އަޖައިބުކަން ގެނުވި މަތިންދާބޯޓު ހައިޖެކްކުރުން

މީގެ 51 އަހަރު ކުރީގެ ހާދިސާއެކެވެ. 1971 ނޮވެންބަރު 24 ވަނަ ދުވަހުގެ މެންދުރުފަހު އެމެރިކާގެ ޕޯޓްލޭންޑުން ފުރައިގެން ސީޓަލްއަށް ދަތުރުކުރަން ހަމަޖެހިފައި އޮތް ނޯތު ވެސްޓް އޮރިއެންޓް އެއަރލައިން، ބޯއިންގ 727 ގެ މަތިންދާ ބޯޓަށް ޑީބީ ކޫޕާ ނުވަތަ ޑޭން ކޫޕާ (ޓިކެޓްގައި ލިޔެފައިވަނީ ޑޭން ކޫޕާ) އެރިއެވެ. އޭނާ ހުރީ އަވިއައިނު އަޅައި ކޯޓު ފަޓުލޫން ލައިގެން، ކަޅު ކުލައިގެ ބްރިފް ކޭސްއެއް ހިފައިގެންނެވެ. ބަލާބެލުމަށް ވިޔަފާރިވެރިއެއްހެން ހީވާގޮތަށެވެ. މަތިންދާބޯޓަށް އެރުމަށް ފަހު ބޯޓުގެ އެންމެ ފަހަތު ގޮނޑީގައި އިށީނދެ ބުއިމަކަށް އޯޑަރުކޮށް ސިނގިރޭޓް ރޯކޮށްލިއެވެ.

އެ ދުވަސްވަރަކީ އެމެރިކާގެ އެތެރޭގެ އުދުހުންތަކުގައި ސަލާމަތީ ގޮތުން މާގިނަ ކަންތައްތަކެއް ބަލަމުން ދިޔަ ދުވަސްވަރެއް ނޫނެވެ. ބޯޓަށް އަރާ މީހުންގެ އަތް ދަބަހާއި، ސާމާނު ޗެކް ނުކުރާއިރު، އައިޑެންޓިފިކޭޝަން ވެރިފައި ވެސް ނުކުރެއެވެ. އަދި އެ ދުވަސްވަރު ބޯޓު ތެރޭގައި ސިނގިރޭޓް ބުއިމަކީ ވެސް ހުއްދަ ކަމެކެވެ. އެއަރޕޯޓްތަކުގައި ސަލާމަތީގޮތުން މިހާރު އެޅިފައި ހުރި ގިނަ ފިޔަވަޅުތައް އޭރު އަޅާފައި ނުވަނީ އެ ފިޔަވަޅުތަކުގެ ސަބަބުން ދަތުރުވެރިންނަށް އުނދަގޫވެ، އެ މީހުންގެ ހިތްތަކުގައި ބިރުވެރިކަން އުފެދި، ދަތުރު ކުރުމަށް ފަސްޖެހިދާނެ ކަމުގެ ބިރު އެއަރލައިން އޮޕަރޭޓްކުރާ ފަރާތްތަކަށް އޮތުމުން އެ މީހުންގެ ނުފޫޒާ ހެދިއެވެ.

ސީޓަލްއަށް ދިއުމަށް ޕޯޓްލޭންޑްގެ އެއަރޕޯޓުން މަތިންދާބޯޓް ނައްޓާލީ އެ ދުވަހުގެ މެންދުރުފަހު 2:50 ގައެވެ. މިއީ އެންމެ 45 މިނެޓްގެ ދަތުރެކެވެ. މި ބޯޓުގައި ޑީޕީ ކޫޕާއާ އެކު 36 ދަތުރުވެރިންނާއި، 3 ފްލައިޓް ކުރޫން އަދި 3 ކެބިން ކުރޫން ތިއްބެވެ.  ބޯޓު ނައްޓާލިތާ ކުޑައިރުކޮޅެއްގެ ތެރޭގައި ބޯޓުގެ ފަހަތުގައި އިށީނދެ އިން އަންހެން ފްލައިޓް އެޓެންޑެންޓް ކަމަށްވާ ފްލޮރެންސް ޝެފްނާގެ އަތަށް ޑީޕީ ކޫޕާ ނޯޓެއް ދިނެވެ.

