ޙުސައިން ޢަލީ
ދިވެހި ސިފައިންނަކީ ދިވެހި ޤައުމުގެ ދިފާޢީ އައްޑަނައެވެ. ދިވެހި ސިފައިންނަކީ ޤައުމީ ޚިދުމަތުގައި ނަފުސަށް ވުރެ ޤައުމީ ޚިދުމަތް އިސްކުރުމަށް އަބަދުވެސް ސަމާލުކަންދޭނެ ފަހުލަވާނުންނެވެ. ދިވެހި ސިފައިންނަކީ ޤައުމަށް ޓަކައި ތިމާގެ އަމިއްލަ ފުރާނަ ޤުރުބާންކުރަން މާތް ﷲ ގަންދީ ހުވާކޮށްގެން ތިބޭ ބައެކެވެ. ދިވެހިރާއްޖޭގެ ޤައުމީ ދިފާޢީ ބާރަކީ ދިވެހި ޤައުމުގެ ސިޔާދަތާއި އިސްތިޤްލާލު ހިމާޔަތްކުރުމުގެ އެންމެ އިސް ވާޖިބު މަތިކޮށްފައިވާ މުއައްސަސާއެވެ. އެހެންކަމުން ދިވެހި ސިފައިންގެ އެންމެ އިސް ވާޖިބަކީ ޤައުމީ ޚިދުމަތެވެ. ޤައުމުގެ ސިޔާދަތާއި އިސްތިޤްލާލު ރައްކާތެރި ކުރުމެވެ. ދިވެހީންގެ އެންމެ މަތިވެރި ނަސީބު ކަމުގައިވާ މާތްވެގެންވާ އިސްލާމްދީން ހިމާޔަތް ކުރުމެވެ. ދިވެހި ލޮބުވެތި ޤައުމުގެ ދިފާޢެވެ.
ސިފައިންގެ ތަމްރީނުތައް އަމާޒުކޮށްފައި ވަނީ ވެސް މި ދެންނެވި ފަދަ ޤައުމީ ޚިދުމަތަށް އިސްކަންދިނުމުގެ އަމާޒު ހާސިލު ކުރުމަށެވެ. އަދި މި ތަމްރީނުތަކުގެ ތެރެއިން ޤައުމިއްޔަތުގެ އިންތަކާއި މިންތަކުގެ ތެރޭގައި ސިފައިންގެ ވިސްނުމާއި ފިކުރު ބެހެއްޓުމަށާއި ދެމެހެއްޓުމަށް ޚާއްޞަ ސަމާލުކަމެއް ދެވެއެވެ. ސިފައިންގެ މަސައްކަތްތައް ރާވާފައިވަނީ ވެސް މި މަޤުސަދު ހާސިލު ކުރެވޭނެ ގޮތްތަކަށެވެ. ސިފައިންގެ ސަފުތައް ތަރުތީބު ކޮށްފައިވަނީ ވެސް ހަމަ މި ބީދައިންނެވެ. އަދި މި ދެންނެވި ސަމާލުކަން، ދުނިޔެއާއި ސަރަހައްދީ ސަލާމަތީ މާހައުލަށް އަންނަމުންދާ ބަދަލުތަކާއި ދިވެހި ޤައުމުގެ ސަލާމަތީ ވެށްޓަށް އަންނަމުންދާ، އަދި އަތުވެދާނެ ބަދަލުތަކަށް އަބަދުވެސް ރިއާޔަތް ކުރެވެއެވެ. ޝައްކެއްނެތެވެ. ޤައުމީ ޚިދުމަތަށްވުރެ ވަކި މުހިންމު، އަދި ވަކި ޝަރަފުވެރި މަސައްކަތެއް ސިފައިންނަކަށް ނެތެވެ.
