ކޯޕްރަލް މުޙައްމަދު ޒައިދާންގެ ހަނދާނުގައި

ކޯޕްރަލް މުޙައްމަދު ޒައިދާން ނިޔާވުމުގެ ފުން ހިތާމައިގައި ސިފައިންގެ ދިދަ ބައިދަނޑިއަށް ތިރިކުރެއްވިއެވެ.  އެ ޒުވާނާގެ ޖަނާޒާ ކުރިއަށް ގެންދެވީ ސިފައިންގެ ރަސްމީ ޢިއްޒަތުގައެވެ. ސަންދޯއްމަތިން ދިވެހިރާއްޖޭގެ ފަޚުރުވެރި ގައުމީ ދިދަ އޮތީ އަޅާފައެވެ. ސަންދޯއް އުފުލީ ޔުނީފޯމުގައި ތިބި ސިފައިންނެވެ. ކޯޕްރަލް ޒައިދާނަށް އެންމެ ފަހުގެ އިހުތިރާމު ސިފައިން އަދާކުރީ ހަތްބަޑީގެ ސަލާމަކުންނެވެ. ކޯޕްރަލް ޒައިދާންގެ ސަންދޯއްމަތީގައި އަޅާފައި އޮތް ގައުމީ ދިދަ އޭނާގެ ލޮބުވެތި ޢާއިލާއާ ހަވާލުކުރެއްވިއެވެ. ކޯޕްރަލް މުޙައްމަދު ޒައިދާނުގެ އަގުމާތް ގައުމީ ޚިދުމަތުގެ ރަމުޒެއްގެ ގޮތުގައެވެ. އެ ރަސްމީ ޢިއްޒަތާއި ޝަރަފުވެރި ޖަނާޒާގެ ދާއިމީ ހަނދާނެއްގެ ގޮތުންނެވެ.

ކޯޕްރަލް މުޙައްމަދު ޒައިދާނަކީ ރ. އުނގޫފާރު، ނިއުލައިފް، އަޙްމަދު ނަޒީރާއި އައިމިނަތު ޙުސައިން މަނިކުގެ ތިން ދަރިންގެ ތެރެއިން އެންމެ ދޮށީ ފިރިހެން ދަރިފުޅެވެ. 2000 ވަނަ އަހަރުގެ ސެޕްޓެންބަރު 11 ވަނަ ދުވަހު އުފަންވި ޒައިދާނުގެ ހަގަށް ތިބީ އަންހެން ކޮއްކޮއަކާއި ފިރިހެން ކޮއްކޮއެކެވެ. ކޯޕްރަލް މުޙައްމަދު ޒައިދާން ސިފައިންގެ ޚިދުމަތާ ގުޅުނީ 20 ޖޫން 2019 ގައެވެ.

ކޯޕްރަލް މުޙައްމަދު ޒައިދާން،  2024 ޖޫން 2 ވަނަ ދުވަހު ކުއްލި ގޮތަކަށް ނިޔާވިއިރު ސިފައިންގެ ޚިދުމަތަށްވީ 4 އަހަރާއި 11 މަހާއި 13 ދުވަހެވެ. އުމުރުން 23 އަހަރުގައި  ނިޔާވިއިރު، ކޯޕްރަލް މުޙައްމަދު ޒައިދާން ހުރީ ލާންސް ކޯޕްރަލް ރޭންކުގައެވެ. އެހެން ނަމަވެސް، މި ހިތާމަވެރި ހާދިސާގައި ނިޔާވުމުގެ ކުރިން، އާންމު އުސޫލުން މަޤާމުގެ ކުރިއެރުން ދިނުމުގެ ޝަރުތު ހަމަވާތީ، މަޤާމުގެ ކުރިއެރުން ދިނުމަށް ހުށަހެޅި،  ފުރިހަމަ ކުރަންޖެހޭ ހުރިހާ މަރުހަލާއެއް ނިންމައި 2024 މޭ 29 ވަނަ ދުވަހު ލާންސް ކޯޕްރަލް މުޙައްމަދު ޒައިދާނަށް ވަނީ ލާންސް ކޯޕްރަލްގެ ރޭންކުން ކޯޕްރަލް ރޭންކަށް މަގާމުގެ ކުރިއެރުން ލިބިފައެވެ. އެހެން ނަމަވެސް ކޯޕްރަލް ޒައިދާން ތަމްރީނެއް ފުރިހަމަކުރުމަށް ރަށުން ބޭރުގައި ހުރުމުން މަޤާމުގެ ކުރިއެރުން ވަނީ ހަވާލުނުކުރެވިއެވެ.

