އިސްމާޢީލް އާތިފް އަޙްމަދު
ދިވެހިރާއްޖޭގައި ސިފައިންގެ ހަރަކާތްތައް ފެށިފައިނުވާ ދުވަސްވަރެއް، ތާރީޚުގައި ފެންނާކަށް ނެތޭ ދެންނެވިދާނެވެ. އެހެނީ ދުނިޔެ ތަރައްޤީއަށް ދަތުރުކުރަމުން އައިއިރު، ހިންދީ ބަހާއި ފާރިސީބަސް އުފަންވެގެން “ސިފަހީ” އޭ ބުނާ ހަނގުރާމަތީ ތަމްރީނު ލިބިފައިވާ މީހާގެ ނަން ބޭނުންކުރެވޭ މީހުން ކުރާ މަސައްކަތް ކުރުމަށް ކޮންމެ ޒަމާނަކު ވެސް ދިވެހިންގެ ތެރެއިން ވަކި ބަޔަކު ޚާއްޞަ ކުރެވިފައިވެއެވެ. މި ޚާއްޞަ ލަޝްކަރަކީ ސިއްޙީގޮތުން ހަށިހެޔޮ، މަސައްކަތުގެ މައިދާނުގައި ހުޝިޔާރު އަދި ތަމްރީނުތަކުގައި އަބަދުވެސް ހުނަރުވެރި ފައުޖެކެވެ.
ދިވެހި ޖުމްހޫރިއްޔާއަށް ނިސްބަތްވާ ދިވެހިރާއްޖޭގެ ޤައުމީ ދިފާޢީ ބާރަކީ ނަފްސާނީ ގޮތުންނާއި ޖިސްމާނީ ގޮތުން ދުޅަހެޔޮބައެކެވެ. މިގޮތުން ސިފައިންނަށް އަމާޒުކޮށްގެން ހިންގާ އެއްގަމާއި ކަނޑާއި އަދި ވައިގެ ތަމްރީނުތަކުން އަންތަރީސް ކުރުވާވަރުގެ ކާމިޔާބީތައް ހާސިލުކޮށްފައިވާ ސިފައިން މިއަދު ދިވެހި އަސްކަރީ ފައުޖުގައި އެބަތިއްބެވެ. ކުރިމަތިވާ ހާދިސާތަކާއި މެދުވެރިވާ ހައްސާސީ ދަނޑިވަޅުތަކުގައި އަމިއްލަ ފުރާނައަށް ބެލުމެއްނެތި ސިފައިންނަށް މަތިކުރެވިފައިވާ ވާޖިބު އޭގެ އެންމެ ފުރިހަމަ ގޮތުގައި އަދާކުރަމުން ގެންދަނީ، ސިފައިންގެ މީހާއަށް ލިބޭ ގެއްލުމަކަށް ނުބަލައި މުޅި ޤައުމުގެ ޙައްޤުގައެވެ. ޤައުމަށް ދިމާވާ ކާރިސާތަކުގައި ބަދަހި ސަފުތަކެއްގެ ގޮތުގައި އިންސާނިއްޔަތުގެ އަތުން އެހީތެރިވަމުން ދަނީ މަދަދުވެރި ޤައުމީ އަސްކަރީ ލަސްކަރެވެ. އެހެން ކަމުން ދިވެހި ސިފައިންގެ ފައުޖަކީ ހަށިހެޔޮ، ހިތްހެޔޮ، ހިތްތަކުން ރުކުރުވާލާފައިވާ ޤައުމީ ބަދަވީންނެވެ.