ނޮވެންބަރު މަހުގެ ތިންވަނަ ދުވަހަކީ ސިފައިންނަށް ވަރަށް ޚާއްޞަ ދުވަހެކެވެ. މި ލޮބުވެތި ޤައުމަށް ވެސް ޚާއްޞަ ދުވަހެކެވެ. ދިވެހީންގެ ހިތްތަކަށް ބިރުވެރިކަމާއި ނާމާންކަން ގެނެސްދޭ ދުވަހެކެވެ. ހަމައެއާއެކު ހިތްތަކަށް ހިތްހަމަޖެހުމާއި ޝުކުރުވެރިކަމުގެ އިހުސާސް ގެނުވައިދޭ ދުވަހެއް ވެސް މެއެވެ. 1988 ވަނަ އަހަރުގެ ނޮވެންބަރު ތިންވަނަ ދުވަހު ދިވެހީންނަށް ނަޞްރާއި ފަތަޙަ ލިބިގެން ދިޔައީ މާތް ﷲ ގެ ވާގިފުޅާއެކު، ދިވެހި ސިފައިންގެ ހިންމަތާއި މިންނަތުންނެވެ. އަދި ދިވެހި ލޮބުވެތި ރައްޔިތުންގެ ހެޔޮ ދުޢާއާއި ހިތްވަރުންނެވެ. އެ ދުވަހު ދިވެހީން ދައްކުވައިދިން އެއްބައިވަންތަކަމުގެ ލާމަސީލު ނަމޫނާއަކީ ތާއަބަދަށް ލިބިގެންދާ ވަރަށް ފުރިހަމަ ޢިބުރަތެކެވެ. ޝައްކެއް ނެތެވެ. ނަވާރަސަތޭކަ އަށްޑިހައިގެ ފަހުކޮޅު ދިވެހި ޤައުމު އޮތްގޮތް ހިތްމައްޗަށް ގެނައުން މުހިންމެވެ. މިކަމުގެ ސަބަބުން ޤައުމުގެ އެކި ދާއިރާތައް އޮންނާނެ ހާލަތު ވަޒަންކުރަން ފަސޭހަވާނެކަމަށް ދެކެމެވެ. މިގޮތުން ޤައުމުގެ އެންމެ މުހިންމު އެއް ގުނަވަން ކަމުގައިވާ އަސްކަރީ ދާއިރާ އޮތްގޮތް ބަލާލަމާތޯއެވެ.
ޤައުމީ ނިސްބަތުން ބަލާއިރު އޭރު، ދިވެހި އަސްކަރިއްޔާއަކީ ވަރަށް ކުޑަކުޑަ އަސްކަރިއްޔާއެކެވެ. އަސްކަރީ ބަހުރުވައިގެ ފުރިހަމަ މާނައިގައި ތަރުޖަމާ ވެސް ނުކުރެވޭނޭ ދެންނެވިދާނެއެވެ. އެއީ އަސްކަރިއްޔާއެއްގައި ނަމަ ހުންނަންޖެހޭ ނުވަތަ ފުރިހަމަވާންޖެހޭ މަސްދަރުތަކެއް އޭރަކު ދިވެހި އަސްކަރިއްޔާގައި ފުރިހަމައެއް ނުވެއެވެ. ޖުމްލަގޮތެއްގައި ދަންނަވާނަމަ، އޭރު އޮތީކީ އަސްކަރިއްޔާއެއް ނޫނެވެ. އޭގެ ބަދަލުގައި އޭރު އޮތީ، ފުރިހަމަ އަސްކަރިއްޔާއަކަށް ނުވާ ފައުޖެކެވެ. އޭރު ދިވެހި ސިފައިން އަދާކުރަމުންދިޔަ ދައުރަކީ ފުރިހަމަ އަސްކަރީ ދައުރަކަށްވުރެ ބޮޑަށް މުޖުތަމަޢުގެ ރައްކާތެރިކަން ކަށަވަރުކޮށް ބެލެހެއްޓުމުގެ ދައުރެއްކަމަށް ދެންނެވިދާނެއެވެ. އޭރު ސިފައިންނަށް ތަޢުލީމާއި ތަމްރީނު ލިބިފައިވާ މިންވަރާއި އެފަދަ ފުރުޞަތުތަކަށް ފަހިވެފައިވާ މިންވަރު ވެސް ވަރަށް ކުޑައެވެ. އަސްކަރީ ތަމްރީނު ދޭގޮތާއި، އަސްކަރީ ތަމްރީނު ލިބިގަތުމަށް ފަހިވެފައިވާ ވަސީލަތްތަކާއި، ބޭނުންކުރަން ލިބޭ އަސްކަރީ އާލާތްތަކުގެ މިންވަރު ކިތަންމެހާ ވެސް މަދެވެ. އަދި އޭރު ދެމުންދިޔަ ތަމްރީނުތަކަށްފަހު، އެ ތަމްރީނުގައި ދަސްކޮށްދޭ ކަންކަން ދެމެހެއްޓެނިވި ގޮތެއްގައި ފަރިތަކުރުމަށް ލިބިގެންދިޔަ ފުރުސަތުތައް ވެސް އިންތިހާއަށް މަދެވެ. ހަމަ އެއާއެކު އޭރު ރާއްޖެއިން ބޭރުގެ އަސްކަރީ މަރުކަޒުތަކުން ތަޢުލީމާއި ތަމްރީނު ފުރިހަމަ ކޮށްފައިވާ ސިފައިން ވެސް ނުހަނު މަދެވެ. އެހެނަސް އެ ދުވަސްވަރުގެ ހާލަތަށް ބަލާއިރު، އޭރުވެސް ދިވެހި ސިފައިންގެ ގާބިލުކަން އާދަޔާއި ޚިލާފަށް ރަނގަޅުކަމާއި ހަރުދަނާކަމަށް އަޅުގަނޑުމެން އެއްބަސްވާން ޖެހެއެވެ. ހަމައެއާއެކު، ހާލަތާއި ގުޅޭގޮތުން އޭރުވެސް، ސިފައިން ތިބީ ޤައުމުގެ ދިފާޢީ އައްޑަނައިގެ ދައުރު އަދާކުރުމަށް ފުރިހަމައަށް ތައްޔާރަށްކަމަށް ޤަބޫލުކުރަން ޖެހެއެވެ. ސަބަބަކީތޯއެވެ. 1988 ވަނަ އަހަރުގެ ނޮވެންބަރު މަހުގެ ތިންވަނަ ދުވަހު ރާއްޖެއަށް ކުރިމަތިވި ޢުދުވާނީ ހަމަލާގައި އިސްލާމް ދީނާއި، ދިވެހި ޤައުމުގެ މިނިވަންކަމާއި، ލޮބުވެތި ރައްޔިތުން ހިމާޔަތްކޮށް ރައްކާތެރި ކުރުމުގައި ސިފައިން ދެއްކި ހިތްވަރާއި އަސްކަރީ މަސައްކަތް އަޅުގަނޑުމެންނަށް ފެންނަން އޮތީމައެވެ.
