ޙުސައިން ޝާކިރު
އަޅުގަނޑުމެން އެކަކު އަނެކަކާ ބައްދަލުވެ މުޚާޠަބު ކުރަމުއެވެ. ވާހަކަދައްކަމުއެެވެ. ތަފާތު މުނާސަބާތަކާއި ކަންކަމުގައެވެ. ހިނިތުންވުމާ އެކުގައެވެ. ޚިޔާލާތު ހާމަކުރަމުއެވެ. ތަފާތު ޝުޢޫރުތައް ފާޅުކުރަމުއެވެ. ބައެއްފަހަރު ތާޢީދުކުރުމުގެ ޝުޢޫރުތަކެވެ. އަދި އަނެއްބައި ފަހަރު…
ޙަޤީޤަތް ސިއްރުކުރުމާއެކު ދުލުން ބޭރުކުރެވޭ ބުނުންތަކަކީ މަޢުނަވީ ބުނުމެއް ނޫނެވެ. އެފަަދަ ބުނުންތައް ބުނާމީހާގެ ބަހާއި ޢަމަލާ ދިމާވާނީ މަދު ފަހަރެއްގައެވެ.
އަޅުގަނޑުމެންނަކީ އެހެން މީހުން ކަހަލަ ބައެއް ނޫނެވެ. އަޅުގަނޑުމެންނަކީ ދިވެހި ޤައުމުގެ އަމަން ބެލެހެއްޓުމުގެ ބުރަބޮޑު މަސްޢޫލިއްޔަތު ބޮލުގައި އަޅައިގެން ތިބި މީހުންނެވެ. ބޭރުން އަތުވެދާނެ ކޮންމެ ޙަމަލާއަކުންނާއި ޤައުމުގެ އެތެރެއިން އުފެދިގެން އަތުވެދާނެ ކޮންމެ ނުރައްކަލަކުން މާތްވެގެންވާ އިސްލާމްދީނާއި ރައްޔިތުންނާއި ވެރިން ސަލާމަތްކުރުމުގެ މަސްޢޫލިއްޔަތު އުފުލުމަށް ﷲ ޞުބުޙާނަހޫ ވަތަޢާލާގެ ޙަޟުރަތުން ވާގިއެދި ތިބެ، އެކަމަށް ﷲ ގަންދީ ހުވާކޮށްގެން ތިބި މީހުންނެވެ. އަޅުގަނޑުމެންނަކީ ބަހާއި ޢަމަލާ އެކައްޗަކަށް ވެވިގެން ނޫނީ އަޅުގަނޑުމެންގެ މި މަތިވެރި މަޤުޞަދު ޙާޞިލެއް ނުކުރެވޭނެއެވެ.
މީހެއްގެ ހިތުގައި އުފެދޭ ޝުޢޫރުތައް ވަންހަނާކޮށް ދުލުކުރިން ބަސްބުނަމުންދާއިރު، އެ މީހާގެ ހަށިގަނޑަށް އަންނަ ކުއްލި ބަދަލުތަކާ ކުރެވޭ ހަރަކާތުން ޙަޤީޤަތް ހާމަވެގެންދެއެވެ. އަނގައިން ބަސް ބުނުމަކާ ނުލައި ޖިސްމާނީ ހަށިގަނޑުން ފޮނުވާ މެސެޖުތައް މަނާކުރަނީ ފޮނުވާ ފަރާތަކުން ނޫނެވެ. އެ މެސެޖް ރައްދުވާ ފަރާތުން ވެސް މަނާކުރާނެއެވެ.