ދިވެހި ސިފައިންގެ ބާރަކީ ސިފައިންނާ ހަވާލުކުރެވިފައިވާ ޒިންމާ އަދާކުރުމުގައި އެފަދަ ދެވަނައެއް ނުވާނެފަދަ ހުޝިޔާރު ފައުޖެކެވެ. އެހެނީ، ބަވަނަވަމުންދާ ދުނިޔޭގެ އޮއިވަރާ އެއްވަރަށް މި ވަޠަނީ ނައު އަމާން ބަނދަރެއްގައި ބާރަށް، ވަރުގަދައަށް އައްސާލުމުގައި ކެނޑި ނޭޅި ދަނީ އަބަދުމެ މަސައްކަތް ކުރަމުންނެވެ. އިރުވައި މޫސުމުގެ ހަޅައިގެ ބާރުވަޔާއި، ހުޅަނގު މޫސުމުގެ ތޫފާނީ، ގަދަ ކޮޅިގަނޑުތަކުން ދިވެހިންގެ ކަރާމާތާއި އިސްތިޤުލާލު ދެމެހެއްޓުމަށް، އަންނަ ހިރަފުހަކަށް ބެލުމެއްނެތި ކަށިން ހިތްވަރުނެރެ ހިތްމަތާއި މިންނަތުން ހަރަކާތްތެރިވަމުންނެވެ. ފަންނުވެރިކަމުގެ އައު ދުނިޔޭގެ އަލިކަމުން މުޅި އަސްކަރީ ފައުޖާއި ދިވެހި ވަންތަކަން ރޯޝަންކުރުމަށް ސިފަވީ އަޖުދާދުން ދަނީ ޙުއްބުލް ވަޠަންގެ ޖޯޝާއި ރޫޙުގައި އެތައް ޚިދުމަތްތަކެއް ކުރަމުންނެވެ. ބޭރު ކަރައެއްގެ ބާޣީންގެ ފަރާތުން އަތުވެދާނެ ޢުދުވާނީ ހަމަލާއަކަށް، ދޮންބަންޑާރައިންގެ އައްޑަނަކޮޅާއި މުޙައްމަދު ތަކުރުފާނުގެ ކަނޑިކޮޅާއި އަދި ޝަހީދު ޙުސައިން ޢާދަމްގެ ހިތްވަރުން ހިތްވަރުލިބި، އެއްވެސް ބިރުވެރިކަމެއް ޖެހިލުމެއްނެތި، މި އަސްކަރިއްޔާގެ ސިފައިންގެ މޭ ދިއްކޮށްލަނީ މާތްވެގެންވާ އިސްލާމީ ވަޙުދަތާއި ދިވެހި މަތިވެރި ބިމަށް ލޭ އޮހޮރުވާ ޝަހީދަކަށްވުމުގެ ޢަޒުމުގައެވެ.
ހަމަ ގައިމުވެސް، ދިވެހި އަސްކަރީ ފައުޖަކީ ސިފައިންނަށް ދެވޭ ތަމްރީނުތަކުގައި ނުހަނު ހުނަރުވެރި ބައެކެވެ. އެގޮތުން ސިފައިންނަށް ހިންގޭ ތަމްރީނުތަކުން ސިފައިން ހޯދާ ކާމިޔާބީއާއި ތަޢުރީފުގެ ބަސްތަކުން ބަރުތީލަ ކުރާ އެތައް ހިތްވަރުގަދަ ބަދަވީންނެއް މިއަދު ދިވެހި އަސްކަރިއްޔާގައި އެބަތިއްބެވެ. އަދި އަސްކަރީ އެކުވެރި ޤައުމުތާއި ރާއްޖޭގައި ކުރިއަށް ގެންދާ އެކި ފަންތީގެ ތަމްރީނުތަކުން އެއްވަނަ ދަރަޖައިން ފާސްވެ، ރަން އަކުރުން ފަވާލެވޭ ދިވެހި އަސްކަރީ ފައުޖާއި މުޅި ޤައުމު ފަޚުރުވެރިވާފަދަ ސިފަވީ އެތައް ދަރީންނެއް މިއަދު އެބަތިއްބެވެ. ހަމައެފަދައިން ލިބިފައިވާ ޢިލްމާއި ޙިލްމުގެ ބޭނުންކޮށްގެން ޙިކުމަތްތެރިކަމާއެކު ދިވެހި ޤައުމާއި ރައްޔިތުންނަށް ޚިދުމަތް ކުރައްވާ ޑޮކްޓަރުންނާއި ނަރުހުން މި ދިފާޢީ ބާރުގައި އެބަތިއްބެވެ. އަދި ހުނަރުވެރިކަމާއި ފަންނުވެރިކަމާއެކު މަސައްކަތްކުރަމުންދާ އިންޖިނިއަރުންނާއި އެއްގަމާއި ކަނޑާއި ވައިގެ އުޅަނދުތަކުގެ މާލިމީކަން ބެލެހެއްޓުމުގައި ވެސް ސިފައިން މިއަދު އެބަތިއްބެވެ. އަދި މީގެ އިތުރުން ވެސް އެހެނިހެން އެތައް ދާއިރާއަކުން ފާހަގަކޮށްލެވޭ ޤައުމު ފަޚުރުވެރިވާފަދަ އެތައް ދިވެހި ދަރީންނެއް މިއަދު ދިވެހި އަސްކަރިއްޔާގައި އެބަތިއްބެވެ.
ދިވެހިރާއްޖޭގެ ޤައުމީ ދިފާޢީ ބާރަކީ ޤައުމީ މަސްލަޙަތު ދިރުވުމުގައި ނަމޫނާ ބައެކެވެ. އަދި މި ހަނގުރާމަމަތީ ފައުޖަކީ ހަށިހެޔޮ، ހުޝިޔާރު ދިވެހިރާއްޖޭގެ ސިފަވީ ބަދަވީންނެވެ. ދިވެހިރާއްޖޭގެ ފަޚުރުވެރި، ހުނަރުވެރި މި ދިވެހި އަސްކަރީ ފައުޖުގެ ކޮންމެ ބަދަވިއަކަށް ޓަކައި މިއަދު ދިވެހި ކޮންމެ ދަރިޔަކު ވެސް ފަޚުރުވެރިވެއެވެ.
