މުޙައްމަދު އިޝާން ޙުސައިން
އަހަރުމެން މިއަދު ދަންނަ ޕީރިއޮޑިކް ޓޭބަލްގެ ފްރޭމްވޯކް އުފެއްދީ 1869 ވަނަ އަހަރު ރަޝިއާއަށް ނިސްބަތްވާ ކެމިސްޓެއް ކަމުގައިވާ ޑިމިޓްރީ މަންޑަލޭވްއެވެ. މި ޕީރިއޮޑިކް ޓޭބަލް ފުރަތަމަ އެކުލަވާލިއިރު، އެކުލަވާލާފައިވަނީ ފަހުން ދެނަގަނެވެން ހުރި ޕީރިއޮޑިކް ޓޭބަލްގެ އެލެމެންޓްތަކަށް ޖާގަ ދޫކުރަމުންނެވެ. މި ޗާޓު އެކުލަވާލުމުގެ ތެރޭގައި ޑިމިޓްރީ މަންޑަލޭވްއަށް ދަސްވީ، އޭގައިވާ ކޮންމެ އެލެމެންޓަކީ ވެސް ފުރިހަމަ ސެޓެއްގެ އެއްބައި ކަމުގައެވެ. އަދި ހަމަ އެކަމުގެ ޙަޤީޤަތްތައް ހޯދުމަށް ކުރެވުނު އިތުރު ދިރާސާތަކުން، މީގެކުރިން އެނގިފައިނުވާ ތިން އެލެމެންޓެއް ދެނެގަތެވެ. އެ ތިން އެލެމެންޓަކީ ގޭލިއަމް، ސްކެންޑިއަމް އަދި ޖަރމޭނިއަމްއެވެ.
ޕީރިއޮޑިކް ޓޭބަލަކީ 100 އަށް ވުރެ ގިނަ ކެމިކަލް އެލެމެންޓްތަކުގެ މައްޗަށް އެކުލެވިގެންވާ ޗާޓެކެވެ. އަދި ޕީރިއޮޑިކް ޓޭބަލްގައި މި ދެންނެވުނު އެލެމެންޓްތައް އެތުރިގެންވަނީ އެ އެލެމެންޓްތަކުގެ އެޓޮމިކް ނަންބަރަށް ނިސްބަތްކޮށްގެންނެވެ. އެލެމެންޓެއްގެ އެޓޮމިކް ނަންބަރު ކަނޑައެޅިގެންދަނީ އެލެމެންޓެއްގައި އެކުލެވޭ އެޓޮމްތަކުގައި ހިމެނޭ ޕްރޮޓޯންތަކުގެ ނިސްބަތުންނެވެ. އެންމެ ދަށް އެޓޮމިކް ނަންބަރުގެ އެލެމެންޓުން ފެށިގެން އެންމެ ގިނަ އެޓޮމިކް ނަންބަރުގެ އެލެމެންޓަށް ތަރުތީބު ކުރެވިފައިވާ އެ ޗާޓު ފެށެނީ [ހައިޑްރޮޖެން] އިންނެވެ. ހައިޑްރޮޖެންގެ އެޓޮމިކް ނަންބަރަކީ 1 އެވެ.
ގްރޫޕްތަކަކަށް ކުލަ ކޯޑުން ބެހިފައިވާ އެ ޗާޓުގައިވާ އެކި ކުލަތަކާއި ގްރޫޕުތަކުން ނިސްބަތް ކޮށްދެނީ އެލެމެންޓްތަކުގެ ސިފަތަކާއި އިތުރު ކަންކަމެވެ. ޕީރިއޮޑިކް ޓޭބަލްގެ ގްރޫޕް 1 ގައި ހިމެނޭ އެލެމެންޓްތަކަކީ [އަލްކަލައި މެޓަލްސް] އެވެ. ގްރޫޕް 2 ގައި ހިމެނެނީ [އަލްކަލައިން-އަރތު] ގެ އެލެމެންޓްތަކެވެ. މިއީ ހަމައެކަނި ކޮމްޕައުންޑްތަކުގައި ޤުދުރަތުން އުފެދޭ އެލެމެންޓްތަކެކެވެ. ދަނބު ކުލައިން ފެންނަ ގުރޫޕުގައި ހިމެނެނީ [ޓްރާންޒިޝަން މެޓަލްސް] ކަމުގައިވާ ރަނާއި ކޮޕަރ ފަދަ އެލެމެންޓްތަކެވެ. ތިރިން ދެވަނަ ސަފުގައި [ލެންތަނައިޑްސް] ކިޔޭ އެލެމެންޓްސް އެކުލެވިގެންވާއިރު އެންމެ ތިރީ ސަފުގައި ހިމެނެނީ [އެކްޓިނައިޑްސް] އޭ ކިޔޭ އެލެމެންޓްސްއެވެ. ގްރޫޕް 0 ކަމަށްވާ އެންމެ ކަނާތަށް ފެންނަ ބަރީގައި ހިމެނެނީ ނޯބްލް ގޭސްތަކެވެ.
އެޓޮމްތަކުގައި ގިނަފަހަރު އެކުލެވޭ ޕްރޮޓޯންގެ އަދަދާއި އިލެކްޓްރޯންގެ އަދަދު ހަމަހަމަވެގެންވެއެވެ. އެހެންކަމުން އެޓޮމިކް ނަންބަރުން އެޓޮމެއްގައި ހިމެނޭ އިލެކްޓްރޯންގެ އަދަދު ވެސް ދައްކުވައިދެއެވެ. އެލެމެންޓެއްގެ އެޓޮމްގެ އެވަރެޖް ބަރުދަނަށް ކިޔޭ ނަމަކީ [އެޓޮމިކް މާސް] އެވެ.
އެޓޮމިކް މާސްއަކީ އެޓޮމްގެ ނިއުކްލިއަސްގައި އެކުލެވޭ ޕްރޮޓޯންސް އަދި ނިއުޓްރޯންސްއިން ކަނޑައަޅައިދޭ އެއްޗެކެވެ. ޕީރިއޮޑިކް ޓޭބަލްގައި ހިމެނޭ ކޮންމެ ގްރޫޕެއް ވެސް އެކުލެވިގެންވަނީ ވަކި އަދަދަކަށް އޭގެ ބޭރު ފަށަލާގައި އިލެކްޓްރޯންސް ހިމެނޭ އެލެމެންޓްތަކުންނެވެ. އެކުގައި ގުރޫޕު ކުރެވިފައިވާ ހުރިހާ އެލެމެންޓްތަކަކީ ވެސް އެއްގޮތް ސިފަތަކެއް ލބިގެންވާ އެލެމެންޓްތަކެކެވެ. ކޮންމެ ގްރޫޕަކަށް ވެސް ނަމަކާއި ނަންބަރެއް ލިބިގެންވެއެވެ. 8 ގުރޫޕަށް އެކުލެވިގެންވާ ޕީރިއޮޑިކް ޓޭބަލަށް އެންމެ ފަހުން އެލެމެންޓެއް އިތުރުވީ 2016 ވަނަ އަހަރުއެވެ. މި އެލެމެންޓްތަކަކީ ނިހޯނިއަމް، މޮސްކޯވިއަމް، ޓެނެސީން އަދި އޯގަނެސަންއެވެ.
