އަންހެން ސިފައިންގެ ޚިދުމަތް

ޒަމާނުއްސުރެ، މި ރާއްޖެއަކީ އަމާންކަމާއި ސުލްޙަމަސަލަސްކަމުގެ ރާއްޖެއެއް ކަމަށްވީނަމަވެސް، ސިފައިންގެ ޚިދުމަތް ރައްޔިތުންނަށް ފޯރުކޮށްދިނުމަށް، އެކި ދުވަސްވަރު އެކި ބަދަލުތައް ވަނީ ގެނެވިފައެވެ. އާދެ، ސިފައިންގެ ތެރެއަށް އަންހެނުން ވެއްދުމަށް 1962 ގައި އޭރުގެ މަޙްކަމަތުލްޢަމްނުއާންމުން އިޢުލާނުކުރެއްވި ނަމަވެސް، އޭރު، ދިވެހިންގެ އިޖުތިމާޢީ ޙާލަތާއި ވިސްނުން ހުރިގޮތުން، ސިފައިންގެ ޚިދުމަތަށް އަންހެނުން ތަޢާރަފުކުރުން ވެފައި އޮތީ، ތަންކޮޅެއް އަބުއި ކަމަކަށެވެ. އެހެންނަމަވެސް، ޒަމާން ބަދަލުވެ، ދިރިއުޅުމުގެ ވައްޓަފާޅިއަށް އަންނަމުންދިޔަ ބަދަލުތަކާއި، ސިފައިންގެ ޚިދުމަތް ފުޅާވަމުންދިއުމާ ގުޅިގެން، އަންހެން ސިފައިންގެ ބޭނުންތެރިކަން ވިސްނެމުން އައެވެ. މި ވިސްނުމުގެ މައްޗަށް ގޮތެއް ނިންމައި ޢަމަލީ ފިޔަވަޅެއް އެޅުމަށް މަޖުބޫރުވީ 1988 ގެ ނޮވެންބަރު 3 ގައި، ރާއްޖެއަށް ދިން ޢުދުވާނީ ޙަމަލާގެ ސަބަބުންނެވެ. އާދެ! ސިފައިންގެ ޚިދުމަތަށް އަންހެން ސިފައިން ތަޢާރަފުކުރުމަށް އެންމެ ފުރަތަމަ އިޢުލާނުކުރިތާ 26 އަހަރު ފަހުން، 1988 ގެ ނޮވެންބަރު 13 ގައި، އަންހެނުން ސިފައިންގެ ޚިދުމަތަށް ވެއްދުމަށް އަނެއްކާ ވެސް އިޢުލާނުކޮށް އަންހެނުން ސިފައިންގެ ވަޒީފާއަށް ވެއްދުނެވެ. އާދެ، މުޅި ދުނިޔެއަށް އަންހެން ސިފައިން ތަޢާރަފުވިތާ 144 އަހަރުފަހުން، ދިވެހި ސިފައިންގެ ސަފުތަކާ ގުޅުނު އަންހެން ސިފައިންގެ ސަފުތައް ވެގެންދިޔައީ، ސިފައިންގެ ޚިދުމަތް މެކުހަށް ޖަހާލުންފަދަ ކަމަކަށެވެ.

އެންމެ ފުރަތަމަ އަންހެން ސިފައިން، ސިފައިންގެ ޚިދުމަތާ ގުޅުނުއިރު، ތުންތުންމަތިން ކުރަމުންދިޔަ ސުވާލުތަކަކީ، އަންހެނުންނަށް ސިފައިންކުރާ ކަހަލަ ކަންތައްތައް ކުރެވޭނެބާއެވެ؟ އެ މީހުންނަށް ޓްރޭނިންގ ހެދޭނެބާއެވެ؟ އެމީހުންނަށް ޑިއުޓީ މެރޭނެބާއެވެ؟ އާދެ! މި ސުވާލުތަކަށް ރައްދު ޖަވާބެއްދީ، އެ ބޯދާ ވިސްނުން ބާޠިލުކޮށްލީ، ޒުވާން، އަދި ޖޯޝީ ލޭހިނގާ 65 އަންހެން ސިފައިން، ސިފައިންގެ ޚިދުމަތާ ގުޅި، އެމީހުންގެ ތަމްރީނު ފުރިހަމަކުރުމުންނެވެ. އެ އަންހެނުން ހެނދުނަކަސް، މެންދުރަކަސް، ހަވީރަކަސް، އަދި ރޭގަނޑަކަސް ފޯރިމެރުމުގައި ފިރިހެނުންނާ އެކީ ޙަރަކާތްތެރިވާން ފެށިއެވެ. އިދާރީ ކަންތައްތަކުގައި އަވަދިނެތި އުޅެން ފެށިއެވެ. ޕީޓީއާއި ޕެރޭޑްކުރުމުގައި ވެސް، ހިޔަލަކަށް އަތްވަކަށް ނުބަލައި، އެކަން ވެސް ކުރަން ފެށިއެވެ. އާދެ، މީހުން ނުކުރެވޭނޭ ނުވަތަ ނުވާނޭ ހިތަށްއެރި އެތައް ކަމެއް، އަންހެން ސިފައިން ކުރަންފެށިއެވެ. ހީވާގި، ހިންގުންތެރި އަދި އެހާމެ ޙަރަކާތްތެރި ދަރިންތަކެއް މި ޚިދުމަތަށް ތަޢާރަފުވިކަން އެއީ، ދިވެހި ސިފައިންގެ ތާރީޚުގައި ވެސް ރަންއަކުރުން ފަވާލަންޖެހޭ ކަމެކެވެ.