ބައެއްފަހަރު ރައްޓެހި ރަޙްމަތްތެރިންނާއެކު ކޮފީއަކަށް، ރެސްޓޯރެންޓް، ކެފޭއާއި ކެފެޓޭރިއާތަކާއި ސައި ހޮޓާތަކާއި ކަޑަތަކަށް ވަނުމަކީ އިޖުތިމާޢީ ރޫޙު އާލާވާ ރަނގަޅު ކަމެކެވެ. އަޅުގަނޑު ވެސް ތާޢީދުކުރާ ރީތިގޮތުގައި ކޮށްފިނަމަ ރީތި ރަނގަޅު ކަމެކެވެ. އެހެންނަމަވެސް، ކޮފީތަށްޓެއް ބުއިމަށް ވަދެތިބޭއިރު އެ ތަނުގައި ދެކެވޭ ބައެއް ޒާތުގެ ވާހަކަތަކުގައި ބައިވެރިވެލުމުގެ ގޮތުން ބޯޖަހާލުމާއި އާނހޫނ ބުނެލެވުމާއި ބައެއްފަހަރަށް ބައެއް ބާވަތުގެ އެއްޗެތި މާބޮޑު ގަސްތެއްނެތި ބުނެވޭ ގޮތްވުމުން، ކުރިން މި ދެންނެވި ގޮތް ދިމާވެއެވެ. އަދި އެކަމުން ޙަޤީޤަތެއް ނެތް ކިތަންމެ ވާހަކަތަކަކަށް ފުރާނަ އެޅިގެން ދެއެވެ.
ބަހާއި ޢަމަލާ ދިމާނުވާ ކަމާއި ތިމާގެ ހަސްނެތް މިންވަރު ބަލަންތިބިންނަށް މިކަމުން ހާމަވެގެން ދެއެވެ. މަދުންނަމަވެސް އަޅުގަނޑުމެން ބައެއް މީހުންގެ ފުށުން ގަސްދަކާ ނުލައި ހިނގާ މިފަދަ ދެރަ ކަންތަކުގެ ވާހަކަ ދެކެވޭއަޑު ބައެއްފަހަރު ފޫދިގެން އައިސް އަޅުގަނޑުގެ ކަންފަތަށް އަރާތީ ހަމަ ލިޔެލެވުނީއެވެ. އަޅުގަނޑުމެން ތިބެން ވާނީ ވަރަށް ހަރުދަނާކަމާއެކުގައެވެ. އަޅުގަނޑުމެންގެ ވެރިން ދެއްވާ އިރުޝާދުގެ މަތީގައި ސާބިތުވެއެވެ. އިއްވާލާހާ އަޑަކުން، ދައްކާލާހާ ކުލަވަރަކުން އަޅުގަނޑުމެންގެ ސަފުތަކަށް އެއްވެސް ބަލިކަށިކަމެއް އަޔަދީގެން ނުވާނެއެވެ.
މަޢާފުކުރެއްވުން އެދެމެވެ. އަޅުގަނޑު މި ރާގަށް މި މޭރުމުން މި ވާހަކަ މި އުފާވެރި މުނާޞަބާއާ ގުޅުވައިގެން ލިޔުމަށް ޚިޔާލުކުރީ އަޅުގަނޑުގެ ހިތުގައި ސިފައިންގެ ޚިދުމަތަށް ދެވިފައިވާ މަތިވެރި ޤަދަރާއި ލޯބީގެ ބޮޑުކަމުންނެވެ. ހިތުގެ ޒުވާންކަމާ އެއްވަރަށް ޖިސްމާނީ ދުޅަހެޔޮކަން ހުރިނަމަ، އަޅުގަނޑުގެ ޖޯޝް ވެސް…
ސިފައިންގެ ޝަރަފުވެރި ޚިދުމަތުގައި އުޅުއްވުމަށްފަހު، ޝަރަފުވެރިކަމާއެކު ޚިދުމަތުގެ ދާއިރާއިން ނުކުމެވަޑައިގެން ތިއްބެވި ބޭފުޅުންގެެ އަގުވަޒަންކުރެވެމުންދާ ތަން ފެނުމުން އުފާވެރިކަމުގެ ޝުޢޫރުތައް ހިތަށް ވެރިވެއެވެ. ލޮލުން ކަރުނަ ފޫދިގެން އާދެއެވެ.
