ޢަބްދުއްލަތީފް ޢަލީ
އަންހެން ސިފައިންގެ ޚިދުމަތަށް ވިހި އަހަރުފުރުން ފާހަގަކުރާއިރު، ޚިދުމަތުގައި ދެމިތިބި ސިފައިންގެ މޫނުމަތިން ފެނިގެންދަނީ އުއްމީދީ ކުލަވަރުތަކެވެ. އެކިއެކި ސަބަބުތަކާ ހުރެ ޚިދުމަތާ ދުރަށް ގޮސްފައިވާ ބޭކަނބަލުންގެ ފަރާތުން އަގުހުރި ޚިދުމަތްތަކެއް ޤައުމަށް ކޮށްދެވިފައިވާކަމުގެ އިޙުސާސްތައް ދައްކުވައިދެއެވެ. މި އިހުސާސްތައް އެންމެ ރަނގަޅަށް ފެނިގެން ގޮސްފައިވަނީ އަންހެން ސިފައިންގެ ޚިދުމަތަށް 20 އަހަރުފުރުން ފާހަގަކުރުމަށް ކަޅުތުއްކަލާކޮށީގައި މާރިޗު މަހުގެ 14 ވަނަ ދުވަހުގެ ރޭ ބޭއްވި ޚާއްޞަ ޙަފުލާގެ ތެރެއިންނެވެ.
މާރިޗު 14 ވަނަ ދުވަހުގެ ރޭ ސިފައިންގެ ޚިދުމަތުން ވަކިވެފައިވާ އަންހެން ސިފައިންނާއި މިހާރު ޚިދުމަތުގައި ދެމިތިބި ސިފައިން ބައްދަލުވި އިރު، އަންހެން ސިފައިން ވަނީ ތަފާތު ރޮނގުރޮނގުން ގިނަ ކުރިއެރުންތަކެއް ހޯދާފައެވެ. ރާއްޖޭގައި ހިންގާ އެންމެ ބުރަ އަސްކަރީ ތަމްރީނުތައް ކަމުގައިވާ ސްޕެޝަލް ޓާސްކް ފޯސްއާއި އެންސީއޯ ކޭޑަރ ފުރިހަމަކޮށްފައިވާ އަންހެން ސިފައިން އެބަތިއްބެވެ. މުދައްރިބުންގެ ގޮތުގައި ހަރަކާތްތެރިވުމަށް ފުރިހަމަކުރަންޖެހޭ ތަމްރީނުތައް ތަފާތު ރޮނގުރޮނގުން ފުރިހަމަކޮށްފައި ތިބި ކުޅަދާނަ އަންހެން މުދައްރިބުން ދިވެހި ސިފައިންގެ ތެރޭގައި އެބަތިއްބެވެ. މި ތަމްރީނުތައް އަންހެން ސިފައިން ފުރިހަމަކޮށްފައިވަނީ އަންހެނަކަށް ވީތީ ޖިސްމާނީ ގޮތުން ވެސް އަދި ނަފުސާނީގޮތުން ވެސް އަންހެނުންނަކީ ވަކި ނިކަމެތި ބައެއް ނޫންކަން ސާބިތުކޮށްދެމުންނެވެ.
އަސްކަރީ ތަފާތު ހަރަކާތްތަކުގެ އިތުރުން ހިންގުމުގެ ދާއިރާއިންނާއި، މަސައްކަތްތެރިކަމުގެ ދާއިރާއިން އަދި މެޑިސިންގެ ދާއިރާއިން ވެސް މަތީ ތަޢުލީމު ޙާސިލުކޮށް އެ ރޮނގުތަކުގައި އެމްއެންޑީއެފްގައި ހީވާގިކަމާއެކު މަސައްކަތްކުރަމުންދާ އަންހެން ދަރީން ތިބިކަމީ އުފާކުރަންޖެހޭޭ ފަދަ ބޮޑު ކާމިޔާބީއެކެވެ. ފަޔަރ ފައިޓިންގއާ ބެހޭ ތަމްރީނުތައް ހަދައި އެ ދާއިރާގައި ވެސް އަންހެން ސިފައިން ޙަރަކާތްތެރިވާ ތަން ފެންނަކަމީ އަންހެން ސިފައިން، އެ މީހުންނަކީ ކޮންމެ ދާއިރާއެއްގައި ވެސް ކެރިގެން ކުރިމަތިލާ ކަންކަން ކާމިޔާބުކުރުމުގެ ރޫޙުގައި ތިބި ބައެއްކަން ހާމަކޮށްދޭ ހެއްކެކެވެ.
ތަޢުލީމާއި ތަމްރީނު އަދި ހުނަރުވެރިކަމުގެ ގޮތުން ހޯދާފައިވާ ކުރިއެރުމާއެކު އަންހެން ސިފައިން ވަނީ މަޤާމުގެ ގޮތުން ވެސް ބޮޑު ކުރިއެރުމެއް ހޯދާފައެވެ. އަންހެނުންނަށް ވެސް ޤައުމީ ދިފާޢުގެ ސަފުތަކުން ޖާގަ ދެވުނުތާ ނަވާރަ އަހަރަށް ފަހު 2008 ވަނަ އަހަރު ވަނީ ފުރަތަމަ ފަހަރަށް އަންހެން ސިފައިންގެ ބޭކަނބަލަކު ކަމިޝަން ކުރައްވާފައެވެ. އޭގެފަހުން މި އަހަރު ވެސް އިތުރު ފަރާތްތަކުން ވަނީ އެ ކާމިޔާބު ހޯއްދަވާފައެވެ.
ސިފައިންގެ މީހަކަށް ލިބޭ މަޤާމުގެ ކުރިއެރުމަކީ އެ މީހަކަށް ލިބޭ ޝަރަފާއި، މުސާރައިގެ ކުރިއެރުމަށް ވުރެ، އެ މީހަކާ ޙަވާލުކުރެވޭ އިތުރު ޒިންމާއެކެވެ. އަންހެން ސިފައިންނަށް ލިބިގެން ގޮސްފައިވާ ކުރިއެރުންތަކާއެކު، އެމްއެންޑީއެފްއަށާއި ދިވެހި ޤައުމަށް ޚިދުމަތްކުރުމުގައި އެންމެ ކުރީ ސަފުން މިހާރަށް ވުރެ ވެސް ޙަރަކާތްތެރި ބައެއްގެ ގޮތުގައި އަންހެން ސިފައިން ފެނިގެންދާނެ ކަމަށް ޔަޤީންކުރެވެއެވެ.