އާދެ، ސިފައިންގެ ޚިދުމަތުގެ އެކި ދާއިރާތައް ފުރިހަމަކުރަމުން، ފަންނީ ތަމްރީނުތައް ވެސް އަންހެން ސިފައިން ހަދަން ފެށިއެވެ. ނަތީޖާއެއްގެގޮތުން، ކޮމްޕިޔުޓަރާއި، އިދާރީ ހިންގުމާއި، ފުލުހުންގެ ދާއިރާގެ ކޯސްތަކާއި، ޞިއްޙީ ޚިދުމަތުގެ އެކިއެކި ފެންވަރުގެ ކޯސްތައް ހަދައި ސިފައިންގެ ޚިދުމަތުގައި މަސްޢޫލުވިއެވެ.

މީގެއިތުރުން، ގިރިފުށީ ޓްރޭނިންގ ސެންޓަރުގައި، އަންހެން ސިފައިންނަށް ކުރިއަށްވުރެ ބޮޑަށް އަސްކަރީ ތަމްރީނުތައް ދޭން ފެށުނެވެ. އަސާސީ ތަމްރީނުގައި ހުރިހާ ގޮތަކުން އެންމެ މޮޅު ދަރިވަރުގެ މަޤާމާއި، އަމާޒަށް ބަޑިޖެހުމުން އެއްވަނައާއި، މުޅިކޯހުން އެންމެ ހަށިހެޔޮ ދަރިވަރުގެ މަޤާމު ވެސް އަންހެން ސިފައިން ހޯދާފައިވާކަމީ، ހުރިހާ މައިދާނެއްގައި ވެސް އަންހެން ސިފައިންގެ ޤާބިލުކަން ދައްކުވާދިން ކަމެކެވެ. މިގޮތުން ބަލާއިރު، ސްޕެޝަލް ޓާސްކް ފޯސްއާއި، އެންސީއޯ ކޭޑާރއާއި، ވެޕަން އަދި ޑްރިލް އިންސްޓްރަކްޓަރސް ކޯހުގެ އިތުރުން، ބޮޑީގާޑު ޓްރޭނިންގ ފަދަ އަސްކަރީ ސިފަވަންތަ ކޯސްތައް ވެސް އަންހެން ސިފައިން ފުރިހަމަކޮށްފައިވެއެވެ.

މީގެ ފޮނި އަރުތަޔަކަށް ވެގެން ދިޔައީ، ސިފައިންގެ ފެންވަރުގައި ހިންގޭ އެކިއެކި ޙަރަކާތްތަކުގައި އަންހެން ސިފައިން އިތުރަށް ޙަރަކާތްތެރިވުމެވެ. ސިފައިންގެ އެންމެ މުހިންމު އެއް އަސާސްކަމަށްވާ، ޕެރޭޑްކުރުމުގައި ވެސް އަންހެން ސިފައިން ޙަރަކާތްތެރިވުމާއި، ސިފައިންގެ މުނިފޫހިފިލުވުމުގެ ދާއިރާއިންކުރާ ކަންތައްތަކާއި، ސިފައިންގެ ހަށިހެޔޮކަން ދެމެހެއްޓުމަށް ޓަކައި ކުރިޔަށްގެންދެވޭ ކޮންމެ ކަމެއްގައި ވެސް އަންހެން ސިފައިން އުޅެނީ، އެއްވެސް ފަސްޖެހުމެއްނެތި ގަދަ ހިތްވަރަކާއެކުއެވެ.

މީގެއިތުރުން، އެކްސަސައިޒްތަކާއި، ތަމްރީނުތަކުގައި ވެސް، އަންހެން ސިފައިން ރެޔާއިދުވާލު ޙަރަކާތްތެރިވަނީ، ފަންނުވެރިކަމާއެކު، އެކަމަށް ފިސާރި އަހުލުވެރިވެ ތިބެގެންނެވެ. މިނޫނަސް، ޤައުމަށް ދިމާވާ ހާދިސާތަކާއި ކާރިސާތަކުގައި އަންހެން ސިފައިންގެ ރޯލު ވަރަށް ބޮޑުކަން ފާހަގަކުރެވެއެވެ. މިގޮތުންބަލާއިރު، ސުނާމީ ކާރިސާއާ ގުޅިގެން ރައްޔިތުންނަށް ސިފައިން ފޯރުކޮށްދިން ޚިދުމަތުގައި އަންހެން ސިފައިން އަދާކުރި ރޯލަކީ ކުޑަ ރޯލެއް ނޫނެވެ. ހާލުގައި ޖެހިފައިވާ އާއިލާތަކަށް އެކިއެކި އެހީތެރިކަން ފޯރުކޮށްދީ، އުފަން ދަރިންނާ މައިންހެން، އަންހެނުންނާ ކުޑަކުދިންނަށް އަޅާލައި ޚިދުމަތްތައް ފޯރުކޮށްދިނީ، އެ މޫނުތަކުން، ނުތަނަވަސްކަމުގެ އެއްވެސް ކުލަވަރެއް ފެނުނަނުދީ، ދެލޯނޭދިއެދޭ އުފަންދަރިން ބަލާހެން، ހިނިތުންވެރިކަމާއި އޯގާތެރިކަމާއި ލޯތްބާއެކުގައެވެ. ސިފައިންގެ ކޯޑް އޮފް އެތިކްސްގައި ބުނާ ފަދައިން ޤައުމީ ޚިދުމަތުގައި ނަފުސަށްވުރެ ދިވެހި ޤައުމު އިސްކޮށްގެންނެވެ.

