އެމެރިކާގެ ރައީސް ރޫސްވެލްޓާއި އެޓޮމް ބޮމާ ގުޅުމެއް ވޭތަ؟

އެމެރިކާއަކީ، އަދުގެ ދުނިޔޭގެ އެންމެ ނުފޫޒުގަދަ ޤައުމެކެވެ. އަސްކަރީ ގޮތުން ބަލާއިރު، އެމެރިކާއަކީ ދުނިޔޭގެ އެހެން ޤައުމުތަކަށް ގޮންޖަހާލުމުގެ ޤާބިލުކަން ލިބިފައިވާ، ނިއުކްލިއަރ ބާރެއް ވެސް މެއެވެ. ތާރީޚުގެ ފަތްފުތްތަކަށް ނަޒަރު ހިނގާލާއިރު، އެެމެރިކާއިން 1945 ވަނަ އަހަރު ޖަޕާނާ ދެކޮޅަށް ނިއުކްލިއަރ ހަތިޔާރު ބޭނުންކުރުން ވެގެންދިޔައީ، މުޅި ދުނިޔެއަށް ސިހުން ގެނުވި ކަމަކަށެވެ. އަޅުގަނޑުމެން އެންމެން ވެސް އެޓަމް ބޮމެއްގެ ވާހަކަ އަޑު އަހަމުއެވެ. އެހެން ނަމަވެސް، މިއީ ކިހިނެއް ހިނގާދިޔަ ކަމެއްކަމާއި، އަދި ނިއުކްލިއަރ ހަތިޔާރުގެ ވާދަވެރިކަމަށް މުޅި ދުނިޔެ ހުޅުވިގެންދިޔައީ ކިހިނަކުންތޯ، މިއީ އުފެދޭ ސުވާލެއް ނޫންތޯއެވެ؟

ދުނިޔޭގެ ތާރީޚުގައި ނިއުކްލިއަރ ހަތިޔާރު ބޭނުންކުރި ހަމައެކަނި ޤައުމަކީ އެމެރިކާއެވެ. އެމެރިކާއިން 1945 ވަނަ އަހަރުގެ އޮގަސްޓް މަހުގެ 6 ވަނަ ދުވަހު “ލިޓްލް ބޯއީ” ގެ ނަމުން ނަންދެވިފައިވާ އެޓަމިކް ބޮން ޖަޕާނުގެ ހީރޯސީމާއަށް ވައްޓާލިއެވެ. މިއީ، ދުނިޔޭގެ ތާރީޚުގައި އެންމެ ފުރަތަމަ ބޭނުންކުރި ނިއުކްލިއަރ ބޮމެވެ. އަދި 1945 ވަނަ އަހަރުގެ އޮގަސްޓް މަހުގެ 9 ވަނަ ދުވަހު “ފެޓް މޭން” ގެ ނަމުން ނަން ދެވިފަައިވާ އެޓަމިކް ބޮން ޖަޕާނުގެ ނަގަސާކީއަށް ވައްޓާލިއެވެ. މިއީ، ދުނިޔޭގެ ތާރީޚުގައި ނިއުކްލިއަރ ހަތިޔާރު ބޭނުންކުރި ދެވަނަ ފަހަރެވެ. މި ދެ ހަމަލާގެ ސަަބަބުން، މުޅި ދުނިޔެއަށް ސިހުން ގެނުވައި، މުޅި ދުނިޔެ ބިރުވެރިކަމަށް ހުޅުވިގެން ދިޔައެވެ. ތާރީޚުން އެނގޭގޮތުގައި މި ހަމަލާތަކުގައި ގާތްގަނޑަކަށް ދެލައްކަ މީހުން މަރުވިއެވެ. އަދި ނިއުކްލިއަރ ބޮމުގެ އަސަރު، ޒަމާންތަކަކަށް ދެމިގެން ދިޔައެވެ.