ނޮވެންބަރު މަހުގެ ތިންވަނަ ދުވަހު ޝަހީދުވެގެން ދިޔަ ހިތްވަރުގަދަ ސިފައިންނާއި ލޮބުވެތި ދިވެހި ފަރުދުންގެ ހަނދާން އާކޮށް، އެ ޝަހީދުންގެ ފުރާނައަށް ހެޔޮ ރަޙުމަތް ލައްވާ ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ކީރިތި ﷲ ގެ ޙަޟްރަތުގައި ދުޢާ ދަންނަވަމެވެ. ވަކިން ޚާޢްސަކޮށް ސިފައިންގެ ތެރެއިން ޝަހީދުވެގެން ދިޔަ ކޮންމެ ބޭފުޅަކީ ވެސް ޤައުމުގެ ޙައްޤުގައި، އެ ބޭފުޅަކަށް ކުރެވުނު އެންމެ މަތިވެރި މަސައްކަތްތައް ކުރުމުގައި ޝަހީދުވެގެން ދިޔަ ބަޠޮލުންނެވެ. ހަމައެއާއެކު އެ ދުވަހުގެ ބަޠޮލުންގެ ތެރެއިން ހިތްވަރާއެކު މަސައްކަތްކުރެއްވި ދިރިތިއްބެވި ބަޠޮލުންގެ މަސައްކަތް ފާހަގަކޮށް، އެ ބޭފުޅުންނަށް އިޚްލާޞްތެރި ޝުކުރު ދަންނަވަމެވެ. ޝަހީދީ ބަޠޮލުންގެ ތެރެއިން ވެސް ކޯޕްރަލް ޝަހީދު ޙުސައިން އާދަމްގެ ނަން ޚާއްޞަކޮށް ފާހަގަ ކޮށްލަންޖެހެއެވެ.
ކޯޕްރަލް ޝަހީދު ޙުސައިން އާދަމަކީ އޭރު، ނޫކަށި ފުރައިގެ ޒުވާނެކެވެ. ކުޑައިރުއްސުރެ، ސިފައިންގެ ވަޒީފާއަށް ނުހަނު ޝައުޤުވެރިވި، އަދި ޤައުމީ ޚިދުމަތުގައި ދެމިހުރުމުގެ ވަރުގަދަ ޢަޒުމުގައި ހުރި ފަހުލަވާނެކެވެ. އެކަން ސާބިތުވެގެން ދަނީ ކޯޕްރަލް ޝަހީދު ޙުސައިން އާދަމް ޚިދުމަތުގައި ހޭދަކުރެއްވި މުއްދަތުގައި އޭނާގެ ސުލޫކާއި އަޚުލާޤު ދަމަހައްޓާފައިވާ ގޮތްތަކުންނާއި ހަވާލުކުރާ މަސައްކަތް ކުރުމުގައި ޢަމަލުތައް ގެންގުޅުނު ގޮތްތަކުންނެވެ. މިކަން އަޅުގަނޑުމެންނަށް ކަށަވަރު ވެގެންދަނީ ކޯޕްރަލް ޝަހީދު ޙުސައިން އާދަމާއި އެކު ސިފައިންގޭގައި އުޅުއްވި އެކުވެރިންނާއި އޭނާގެ ކޮމާންޑަރުންގެ ގޮތުގައި މަސައްކަތް ކުރައްވާފައިވާ ބޭފުޅުން ދެއްވާފައިވާ މަޢުލޫމާތުތަކުންނެވެ. ކޯޕްރަލް ޝަހީދު ޙުސައިން އާދަމަކީ ވަގުތަށް ވަރަށް ފަރުވާތެރި ބޭކަލެކެވެ. ނަމާދުކުރުމަށް ޚާއްޞަ ސަމާލުކަން ދެއްވި ބޭކަލެކެވެ. ސާފުތާހިރުކަމަށް ވަރަށް ބޮޑަށް ލޯބިކުރެއްވިއެވެ. މަސައްކަތަށް އިންތިހާއަށް ފަރުވާތެރިކަން ދެއްވިއެވެ. ކިޔަމަންތެރިކަމުގެ ނަމޫނާ ދެއްކެވިއެވެ. އެހެންކަމުން ކޯޕްރަލް ޝަހީދު ޙުސައިން އާދަމަކީ ސިފައިންގެ މީހެއްގައި