި ބައްޕަ ހައްޔަރުކުރިއެވެ.
ފުލުހުން އަހަރެމެން ގެންދިއުމަށްފަހު އަހަންނަށް ލިބިފައިވާ އަނިޔާތައް ފޮޓޯ ނެގިއެވެ. އަދި އަހަންނަށް ލިބިފައިވާ އަނިޔާތަކަށް ފަރުވާ ހޯދުމަށް އައިޖީއެމް ހޮސްޕިޓަލުގެ ޑޮކްޓަރަކަށް ދެއްކިއެވެ. އެ ހާދިސާގައި މަންމައަށް ލިބިފައިވަނީ ކޮން އަނިޔާތަކެއް ކަމެއް އަހަންނަކަށް ނޭނގެއެވެ. އެ ހާދިސާ ހިނގި ރޭ ދޮންބައްޕަ ހުރީ ބަނގުރާ ބޮއިގެން މަސްތުވެފައިކަން ބައްޕަގެ ޢަމަލުތަކުން އަހަންނަށް އެނގެއެވެ. އެއީ އެ ގަޑީގައި ބައްޕައަށް ހަމައަށް ކޮޅަށް ނުހުރެވޭތީއާއި އާންމުކޮށް ބައްޕަ ބަނގުރާ ބޮއިގެން އައިސް ބައެއްފަހަރު ގޭތެރޭގައި އަޑުގަދަކޮށް މަންމައާ ޒުވާބުކޮށް ހަދާތީއެވެ. އަދި މަންމައަށް އެކިވަރުގެ އަނިޔާތައްކޮށް ހަދާތީއެވެ. މިއީ އަހަރެންނާއި މަންމަގެ ހާލަތެވެ. ނަމަވެސް އަހަރެންގެ އެއްބަނޑު އަންހެން ކޮއްކޮގެ ހާލަކީ ކޮބައިކަން އަހަންނަށް ބުނެދޭން ވެސް ދައްޗެވެ. ކޮއްކޮއަށް ބައްޕަ ދެމުންދިޔައީ ދުވަހަކު ވެސް އަހަރެން ހިތުން ފިލައިގެންދާނެ އަނިޔާތަކެއް ނޫނެވެ.
ދުވަސްތައް މާޒީއާ އެކުވެދިޔައެވެ. ދޮންބައްޕަ މިނިވަން ވެގެން އެނބުރި ގެއަށް އަތުވެއްޖެއެވެ. އަހަރެމެން ހީކުރީ ދޮންބައްޕަ ރަނގަޅުވީ ކަމަށެވެ. ނަމަވެސް ދެން ފެނުނީ އެއަށްވުރެ ހިތި ދުވަސްތަކަކެވެ. ދޮންބައްޕަގެ އަނިޔާތައް އަނެއްކާ ވެސް ދޭތެރެދޭތެރެއިން މަންމައަށް ލިބެމުން ދިޔައެވެ. އަހަރެންނާއި ކޮއްކޮގެ ކުރިމަތީގައި ދޮންބައްޕަ، މަންމައާ ދިމާލަށް ވަރަށް ހަޑިހުތުރު އެއްޗެހި ވެސް ގޮވައެވެ. އަހަރެމެންނަށް އެކި ގޮތްގޮތުން ބިރުދައްކަމުން ދިޔައެވެ. އެކަމާ އަހަރެންނާ ކޮއްކޮ ތިބެނީ އަބަދުވެސް ބިރުންނެވެ.
އެއްދުވަހަކު އަހަރެން ސިޓިންގ ރޫމުގައި ފޮތްކިޔަން އިންދާ، ދޮންބައްޕަ ގެއަށް އައެވެ. އޭރު މަންމަ ވާނީ އޮފީހުގައެވެ. ކޮއްކޮ އިނީ ކޮޓަރީގައި ފޯނުން ގޭމް ކުޅޭށެވެ. ކޮއްކޮ ގޭމްކުޅެން އިންދާ ދޮންބައްޕަ، ކޮއްކޮގެ ކޮޓަރިއަށް ވަނެވެ. އަދި ކޮއްކޮއާ ބައިވެރިވެ ގޭމް ކުޅެން ފެށިއެވެ. މިހެން ގޭމް ކުޅުމުގެ ތެރޭގައި ކޮއްކޮގެ އަތުގައި އޮތް ފޯނުން މާމޮޅު ގޭމެއް ދައްކާނަމޭ ކިޔާފައި ދޮންބައްޕަ ކޮއްކޮގެ ފޯނުން ބަރަހަނާ ސައިޓަކަށް ވަދެ ކޮއްކޮއަށް އެ މަންޒަރުތައް ދައްކަން ފެށިއެވެ. އޭރު ކޮޓަރީގެ ދޮރު ހުރީ ހުޅުވާފައެވެ. އެހެންވެ އެ މަންޒަރުތައް އަހަރެންނަށް ދިޔައީ ފެންނަމުންނެވެ. ގޭމް ކުޅެން އިނދެފައި ދޮންބައްޕަ ކޮއްކޮގެ ގައިގާ ލޯބިން ބައްދައި ދޮންދީ ހަދަން ފެށުމުން އެކަމާ ކޮއްކޮ ހިތްހަމަ ނުޖެހިގެން ރޯން ފެށިއެވެ. ކޮއްކޮ ރޯން ފެށުމުން އަހަރެން ކޮއްކޮގެ ކޮޓަރިއަށް ވަންނަން އުޅުމުން ދޮންބައްޕަ، އަހަރެން ގަދަކަމުން ކޮޓަރިން ނެެރެލައި ކޮއްޕާލިއެވެ. ކޮއްްޕާލި ގަޑީގައި އަހަރެންގެ ބޯ ފާރުގައި ޖެހި ފަޅައިގެން ގޮސް ލޭ އައެވެ. އެވަގުތު ކޮއްކޮ ކޮޓަރިން ނިކުންނަން އުޅުމުން ދޮންބައްޕަ ކޮއްކޮ ހިފެހެއްޓިއެވެ. ކޮއްކޮ ރޯން ފެށިއެވެ. ރޯން ފެށުމުން ދޮންބައްޕަ ކޮއްކޮގެ އަތުގައި ހިފަހައްޓައިގެން ކޮޓަރިއަށް ވައްދައި ކޮޓަރީގެ ދޮރު ލެއްޕިއެވެ. އޭރު އަހަންނަކީ ވެސް ކުޑަކުއްޖެއް ކަމުން ކުރެވޭނެ މާބޮޑު ކަމެއް ނެތެވެ. ވެފައި ހުރި ތަދުންނާއި ބޮލަށް އެނބުރުން އަރާފައި ހުރުމުން މަޑުމަޑުން ތެދުވެގެން ގޮސް މޭޒުމަތީ އޮތް އަހަރެންގެ ފޯނު ނަގައި މަންމައަށް ގުޅީމެވެ. މަންމައަށް ގުޅައި މިހެން ކަންތައް ވާ ވާހަކަ ބުނުމުން މަންމަ މި އަންނަނީއޭ ބުނެ ފޯނު ކަނޑާލިއެވެ. އޭރުވެސް ދޮންބައްޕަ، ކޮއްކޮއަށް ކޮޓަރިތެރޭ އަނިޔާކުރާކަން އަހަންނަށް އެނގެއެވެ. އަދި ކޮއްކޮއަށް ޖިންސީ ގޯނާ ކުރަމުންދާކަން ވެސް އެނގެއެވެ. އޭރުވެސް ދޮންބައަޕަ ހުރީ މަސްތުވެފައެވެ. މަންމަ އައުމުގެ ކުރިން ދޮންބައްޕަ ކޮއްކޮއަށް ކުރާނެކަމެއްކޮށް ނިންމައި ކޮޓަރިން ނިކުމެގެން ދިޔައެވެ. ދޮންބައްޕަ ދިއުމުން އަހަރެން ބޮލުގައި އަތްއަޅައިގެން ހުރެ ކޮޓަރި ތެރެއަށް ވަނީމެވެ. އޭރު ކޮއްކޮ އޮތީ އެނދުމަތީ ބަންޑުން އޮވެ ރޯށެވެ. އަހަރެން ކޮއްކޮގާތު އިށީން ތަނާ މަންމަ ގެއަށް އައެވެ. އަދި އަހަރެންގެ ބޮލުން ލޭ އަންނަތަން ފެނުމުން ފޮތިގަނޑަކުން އެތަން ބަނދެލިއެވެ. މަންމަ އައިސް އެނދުގައި އިށީނުމާއެކު