އެމެރިކާއިން ޖަޕާނާ ދެކޮޅަށް، ނިއުކްލިއަރ ހަތިޔާރު ނުވަތަ އެޓަމް ބޮން، ބޭނުން ކުރުމުގެ ހުއްދަ ދެއްވީ، އެމެރިކާގެ 33 ވަނަ ރައީސްގެ މަޤާމު އަދާކުރެއްވީ ހެރީ ޓްރޫމަންއެވެ. އެހެންނަމަވެސް، ހެރީ ޓްރޫމަންއަކީ، އެމެރިކާގެ ނިއުކްލިއަރ ހަތިޔާރު ޕްރޮގްރާމް ފެށި ރައީސެއް ނޫނެވެ. އެެމެރިކާއިން ނިއުކްލިއަރ ހަތިޔާރު އުފެއްދުމުގެ މަސައްކަތް ފެށީ، 1933 އިން 1945 އަށް އެެމެރިކާގެ ރައީސްގެ މަޤާމު އަދާކުރެއްވި ފްރެންކްލިން ރޫސްވެލްޓްގެ ރައީސްކަމުގެ ދުވަސްވަރުއެވެ. އޭރު، ހެރީ ޓްރޫމަން ހުންނެވީ އެމެރިކާގެ ނައިބު ރައީސްގެ މަޤާމުގައެވެ. ހެރީ ޓްރޫމަން އެމެރިކާގެ ރައީސްގެ މަޤާމަށް އިސްކުރެވުނީ، އެ މަޤާމުގައި ހުންނެވި، ފްރެންކްލިންގ ރޫސްވެލްޓް، 1945 ވަނަ އަހަރު ސްޓްރޯކެއް ޖެހި އަވަހާރަވި ހިސާބުންނެވެ.

ފްރެންކްލިންގ ރޫސްވެލްޓްގެ ވެރިކަމުގެ ދުވަސްވަރު، ނިއުކްލިއަރ ހަތިޔާރު އުފެއްދުމުގެ މަސައްކަތް އެމެރިކާއިން ސިއްރިއްޔާތުގައި ދިޔައީ ކުރަމުންނެވެ. އެހެންނަމަވެސް، މި ޕްރޮޖެކްޓްގެ ސިއްރުކަމުގެ ސަބަބުން، ނައިބު ރައީސް ހެރީ ޓްރޫމަންއަށް ވެސް މި ޕްރޮޖެކްޓާބެހޭ މަޢުލޫމާތު ލިބިވަޑައިގެންނެވީ، ރައީސްގެ މަޤާމަށް ވަޑައިގެންނެވި ފަހުންނެވެ. އެހެންކަމުން، މުޅި ދުނިޔެ ނިއުކްލިއަރ ހަތިޔާރުގެ ވާދަވެރިކަމަށް ހުޅުވާލި ފަރާތަކީ، ފްރެންކްލިން ރޫސްވެލްޓް ކަމަށް ދެންނެވިދާނެއެވެ. މިހާ ހިސާބުން އުފެދޭ ސުވާލަކީ، އެމެރިކާ ސަރުކާރުން ނިއުކްލިއަރ ހަތިޔާރު އުފެއްދުމުގެ ވިސްނުން އައީ ކީއްވެގެންތޯ، އުފެދޭ ސުވާލެވެ.

މޭންހަޓަން ޕްރޮޖެކްޓް

ޖަރުމަންވިލާތާއި ސްވިޓްޒިލެންޑްގެ ސައިންޓިސްޓުން، 1938 ވަނަ އަހަރު “ނިއުކްލިއަރ ފިޝަން” ދެނެގަތެވެ. ނިއުކްލިއަރ ފިޝަންއަކީ، ނިއުޓްރަންއެއް، ޔޫރޭނިއަން އެޓަމެއްގައި ޖެހި، ދެފަޅިވުމުން، ހީޓް އަދި ރޭޑިއޭޝަންގެ ގޮތުގައި ބޭރުކުރާ ހަކަތައެވެ. މި ހޯދުންތަކާއެކު، އައު ހަތިޔާރެއް ނުވަތަ އެނަރޖީ ސޯސްއެއް “ނިއުކްލިއަރ ފިޝަން” ގެ އެހީގައި އުފެއްދުމާމެދު ދުނިޔޭގެ ސައިންސްވެރިންގެ މެދުގައި ބޮޑު ބަހުސަކަށް ދިޔައެވެ. “ދަ މޭކިންގ އޮފް ދަ އެޓަމިކް ބޮމް” ގެ މުސައްނިފު، ރިޗާޑް ރޮޑްސް، އޭނާގެ ފޮތުގައި ލިޔުއްވާފައިވާ ގޮތުގައި، އޭރުވެސް ނިއުކްލިއަރ ހަތިޔާރަކުން ކުރިމަތިކުރުވަފާނެ ފަނާކުރަނިވި ގެއްލުން ސައިންޓިސްޓުންނަށް އެނގެއެވެ.