“Miss, I have a bomb in my briefcase and I want you to sit by me”

“އަހަރެންގެ ބްރީފްކޭސް ތެރޭގައި ބޮމެއް އެބަ އޮތް. އަހަރެން ބޭނުންވަނީ ކަލޭ އަހަންނާ ޖެހިގެން އިށީނުމަށް.” ނޯޓުގައި ލިޔެފައި އޮތެވެ. ފްލައިޓް އެޓެންޑެންޓް އައިސް ޑީޕީ ކޫޕާ އިށީނދެ އިން ގޮނޑިއާ ޖެހިގެން އިން ހުސްގޮނޑީގައި އިށީނެވެ. ޑީޕީ ކޫޕާ އޭނާގެ އަތުގައި އޮތް ބްރީފް ކޭސް ހުޅުވާލުމަށް ފަހު އޭގެ ތެރޭގައި  އޮތް ބޮން، ފްލައިޓް އެޓެންޑެންޓަށް ދައްކާލިއެވެ. ބްރިފް ކޭސް ތެރޭގައި ޑައިނަމޭޓް ކަމަށް ޤަބޫލު ކުރެވޭ ރަތް ކުލައިގެ 8 ސިލިންޑަރ، ދެ ބަރިއަކަށް ވާގޮތަށް އޮތެވެ. އަދި އޭގެ ތެރޭގައި ބެޓެރީއެއް ވެސް އޮތެވެ.

ބޯޓު މިހާރު މިވަނީ ހައިޖެކް ކުރެވިފައި ކަމަށާއި، އޭނާގެ ޑިމާންޑްތައް ޕައިލެޓާ ހަމައަށް ގެންދިއުމަށް ޑީބީ ކޫޕާ އެދުނެވެ. ފްލައިޓް އެޓެންޑެންޓް އެކަން ޕައިލެޓާ ހަމައަށް ގެންދިޔައެވެ. ޑީބީ ކޫޕާގެ އެދުންތަކަކީ $200,000 (ދެ ލައްކަ ޔޫއެސް ޑޮލަރު)އޭނާއަށް ލިބުން ކަމަށާއި، ފައިސާ ހުންނަން ޖެހޭނީ ބެކްޕެކަކަށް އަޅާފައި ކަމަށެވެ. އަދި ދެ ފްރަންޓް ޕެރަރޝޫޓާއި، ދެ ބެކް ޕެރަޝޫޓް ހަމަޖެއްސުމަށާއި، ބޯޓަށް ތެޔޮ އެޅުމަށް ތެޔޮ ލޮރީއެއް ސީޓަލް އެއަރޕޯޓްގައި ތައްޔާރަށް ބޭއްވުމަށެވެ. އަދި މިގޮތަށް ކަންތައްތައް ހަމަޖައްސައިފިނަމަ ހުރިހާ ދަތުރުވެރިން ދޫކޮށްލާނެ ކަމަށެވެ. މިކަން އެއަރ ޓްރެފިކް ކޮންޓްރޯލަށް ޕައިލެޓް އެންގިއެވެ.  އެއަރ ޓްރެފިކް ކޮންޓްރޯލް ޔުނިޓުން ބޯޓު ހައިޖެކް ކުރިކަން، އެމެރިކާގެ އެފްބީއައިއަށާއި، އެއަރލައިންގެ ރައީސްއަށް ވަގުތުން އަންގައި ސަމާލުކަމަށް ގެނުވިއެވެ. ޑީބީ ކޫޕާގެ ހުރިހާ ޑިމާންޑްތަކެއް ހަމަޖައްސައިދޭނެ ކަމަށް ހައިޖެކަރ ގާތު ބުނުމަށް ފްލައިޓް ކުރޫއަށް އެއަރލައިންގެ ރައީސް އެންގިއެވެ. ފައިސާގެ ކަންތައްތައް ހަމަޖެއްސުމަށާއި، ޕެރަޝޫޓް ގަތުމަށް ގާތްގަނޑަކަށް ދެގަޑިއެއްހާއިރު ހޭދަވިއެވެ. މި ދެގަޑިއިރު ހައިޖެކްކުރެވިފައިވާ ބޯޓު އޮތީ ސީޓަލްގެ މަތީގައި ބުރު ޖަހާލަޖަހާލައެވެ. ބޯޓު ހައިޖެކް ކޮށްފައިވާކަން ބޯޓުގެ އެއްވެސް ދަތުރުވެރިއަކަށް އެނގިފައެއް ނުވެއެވެ. ލޭންޑް ނުކުރެވި ލަސްވަނީ ޓެކްނިކަލް މައްސަލައަކާ ހެދިކަމަށް ކްރޫން ދަތުރުވެރިންނަށް އަންގަމުން ދިޔައެވެ.