ކޯޕްރަލް މުޙައްމަދު ޒައިދާން ނިޔާވީ ލ. ކައްދޫ ޓްރޭނިންގ ސެންޓަރުގައި ކުރިއަށް ގެންދާ ސްޕެޝަލް ބޯޓް ސްކޮޑްރަން (އެސްބީއެސް) ކޮލިފިކޭޝަން ކޯސް 1ގެ ކަނޑުމަތީގެ ތަމްރީނެއްގެ ތެރޭގައި ލ. މާވަށް ކައިރި ކަނޑުގެ ސަރަހައްދުގައި ހަރަކާތެރިވަނިކޮށް މިޔަރެއް ދިން ހަމަލާއަކަށް ފަރުވާދެމުން ދަނިކޮށް ލ. ގަން ރީޖަނަލް ހޮސްޕިޓަލްގައެވެ. ކޯޕްރަލް ޒައިދާންއާއި އެ ކޯހުގެ ދަރިވަރުން ކަނޑުމަތީގައި ހަރަކާތްތެރިވަމުން ދަނިކޮށް ކުއްލިއަކަށް މިޔަރެއް ހަމަލާދީފައިވަނީ ޒައިދާނުގެ ދެ ފައިގެ ފަލަމަސްގަނޑަށެވެ. މިޔަރު ހިފުމުގެ (މިޔަރު ދަތްއަޅުގެ) ސަބަބުން އެންމެ ބޮޑަށް ޒަޚަމުވެފައިވަނީ ޒައިދާންގެ ވާތުފަޔަށެވެ. މިޔަރު ޙަމަލާ ދިނުމާގުޅިގެން ކޯޕްރަލް މުޙައްމަދު ޒައިދާން ވަގުތުން ލ.ގަމު ރީޖަނަލް ހޮސްޕިޓަލަށް ގެންގޮސް ފަރުވާދެމުން ދަނިކޮށް ނިޔާވީ އެރޭ ގާތްގަނޑަށް 08:40 ހާއިރުއެވެ.

ކޯޕްރަލް މުޙައްމަދު ޒައިދާންގެ ކުއްލި ވަކިވުން ވެގެން ދިޔައީ އޭނާގެ ލޮބުވެތި ޢާއިލާއަށާއި، ދިވެހި އަސްކަރިއްޔާއަށް އަދި ހުރިހާ ދިވެހީންނަށް ވެސް ލިބިގެން ދިޔަ ވަރަށް ބޮޑު ފުން ހިތާމައަކަށެވެ. ކޯޕްރަލް މުޙައްމަދު ޒައިދާނުގެ ޖަނާޒާ ޢާއިލާގެ އެދުމުގެ މަތިން ސިފައިން ކުރިއަށް ގެންދެވީ އުފަންރަށް ކަމުގައިވާ ރ. އުނގޫފާރުގައެވެ. މި ޖަނާޒާގައި ސިފައިންގެ ތިން ޖެނެރަލް އޮފިސަރުންނާއި އެކިއެކި ރޭންކުތަކުގެ ސިފައިންނާއި، އުނގޫފާރުގެ ގިނަ އަދަދެއްގެ ރައްޔިތުން ބައިވެރިވެވަޑައިގެންނެވިއެވެ. އެ އެންމެންގެ ދުލާއި ހިތްތަކުން ކުރަމުން ދިޔައީ އެ ޒުވާނާއަށް ހެޔޮ ދުޢާއެވެ. ހުރިހާ ލޯތަކެއް ވަނީ ފެންކަޅިވެފައެވެ.

ކޯޕްރަލް މުޙައްމަދު ޒައިދާން އަސާސީ ތަމްރީނު ފުރިހަމަކުރީ ދަ ބޭސިކް ސްކޫލުގައި 19 އޯގަސްޓް 2020 އިން 15 ޑިސެންބަރު 2020 އަށް ކުރިއަށް ގެންދިޔަ  66 ވަނަ އަސާސީ ތަމުރީނު ކޯހުގައެވެ. މި ކޯހުން ކޯޕްރަލް ޒައިދާނު ޑިސްޓިންކްޝަން ހާސިލުކުރިއެވެ. އަސާސީ ތަމްރީނު ކޯސް ނިންމެވުމާ ގުޅިގެން 11 ފެބުރުވަރީ 2021 ގައި ކޯޕްރަލް މުޙައްމަދު ޒައިދާނުގެ ޕޭރެންޓް ސަރވިސްއަކީ ފަޔަރ އެންޑް ރެސްކިޔު ސަރވިސް ކަމުގައި ހަމަޖައްސަވައި، ސްޕެޝަލް ޕްރޮޓެކްޝަން ގުރޫޕް (އެސްޕީޖީ) އަށް ޕޯސްޓްކުރެއްވިއެވެ. މި ކޯހުގައި ދާންވަންދެން ކޯޕްރަލް ޒައިދާން މަސައްކަތް ކުރަމުން އައީ އެ ޔުނިޓްގައެވެ.