ނިއުކްލިއަރ ފިޝަން ދެނެގަތުމާއެކު، ނާޒީ ޖަރުމަނުން ނިއުކްލިއަރ ބޮމެއް އުފައްދަފާނެކަމަށް ހަންގޭރީގެ ފިޒީސްޓެއްކަމަށްވާ ލިއޯ ސްލިޒަރޑަށް ވިސްނުނެވެ. މި މަޢުލޫމާތު، އޭނާ އެލްބަޓް އެއިންސްޓެއިންއާ ހިއްސާކުރުުމާއެކު، އެއިންސްޓައިން، އެމެރިކާގެ ރައީސް ރޫސްވެލްޓަށް ސިޓީއެއް ފޮނުވިއެވެ. މި ސިޓީގައި، ޖަރުމަންވިލާތަށް ބޭނުންވާ ވަރަށް ޔޫރޭނިއަމް އެއްކުރެވިއްޖެނަމަ، ވަރަށް ބާރުގަދަ ބޮމެއް އުފެއްދިދާނެ ކަމަށާއި އަދި މި ބޮމުގެ އެހީގައި ބޮޑު ސަރަޙައްދެއް ނެތިކޮށްލެވިދާނެކަމުގެ އިންޒާރު ދިނެވެ. މި ސިޓީ ފޮނުވާފައިވަނީ، 1939 ވަނަ އަހަރުގެ އޮގަސްޓް މަހުއެވެ. އެހެން ނަމަވެސް، މި ސިޓީ ރޫސްވެލްޓަށް ލިބުނުއިރު، އެޑޮލްފް ހިޓްލަރުގެ ލަޝްކަރު ވަނީ ޕޮލެންޑަށް އަރާފައެވެ. އަދި ދެވަނަ ބޮޑު ހަނގުރާމަ ވެސް ވަނީ ފެށިފައެވެ.

މި ސިޓީ ލިބުނުއިރު، އެމެރިކާއިން ދެވަނަ ބޮޑު ހަނގުރާމައިގެ ތެރެއަށް ސީދާ ވަދެފައި ނުވިނަމަވެސް، ރޫސްވެލްޓް އޭނާގެ އެޑްވައިޒަރީ ކޮމެޓީ އެއްކުރައްވައި ޔޫރޭނިއަމްއާ ބެހޭ މަޢުލޫމާތު ހިއްސާކުރެއްވިއެވެ. ނަތީޖާއެއްގެ ގޮތުން، 1940 ވަނަ އަހަރު “ނޭޝަނަލް ރިސާޗް ކޮމެޓީ” ގެ ނަމުގައި ރޫސްވެލްޓް ކޮމެޓީއެއް އުފެއްދެވިއެވެ. އަދި 1941 މި ކޮމެޓީ، “އޮފީސް އޮފް ސައިންޓެފިކް ރިސާޗް އެންޑް ޑިވެލޮޕްމަންޓް” އަށް ބަދަލު ކުރައްވައި، އެމެރިކާގެ ނިއުކްލިއަރ ޕްރޮގްރާމްގެ ބިންގާ އެޅުއްވިއެވެ.

އެމެރިކާގެ ނިއުކްލިއަރ ޕްރޮގްރާމަށް އެންމެ ބޮޑު ކުރިއެރުމެއް ލިބިގެންދިޔައީ 1941 އިނގިރޭސިވިލާތުގެ މައުޑް ކޮމެޓީން ތައްޔާރުކުރި ރިޕޯޓަކުންނެވެ. މި ރިޕޯޓްގައި ފަސޭހަކަމާއެކު މިކަން ކުރެވޭނެގޮތް ބަޔާންކޮށްފައި ވެއެވެ. މި ރިޕޯޓާ ގުޅިގެން، އޮފީސް އޮފް ސައިންޓެފިކް ރިސާޗް އެންޑް ޑިވެލޮޕްމަންޓްގެ ވެރިޔާ، ރޫސްވެލްޓާ ބައްދަލުކުރައްވައި، މަޝްވަރާ ކުރެއްވިއެވެ. މި މަޝްވަރާތަކަށްފަހު، އެމެރިކާއިން ނިއުކްލިއަރ ބޮމެއް އުފެއްދުމަށް ޓަކައި ކުރަންޖެހޭ ދިރާސާތައް ކުރުމަށް ރޫސްވެލްޓް އަމުރު ކުރެއްވިއެވެ.

އެމެރިކާގެ ހޮނަލުލޫގެ ވައިގެ މަރުކަޒު ޕާލް ހާބަރަށް 1941 ވަނަ އަހަރުގެ ޑިސެންބަރު މަހުގެ 7 ވަނަ ދުވަހު ޖަޕާނުން ކުއްލި ހަމަލާއެއް ދިނެވެ. ވައިގެ މަގުން ދިން މި ހަމަލާތަކުގައި އެމެރިކާގެ ކަނޑުގެ 20 އުޅަނދަކަށާއި އަދި 300 މަތިންދާބޯޓަށް އެކިވަރުގެ ގެއްލުންތައް ލިބި، މުޅި އެމެރިކާ ހައިރާންކޮށްލިއެވެ. ޖަޕާނުގެ މި ހަމަލާ ވެގެންދިޔައީ، ނިއުކްލިއަރ ހަތިޔާރު އުފެއްދުމުގައި އެމެރިކާއިން ކުރަމުންދިޔަ މަސައްކަތްތަކަށް ލިބުނު ކުރިއެރުމަކަށެވެ. މި ހާދިސާއާއެކު، ރޫސްވެލްޓް ރަސްމީކޮށް، ނިއުކްލިއަރ ހަތިޔާރު އުފެއްދުމުގެ ޕްރޮގްރާމް “މެންހަޓަން ޕްރޮޖެކްޓް” އެޕްރޫވް ކުރެއްވިއެވެ. އެމެރިކާއިން ސިއްރިއްޔާތުގައި ދުނިޔޭގެ ފުރަތަމަ އެޓަމިކް ބޮމް އުފެއްދުމަށް ކުރިއަށްގެންދިޔަ ޕްރޮޖެކްޓަށް 2 ބިލިއަން ޑޮލަރު ހޭދަކޮށްފައި ވެއެވެ. އަދި މި މަސައްކަތުގައި 130000 މީހުން މަސައްކަތްކުރިއިރު، އެމީހުން އެ މަސައްކަތް ކުރަނީ، އެޓަމިކް ބޮމެއް އުފައްދަން ކަމެއް އެމީހުންނަކަށް ވެސް ނޭނގެއެވެ. މި ޕްރޮޖެކްޓްގެ އެންމެ މުހިންމު ދައުރެއް އަދާކުރެއްވި އެކަކީ، މި ޕްރޮޖެކްޓްގެ ސިއްރު ލެބޯޓްރީގެ ޑައިރެކްޓަރ މަޤާމު އަދާކުރެއްވި ރޮބަރޓް އޮޕެންހައިމަރއެވެ. އޮޕެންހައިމަރ މަޝްހޫރުވެފައިވަނީ، “އެޓަމް ބޮމްގެ ބައްޕަ” ގެ ގޮތުގައެވެ.

ނިއުކްލިއަރ ހަތިޔާރުގެ ނުރައްކާ!

