އަޙްމަދު ނާފިޢު
ކުއްލިއަކަށް ކޮޓަރިތެރެ އެއްކޮށް އަނދިރިވެގެން ދިޔައެވެ. އެ ވަގުތު އިފްރީތު ޖިންނީންގެ ލަޝްކަރު ރުޤުޔާކުރާ މީހާއަށް ފާޅުވިއެވެ. އެ ލަޝްކަރުގައި ލައްކައެއްހާ ޖިންނި އުޅޭނެއެވެ.
މިއީ ރާއްޖޭގައި ހިނގާފައިވާ ޙަޤީޤީ ހާދިސާއެއްގެ މައްޗަށް ބިނާކޮށް ލިޔެފައިވާ ވާހަކައެކެވެ. މި ހާދިސާގައި ބޭނުންކޮށްފައިވާ ނަންނަމާއި ތަންތަނަކީ އަސްލެއް ނޫނެވެ.
އެއީ މީގެ ތޭރަ އަހަރު ކުރިއެވެ. އެ ދުވަސްވަރު އަހަރެންނަކީ ޖިންނި މޮޔަވެފައި ތިބޭ ކުދިންނަށް ޝިފާއެއް ހޯދުމަށް ރުޤުޔާކުރާ މީހަކާ އެކު ކިޔަވަން ގޭގެއަށް ގޮސް އުޅުނު މީހެކެވެ. މިގޮތުން މި ކިޔައިދެނީ އަހަރެންގެ ހަޔާތުގައި އަހަންނަށް ފެނުނު އެންމެ ބިރުވެރި އެއް ހާދިސާއެވެ.
އިރުއޮއްސި އުޑުމަތިން ރަތްވިލާ ފާޅުވަނީއެވެ. ނަސީޙު (އަަސްލު ނަމެއް ނޫން) އަކީ އުމުރުން 17 އަހަރުގެ ޒުވާނެކެވެ. ނަސީޙު ފުޓްބޯޅަ ކުޅެ ނިންމާފައި ގެއަށް ދިޔުމުގެ މަގުމަތީގައި ދަނޑުމަތީގެ އެއް ފަރާތެއްގައި އޮތް ނާއްޓެއްގައި ފައިންޖަހައި އެއްލާލިއެވެ. އަދި ފަސްއެނބުރި ބަލައި ނުލައި ހުރިގޮތަށް ގެއަށް ވަނެވެ. އޭރު ގޭތެރޭގައި ނަސީޙުގެ މަންމައާއި ބައްޕަ އުޅެއެވެ. ނަސީޙު ގެއަށް އައިސް ކޮޓަރިއަށް ވަތްތަން ނަސީޙުގެ މަންމައަށް ފެންނާނެއެވެ. އާދައިގެ މަތިން ނަސީހަކީ ކުޅެ ނިންމާފައި ފެންވަރައިގެން ސައިބޯން ކާގެއަށް އަންނަ ކުއްޖެއް ކަމުން، މަންމަ ހުރީ ނަސީހަށް ސައި ހަދައިގެންނެވެ. ނަމަވެސް ނަސީޙު ކޮޓަރިން ނުނިކުމެ ގިނައިރުތަކެއް ވުމުން ނަސީޙުގެ މަންމަ ގޮސް ނަސީޙުގެ ކޮޓަރީގެ ދޮރުގައި ޓަކިޖަހަން ފެށިއެވެ. ކިތަންމެ ބާރަށް ޓަކި ޖެހި ނަމަވެސް ކޮޓަރީގެ ދޮރެއް ނުހުޅުވިއެވެ. ގޮވާގޮވައި ވެސް އަޑެއް ނީވުނެވެ. އެހެންކަމުން ދޮރުގެ ތަޅު އަތްގަނޑުގައި ހިފައި މަންމަ ދޮރުހުޅުވާލިއެވެ. ދޮރުޅުވާލުމާ އެކު ފެނުނު މަންޒަރުން ނަސީޙުގެ މަންމަ ފެންކަޅިވިއެވެ. އޭރު ނަސީޙު އޮތީ އެނދުމަތީގައި އުޑުތިލަ މަތިން ދެލޯ ބޮޑުކޮށްގެން މައްޗަށް ބަލާށެވެ. އަތަށާއި ފަޔަށް ހުރީ ވާން އަރާފައެވެ. އަތްފައިގެ އިނގިލިތައް ހުރީ ބުޅިވެފައެވެ. މި މަންޒަރު ފެނުމާއެކު ނަސީޙުގެ މަންމަ [މަގޭ ދަރިއޭ] ކިޔައި ހަޅޭއްލަވައިގަތެވެ. އެވަގުތު ނަސީޙުގެ ބައްޕަ އެތަނަށް އައެވެ. ނަސީޙު ފެނުމުން އޭނާގެ ހަރަކާތް ހުރި ގޮތުން ޖިންނި އަވަލާފައިވާ ކުދިންގެ ހަރަކާތްތަކާ އެއްގޮތް ހަރަކާތްތަކެއް ހުރިކަން ނަސީޙުގެ ބައްޕައަށް ފާހަގަކުރެވުނެވެ. އެހެންކަމުން ރުޤުޔާކުރާ މީހަކަށް ގުޅިއެވެ. އަދި ވަރަށް އަވަހަށް އެ ގެއަށް އައިސް ދިނުމަށް އެދުނެވެ.
އަހަރެންނަކީ އަބަދުވެސް ރުޤުޔާކުރާ މީހާއާ އެކު އުޅޭ މީހެއްކަމުން ނަސީޙަށް ކަމެއް ވެގެން އުޅޭކަން ރުޤުޔާކުރާ މީހާގެ ފަރާތުން އެނގުނެވެ. އެ ގެއިން ގުޅާފައި ވަރަށް އަވަހަށް އެ ގެއަށް ދިއުމަށް އެދިފައިވާކަމަށް ރުޤުޔާކުރާ މީހާ ބުނުމުން އޭނާއާ އެކު ނަސީޙު ދިރިއުޅޭ ގެއަށް ދިޔައީމެވެ. އެއީ ދެނަމާދު ދޭތެރެއެވެ. އަހަރެން އެ ގެއަށް ގޮސް ވަތްއިރު ނަސީޙު ކޮޓަރިތެރޭގައި އުޑުތިލަމަތިން އޮތެވެ. ކަޅި ހުއްޓިފައި އޮތީ ކޮޓަރީގެ ފުރާޅަށެވެ. މުޅި މީހާގެ އަތްފައި އޮތީ ބުޅިވެ ވާންވެފައެވެ. އެ ވަގުތު ނަސީޙަށް ޖިންނި ސައިތާނުންގެ އުނދަގުލެއް ޖެހިގެން އުޅޭކަން ފާހަގަ ކުރެވުނެވެ. ބަލާކަށް ނުހުރެ ރުޤުޔާކުރާ މީހާ ނަސީޙުގެ ގާތަށް ގޮސް ފެންތައްޓެއް ކިޔަވައި އޭނާގެ މޫނުގައި އުގުޅާލިއެވެ. އިސާހިތަކު އޭނާއަށް ހަމަހޭވެރިކަން ވިއެވެ. ނަމަވެސް މާގިނަ ވާހަކަތަކެއް ނުދައްކާ ރުޤުޔާކުރާ މީހާ އެދުނީ ޖެހިގެން އަންނަ ރޭ ނަސީޙަށް ވެގެންއުޅޭ ގޮތެއް ބެލުމަށް އިތުރަށް ކިޔަވާށެވެ. މިކަމާ ނަސީޙުގެ މައިންބަފައިން ވެސް އެއްބަސްވިއެވެ. އެއީ، މި ކަމަކީ ޖިންނި ސައިތާނުންގެ ކިބައިން ފެންނާނެ އަލާމާތެއްކަން އެނގުމުން މިފަދަ ކަންކަމަކީ އަވަހަށް ކިޔަވައިގެން ނޫނީ ރަނގަޅު ކުރެވޭނެކަމެއް ނޫންކަމަށް ރުޤުޔާކުރާ މީހާ ބުނުމުންނެވެ.
ޖެހިގެން އައި ރެއެވެ. އަހަރެމެން ނަސީޙު ގެއަށް ދިޔައީ ކިޔަވާނެ ހަތަރު މީހަކު ގޮވައިގެންނެވެ. އޭރު ވެސް ނަސީޙު އޮތީ ކުރިން ރޭ ވީހެން ވެފައެވެ. ބަލާކަށް ނުހުރެ ރުޤުޔާކުުރާ މީހާ ނަސީޙު އޮތް އެނދުގައި އިށީނދެ ކިޔަވަން ފެށިއެވެ. ދެން ތިބި މީހުން ވެސް ކިޔަވަމުން ދިޔައެވެ. ކިޔަވަމުން ދިޔަ ވަރަކަށް ނަސީޙުގެ އަތްފަޔަށް ވާންވެ މޮޔަވެފައިވާ މީހެއް ފަދައިން އެނދުން ތެދުވުމަށް މަސައްކަތް ކުރެއެވެ. ދެ ލޯ ބޮޑުކޮށް ރުޤުޔާކުރާ މީހާއާ ދިމާލަން ބަލަން ފެށިއެވެ. އެ ވަގުތު އެތާނގައި ތިބި ހަތަރު ފިރިހެނުން ނަސީޙުގެ އަތްފައިގައި ހިފަހައްޓަން ފެށިއެވެ. ރުޤުޔާކުރާ މީހާ ބުނާ ގޮތަށެވެ. ނަމަވެސް ހަތަރު މީހުންނަށް ވެސް ނަސީޙު މައިތިރިއެއް ނުކުރެވުނެވެ. އެއަށްވުރެ ނަސީޙުގެ ގަޔަށް އަރާފައިވާ ރޫހާނީ ބާރު މާގަދައެވެ. އެހެންކަމުން އިތުރަށް މީހުން ގެނެސް ނަސީޙުގެ އަތްފައިގައި ހިފަހައްޓައިގެން ތިއްބެވެ. ރުޤުޔާކުރާ މީހާ ކިޔަވަމުން ގެންދެއެވެ. ކިޔެވުން ވަކި ހިސާބަކަށް ދިޔަތަނާ ރުޤުޔާކުރާ މީހާ ނަސީޙާ ސުވާލުކުރަން ފެށިއެވެ. ނަސީޙު ވާހަކަ ދައްކަމުން ދިޔައީ ބިރުވެރި އަޑަކުންނެވެ.
ރުޤުޔާކުރާ މީހާ ބުންޏެވެ. “ކަލޭ ތީ ކާކު ހެއްޔެވެ؟” އެ ވަގުތު ނަސީޙުގެ އަނގައިން ބިރުވެރި އަޑެއް ލައްވަމުން “އަހަންނަކީ އިފުރީތު ޖިންނިއެކޭ” ބުންޏެވެ. މިހެން ބުނުމާއެކު “ކަލޭ ނަސީޙުއަށް އަވަލައިގެން ތި އުޅެނީ ކީއްވެގެން ހެއްޔޭ” އެހުމުން އިފްރީތު ޖިންނި ވާހަކަ ދައްކަމުން ދިޔައެވެ. “އަޑު އަހާށެވެ. އިއްޔެ ކުޅެންގޮސް އުޅެފައި މީނަ ގެއަށް އައި މަގުމަތީގައި ނާއްޓަކުން އަހަރެންގެ އާއިލާ މީހެއްގައިގައި ޖެހީއެވެ. އޭރު ބުޅަލެއްގެ ސިފައިގައި އޮތީ އަހަރެންގެ ބޭބެއެވެ. އެއީ ދުވަސްވީ މާރިދު ޖިންނިއެކެވެ. ނާށިން ޖެހުމާއެކު އޭނަ މަރުވީއެވެ. އެހެންވެ އަހަރެމެން ބޭނުން ވަނީ މަރަށް މަރު ހިފާށެވެ.”