ސިފައިންގެ ޚިދުމަތަކީ ގަދަރުވެރި، ޝަރަފުވެރި ޚިދުމަތެކެވެ. އެ ޚިދުމަތުގައި ދެމިތިބެން ޖެހޭނީ ޝަރަފުވެރިކަމާ އެކުގައެވެ. އަދާކުރާ ޚިދުމަތާއި ނިޞްބަތްކުރެވޭ ގޮތުގައެވެ. މިހެން ދެންނެވުމުން އުފެދި ފެންމަތިވެގެންދާނެ ސުވާލުތައް މަދު ނުވާނެކަން އިޙުސާސް ކުރެވެއެވެ.
އަޅުގަނޑު ޤަބޫލުކުރާ ގޮތުގައި ސިފައިންގެ ޚިދުމަތެކޭ އެއްފަދައިން ފުލުހުންގެ ޚިދުމަތަކީ ވެސް ޤަދަރުވެރި، ޝަރަފުވެރި ޚިދުމަތެކެވެ. އެ ޚިދުމަތް އަދާކުރާ މީހުން ވެސް ވާންޖެހޭނީ ހަމަ އެފަދަ ބަޔަކަށެވެ. އެއްބަޔަކު އަނެއް ބަޔަކަށް ހުރިހާ މާނައެއްގައި ވެސް އިޙްތިރާމްކުރާ، ގަދަރުކުރާ، އެހީތެރިވާ، އަޚުވަންތަ ބަޔަކަށެވެ. އަޅުގަނޑަށް ސިފަކުރެވޭގޮތުގައި ސިފައިންނާއި ފުލުހުންނަކީ އެއް ގާޑިޔަލުގައި ލާފައިވާ ދެ އަހެވެ. ސިފައިންނާއި ފުލުހުންގެ ވެސް މަޤުޞަަދަކީ އެކައްޗެކެވެ. އިސްލާމްދީނާއި ރައްޔިތުންނާއި ވެރިން ސަލާމަތްކުރުމެވެ. ޤައުމަށް ދިމާވެދާނެ ކޮންމެ ނުރައްކަލަކަށް ހޭލައި ފާރަވެރިވެ ތިބުމެވެ. އެއީ ހާދިސާއަކަސް ކާރިސާއަކަސް ފިސާރި ކެރިތިބެގެން ކުރިމަތިލުމެވެ. އެއީ، ޤައުމުގެ ބޭރުން އަންނަ ކަމެއް ކަމުގައި ވިއަސް ނޫނީ ޤައުމުގެ ތެރެއިން ނަގާ ބޮޑުކުރަމުން އަންނަ ކަމެއް ކަމުގައި ވިއަސް ވެހެވެ.
ސިފައިންނާއި ފުލުހުންނަކީ ޤައުމުގެ ތެރޭގައި ހިނގާ އެއްވެސް ވާދަވެރިކަމެއްގެ ތެރެއަށް ވަދެގެން ވާނެ ބައެއް ނޫނެވެ. ސިފައިންނާއި ފުލުހުން އެންމެ އިސްކަމެއް ދޭން ޖެހޭނީ ޤައުމާއި ރައްޔިތުންގެ ސަލާމަތަށާއި ރައްޔިތުންގެ މެދުގައި އޮންނަންވީ ހަމަޖެހުމާއި މަސްލަޙަތަށެވެ. ސިފައިންނާއި ފުލުހުންގެ މި ބަދަހި ސަފުތައް ރޫޅިގެން ހިނގައިދާނެ އެއްވެސް ޙަޤީޤަތެއް ނެތް ވާހަކަތައް ފެތުރުމަށް ކުޑަ ތަންކޮޅެއް ވެސް ދީގެން ނުވާނެއެވެ.
އަޅުގަނޑުމެން އެއްބަޔަކު އަނެއް ބަޔަކާ ބައްދަލުވާން ޖެހެނީ އެއްބަޔަކު އަނެއްބައެއްގެ ބޭނުންތައް ފުއްދައިދީ ހިތްހަމަޖައްސައިދެވިއްޖެކަމުގެ ޔަޤީންކަމާއެކުގައެވެ. އުފާވެރިކަމުގެ ހިނިތުންވުމާއެކު “އައްސަލާމް ޢަލައިކުމް” ގެ މި މަތިވެރި ޝިޢާރު ޙަޤީޤީ މާނައިގައި ފާޅުކުރަމުންނެވެ.