ހުންނަންޖެހޭ ސިފަވަންތަ އަޚުލާޤުގެ އެންމެ މޫރިތި ސިފަތަކުން ޒީނަތްތެރިވެފައިވާ ބޭކަލެކެވެ. އަޅުގަނޑުމެންގެ ބަހުރުވައިންނަމަ، ކޯޕްރަލް ޝަހީދު ޙުސައިން އާދަމަކީ އިސްލާމީ ޢަޤީދާގައި ސާބިތުވެ ހުންނެވި، ނަފުސަށް ވުރެ ޤައުމު އިސްކުރައްވާ، ދީނާއި ޤައުމާއި ރައްޔިތުންނަށް ޓަކައި ފުރާނައިން ޤުރުބާންވުމަށް ތައްޔާރުވެގެން ހުންނެވި ފުރިހަމަ ސިފައިންގެ މީހެކެވެ.
ނޮވެންބަރު ތިންވަނަ ދުވަހުގެ ބިރުވެރި ހާދިސާގައި ކޯޕްރަލް ޝަހީދު ޙުސައިން އާދަމްގެ ޢަމަލުތައް ބެހެއްޓެވި ގޮތާއި، ކުރެއްވި މަސައްކަތްތަކަށް ބަލާލަމާތޯއެވެ. އެދުވަހު ދިވެހިރާއްޖެއަށް ކުރިމަތިވީ ޢުދުވާނީ ހަމަލާއެކެވެ. މި ޒަމާނުގައި ވެސް ބޭނުންކުރާފަދަ ހަތިޔާރުތައް ބޭނުންކޮށްފައިވާކަން ފާހަގަކޮށްލަންޖެހެއެވެ. ހަނގުރާމައިގެ ރަސްގެފާނުގެ ނަމުން މަޝްހޫރު ކަލަޝްނިކޯފް މަރުކާގެ ހަތިޔާރުގެ އިތުރުން، އަސްކަރީ ތަފާތު ހާލަތްތަކުގައި ބޭނުންކުރާ ޒާތުގެ ބަރުހަތިޔާރާއި އަތުބޮމާއި އެހެނިހެން ގޮވާތަކެތި ބޭނުންކޮށްފައިވާކަން ލިއުންތަކުން އެނގެން އެބައޮތެވެ. އަދި ބާޣީންގެ ހަމަލާގެ ރާވާފައިވަނީ އެ ދުވަސްވަރު، “ކޮންވެންޝަނަލް” ހަނގުރާމައިގެ ހާލަތްތަކުގައި ވެސް އަސްކަރީ ކޮމާންޑަރުން ހަނގުރާމައެއް ރާވާނެ ގޮތްތަކަށް ބަލައިގެން، ހައިރާންކަން ހާސިލުކޮށް، ހަލުވިކަމާއެކު ހަނގުރާމައިގެ ކާމިޔާބު ހާސިލުކުރެވޭނެ ގޮތްތަކަށް އިސްކަންދީގެންކަމަށް ދެންނެވިދާނެއެވެ. ޝައްކެއްނެތެވެ. ހަނގުރާމައެއްގެ އާޚިރު އަމާޒަކީ ކާމިޔާބެވެ. އެހެނަސް ހަނގުރާމައިގައި ޝާމިލުވާ ފައުޖުގެ ތަމްރީނާއި، ހިކުމަތާއި، ބޭނުންކުރާ އަސްކަރީ އާލާތްތަކާއި، ބައިވެރިންގެ ކުޅަދާނަކަމަށް ބަލައި، ހަމަލާ ރާވައި، ކުރިއަށް ގެންދާގޮތް ތަފާތު ވެއެވެ. ކޮންމެއަކަސް، ނޮވެންބަރު ތިނެއްގެ ހަމަލާ ބާޣީން ރާވާފައިވަނީ ދިވެހި ސިފައިންގެ މައިމަރުކަޒުގެ ހަތަރު ދިމާލަކުން ހަމަލާދީ މަދުވަގުތުކޮޅެއްގައި ބާޣީންގެ ހަމަލާ ކާމިޔާބުކޮށް ސިފައިންގެ މައިމަރުކަޒު ބާޣީންގެ ބެލުމުގެ ދަށަށް ގެނެވޭނެކަމަށް ބަލައިގެންކަން ވެސް އެ ދުވަހުގެ ލިޔުންތަކުން އެނގެއެވެ.