ނަސީޙުގެ އަޑުން އިފުރީތު ޖިންނި މިހެން ބުނުމާއެކު ޖިންނިއަށް އިސްލާމްވުމަށް އެދި ރުޤުޔާކުރާ މީހާ ދެވަނަ ފަހަރަށް ނަސޭހަތްތެރިވިއެވެ. ނަމަވެސް އިފުރީތު ޖިންނި ގޮތް ދޫކުރާކަށް ބޭނުމެއް ނުވިއެވެ. އެ ޖިންނީގެ ޢާއިލާ މީހުން ގިނަކަމާއި ބޭނުން ވަނީ ނަސީޙުގެ ފުރާނަ ދުއްވާލަން ކަމަށް ތަކުރާރުކޮށް ބުނަމުން ދިޔައެވެ. މި ވާހަކަތައް އަޑުއަހާފައި ރުޤުޔާކުރާ މީހާ އިތުރަށް ކިޔަވަން ފެށިއެވެ. އިސާހިތަކުން ނަސީޙު ހަމަމަގަށް އެޅިއްޖެއެވެ. ނަސީޙު ހަމަމަގަށް އެޅުމުން ރުޤުޔާކުރާ މީހާ ބުންޏެވެ. އެ ޖިންނި ނަސީޙު ދިރިހުއްޓާ ދުލެއް ނުކުރާނެއެވެ. އެއީ އިފުރީތެކެވެ. އެކަހަލަ ޖިންނިންނަކީ ބަދަލަށް ބަދަލު ހިފާފައި ނޫނީ ހުއްޓާލަން ފަސްޖެހޭނެ މަހްލޫޤުންނެއް ނޫނެވެ. އެހެންކަމުން މާދަމާ ރޭ ވެސް ހަމަ މި ގަޑިއަށް މި ގެއަށް އަންނާނަމެވެ. ނަސީޙު ރަނގަޅު ވަންދެން ކިޔަވަން ބޭނުމެވެ. މިހެން ރުޤުޔާކުރާ މީހާ ބުނުމަށްފަހު އަހަރެމެންނާއެކު އޭނާ ވެސް އެ ގެއިން ނިކުމެއްޖެއެވެ. ގެއިން ނިކުތުމަށްފަހު ބުންޏެވެ. މާދަމާ ރޭ މީ ތިންވަނަ ރެއެެވެ. މާދަމާ ރެއަށް އަށްވަރަކަށް މީހުން ހޯދަން ޖެހޭނެއެވެ. މަރާލެވިފައި ވަނީ މާރިދު ޖިންނިއެެވެ. އެ މާރިދު ޖިންނިއަކީ މި އިފުރީތު ޖިންނީގެ ޢާއިލާ ޖިންނިއަކަށް ވުމުން މި އިފުރީތު ޖިންނީގެ އުނދަގޫ ކުރިއަށް ވުރެ ބޮޑުވެދާނެއެވެ. އެހެންވީމާ މާދަމާ ރޭ ރަނގަޅަށް ތައްޔާރުވެގެން މަޣްރިބް ނަމާދުން ފައިބައިގެން މި ގެއަށް އަންނަން ވާނެއެވެ. ރުޤުޔާކުރާ މީހާ މިހެން ބުނުމަށްފަހު ހިނގައިގަތުމުން އަހަރެން ވެސް ދިޔައީ ގެއަށެވެ.