“އެފްބީއައި” އިން ވަނީ 20 ޑޮލަރުގެ ނޫޓުން ޖުމްލަ ދެ ލައްކަ ޑޮލަރު ހަމަކޮށް ސީރިއަލް ނަމްބަރު ނޯޓު ކުރުމަށް ކޮންމެ ނޫޓެއްގެ ފޮޓޯ ނަގާފައެވެ. ޑީބީ ކޫޕާ އެދުނު ގޮތަށް ހުރިހާ ކަމެއް ހަމަޖެހިފައިވުމުން ސީޓަލްގެ ޓަކޯމާ އެއަރޕޯޓަށް ބޯޓު ލޭންޑްކުރުމުގެ ހުއްދަ އޭނާ ދިނެވެ. ބޯޓު އެއަރޕޯޓަށް ޖެއްސީ އެ ދުވަހުގެ 5:39 ގައެވެ.

ރަންވޭއަށް ބޯޓު ތިރިކުރުމާއެކު ދެ ލައްކަ ޑޮލަރު އަޅާފައި އޮތް ދަބަހަކާއި، ހަތަރު ޕެރަރޝޫޓް، ޑީބީ ކޫޕާއަށް ގެނެސްދިނުމުން ބޯޓުގައި ތިބި ދަތުރުވެރިންނާއި، ދެ ކެބިން ކުރޫން ސަލާމަތުން ބޯޓުން ފޭބިއެވެ. ޑީބީ ކޫޕާގެ އެދުމަށް އޭނާއާއެކު ފްލައިޓް އެޓެންޑެންޓް ޓިނާ މުކްލޯއާއި ތިން ފްލައިޓް ކުރޫން ބޯޓުގައި މަޑުކުރިއެވެ. ތެޔޮ ލޮރީއަށް މައްސަލައެއް ދިމާވެ ބޯޓަށް ތެޔޮ އެޅުން ލަސްވަމުން ދާތީވެ ބޯޓު އުދުއްސާލުމަށް ޑީބީ ކޫޕާ އެދުމުން ސީޓަލް އެއަރޕޯޓުން ބޯޓު އުދުއްސާލިއެވެ.

ބޯޓު ނައްޓާލުމާއެކު މެކްސިކޯ ސިޓީއަށް ދިއުމަށް ޑީޕީ ކޫޕާ ޕައިލެޓަށް އެންގިއެވެ. އަދި އެންމެ ދަށް ސްޕީޑްގައި 10000m (ދިހަހާސް މީޓަރ) މަތިން އުދުހުމަށާއި، ކެބިން ތެރެ އެއަރ ޕްރެޝަރ ނުކޮށް، ލޭންޑިންގ ގިއަރ ތިރިކޮށްފައި ބެހެއްޓުމަށް ވެސް އެދިފައިވެއެވެ.  ބޯޓު އުދުއްސާލިތާ ކުޑައިރުކޮޅެއްގެ ތެރޭގައި އެމެރިކާގެ އެއަރފޯސްގެ ވައިގެ ތިން އުޅަނދު، ހައިޖެކްކޮށްފައިވާ ބޯޓްގެ ފަހަތުން ދުއްވަން ފެށިއެވެ. ހައިޖްކޮށްފައިވާ ބޯޓުގެ ސްޕީޑް ދައްކަމުން، ފައިޓިންގ ޖެޓްތަކަށް ބޯޓުގެ ފަހަތުން ނުދުއްވި، ބޯޓު ވަށާ ބުރުޖަހަން ފެށިއެވެ.

މެކްސިކޯ ސިޓީއާ ހިސާބަށް ދެވޭވަރަށް ބޯޓުގައި ތެޔޮ ނެތް ކަމަށާއި، ތެޔޮ އެޅުމަށް ނެވާޑާގެ ރިނޯ އެއަރޕޯޓަށް ނުވަތަ ފީނިކްސް އެއަރޕޯޓަށް ޖައްސަން ބޭނުންވާ ކަމަށް ޕައިލެޓުން އެދުމުން ރިނޯ އެއަރޕޯޓަށް ތިރިކުރުމަށް ކޫޕާ އެއްބަސްވިއެވެ. ފްލައިޓްގެ ހުރިހާ ކުރޫން ކޮކްޕިޓްގައި ތިބުމަށް ކޫޕާ އަމުރުކުރުމުން ފްލައިޓް އެޓެންޑެންޓް ވެސް ކޮކްޕިޓް ތެރެއަށް ވަނެވެ. އެހެންކަމުން ކެބިންގެ ތެރޭގައި އިނީ ކޫޕާ އެކަންޏެވެ. ފްލައިޓް އެޓެންޑެންޓް ޓިނާ މުކްލޯއަކީ ޑީބީ ކޫޕާ ކަމަށް ބުނާ މީހާ ފެނުނު އެންމެ ފަހު މީހާއެވެ. ޓިނާއަށް ކޫޕާ އެންމެ ފަހުން ފެނުނުއިރު އޭނާގެ ކަމަރުގައި އެއްޗެއް ބަންނަކަން ޓިނާއަށް ފާހަގަވެފައިވެއެވެ.