ނޮވެންބަރު ތިންވަނަ ދުވަހުގެ ފަތިހު ބާޣީން ހަމަލާ ދިންއިރު، ކޯޕްރަލް ޝަހީދު ޙުސައިން އާދަމް ހުރީ ދިވެހި ސިފައިންގެ އަސްކަރިއްޔާގެ މައިދޮރޯށީގެ ފާރަވެރިއެއްގެ ޝަރަފުވެރި ދައުރު އަދާކުރެއްވުމުގައެވެ. ހަމަލާގެ ވަގުތާ ހަމައަށް ވެސް، ފާރަވެރިއެއްގެ ދައުރަކީ ކޯޕްރަލް ޝަހީދު ޙުސައިން އާދަމަށް ވަރަށް ފަރިތަ ދައުރެއްކަން ޔަޤީނެވެ. އެހެނީ އެ ދުވަހުގެ ކުރީން ވެސް އެފަދަ ގިނަ މަސައްކަތްތަކެއް ކޯޕްރަލް ޝަހީދު ޙުސައިން އާދަމް ކުރައްވާފައިވާތީއެވެ. ޝައްކެއްނެތް ގޮތުގައި އަޅުގަނޑުމެންގެ ކޮންމެ ފަތިހަކީ ވެސް ވަރަށް ހިތްގައިމު ފަތިސްތަކެކެވެ. ތަފާތު ރާގުގެ ގޮވަލިތަކާއި، ނަލަނަލަ ރީތި ވައިރޯޅިތަކުން ކޮންމެ ފަތިހަކުން ވެސް އަޅުގަނޑުމެންގެ ހިތްތަކަށް ހިތްހަމަޖެހުމާއި އުފާވެރިކަން ގެނުވައެވެ. އަދި ދިވެހި ޖައްވުގެ އުދަރެހުން އިރު ފާއްދައިލަނީ ވެސް އުފާވެރިކަމާއި ހިނިތުންވުމާއި ބާއްޖަވެރިކަމާއެކުއެވެ. އެހެނަސް ނަވާރަސަތޭކަ އަށްޑިހަ އަށްވަނަ އަހަރުގެ ނޮވެންބަރު މަހުގެ ތިންވަނަ ދުވަހުގެ ފަތިސް ތަފާތެވެ. ހިތްގައިމު ގޮވަލިތަކުގެ ބަދަލުގައި އެ ދުވަހުގެ ފަތިހުގެ ވަގުތު މާލޭގެ ޖައްވު ގުގުމައިގެންދިޔައީ ނުރައްކާތެރި ބަޑީގެ އުއްޑަތަކުންނެވެ. ދިވެހީން ކުރިމަތިލާންޖެހުނީ ބިރުވެރިކަމާއި ނާމާންކަމާއެވެ. ޢަދުއްވުންގެ ޢަދާވާތްތެރި ރޭވުމެއްގެ ޝިކާރައަކަށް ދިވެހީން ނުދިޔައީ ހަމަ ކިރިޔާއެވެ. ހާލަތު މިންވަރު ކުރިގޮތުން، މި ނާޒުކު ފައްތަރުމަތީން ދިވެހީން ސަލާމަތްކުރުމުގެ އެންމެ ކުރީ ސަފުގައި ހުންނެވީ ކޯޕްރަލް ޝަހީދު ޙުސައިން އާދަމެވެ. އަދި ބާޣީންގެ ނުރައްކާތެރި ހަމަލާ ނާކާމިޔާބު ވެގެން ދިޔައީ ވެސް ކޯޕްރަލް ޝަހީދު ޙުސައިން އާދަމް ހުޝިޔާރުކަމުންކަން ދެންނެވުމަކީ އެ ދުވަހުގެ ބިރުވެރި ޖިހާދުގައި މަސައްކަތްކުރެއްވި އެހެން ފަރާތްތަކަށް ކުޑައިމީސްބަހެއް ދެންނެވުންކަމަށް އަޅުގަނޑު ނުދެކެމެވެ. ސަބަބަކީތޯއެވެ. އެ ދުވަހުގެ އެންމެ ޚާއްޞަ ކަމަކީ ބާޣީންގެ ފުރަތަމަ ހަމަލާއަށް ކޯޕްރަލް ޝަހީދު ޙުސައިން އާދަމް ދެއްވި ރައްދު ހަމަލާއެވެ. ހަނގުރާމައިގެ މިސްރާބު ބަދަލުވެ، ބާޣީންގެ ރޭވުން ވިއްސިވިހާލިވެގެން ދިޔައީ އެ ހަމަލާގައި ކޯޕްރަލް ޝަހީދު ޙުސައިން އާދަމްގެ ހުޝިޔާރު، އަދި ޖެހިލުންކުޑަ ރައްދުގެ ސަބަބުންކަމަށް