އަހަރެންގެ އެކުވެރި ރުޤުޔާކުރާ މީހާއަކީ ވެސް ހަތަރު މުއުމިނު ޖިންނި ގެންގުޅޭ މީހެކެވެ. އޭނާގެ ވާހަކަތަކުން މާދަމާ ރޭ އެ ހަތަރު ޖިންނީންގެ ބޭނުން ހިފާނެއެވެ. މިހެން ހިތަށް އަރައި މިކަމަށް ހުރި ޝައުޤެއްގެ ބޮޑުކަމުން ޖެހިގެން އައިރޭ ރުޤުޔާކުރާ މީހާއާ އެކު އިތުރު އަށް މީހުން ގޮވައިގެން އަހަރެން އެ ގެއަށް ދިޔައީމެވެ. އޭރު ނަސީޙުގެ ކޮޓަރީގެ ދޮރު ހުރީ ލައްޕާފައެވެ. ނަމަވެސް ނަސީޙުގެ ބައްޕަ ހުއްދަ ދިނުމުން އެ ކޮޓަރީގެ ދޮރު އަހަރެން ހުޅުވާލީމެވެ. އަހަންނަށް ލިބުނީ ކުއްލި ސިހުމެކެވެ. އަތްފައިން ހީބިހި ނަގައިގެން ދިޔައެވެ. މުޅި މީހާގެ ގައިން ތުރުތުރު އަޅަން ފެށިއެވެ. ފެނުނު މަންޒަރުންނެވެ. ކޮޓަރިތެރެ ވަރަށް އަނދިރިއެވެ. އޭރު ނަސީޙު އޮތީ އެނދުން ދެ ފޫޓް މައްޗަށް ހިތްލިފައެވެ. އުޑުތިލަމަތިންނެވެ. ކޮޓަރި ތެރެއިން ސިފަވަނީ ނާމާންކަމާއި ބިރުވެރިކަމެވެ. މި މަންޒަރު ރުޤުޔާކުރާ މީހާއަށް ވެސް ފެންނާނެއެވެ. ބަލާކަށް ނުހުރެ ރުޤުޔާކުރާ މީހާ ތުންތަޅުވަމުން ކޮޓަރިއަށް ވަދެ ކޮޓަރި ދިއްލާލިއެވެ. އަދި އެނދުގައި އިށީނެވެ. އިށީނުމާއެކު ނަސީޙު ހަމަ އެނދަށް ތިރިވިއެވެ. އޭރުވެސް ނަސީޙުގެ އަތްފައި ވަނީ ބުޅިވެފައެވެ. އަނގައިން ބިރުވެރި އަޑެއް ލައްވައެވެ. އެހެންކަމުން ރުޤުޔާކުރާ މީހާ އެދުނީ އަށް މީހުން ވެގެން އޭނާގެ ހަތަރެސްފައިގައި ހިފަހައްޓައިގެން ތިބުމަށެވެ. އެ ވަގުތު ރުޤުޔާކުރާ މީހާ ކިޔަވަން ފެށިއެވެ. ކިޔަވަމުން ދިޔަ ވަރަކަށް ނަސީޙުގެ ހަށިގަނޑަށް އަރާފައި ހުރި ބާރު އިހުނަށްވުރެ ގަދަވަމުން ދިޔައެވެ. އަށް މީހުންނަށް ވެސް ހިފަހައްޓާލެވެނީ ހަމަ ކިރިޔާއެވެ. މިގޮތަށް ކިޔަވާތާ އިރުގަނޑެއް ފަހުން އެއްކަލަ އިފުރީތު ޖިންނި ނަސީޙުގެ ހަށިގަނޑުން ފާޅުވެއްޖެއެވެ. އިސާހިތަކު ނަސީޙުގެ ގަޔަށް އަރާފައި ހުރި ވަރުގަނޑު ކުޑަކޮށް މައިތިރިވެއްޖެއެވެ. އެވަގުތު ޖިންނި އައީކަން ރުޤުޔާކުރާ މީހާއަށް އެނގުނެވެ. ރުޤުޔާކުރާ މީހާއަކީ ޖިންނި ފެންނަ މީހެއްކަމުން އިފުރީތު ޖިންނި އައުމާއެކު ސުވާލުކުރަން ފެށިއެވެ. އޭރު ރުޤުޔާކުރާ މީހާ ގާތު ހަތަރު މުއުމިނު ޖިންނި ތިބިކަމަށް ރުޤުޔާކުރާ މީހާ ބުންޏެވެ. އެހެންކަމުން މުއުމިނު ޖިންނީންގެ ބޭނުން ހިފައި އިފުރީތު ޖިންނިއަށް އަނެެއްކާ ވެސް ނަސޭހަތްލައިދެމުން ދިޔައެވެ. ދިރިހުރި މީހެއްގެ ފުރާނަ ދުއްވާ ނުލައި އިސްލާމްވުމަށެވެ. ނަމަވެސް އިފުރީތު ޖިންނި މި ފަހަރު ވެސް ގޮތް ދޫކުރާކަށް ބޭނުމެއް ނުވިއެވެ. ބޭނުންވަނީ މަރަށް މަރު ހިފަންކަމަށް ތަކުރާރުކޮށް ބުނަމުން ދިޔައެވެ. އަދި މަރާލި މާރިދު ޖިންނިއަކީ އެ ޖިންނީގެ އާއިލާގެ ތެރެއިން އެންމެ ދުވަސްވީ ޖިންނިކަމަށާއި، ސަތާރަ ހާސް އަހަރުވީ ޖިންނިއެއް ކަމަށް ވެސް ބުންޏެވެ. (ނޯޓް: ޖިންނީން އަހަރު ގުނަމުން ދަނީ ހަފުތާއިންނެވެ. ކޮންމެ ހަފުތާއަކީ އަހަރެއް ކަމަށް ބަލައިގެންނެވެ.) އަދި އެ ޖިންނީގެ ޢާއިލީ ލަޝްކަރު ވަރަށް ބޮޑުވާނެކަމަށާއި، އެ ޢާއިލާގެ އެންމެން ވެސް ބޭނުން ވަނީ މަރަށް މަރު ހިފަން ކަމަށް ބުނަމުން ދިޔައެވެ. މިގޮތަށް ދެ ފަރާތުން ބަހުގެ ހަމަލާތައް ރައްދު ކުރަމުން އެންމެ ފަހުން އެ ޖިންނި މިރޭ ވެސް އެނބުރި ގޮސްފިއެވެ. ޖިންނި ދިއުމާއެކު ނަސީޙުއަށް ހޭވެރިކަން ވިއެވެ. އެހެންކަމުން ރުޤުޔާކުރާ މީހާ ނަސީޙުގެ މައިންބަފައިން ގާތު އެދުނީ ނަސީޙު ސަލާމަތް ކުރަންޏާ އިތުރަށް ކިޔަވަންޖެހޭނެ ވާހަކައެވެ. ކަމުގެ ބޮޑުކަމުންނެވެ. މައިންބަފައިން ވެސް އެކަމަށް އެއްބަސްވިއެވެ. ނަސީޙުގެ މައިންބަފައިން ވެސް އެނދުނީ އޭނާ އަވަހަށް ރަނގަޅުކޮށް ދިނުމަށެވެ. އޭނާގެ ފުރާނަ ޖިންނީންގެ ކިބައިން ސަލާމަތް ކޮށްދިނުމަށެވެ. އެވަގުތު ރުޤުޔާ ކިޔަވާ މީހާ ބުންޏެވެ. އަވަހަށް ރަނގަޅު ކުރަން ބޭނުމިއްޔާ މާދަމާ ހެނދުނު އަންނާނަމެވެ. މާދަމާއަކީ މިކަން ކޮޅެއްގައި ޖައްސާފައި ނޫނީ ދޫކުރާނެ ދުވަހެއް ނޫނެވެ.
ޖެހިގެން އައި ދުވަހުގެ ހެނދުނު އިރުފެނުން ތޮޅެލި ވަގުތެވެ. ނަސީޙު ކޮޓަރީގައި ބާއްވައިގެން ރުޤުޔާކުރާ މީހާ ކިޔަވަމުން ގެންދިޔައެވެ. ނަމަވެސް ވަރަށް އިރުވީފަހުން އެއްކަލަ އިފުރީތު ޖިންނި ފާޅުވިއެވެ. އެ ޖިންނި އައުމާއެކު ރުޤުޔާކުރާ މީހާ ސުވާލު ކުރިއެވެ. ނަސީޙު މަރާލައިފިނަމަ ތިޔަ ޖިންނި ވެސް މަރާލާނަމެވެ. ދުލެއް ނުދޭނަމެވެ. ނަމަވެސް ގޮތް ދޫކޮށް އިސްލާމްވެއްޖެނަމަ ދެ މީހުންގެ ފުރާނަ ވެސް