މުޙައްމަދު ނާސިރު
ކޮންމެ ޤައުމެއްގައި ވެސް އެ ޤައުމެއްގެ ރައްޔިތުންނަކީ ޤައުމީ ކޮންމެވެސް ވާޖިބުތަކަކާއި ޒިންމާތަކެއް އުފުލަން ޖެހޭ ބަޔެކެވެ. އަމިއްލަ ދިރިއުޅުމާއި، އަދާކުރާ ވަޒީފާގެ އިތުރުންނެވެ. ޤައުމަކަށް ވީތީވެ، އަދި އެ ޤައުމަކަށް ތިމާ ނިސްބަތްވީތީވެ، އެ ޤައުމުގެ މިނިވަންކަމާއި އިސްތިޤުލާލު ރައްކާތެރިކޮށް އަންނަން އޮތް ޖީލުތަކަށް ފޯރުކޮށްދިނުމަށް ޓަކައެވެ. އަޅުގަނޑުމެންގެ މި ރާއްޖެއަކީ މިނިވަންކަމާއި އިސްތިޤުލާލު ރައްކާތެރިކުރެވި، އެކަމުގެ އުފަލާއި ހިތްހަމަޖެހުމުގައި ހަޔާތް ވޭތުކުރުމުގެ ނަސީބު ލިބިފައިވާ ރައްޔިތަކު ދިރިއުޅޭ ޤައުމެކެވެ. އަދި މިއީ ކުރިން ދެންނެވިފަދަ ޤައުމީ ވާޖިބުތައް، ތިމާމެންގެ އަމިއްލަ ދިރިއުޅުމަށް ވުރެ ކުރިއަށް ނެރެ، މި ޤައުމުގެ މިނިވަންކަމަށް ޓަކައި ޤުރުބާންތަކެއް ވެފައިވާ އެތައް ދަރިންނެއްގެ މިންނެތް މަސައްކަތުގެ ފޮނި ނަތީޖާއެވެ. ވުމާއެކު އަޅުގަނޑުމެންގެ ތެރެއިން ކޮންމެ މީހަކީ ވެސް މި ފަޚުރާއި ނަސީބު ލިބިފައިވާ މީހެކެވެ.
ޤައުމުގެ މިނިވަންކަމާއި އިސްތިޤުލާލު ރައްކާތެރިކޮށް ދެމެހެއްޓުމުގައި ޤައުމުގެ އެކި އަފުރާދުންގެ ޒިންމާއާއި ދައުރު ތަފާތު ވާނެކަން އަޅުގަނޑުމެން ޤަބޫލުކުރަން ޖެހެއެވެ. މުޖުތަމަޢުގައި ތިމާއަށް ލިބިފައިވާ ޖާގައާއި އަދާކުރާ ވަޒީފާގެ ހައިސިއްޔަތުންނެވެ. އެހެންކަމަށްވާނަމަ، މި ކަމުގައި އެންމެ ކުރީ ސަފުގައި ތިބި ބަޔަކީ އަޅުގަނޑުމެން ސިފައިންކަން ޔަޤީނެވެ. އަޅުގަނޑު ހިތުން މިއީ ސިފައިންގެ މީހަކަށް ވީތީވެ އަޅުގަނޑުމެންނަށް ލިބޭ އެންމެ ބޮޑު އުފަލާއި ފަޚުރެވެ. އަދި މި ވަޒީފާއަކީ ފަޚުރުވެރި ވަޒީފާއަކަށް ވަނީ ވެސް މި ސަބަބަށް ޓަކައެވެ. އަޅުގަނޑުމެން ދިވެހި ސިފައިން އަޅުގަނޑުމެންގެ ވަޒީފާއަށް ޓަކައި ފަޚުރުވެރިވާން ޖެހޭ ގިނަގުނަ ސަބަބުތަކެއް އެބަ ހުރިކަން ޤަބޫލުކުރަން ޖެހެއެވެ. ވަޒީފާގެ ހައިސިއްޔަތުން ބަލާއިރު ތަޢުލީމާއި، މަސައްކަތްތެރިކަމުގެ ގޮތުން އެންމެ ބޮޑު، އެންމެ ގިނަ ފުރުޞަތުތަކެއް އޮތް އެއް ދާއިރާއަކީ މިއީއެވެ. ހަމައެހެންމެ އާމްދަނީގެ ގޮތުންނާއި އެހެނިހެން ގިނަގުނަ މުހިންމު ޚިދުމަތްތަކެއް ލިބުމުގެ އިތުރަށް ސިފައިންގެ ވަޒީފާއަކީ މި ވަޒީފާގައި ކުރެވޭ ކޮންމެ މަސައްކަތަކަށް ބޭނުންވާ ތަޢުލީމާއި ތަމްރީނު ލިބިގެން ކުރެވޭ މަސައްކަތްތަކެކެވެ. މިގޮތުން އަޅުގަނޑުމެންގެ ވަޒީފާގައި ހިފަހައްޓަންޖެހޭ ވަކި ޚާއްޞަ ސިފަތަކަކާއި އުސޫލުތަކެއް ވެއެވެ. ވަކިން ޚާއްޞަކޮށް އަޚްލާޤީ ސުލޫކުތަކާއި، ހަމަތަކެވެ. މީގެ ތެރެއިން ދީނީ އަޤީދާގައި ސާބިތުވެތިބެ އަމުރަށް ކިޔަމަންތެރިވުމާއި، ކަމަށް ކަމޭހިތުން، ގަޑިއަށް ފަރުވާތެރިވުން، އިސްނެގުމާއި އަނެކުންނަށް އެހީތެރިވުން، އެހެން މީހުންނަށް އިޙްތިރާމްކުރުން، ހިތްވަރާއި ކެރުން، ސާބިތުކަމާއި، ސެލްފް ކޮންފިޑެންސް އަދި ކާމިޔާބުކުރުމުގެ ރޫޙާއި ޖޯޝް ފަދަ ސިފަތަކަކީ އަޅުގަނޑުމެންގެ މި ވަޒީފާގައި ދެމިހުންނަ ކޮންމެ މީހެއްގެ ފަރާތުން ފެނިގެންދާނެ މުހިންމު އަޚްލާޤީ ސިފަތަކެކެވެ. ހަމައެހެންމެ މިއީ ވަޒީފާގެ ތަމްރީނުތަކުގެ މުހިންމު ބައެއް އަސާސްތައް ވެސް މެއެވެ.
ނަތީޖާއަކަށް ވަނީ މި ސިފަތަކުން އަޅުގަނޑުމެން ސިފަ ލިބިގަތުމުގެ ސަބަބުން އެހެން މީހުންގެ ކުރިމަތީގައި އަޅުގަނޑުމެންގެ ޤަދަރާއި އަގުއުފުލިގެން ދިއުމެވެ. ހަމައެހެންމެ އަޅުގަނޑުމެންނަކީ ޤައުމަށް ދިމާވާ ކޮންމެ ބޮޑު ކަމެއްގައި ޖާނާއި ފުރާނައިން ޤުރުބާން ވާން ތައްޔާރަށް ތިބޭ ބަޔަކީމުއެވެ. 2004 ގައި ދިމާވި ހިތާމަވެރި ސުނާމީ ކާރިސާއަކީ މިކަމުގެ އަލިގަދަ ހެއްކެކެވެ. އެ ދުވަހު އަޅުގަނޑުމެންގެ އާއިލާއާއި ދިރިއުޅުން ދޫކޮށް ދިވެހި ރައްޔިތުންގެ ރައްކާތެރިކަމާއި، ސަލާމަތަށް ޓަކައި އެތަކެއް ޤުރުބާނީތަކެއް ވީމެވެ. އަޅުގަނޑު ހިތުން މިއީ ހަމަކޮންމެ ދިވެއްސަކު ވެސް އަޅުގަނޑުމެންނަށް ޓަކައި ފަޚުރުވެރިވާ އަދި ޝުކުރުވެރިވާ ކަންތައްތަކެކެވެ. މިނޫނަސް މިފަދަ ތަފާތު އެތައް ކަމެއް އަޅުގަނޑުމެންގެ ތާރީޚުގެ ޞަފުޙާތަކުން ފެންނަން އަދިވެސް އެބަހުއްޓެވެ. މިއީ ހައްތާ ވެސް އަޅުގަނޑުމެންނަށް ލިބޭ ޝަރަފާއި ޢިއްޒަތެވެ. ސިފައިންގެ މީހަކަށް ވީތީވެ ޤައުމަށް ޚިދުމަތްކުރުމުގައި ރެއާއި ދުވާލު އަޅުގަނޑުމެން މިކުރާ މަސައްކަތުގެ އަގުވަޒަންކުރާ އެތައް ބަޔަކު މި ޤައުމުގައި ތިބިކަމީ ޝައްކެއް ވެސް އޮތް ކަމެއް ނޫނެވެ. ނަމަވެސް ޒަމާނުގެ ތަޙުޒީބާއި، ބަދަލުވަމުންދާ ދުނިޔަވީ އާދަކާދަތަކަށް އަޅުގަނޑުމެން ހޭއަރައި ސަމާލުވާން ޖެހޭކަން ވެސް ހަނދާންކޮށްލަން ޖެހެއެވެ. މި ޤައުމުގެ މިނިވަންކަމުގެ ހުޅުކޮޅު ނިއްވާލުމުގެ މަކަރުވެރި ރޭވުމާއި އެކަމުގެ އެދުންވެރިކަން ހުރި ބަޔަކު ވެސް ތިބެދާނެތީއެވެ. މަދު ފަހަރެއްގައި ނަމަވެސް އަޅުގަނޑުމެން ވެސް އެފަދަ ހިތި ތަޖުރިބާތަކެއް ކުރަންޖެހިފައި ވުމުގެ ސަބަބުންނެވެ. ވުމާ އެކު އެފަދަ ކޮންމެ ހާލަތަކަށް ޓަކައި އަޅުގަނޑުމެން ތައްޔާރުވާން އެބަޖެހެއެވެ. އަޅުގަނޑުމެންގެ ސަފުތައް ވަރުގަދަކޮށް ބަދަހިކޮށްގެންނެވެ. ހަމައެހެންމެ، ބޮމާއި ބަޑީގެ ކުރިން އަތުވެދާނެ ފިކުރީ ހަނގުރާމައަކުން ޤައުމުގެ މިނިވަންކަން ސަލާމަތްކުރުމަށް ޓަކައި ދުރު ވިސްނޭ، ރަނގަޅާއި ނުބައި ވަކިކުރަން އެނގޭ ސިކުނޑިތަކެއް ތައްޔާރުކުރަން ވެސް ޖެހެއެވެ. އެހެން ނަމަވެސް މިކަމަކީ އަޅުގަނޑުމެން ކުޑަކޮށް ވެސް ޝައްކުކުރަންވީ ކަމެއް ނޫނެވެ. ދޮންބަންޑާރައިން، ޝަހީދު ޙުސައިން އާދަމް ފަދަ އެތައްއެތައް ދަރިންނެއް އަދިވެސް އަޅުގަނޑުމެންގެ ތެރޭގައި އެބަތިއްބެވެ. ހިތްވަރާއި އަޒުމުގައެވެ. ސާބިތުކަމާއި ތެދުވެރިކަންމަތީގައެވެ. އަޅުގަނޑުމެންގެ މި ވަޒީފާއަކީ އެހެން މީހުންނަށް ނުލިބޭނެ މިފަދަ އެތައް ނަސީބުތަކެއް ލިބިފައިވާ ފަޚުރުވެރި ވަޒީފާއެކެވެ.
އާއެކެވެ! އަޅުގަނޑުމެން، މިއަދު މި ޤުރުބާންކުރަނީ އަޅުގަނޑުމެންގެ ދަރިންގެ މާދަމާއަށް ޓަކައެވެ. ސިފައިންގެ ވަޒީފާއަކީ ފަޚުރުވެރި ވަޒީފާއެކޭ އަޅުގަނޑު މި ދަންނަވަނީ މި ސަބަބުތަކަށް ޓަކައެވެ.