ކޮއްކޮ ތެދުވެގެން މަންމަ ގައިގައި ބައްދާލައި ރޯން ފެށިއެވެ. އެހިސާބުން، މަންމަ ކޮއްކޮއާ ސުވާލުކުރިއެވެ. ބައްޕަ ކުރީ ކީއްހޭ ވެސް އެހިއެވެ. އެވަގުތު ކޮއްކޮ ގިސްލަމުން މަންމަގާތު ބުންޏެވެ. ބައްޕަ ކޮއްކޮގެ މޫނުމަތީ ޖެހި ވާހަކައެވެ. އަދި ކޮއްކޮއަށް އެކި ގޮތްގޮތުން އަނިޔާކުރާ ވާހަކައާއި ފޯނުން ބަރަހަނާ ފިލްމު ދެއްކި ވާހަކަ ވެސް ކޮއްކޮ މަންމައަށް ކިޔައިދިނެވެ. އަދި ކޮއްކޮއާއި ބައްޕަ ބެހެން އުޅުނު ވާހަކަ ވެސް ކޮއްކޮ މަންމަގާތު ބުންޏެވެ.
ކޮއްކޮ މަންމައަށް މި ހުރިހާ ވާހަކައެއް ކިޔައިދިނުމުން، މަންމަ، ކޮއްކޮގެ ގައިގައި ބައްދައި ރޯން ފެށިއެވެ. އަދި ހިތްވަރު ކޮށްފައި މަންމަ މި މައްސަލަ ފުލުހުންނަށް ހުށަހެޅިއެވެ. މި މައްސަލައާ ގުޅިގެން ދޮންބައްޕަ ހައްޔަރު ކުރިއެވެ. އޭގެ ދުވަސްކޮޅެއް ފަހުން މަންމަ އަހަރެމެން ގޮވައިގެން ރަށަށް ދިރިއުޅުން ބަދަލު ކުރިއެވެ. އަދި ދޮންބައްޕަގެ ކައިރިން ވަރިވިއެވެ.
އެއީ މާޒީއެވެ. އެހެނަސް، އެ ހަނދާންތައް ހިތަކުން ނުފިލައެވެ. އަހަރެން ދެކޭ ގޮތުގައި އެއީ ދޮންބައްޕައެއް ކަމަކު އިންސާނިއްޔަތު ކަމެއް ހުރި މީހެއް ނޫނެވެ. އެ ދުވަހު މަންމައަށް ބައްޕަ ކުރަމުންދާ ގެވެށި އަނިޔާތައް ދެމުންދިޔައިރު، ދޮންބައްޕަ އަހަރެންނަށް ދެމުންދާ އެކިވަރުގެ ގެވެށި އަނިޔާތައް ވަކި މަދެއް ނޫނެވެ. މިއަދު އަހަރެންގެ ގައިގައި އަޅާ ވޭނާއި އަހަރެންގެެ ބޮލަށް ލިބިފައި މިހިރަ އަނިޔާއަކީ އެ ދޮންބައްޕަގެ ފުށުން އަހަންނަށް ލިބިފައިވާ ހަނދާން ނުފިލާވަރުގެ އަނިޔާތަކެވެ. މިއަދު އަހަރެން ދުނިޔޭގައި މި ހުންނަނީ ދާއިމަށް ބޭސްކައިގެންނެވެ. ބަލި މީހެއްގެ ގޮތުގައެވެ. އެ ވޭން އަދިވެސް ހަށިގަނޑުގައި އަޅައެވެ. އެ ތަދު އިހްސާސް ކުރެވެއެވެ. މަންމަގެ ހާލަކީ ވެސް ހަމަ މިފަދައެވެ. ނަމަވެސް މަންމަގެ ހާލު ނުވަތަ މަންމައަށް ބައްޕަ ކުރާ އަނިޔާއިން މަންމައަށް އަޅާ ވޭނާއި އިހްސާސް ކުރެވޭނީ ހަމަ މަންމައަށެވެ. އެވެސް ގެވެށި އަނިޔާއެވެ. މިވެސް ގެވެށި އަނިޔާއެވެ. ކުރިން އަހަރެންނަށް އަޑުއިވިފައި އޮތީ ގެވެށި އަނިޔާއަކީ ހަމައެކަނި އަންހެނުންނަށް ކުރާ އަނިޔާ ކަމަށެވެ. އެކަމަކު މިއަދު އަހަރެންނަށް ލިބެމުން މިދާ އަނިޔާތަކަކީ ވެސް ގެވެށި އަނިޔާއެވެ. މިފަދަ އަނިޔާތައް ލިބެނީ ހަމައެކަނި އަންހެނުންނަށް ނޫންކަން މަދުން ނަމަވެސް އަހަރެން ފަދަ އެތައް ފިރިހެނުންނަކަށް ވެސް މި އަނިޔާތަކާ ކުރިމަތިލާން ޖެހޭކަން އެއީ މިއަދު އެންމެން ދަންނަ ޙަޤީޤަތެކެވެ.