ވާތީއެވެ. ހަނގުރާމައިގެ މުހިންމު އުކުޅުތަކުގެ ތެރެއިން ހަމަލާ ރައްދުވާ ފަރާތް ހައިރާންކޮށްލުމަކީ އިސްވެ، ހަމަލާ ދޭ ފަރާތުން ކޮންމެހެން ވެސް ހާސިލުކުރަން ބޭނުންވާ، ހަނގުރާމަ ކާމިޔާބުވުން ވަރަށް ބަރޯސާވެފައިވާ، ހަނގުރާމައިގެ ވަރަށް މުހިންމު އުކުޅެކެވެ. އެކަން ހާސިލުވެއްޖެނަމަ، ހަނގުރާމަ ކާމިޔާބުވުމުގެ ފުރުސަތު ފަހިވެގެން ދެއެވެ. ހަނގުރާމައެއްގައި ކޮންމެ ކަހަލަ ހަމަލާއެއް ރޭވިކަމުގައިވިއަސް، ހަމަލާ ރައްދުވާ ފަރާތް ހައިރާންކުރެވޭ ފަދަ ގޮތަކަށް ހަމަލާ ރޭވުމަކީ ހަމަލާ ރާވާ ކޮމާންޑަރުން ވަރަށް ބޮޑަށް އިސްކަންދޭ ކަމެކެވެ. އަދި މިއީ އަސްކަރީ އަސާސްތަކުގެ ތެރޭގައި ހިމެނޭ މުހިންމު އަސާސެއް ވެސް މެއެވެ. އެހެންކަމުން އަސްކަރީ ނަޒަރުން ބަލާއިރު، ކޯޕްރަލް ޝަހީދު ޙުސައިން އާދަމް އެދުވަހު ކުރި މަސައްކަތަކީ ވަރަށް ޖެހިލުން ކުޑަ، ހިތްވަރުގަދަ މަސައްކަތެކެވެ. ވަކިން ޚާއްޞަކޮށް، އެފަދަ ހަމަލާއެއް ކުރިމަތިވެދާނެކަމަށް އެއްވެސް މިންވަރަކަށް ހީކުރެވޭނެފަދަ މާހައުލެއްނެތި، އެއްވެސް ފަސްޖެހުމެއްނެތި ނުހަނު ހުޝިޔާރުކަމާއެކު ކޯޕްރަލް ޝަހީދު ޙުސައިން އާދަމް ރައްދު ހަމަލާ ދިނުމަކީ ހައިރާންވެ އަންތަރީސްވާފަދަ ޢަމަލެކެވެ. މިޢަމަލުން ސާބިތުވެގެން ދިޔައީ އަސްކަރީ މައިމަރުކަޒުގެ މައިދޮރޯށީގެ ފާރަވެރިކަން އަދާކުރުމުގައި ކޯޕްރަލް ޝަހީދު ޙުސައިން އާދަމް ދެއްވި އަހުމިއްޔަތުކަމެވެ. މާހައުލަށް އަހުލުވެރިވެ، ހަރުދަނާ ވިސްނުމާއެކު، ގޮތް ނިންމުމުގެ ކުޅަދާނަކަން ހުރި މިންވަރެވެ.
ކޯޕްރަލް ޝަހީދު ޙުސައިން އާދަމްގެ އަވަސް، ހަލުވި، އަދި ކުއްލި ރައްދު ހަމަލާގެ ސަބަބުން ބާޣީންނަށް ވަރަށް ބޮޑު ސިހުމަކާއި ހައިރާންކަމެއް ލިބިގެންދިޔަކަން ކަށަވަރެވެ. ބާޢީންގެ ރޭވުން ވިއްސިވިހާލިވެގެން ދިޔައެވެ. އަދި އެކަމުގެ ސަބަބުން ދިވެހި ފައުޖު ދިމަދިމާލަށް ރުކުރުވާލަން ފުރުސަތު ލިބިގެން ދިޔައެވެ. ހިނދުކޮޅެއްގެ ތެރޭގައި ދިވެހި އަސްކަރީ ކޮމާންޑަރުން ގޮތް ނިންމުމަށް މަގުފަހިވެގެން ދިޔައެވެ. ކޯޕްރަލް ޝަހީދު ޙުސައިން އާދަމްގެ ހައިރާންކުރުވަނިވި ހަލުވި ރައްދު ހަމަލާގެ ސަބަބުން ދިވެހި އަސްކަރީ ކޮމާންޑަރުންނަށާއި އަސްކަރީ ފައުޖަށް ލިބިގެން ދިޔަ ފުރުސަތަކީ ރައްދު ހަމަލާ ވަރުގަދަކޮށް، ޤައުމުގެ މިނިވަންކަން ދިފާޢު ކުރުމުގައި