ފާއިތުވި ދުވަސްތަކުގައި ކޯޕްރަލް މުޙައްމަދު ޒައިދާން ފާހަގަ ވެފައިވަނީ އަޚުލާޤާއި ސުލޫކު ވަރަށް ރަނގަޅު، ހަށިހެޔޮކަމަށް ޚާއްޞަ އިސްކަމެއްދިން ނަމޫނާ ޖޫނިއަރ އެންލިސްޓެޑެއްގެ ގޮތުގައެވެ. ޚާއްޞަކޮށް އަސްކަރީ ތަފާތު ދާއިރާތަކުން ތަމުރީން ހަދައިގެން ކުރިއަށްދިއުމުގެ ޝައުޤުވެރިކަމުގައި މަސައްކަތް ކުރި ޢަޒުމްވަރުގަދަ ޒުވާނެއްގެ ގޮތުގައެވެ. ހަވާލުކުރާ ކޮންމެ ކަމެއްވެސް އިޚްލާޞްތެރިކަމާއެކު ކުރަމުންދިޔަ ޒައިދާނަށް ލާންސް ކޯޕްރަލްގެ މަޤާމު ދެއްވީ 17 މާރިޗު 2022 ގައެވެ.

އެމްއެންޑީއެފްގައި އެލީޓް ފޯހެއްގެ ގޮތުގައި ކޯސްޓްގާޑު ސްޕެޝަލް ބޯޓް ސްކޮޑްރަން އުފެއްދެވުމަށް ޓަކައި ޖިސްމާނީގޮތުންނާއި ނަފުސާނީގޮތުންނާއި ރޫޙާނީ ގޮތުން ވެސް އެފަދަ ފޯހެއްގައި މަސައްކަތްކުރުމުގެ ހިތްވަރާއި ޢަޒުމް ވަރުގަދަ، ހަށިހެޔޮ އަދި ދުޅަހެޔޮ ޒުވާން ސިފައިންނަށް ހުޅުވާލި ފުރުސަތުގައި އެ ކޯހަށް ޒައިދާން ކުރިމަތިލީ ކޯސްޓްގާޑުގެ އެ ދާއިރާއިން ކުރިއަށްދިއުމުގެ ވަރުގަދަ ޢަޒުމުގައެވެ. ހައިރިސްކް ކޯހެއް ކަމުގައިވާ ސްޕެޝަލް ބޯޓް ސްކޮޑްރަން ކޮލިފިކޭޝަން ކޯސް 1 ފުރިހަމަ ކުރަމުން ދިޔަ ކޯޕްރަލް މުޙައްމަދު ޒައިދާން ނިޔާވީ ވަރަށް ޝައުޤުވެރިކަމާއެކު އަދި ފޯރިއާއި ޖޯޝުގައި  އެ ކޯސް ފުރިހަމަކުރަމުން ދަނިކޮށެވެ. ކުއްލިއަކަށް ކަނޑުތެރެއިން އަރާ މިޔަރުދިން ހަމަލާއިން ލިބުނު ބޮޑެތި ފުން ޒަޚަމުތަކާއެކުގައި ވެސް ކޯޕްރަލް މުޙައްމަދު ޒައިދާންގެ ފަރާތުން ފެނިގެންދިޔައީ ހިތްވަރުގަދަކަމާއި ކެތްތެރިކަމެވެ.

މާތްﷲ، ކޯޕްރަލް މުޙައްމަދު ޒައިދާންގެ ފާފަ ފުއްސަވައި ހެޔޮ ރަޙްމަތް ލައްވާށިއެވެ. އަދި އެ މަރުޙޫމަށް ސުވަރުގޭގެ ދާއިމީ މަތިވެރި ނިޢުމަތް މިންވަރު ކުރައްވައި  ޢާއިލާއަށް ކެތްތެރިކަން ދެއްވާށިއެވެ. އާމީން.