އެމެރިކާގެ ނިއުކްލިއަރ ޕްރޮގްރާމް “މެންހަޓަން ޕްރޮޖެކްޓް” ފެށުމުގެ އަސްލަކީ، އެމެރިކާއަށް ވުރެ ކުރިން ނާޒީ ޖަރުމަންވިލާތުން މިފަދަ ހަތިޔާރެއް ތަރައްޤީކޮށް ބޭނުންކުރުމުގެ ބިރެވެ. އެހެންކަމުން، އެމެރިކާއިން ބޭނުންވީ، ޖަރުމަނަށްވުރެ ކުރިން ނިކްލިއަރ ހަތިޔާރު އުފެއްދުމަށެވެ. އެހެން ނަމަވެސް، ޖަރުމަންވިލާތުގެ ނިއުކްލިއަރ ޕްރޮގްރާމަށް މާބޮޑު ކުރިއެރުންތަކެއް ލިބޭގޮތެއް ނުވިއެވެ. 1944 ވަނަ އަހަރާ ހަމައަށް އައިއިރު، ޖަރުމަންވިލާތް ދިޔައީ ހަނގުރާމައިގެ މައިދާނުގައި ނާކާމިޔާބީއާ ކުރިމަތިވަމުންނެވެ. މިކަމުގެ ސަބަބުން، އެމެރިކާ އަދި އިނގިރޭސިވިލާތުގެ ސައިންސްވެރިން، އެމެރިކާއިން ނިއުކްލިއަރ ހަތިޔާރު އުފެއްދުމުގެ ސަބަބުން ނިކުމެދާނެ ނުރައްކާތެރި ހާލަތަކާމެދު ކަންބޮޑުވުން ފާޅުކުރަން ފެށިއެވެ. މި ޕްރޮޖެކްޓާ ގުޅިގެން އެންމެ ބޮޑު ކަންބޮޑުވުމެއް ފާޅުކުރި އެކަކީ، ޑެންމާކުގެ ސައިންޓިސްޓެއްކަމަށްވާ ނީލްސްއެވެ. މީނާއަކީ، އިނގިރޭސިވިލާތުގެ ފަރާތުން މި ޕްރޮޖެކްޓްގައި މަސައްކަތްކުރި މީހެކެވެ. މި ކަންބޮޑުވުންތަކާއެކު، އޭނާ އެމެރިކާގެ ރައީސް ރޫސްވެލްޓާ ބައްދަލުކޮށް އޭނާގެ ކަންބޮޑުވުންތައް ހިއްސާކުރިއެވެ. މިފަދަ ނިއުކްލިއަރ ހަތިޔާރެއްގެ ސަބަބުން ދުނިޔޭގައި ނިއުކްލިއަރ ހަތިޔާރު އުފެއްދުމުގެ ވާދަވެރިކަން އުފެދިގެންދާނެ ކަމަށާއި އަދި އެމެރިކާއިން އެޓަމިކް ބޮމެއް އުފެއްދުމަކީ، މުޅި ދުނިޔެއަށް ވެސް އެކަމުގެ ބިރު އޮތްކަމެއްކަމަށް، ރޫސްވެލްޓަށް ދެންނެވިއެވެ. އެހެންކަމުން، ނިއުކްލިއަރ ހަތިޔާރު ބޭނުންކުރުމުގެ ބައިނަލްއަޤްވާމީ ޕްލޭނެއް އެކުލަވާލާ މިފަދަ ހަތިޔާރު ކޮންޓްރޯލް ކުރެވޭނެ ނިޒާމެއް ޤާއިމްކުރުމަށް އޭނާ ރޫސްވެލްޓަށް ލަފާއެރުވިއެވެ.

އެޓަމިކް ބޮކް އުފެއްދުމާ ގުޅޭ ގޮތުން ސައިންސްވެރިންގެ ކަންބޮޑުވުންތަކާއެކު، އޭގެ މަސްދުވަސް ފަހުން އެމެރިކާ ރައީސް ރޫސްވެލްޓް އަދި އިނގިރޭސިވިލާތުގެ ބޮޑުވަޒީރު ވިންސްޓަން ޗާޗިލް ބައްދަލުކުރެއްވިއެވެ. ޑެންމާކުގެ ސައިންޓިސްޓް ނީލްސް ވިސްޓަން ޗާޗިލްއާ ވެސް ބައްދަލުކޮށް، އޭނާގެ ކަންބޮޑުވުންތައް އޭރު އޮތީ ހިއްސާކޮށްފައެވެ. އެހެން ނަމަވެސް، އެކަމާ އޭނާ ސީދާ ދެކޮޅު ހެއްދެވިއެވެ. ނަތީޖާއެއްގެ ގޮތުން، މި ބައްދަލު ކުރެއްވުމުގައި، އެއްބަސްވުމެއްގައި ސޮއިކުރެއްވިއެވެ. މި އެއްބަސްވުމުގެ ދަށުން، އެޓަމިކް ބޮމުގެ ވާހަކަ މުޅި ދުނިޔެއަށް ސިއްރުކުރެވިގެން ދިޔައެވެ.