ސާބިތުވެ ތިބުމަށް ލިބިގެން ދިޔަ ވަރަށް ބޮޑު ހިތްވަރެކެވެ. ރައްދު ހަމަލާއާއެކު ކޯޕްރަލް ޝަހީދު ޙުސައިން އާދަމްގެ އެންމެ ފަހުވަގުތާ ހަމައަށް ވެސް ބާޣީންގެ ރޭވުންތައް ނާކާމިޔާބުކޮށް، ދިވެހި އަސްކަރިއްޔާގެ ދިފާޢީ މަރުކަޒު ދިފާޢު ކުރުމުގައި ސާބިތުކަމާއެކު ދެމިހުންނެވިއެވެ. މާތް ﷲ ވާގިފުޅާއެކު ދިވެހި ސިފައިންގެ ހިތްވަރުގަދަކަމާއި ދިވެހި ލޮބުވެތި އެންމެހާ ރައްޔިތުންގެ ހިންމަތާއި މިންނަތުން ޢަދާވާތްތެރިންގެ ހަމަލާ ނާކާމިޔާބުވެ، ދިވެހީންނަށް ނަޞްރާއި ފަތަޙަ ލިބިގެން ދިޔައީއެވެ. ٱلْحَمْدُ لِلَّٰهِ
ނޮވެންބަރު ތިނެއްގެ ހާދިސާގައި ކޯޕްރަލް ޝަހީދު ޙުސައިން އާދަމްގެ މަސައްކަތުން އަޅުގަނޑުމެންނަށް އެނގި، ސާބިތުވެގެން ދިޔައީ ތިމާއަށް ކިތަންމެ ކުޑަމިންވަރެއްގެ ޢިލްމަކާއި ޙިލްމެއް ލިބިފައިވީނަމަވެސް، ތިމާގެ ކިބައިގައި ހަރުދަނާ އަޚުލާޤަކާއި ސުލޫކެއް ހުރެ، އިޚްލާޞްތެރިކަމާއެކު މަސައްކަތްކޮށްފިނަމަ، ނުހަނު މަތިވެރި ކާމިޔާބު ވެސް ހާސިލު ކުރެވިދާނެ ކަމެވެ. އަދި ތިމާއަށް ހަވާލުކޮށްފައިވާ މަސައްކަތުގައި އަބަދުވެސް ހުޝިޔާރުވެ ހުރުމަކީ ކިހާ މުހިންމު ކަމެއް ކަމެވެ. އެ ދުވަހުގެ ހިތްވަރުގަދަ ޝަހީދީ ބަޠޮލުންގެ ތެރެއިން، ކޯޕްރަލް ޝަހީދު ޙުސައިން އާދަމްގެ ހިތްވަރުގަދަކަމާއި ޖެހިލުން ކުޑަކަމާއި ހުޝިޔާރު ކަމުގެ ނަމޫނާއަކީ މިއަދުގެ ޖީލަށް ލިބޭ ވަރަށް އަގުހުރި ފިލާވަޅެކެވެ. އެދުވަހު އޭނާ ކުރެއްވި މަސައްކަތަށް ތަޢުރީފު ކުރާހާލު، އެ މަސައްކަތުން ޢިބްރަތް ހާސިލުކުރުމަކީ ކުރިމަގަށް ކޮށިގެންދާ ތަނަވަސް މަގަކަށް ވެގެންދާނެއެވެ. ޤައުމާއި، ދީނާއި ރައްޔިތުންގެ ޙައްޤުގައި މަސައްކަތްކުރަން ލިބޭ ކޮންމެ ވަގުތަކީ ވެސް ކިހާ މުހިންމު ވަގުތެއްކަން ވަޒަންކޮށްލަމާތޯއެވެ. ޒުވާން އުމުރުގައި، ހަށީގައި އުފެދިފައިވާ ޤައުމީ ރޫޙާއި ޤައުމީ ޖޯޝްގެ ނަތީޖާއަކީ އެއްވެސް ފަސްޖެހުމެއް ނެތި، ޤައުމުގެ ސިޔާދަތާއި އިސްތިޤްލާލު ހިމާޔަތްކޮށް، މާތްވެގެންވާ އިސްލާމްދީނުގެ ދިފާޢުގައި، ދިވެހި ޤައުމަށް ޓަކައި ފުރާނައިން ޤުރުބާންވެގެން ދިއުމެވެ. އަސްކަރީ ނަޒަރުން ބަލާއިރު ކޯޕްރަލް ޝަހީދު ޙުސައިން އާދަމް އެ ދުވަހު ކުރެއްވި މަސައްކަތަކީ ހަނގުރާމައިގެ މަޝްރަހު އަޅުގަނޑުމެންގެ ކޮޅަށް އެނބުރިގެން ދިޔަ މަސައްކަތެކެވެ. އެއްވެސް ލަސްވުމެއް