ކޮންމެއަކަސް ގެވެށި އަނިޔާގެ ސަބަބުން ޢާއިލާތައް ރޫޅި ދިރިއުޅުން ވިއްސިވިހާލިވެގެންދާ މަންޒަރުތަކަކީ މުޖުތަމައުން ފެންނަމުންދާ ހިތާމަވެރި މަންޒަރުތަކެވެ. ގެވެށި އަނިޔާގެ ގޮތުގައި ޖިސްމާނީ ހާނިއްކަ ކުރުމަކީ މީހެއްގެ ފަރާތުން އަނެކާގެ ފުރާނައަށް ނުވަތަ ޖިސްމާނީ ޞިއްޙަތަށް ގެއްލުން ލިބޭ ފަދަ ނުވަތަ ގެއްލުން ލިބިދާނެ ފަދަ ޢަމަލެއް ހިންގުމެވެ. އެއީ މިފަދަ އަނިޔާއެއް ގަސްދުގައި މީހަކަށް ދިނުން ނުވަތަ ހަރުކަށި އަދަބެއް ދިނުމުގެ ތެރޭގައި ގެއްލުން ލިބުން ނުވަތަ މީހާއާ މެދު އިހުމާލުވުމުގެ ސަބަބުން ގެއްލުން ލިބުމެވެ. އަނބިމީހާ ނުވަތަ ފިރިމީހާގެ ފަރާތުން ގެވެށި އަނިޔާ ލިބެމުންދާ ނަމަ ނުވަތަ ކުޑަކުދިންނަށް އަނިޔާ ކުރާނަމަ އެކަން، ވީއެންމެ އަވަހަކަށް ކަމާބެހޭ ފަރާތްތަކަށް ހުށަހެޅުން މުހިންމެވެ. މި ފަދަ މައްސަލައެއް ހުށަހަޅާ ފަރާތުގެ ނަން ވަންހަނާކުރަން ބޭނުންވާ މީހުންނަށް ނަން ވަންހަނާކޮށް ވެސް މައްސަލަ ހުށަހެޅިދާނެއެވެ. ފުލުހުންނާ ގުޅޭނެ ހެލްޕްލައިނަކީ ނުވަތަ ރިޕޯޓުކުރާނެ ނަންބަރަކީ 3000600 ނުވަތަ (ޗައިލްޑް ހެލްޕްލައިން) 1412 އެވެ. ގުޅާ ފަރާތެއްގެ ނުވަތަ އެ މައްސަލައެއް ރިޕޯޓްކުރި ފަރާތެއްގެ ނަން، ފުލުހުން ވަންހަނާ ކޮށްދޭނެއެވެ. އާދެ! މިފަދަ ކުށްކުރާ މީހުން ހޯދައި، އެ މީހުން އެ ކަންތައް ކުރުމުން ހުއްޓުވައި، ޤާނޫނީ އަދަބު ދޭންޖެހެއެވެ. އެއްވެސް މީހަކަށް އަނެކާއަށް އެއްވެސް ކަހަލަ އަނިޔާއެއް ކުރުމުގެ ޙައްޤެއް ލިބިގެން ނުވެއެވެ.