ރޭގަނޑުގެ އަނދިރީގައި ދުއްވަމުންދިޔަ މަތިންދާބޯޓުން ފައިސާ ދަބަސް ހިފައިގެން ޕެރަޝޫޓްގައި ޑީބީ ކޫޕާ ފުންމާލާފައިވާ ކަމަށް ބެލެވެނީ ސީޓަލް އެއަރޕޯރޓުން ބޯޓް ނައްޓާލިތާ ވިއްސަކަށް މިނެޓް ފަހުންނެވެ. ބޯޓުގެ އެއަރ ޕްރެޝަރަށް ބަދަލު އައުމުން ބޯޓުގެ ކެޕްޓަން، އިންޓަރކޮމް ބޭނުންކޮށް ޑީބީ ކޫޕާއާ ވާހަކަ ދައްކަން މަސައްކަތް ކުރިއެވެ. ނަމަވެސް އެއްވެސް ޚަބަރެއް ނުވުމުން ރިނޯގެ އެއަރޕޯޓަށް ބޯޓު ތިރިކޮށްފައިވަނީ ރޭގަނޑުގެ 10:15 އެހާއިރުއެވެ. ބޯޓު ތިރިކުރިއިރު ބޯޓުގެ ފަހަތު ދޮރުހުރީ ހުޅުވާފައެވެ. (މި ބޯޓުގެ ފަހަތު ކޮޅުން ތިރިއަށް ހުޅުވޭ ދޮރުގައި އަރާ ފޭބުމަށް ސިޑި އެއްވެސްވެއެވެ). ބޯޓު ތިރިކުރުމަށްފަހު ބޯޓު ތެރެ އެއްކޮށް ބަލާ ފާސް ކުރެވުނެވެ. ބޯޓުން ޑީބީ ކޫޕާއާއި ފައިސާ ދަބަސް ވެސް އަދި ބޮން ކަމަށް ބެލެވޭ ސިލިންޑަރުތައް ލާފައިވާ ދަބަސް ވެސް ފެނިފައެއް ނުވެއެވެ.

ޑީބީ ކޫޕާ ވައިކުޑާގައި ބޯޓުން ފުންމާލިތަން އެއްވެސް މީހަކަށް ފެނިފައެއް ނުވެއެވެ. ނަމަވެސް ބޯޓުގެ ފަހަތު ދޮރު ހުޅުވައި، ސިޑި ތިރިކޮށްފައި ހުރުމުން ސީޓަލްއާއި ރިނޯއާ ދޭތެރެއަށް ފުންމާލާފައިވާ ކަމަށް ޤަބޫލުކުރެވެއެވެ. ބޯޓު ތެރެއިން ފެނިފައިވަނީ ކޫޕާ އަޅައިގެން ހުރި ޓައިއާއި، 8 ސިނގިރެޓް ބަޓާއި، ބާކީ ހުރި ޕެރަޝޫޓްތަކެވެ.

ދެލައްކަ ޑޮލަރާއެކު ޑީބީ ކޫޕާ ފިލާފައިވަނީ ވަރަށް ވެސް ހީލަތްތެރި ކަމާއެކުއެވެ. މިއަދާ ހަމައަށް ވެސް ޑީބީ ކޫޕާ ހޯދިފައެއް ނުވެއެވެ. އެމެރިކާގެ އެފްބީއައިއަށް މި މައްސަލަ އަދިވެސް ބަންދު ނުކުރެވެއެވެ. އޭނާގެ ފޮޓޯއެއް ވެސް އެފްބީއައިއަށް ހޯދިފައެއް ނުވެއެވެ. ހައިޖެކްކުރި ބޯޓުގައި ތިބި ފަޅުވެރިންނާއި ޕަސިންޖަރުންގެ އެހީގައި ކުރެހި ޑީބީ ކޫޕާގެ ކުރެހުން ނޫނީ އެފްބީއައި އަތުގައި ނެތެވެ. ތަޙުޤީޤަށް ހޯދިހޯދުންތަކުން، 1980 ވަނަ އަހަރު ވޮޝިންގޓަންގެ ވެންކޯވާގެ ކޯރެއްގެ ކައިރިން ކޫޕާއާ ހަވާލުކުރި ފައިސާތަކުގެ ބައެއް ނޫޓްތައް ފެނިފައިވެއެވެ. ޑޭން ކޫޕާ ނުވަތަ ޑީޕީ ކޫޕާ އަކީ ކާކު ހެއްޔެވެ؟