1945 ވަނަ އަހަރުގެ މާރިޗު މަހު، އެއިންސްޓައިން، ރޫސްވެލްޓަށް ދެވަނަ ސިޓީއެއް ފޮނުވިއެވެ. މި ސިޓީގައި އޭނާ އެދިފައިވަނީ، ރޫސްވެލްޓް، މި ޕްރޮޖެކްޓްގައި މަސައްކަތްކުރަމުންދިޔަ ސްޒިލަރޑްއާ ބައްދަލު ކުރެއްވުމަށެވެ. ސްޒިލަރޑްއަކީ، ނިއުކްލިއަރ ހަތިޔާރުގެ ސަބަބުން މުޅި ދުނިޔެ ބަދަލުކޮށްލާނެކަމުގެ އިންޒާރު ދެމުން ދިޔަ އެއް ސައިންޓިސްޓެވެ. މި ސިޓީގައި އެއިންސްޓައިން ސްޒިލަރޑްގެ ކަންބޮޑުވުންތައް ފާހަގަކޮށްފައި ވެއެވެ. މި ގޮތުން، މި ބޮން އުފެއްދުމުގެ މަސައްކަތުގައި ހަރަކާތްތެރިވާ ސައިންޓިސްޓުންނާއި، މި ބޮން އޮޕަރޭޝަނަލް ހާލަތުގައި ބޭނުންކުރާނެ ފަރާތްތަކާ މުޢާމަލާތް ކުރެވޭނެގޮތެއް ނެތްކަން ފާހަގަކޮށްފައި ވެއެވެ. އެހެންކަމުން، ރޫސްވެލްޓް، ސްޒިލަރޑްއާ ބައްދަލުކޮށް، މި ކަންކަމާބެހޭ ގޮތުން މަޝްވަރާ ކުރެއްވުމަށް އޭނާގެ ސިޓީގައި އެދިފައިވެއެވެ. މި ސިޓީ ރޫސްވެލްޓަށް ނުލިބިދާނެކަމަށް ޓަކައި، ސިޓީގެ ކޮޕީއެއް ފަސްޓް ލޭޑީ އެލޭނާ ރޫސްވެލްޓަށް ވެސް އޭނާ ފޮނުވިއެވެ. މި ސިޓީއާ ގުޅިގެން، އެކަމަނާ ރޫސްވެލްޓް އަދި ސްޒިލަރޑްގެ ބައްދަލުވުމެއް އެ އަަހަރުގެ މެއި މަހަށް ތާވަލުކުރިއެވެ. އެހެން ނަމަވެސް، އޭޕްރީލް މަހުގެ 12 ވަނަ ދުވަހު ސްޓްރޯކެއް ޖެހިވަޑައިގެން ކުއްލިގޮތަށް ރޫސްވެލްޓް އަވަހާރަވިއެވެ.

ބޭނުންކުރާނެ ގޮތުގެ އުސޫލެއް ނެތް!

އެމެރިކާގެ ނިއުކްލިއަރ ޕްރޮގްރާމް “މެންހަޓަން ޕްރޮޖެކްޓް” އަކީ ސީދާ ރޫސްވެލްޓް ފެށްޓެވި ޕްރޮގްރާމެކެވެ. އެހެންނަމަވެސް، މިކަން އޮތީ ވަރަށް ބޮޑަށް ސިއްރު ކުރެވިފައެވެ. ހެރީ ޓްރޫމަން އެމެރިކާގެ ސެނެޓްގައި 1943 ވަނަ އަހަރު މަސައްކަތް ކުރެއްވި ދުވަސްވަރު، ސަރުކާރުން ޕްރޮޖެކްޓް މެންހަޓަންއަށް ކުރަމުންދިޔަ ޚަރަދުތައް ތަޙުޤީޤުކުރުމުގެ މަސައްކަތް ކޮށްފައިވެއެވެ. އެހެން ނަމަވެސް، “މެންހަޓަން ޕްރޮޖެކްޓް” އަކީ، އެމެރިކާގެ ނިއުކްލިއަރ ހަތިޔާރު އުފެއްދުމަށް ހިންގާ ޕްރޮގްރާމެއްކަން އޭނާއަށް އެނގިވަޑައިގަތީ، އެމެރިކާގެ ނައިބު ރައީސްގެ މަޤާމުން ރައީސްކަމަށް އައްޔަން ކުރެވުނު ހިސާބުންނެވެ.