ސިފައިންގެ ފެންވަރުގައި ބޭއްވޭ ކުޅިވަރު މުބާރާތްތަކުގެ ރޫޙަކީ، ސިފައިންގެ ބަހުރުވައިންނަމަ، މޮރާލްއަކީ އަންހެން ސިފައިންނެވެ. ސިފައިން ބައިވެރިވާ ހުރިހާ ކުޅިވަރު މުބާރާތްތަކެއްގައި ސިފައިންނަށް ތަރުޙީބުދިނުމާއި، ޤައުމީ ފެންވަރުގައި ބޭއްވޭ ކުޅިވަރު މުބާރާތްތަކުގައި ސިފައިންގެ ތަމްސީލުކުރުމުގައި އަންހެން ސިފައިން ފޯރިއާއެކު މަސައްކަތްކޮށް، ގިނަ ކާމިޔާބީ ސިފައިންގެއަށް ހޯދައިދީފައިވެއެވެ.

މީގެއިތުރުން އުފަލާއެކު ފާހަގަކޮށްލަންޖެހޭ އަނެއް ކަމަކީ، ސިފައިންނަށް ދެވޭ ތަމްރީނުތަކުގައި، މުދައްރިބުންގެ ގޮތުގައި އަންހެން ސިފައިން ޙަރަކާތްތެރިވަމުންދާކަމެވެ. މިގޮތުން ބަލާއިރު، ހެވިކަމާއި، ހަތިޔާރާއި، ފަސްޓްއެއިޑާއި، އެނޫންވެސް، ފީލްޑްކްރާފްޓް ފަދަ އަސްކަރީ މާއްދާތައް ކިޔަވައިދިނުމުގައި ހުނަރުވެރި އަންހެން ސިފައިން ޙަރަކާތްތެރިވާކަމީ، މި ދެންނެވި ބަހުގެ ތެދުކަން ސާބިތުކޮށްދޭނޭ ހެއްކެކެވެ.

ކޮންމެޔަކަސް، ދިވެހި ސިފައިންގެ ތެރެއަށް އަންހެން ސިފައިން ތަޢާރަފުވިތާ 20 އަހަރު ފުރުނުއިރު، މި ޚިދުމަތުން، އަންހެން މާލިމީން ތަޢާރަފުކޮށްދީފިއެވެ. މި ޚިދުމަތުގައި އަންހެން ސިވިލް އިންޖިނިއަރުންނާއި، ފަރުމާކުރުންތެރިންނާއި، ޤައުމީ ފެންވަރުގެ ދުވުންތެރިންނާއި ކުޅުންތެރިން އެބަތިއްބެވެ. އަދި ކީއްތޯއެވެ؟ އަންހެން ޑޮކްޓަރުން ވެސް އެބަތިއްބެވެ. މީގެއިތުރުން، ސްޕެޝަލް ޓާސްކްފޯސްއާއި، އެންސީއޯ ކޭޑާރއާއި، ވެޕަން އަދި ޑްރިލް އިންސްޓްރަކްޓަރސް ކޯސް ފުރިހަމަކޮށްފައިވާ ޤާބިލު މުދައްރިބުން އެބަތިއްބެވެ. އަންހެން ސިފައިންގެ ސަފުތައް ކާމިޔާބުކަމާއެކު އަދިވެސް މި ޚިދުމަތުގައި ދެމިތިބޭނެކަން، އެމީހުންގެ މާޒީން އެމީހުން ސާބިތުކޮށްދީފިއެވެ. މި ލޮބުވެތި ފަސްގަނޑާއި، ދީނާއި ރައްޔިތުންގެ ޙައްޤުގައި، އަންހެން ސިފައިން އަބަދުވެސް މަސައްކަތްކުރާނީ ސިފައިންގެ ޤައުމީ ޚިދުމަތުގެ މި ގުލްޒާރަށް މީރުވަހާއި، ރީތިކަމާއި، އުފާވެރިކަން ގެނެސްދޭ، މޯޅިވުމެއްނުވާ މާތަކެއް ފަދައިންކަން އެމީހުން މިއަދު ކަށަވަރުކޮށްދީފިއެވެ.