ނެތި، ރައްދުގައި ކޯޕްރަލް ޙުސައިން އާދަމް ދެއްވި ހަމަލާގެ ސަބަބުން ބާޣީންނަށް ލިބިގެން ދިޔައީ ވަރަށް ބޮޑު ހައިރާންކަމެކެވެ. އެމީހުންގެ މުޅި ރޭވުން ބޮއްސުން ވެގެން ދިޔައެވެ. އެމީހުންގެ ތެރޭގައި ޚިޔާލު ތަފާތުވުން އިތުރުވެ، އެމީހުން ހާސިލުކުރަން ބޭނުންވި މަގްސަދު ހާސިލު ނުވާނެކަން ޤަބޫލުކުރުމަށް މަޖުބޫރު ކުރިވިއެވެ. އެއާއެކު ބާޣީން އެހެން ގޮތްތަކާއި ދޭތެރޭ ވިސްނަން ޖެހުނެވެ. ހަމަ މި ބީދައިން ހަލުވި ރައްދެއް ބާޣީންނާ ދިމާލަށް ނުދެވުނު ނަމަ ވެދާނެ ގޮތް ވަޒަން ކޮށްލައްވަމާތޯއެވެ. އަސްކަރީ ނަޒަރުން ބަލާއިރު، ހަލުވި ރައްދު ހަމަލާއެއް ނުދެވިއްޖެ ނަމަ، ބާޣީން ރާވާފައިވާ ގޮތަށް ހަމަލާތައް ކުރިއަށް ގެންދިއުމަށް ފުރުސަތު ލިބުމުގެ ނަތީޖާއަކަށް ވެގެންދާނީ ބާޣީންނަށް ހަނގުރާމަ ކާމިޔާބުވުމުގެ ފުރުސަތު ފަހިވުމެވެ. ކޮންމެ އަކަސް، އެ ފުރުސަތު ބާޣީންނަށް ނުލިބުނީ ކޯޕްރަލް ޝަހީދު ޙުސައިން އާދަމްގެ ހުޝިޔާރުކަމާއި ހަރުދަނާ ކަމުންކަން ކަށަވަރެވެ.
މާތް ﷲ ގެ ވާގިފުޅާއެކު މިއަދު މިވަނީ ހާލަތު ވަރަށް ބޮޑަށް ބަދަލުވެފައެވެ. ޤައުމުގެ ހާލަތެވެ. ދިވެހި އަސްކަރިއްޔާގެ ހާލަތެވެ. ނޮވެންބަރު ތިނެއްގެ ޢުދުވާނީ ހަމަލާއަށްފަހު ދިވެހި އަސްކަރިއްޔާއަށް އައި އިންޤިލާބީ ހެޔޮ ބަދަލާއެކު، ދުނިޔޭގެ ކުރިއަރާފައިވާ އަސްކަރިއްޔާތައް ތަރުތީބު ކުރެވިފައިވާ ގޮތަށް އަޅުގަނޑުމެންގެ ސަފުތައް ތަރުތީބު ކުރެވި، ޒަމާނީ އާލާތްތައް ހޯދި، ފުރިހަމަ އަސްކަރީ ތަޢުލީމާއި ތަމްރީނު ލިބުމުގެ ފުރުސަތު މިވަނީ ފަހިވެފައެވެ. މާތް ﷲ ގެ ހެޔޮ ރަޙްމަތާއެކު މިއަދު އަޅުގަނޑުމެން ވަނީ އިހުނަށްވުރެ އެތައް ގޮތަކުން ކުރިއަރާފައެވެ. އެހެނަސް އަޅުގަނޑުމެންގެ ކިބައިގައި ކޯޕްރަލް ޝަހީދު ޙުސައިން އާދަމް ގެންގުޅުނު ފަދަ ޤައުމީ ވިސްނުމާއި ޤައުމީ ޖޯޝް ހުރެގެން މެނުވީ ކާމިޔާބު ނުލިބޭނެކަމަށް ދެކެމެވެ. ކޮންމެކަހަލަ މަސައްކަތެއް ކުރަން ޖެހުނުކަމަށް ވިއަސް، ފަރުވާތެރިކަމާއި އިޚްލާޞްތެރިކަމާއެކު ކުރުމަކީ ކިހާ މުހިންމު ކަމެއްކަން ކޯޕްރަލް ޝަހީދު ޙުސައިން އާދަމްގެ ޢަމަލުތަކުން އަޅުގަނޑުމެންނަށް އެނގިގެން ދެއެވެ. ޝައްކެއް ނެތެވެ. ނޮވެންބަރު ތިންވަނަ ދުވަހު ކޯޕްރަލް ޝަހީދު ޙުސައިން އާދަމް ކުޅަ މަސައްކަތަކީ އަސްކަރީ ފަޚުރުވެރި މަސައްކަތެކެވެ.