އެމެރިކާގެ ނިއުކްލިއަރ ޕްރޮގްރާމުން އުފައްދާ އެޓަމިކް ބޮން އެންމެ ފުރަތަމަ ބޭނުންކުރާނީ، ކޮން ޤައުމަކާ ދެކޮޅަށްކަން، ރޫސްވެލްޓް އަވަހާރަވުމުގެ ކުރިން، އިނގިރޭސިވިލާތުގެ ބޮޑު ވަޒީރު ވިންސްޓަން ޗާރޗިލްއާ އެކު އޮތީ އެއްބަސްވެފައެވެ. މި އެއްބަސްވުމުގެ ދަށުން، އެޓަމިކް ބޮމެއް، ބޭނުންކުރެވޭ ޙާލަތަށް ތައްޔާރުކޮށް ނިމުމުން، އެފަދަ ހަތިޔާރެއް ބޭނުންކުރަންޖެހޭނީ ވަރަށް ބޮޑަށް އެކަމާމެދު ރައްކާތެރިވެ، މުސްތަޤްބަލަށް ވިސްނުމަށްފަހު، ޖަޕާނާ ދެކޮޅަށްކަމަށް ބަޔާންކޮށްފައި ވެެއެވެ. އަދި މި ބޮން ޖަޕާނާ ދެކޮޅަށް ބޭނުން ކުރުމަށްފަހު، އެ ޤައުމުން އަމާންދޭން ޖެހޭނެ ކަމަށާއި އަދި އަމާން ނުދީފިނަމަ، އަމާން ދެންދެކަށް މިފަދަ ހަތިޔާރު އެ ޤައުމާ ދެކޮޅަށް ބޭނުންކުރާނެކަމަށް ވެސް 1944 ވަނަ އަހަރު ސޮއިކުރި އެއްބަސްވުމުގައި ބަޔާންކޮށްފައި ވެއެވެ. އެހެންކަމުން، އެމެރިކާއިން ތަރައްޤީ ކުރަމުންދިޔަ، އެޓަމް ބޮމުގެ ނުރައްކާތެރިކަން އޭރުވެސް އެ ބޭފުޅުންނަށް ވެސް ވިސްނިފައި ނުވާކަން ދޭހަވެއެވެ.

މި އެއްބަސްވުން ފެންނަން އޮތް ނަމަވެސް، މި ބޮން ބޭނުން ކުރުމާބެހޭ ގޮތުން ތައްޔާރުކޮށްފައިވާ ޕްލޭނެއް ނުވަތަ މިފަދަ ހަތިޔާރު ގެންގުޅުމާބެހޭ ޕޮލިސީއެއް ނުވަތަ ޑައިރެކްޓިވެއް ރޫސްވެލްޓް އަވަހާރަވިއިރު ވެސް ތައްޔާރު ކުރެވިފައި ނުވެއެވެ. އެހެން ނަމަވެސް، އެމެރިކާގެ އޭރުގެ ސެކެރެޓްރީ އޮފް ވޯރ، މިފަދަ ބޮމެއް ބޭނުންކުރެވިދާނެ ހާލަތްތަކާ ބެހޭގޮތުން މަޝްވަރާކޮށްފައި ވެއެވެ. މި ގޮތުން، އެޓަމް ބޮމުގެ ޑެމޮންސްޓްރޭޝަނެއް ދީ، މި ބޮމުގެ ސަބަބުން ކުރިމަތިވާނެ ފަނާކުރަނިވި ނުރައްކާގެ އިންޒާރު ޖަޕާނަށް ދިނުމަށް ލަފާދިނެވެ. އަދި މިވަރުން ވެސް ޖަޕާނުން އަމާންނުދީފިނަމަ، މި އެޓަމިކް ބޮމް ޖަޕާނާ ދެކޮޅަށް ބޭނުންކުރުމަށް ލަފާދިނެވެ. މި ލަފަޔާއެކު، ހެރީ ޓްރޫމަން މި ސިޔާސަތު ރަނގަޅު ކަމަށް ޤަބޫލުފުޅު ކުރެއްވިއެެވެ. އެހެން ނަމަވެސް، ފަހުވަގުތު މި ސިޔާސަތާ ޚިލާފުވެވަޑައިގެންނެވީއެވެ. މި ހުރިހާ ހާލަތެއް މެދުވެރިވީ، ނިއުކްލިއަރ ޕްރޮގްރާމް “މެންހަޓަން ޕްރޮޖެކްޓް” ނިމުމުގެ ކުރިން ރޫސްވެލްޓް އަވަހާރަވުމެވެ. މި ހަތިޔާރަކީ، ކިހާ ނުރައްކާތެރި އެއްޗެއްކަމާއި އަދި މީގެ ސަބަބުން މުޅި ދުނިޔެ ބަދަލުކޮށްލަފާނެކަން ސައިންޓިސްޓުންނަށް އެނގުނީ މި ޕްރޮގްރާމްގެ އެންމެފަހު މަރުޙަލާގައެވެ. އަދި މި ނިއުކްލިއަރ ހަތިޔާރު ބޭނުންކޮށްފިނަމަ، ޖަޕާނަށް ލިބިދާނެ ގެއްލުން އެއްވެސް ފަރާތަކަށް އޭރު އަންދާޒާ ކުރެވިފައި ވެސް ނުވެއެވެ. ނާޒީ ޖަރުމަނުން، އެހެން ޤައުމަކަށްވުރެ ކުރިން، ނިއުކްލިއަރ ހަތިޔާރެއް އުފައްދަފާނެކަމުގެ ބިރަށް އެމެރިކާއިން ފެށި ނިއުކްލިއަރ ޕްރޮގްރާމް މިއަދު މިވަނީ މުޅި ދުނިޔެ ބަދަލުކޮށްލާފައެވެ.