ސަލާމަތްވާނެއެވެ. މިހެން ބުނުމާއެކު ނަސީޙުގެ ހަށިގަނޑުގެ ތެރެއިން ގޮތް ދޫކުރުމެއް ނެތި އެ ޖިންނި ވާހަކަ ދައްކަމުން ބުންޏެވެ. ބޭނުން ވަނީ ހަމަ މަރަށް މަރު ހިފާށެވެ. މި ތިބީ އަހަރެންގެ ޢާއިލާ މީހުންނެވެ. މިހެން ބުނުމާއެކު ކުއްލިއަކަށް މުޅި ގޭތެރެ އެއްކޮށް އަދިރިވެގެން ދިޔައެވެ. ހީވީ ބޮޑު ތޫފާނެއް ލައިގަތީ ހެންނެވެ. ދުވާލު ނަމަވެސް ރޭގަނޑުގެ ކަނުއަދިރި ފަދައެވެ. ކޮޓަރިތެރެ ވެސް އެހާމެ އަނދިރިއެވެ. އެވަގުތު އިފުރީތު ޖިންނީންގެ ލަޝްކަރު ރުޤުޔާކުރާ މީހާއަށް ފާޅުވިއެވެ. އަހަރެން ހުރީ ބިރުން ތުރުތުރު އަޅައަޅައެވެ. ރުޤުޔާކުރާ މީހާ ބުނާގޮތުން ލައްކައެއްހައި ޖިންނި އެ ލަޝްކަރުގައި އެބަ ތިއްބެވެ. މި ޖިންނި ލަޝްކަރު ރުޤުޔާކުރާ މީހާއަށް ފެނުމާއެކު ނަސީޙުގެ އަނގައިން ބިރުވެރި އަޑެއް ލައްވާލައި އޭނަގެ ގައިގައި ހިފަހައްޓައިގެން ތިބި މީހުންގެ އަތް ފޮޅާލުމަށްފަހު ތެދުވެގެން ދާން މަސައްކަތް ކުރިއެވެ. ނަމަވެސް ބާރުގަދަ އަށް މީހުންގެ އަތްދަށުން ނަސީޙުއަކަށް ތެދުވެވޭ ގޮތެއް ނުވިއެވެ. އޭރު ނަސީޙުގެ ހަށިގަނޑު ތެރޭގައި އެއްކަލަ އިފުރީތު ޖިންނި އޮވެ ވާހަކަ ދައްކަމުން ގެންދިޔައެވެ. އަހަރެމެން ބޭނުންވަނީ ކަލޭމެންނާ ހަނގުރާމަކޮށްގެން ވެސް މިކަލޭގެ ދުވަސް ދުއްވާލާށެވެ. މިއީ އަހަރެންގެ ލަޝްކަރެވެ. މިހެން ބުނުމާއެކު ރުޤުޔާކުރާ މީހާ ގެންގުޅޭ މުއުމިންު ހަތަރު ޖިންނި އެތަނަށް ހާޟިރު ކުރިއެވެ. އަދި އެ ޖިންނީންނަށް އިޝާރާތްކޮށް ބުންޏެވެ. އަހަރެމެން ވެސް ބޭނުންވަނީ ހަނގުރާމަކޮށްގެން ކަލޭމެން ބަލިކުރާށެވެ. ނަޞްރު ދެއްވާނީ ﷲ އެވެ. މިހެން ބުނެ މުއުމިނު ހަތަރު ޖިންނިއަށް އެންގިއެވެ. މައްކާގެ ރަށް ބޭރުން މުއުމިނު ޖިންނީންގެ ލަޝްކަރެއް ގެންނާށެވެ. މިހެން ބުނެ މާގިނައިރުތަކެއް ނުވެ އެ ތަނަށް މުއުމިނު ޖިންނީންގެ ލަޝްކަރެއް އައެވެ. އަހަރެންނަށް އެ މަންޒަރު ނުފެނުނެއް ކަމަކު ރުޤުޔާކުރާ މީހާއަށް އެ މަންޒަރު ފެންނަ ކަމަށް އޭނާ ބުންޏެވެ. އެ ލަޝްކަރު އައުމާއެކު ދެ ލަޝްކަރުގެ މެދުގައި ހަނގުރާމަ ކުރަމުން ދިޔައެެވެ. އެވަގުތު މުޅި ގެއިން ސިފަވެގެން ދިޔައީ ނާމާންކަމާއި ބިރުވެރިކަމެވެ. ކޮޓަރީގެ ތެރެއިން އިވެމުންދަނީ ބިރުވެރި އަޑުތަކެވެ. ގޭތެރެއިން އެއްޗެހި ވެެއްޓޭ އަޑެވެ. ހީވަނީ ކައިރީގައި ބަޔަކު އުޅޭ ހެންނެވެ. ސިއްސަސިއްސައިގެންދާ ކަހަލައެވެ. އަހަރެން އިނީ ބިރުން ވިރިވިރިއެވެ. ދުލަށް އައިހައި ހެޔޮ އެއްޗެއް ކިޔަމުންނެވެ. މިގޮތުގައި ގިނައިރުތަކެއް ފާއިތުވެ ދިޔަފަހުން ކުއްލިއަކަށް އުޑުމަތި ބަނަވެ ބޯކޮށް ވާރޭ ވެހެން ފެށިއެވެ. އަހަރެންނާއި ދެން ތިބި މީހުން ވެސް ތިބީ ދެން ވާނެގޮތެއްް ނޭނގި ބިރުގަނެ ހާސްވެފައެވެ. ނަމަވެސް ވާރޭވެހުން ހުއްޓުމާއެކު ނަސީޙުގެ ގަޔަށް އަރާފައި ހުރި ބާރުގަނޑު މުޅިން ކެނޑި މީހާ ހަމަޔަކަަށް އެޅި، ވާހަކަ ދައްކަން ފެށިއެވެ. އަހަރެން ހައިރާން ކަމާއެކު ނަސީޙުއަށް ބަލަން އިނީމެވެ. ކުއްލިއަކަށް ނަސީހަށް އައި ބަދަލު ފެނިފައެވެ. އެވަގުތު ރުޤުޔާކުރާ މީހާ ނަސީޙު ގާތު ކަން ހިނގާދިޔަގޮތް ކިޔައިދިނުމަށް ފަހު މިހާރު އެ އިފުރީތު ޖިންނި ކޮބައިތޯ ނަސީޙު ގާތު އެހިއެވެ. ނަސީޙު ބުންޏެވެ. ވާރޭ ވެހެން ފެށުމާއެކު އިފްރީތު ޖިންނީންގެ ޢާއިލާ އެއްކޮށް ފަނާވެ ދިޔައީއެވެ. އެ ޖިންނި ވެސް މަރުވީއެވެ.
މި ޚަބަރު ލިބުމާއެކު ރުޤުޔާކުރާ މީހާ ٱلْحَمْدُ لِلَّٰهِ އޭ ބުނެ މާތް ﷲ އަށް ޙަމްދު ކުރިއެވެ. ނަސީޙުގެ ފުރާނަ ސަލާމަތްކޮށްދެއްވީތީއެވެ. އޭގެ ފަހުން ނަސީޙަކަށް މިފަދަ ކަމެއް މެދުވެރިއެއް ނުވެއެވެ.
އެކުވެރިންނޭވެ. މަގުމަތިން އެއްޗެއް ފެނުނަސް ފައިން ނުޖަހާށެވެ. އަދި ފައިންޖަހާ އެއްލާލި ނަމަވެސް ބިސްމި ކިޔުމަށް ފަހު ނޫނީ އެ އެއްޗެއްގައި އަތްނުލާށެވެ. ކުރެވޭ މިފަދަ ކުޑަކުޑަ އަމަލަކުން ވެސް ތިބާގެ ފުރާނަ ނުރައްކަލަކަށް ހުށަހެޅިދާނެއެވެ.
ކޮންމެއަކަސް މިކަންކަމުން ސަލާމަތްވުމަށް ކުރެވިދާނެ ކަންތައްތަކެއް ވާކަން އެނގެއެވެ. އެގޮތުން އަބޫ ހުރައިރާ ރަޟިޔަﷲ އަންހު ރިވާކުރެއްވި ޙަދީޘެއްގެ މާނައިގައި ވެއެވެ. ރަސޫލާ ޞައްލަﷲ ޢަލައިހި ވަސައްލަމަ ޙަދީޘް ކުރެއްވިއެވެ. “އެ ގެއެއްގައި ބަޤަރާ ސޫރަތް ކިޔެވޭނަމަ ޝައިތާނާ ދުވެފިލާނެއެވެ.” އެހެންކަމުން ޖިންނި ޝައިތާނުންގެ ކިބައިން ރައްކާތެރިވުމަށް ބަޤަރާ ސޫރަތް ކިޔުމަކީ ވެސް ވަރަށް މުހިންމު ކަމެކެވެ.