އެމެރިކާއިން ޖަޕާނާ ދެކޮޅަށް ނިއުކްލިއަރ ހަތިޔާރު ބޭނުންކުރި ފަހުން މިހާރު މިވަނީ 78 އަހަރު ފާއިތުވެގެން ގޮސްފައެވެ. ނިއުކްލިއަރ ހަތިޔާރުގެ ނުރައްކަލަށް މުޅި ދުނިޔެ ހުޅުވިފައިވާއިރު، ނިއުކްލިއަރ ހަތިޔާރުގެ ޤާބިލުކަން ހޯދާފައިވާ ޤައުމުތަކަކީ، މިއަދު އަސްކަރީ ގޮތުން ބާރުގަދަ ޤައުމުތަކެވެ. ނިއުކްލިއަރ ހަތިޔާރުގެ ނުރައްކާ މުޅި ދުނިޔެއަށް ކުރިމަތިވަމުން ދިއުމާއެކު، 2017 އަހަރު “ޓްރިޓީ އޮން ދަ ޕްރޮބިއުޝަން އޮފް ނިއުކްލިއަރ ވެޕަންސް” ނުވަތަ ނިއުކްލިއަރ ހަތިޔާރު މަނާކުރުމާބެހޭ މުޢާހަދާއެއް އެކުލަވާލާފައިވެއެވެ. މި މުއާހަދާގެ ބޭނުމަކީ، މުޅި ދުނިޔެއިން ނިއުކްލިއަރ ހަތިޔާރު ނައްތާލުމެވެ. މިފަދަ މުއާހަދާތައް އެކުލަވާލެވުނު ނަމަވެސް، ނިއުކްލިއަރ ހަތިޔާރު ތަރައްޤީ ކުރުމުގެ ރޭހަށް ހުއްޓުމެއް ނާދެއެވެ. އަދި ނިއުކްލިއަރ ހަތިޔާރުގެ ނުރައްކާ ކުޑަވެފައި ވެސް ނުވެއެވެ. އެޓަމް ބޮމާއި، އެމެރިކާގެ ކުރީގެ ރައީސް ރޫސްވެލްޓާ ގުޅުންއޮތީ ކިހާވަރަކަށްތޯ ކުރެވޭ ސުވާލުގެ ޖަވާބަކީ، އެމެރިކާގެ ނިއުކްލިއަރ ޕްރޮގްރާމް “މެންހަޓަން ޕްރޮޖެކްޓް” އަކީ ރޫސްވެލްޓްގެ ވެރިކަމުގެ ދުވަސްވަރު، އޭނާ ފެށްޓެވި ޕްރޮގްރާމެއް ކަމެކެވެ. މި ޕްރޮޖެކްޓްގެ މަޤްޞަދަކީ އެމެރިކާގެ ސަލާމަތާއި ރައްކާތެރިކަން ކަށަވަރުކުރުން ކަމަށް ވީނަމަވެސް، ރޫސްވެލްޓަކީ މި ހަތިޔާރު އުފެއްދި ޕްރޮޖެކްޓަށް ހުއްދަ ދެއްވި ރައީސްއެވެ. އެހެންކަމުން، މުޅި ދުނިޔެ ނިއުކްލިއަރ ހަތިޔާރަށް ހުޅުވިގެން ދިޔައީ، އެމެރިކާއިން މި ހަތިޔާރު އުފައްދައި، ބޭނުންކުރުމުގެ ސަބަބުންކަމަށް ތާރީޚުން ފެންނާން އެބައޮތެވެ. އެމެރިކާއިން މި ހަތިޔާރު އުފެއްދީ، އެ މީހުންގެ ސަލާމަތާއި ރައްކާތެރިކަން ކަށަވަރު ކުރުމުގެ ބޭނުމުގައި، އެ މީހުންގެ ޤައުމާއި ރައްޔިތުންގެ ދިފާޢުގައެވެ. މިއީ، ނިއުކްލިއަރ ހަތިޔާރުގެ ވާދަވެރިކަން ފެށެން މެދުވެރިވި މައިގަނޑު ސަބަބު ވެސް މެއެވެ.