ޢަބްދުﷲ ސަޢީދު
ރާއްޖޭގެ އެކިއެކި ދާއިރާތަކަށް ޒަމާނީ ބަދަލުތައް އަންނަމުން އެބަދެއެވެ. އިސްލާޙީ ހެޔޮ ބަދަލުތަކެވެ. ވޭތުވެދިޔަ ތިރީހަކަށް އަހަރަކީ އެކިއެކި ގޮތްގޮތުން ސިފައިންގެ ޚިދުމަތަށް ވެސް އިޞްލާޙީ ހެޔޮ ބަދަލުތަކެއް އައިސްފައިވާ ދުވަސްތަކެއް ކަމުގައި ދަންނަވަން ޖެހެއެވެ. މި ހެޔޮ ބަދަލުތަކުގެ ސަބަބުން ސިފައިންގެ ޤަދަރާއި ހައިބަތު ބޮޑުވެއްޖެއެވެ. ރައްޔިތުންގެ ރުހުމާއި ލޯބި ލިބޭ ބަޔަކަށް ސިފައިން ވެއްޖެއެވެ. ޒަމާނަށް ލޯހުޅުވޭ، ވާޖިބާއި މަސްޢޫލިއްޔަތު އުފުލުމުގައި ރީތި ނަމޫނާއެއް ދަައްކާ ބަޔަަކަށް ވެއްޖެއެވެ. ރައްޔިތުންްގެ އިތުބާރު ލިބިފައިވާ ބަޔަކަށް ވެއްޖެއެވެ.
މީގެ ކުރިން ސިފަައިންގެ ޚިދުމަތަކީ ދިވެހި މުޖުތަމައުގައި އެއްވެސް އަގެއްނެތް، ޤަދަރެއްނެތް މަސައްކަތެކެވެ. އޭރު ސިފަައިންގެ ޚިދުމަތަށް މުޖުތަމަޢުން ދީފައިވަނީ މީގެ ކުޑަދުވަަސްކޮޅެއް ކުރިން ދިވެހި ފިލްމީ ދާއިރާއަށް ދީފައިވާ ޤަދަރެވެ. ސިފައިންނަކީ އަބުުރުވެރި ޤަދަރުވެރި ބައެއް ކަމަކަށް ނުދެކެއެވެ. ސިފައިންގެ ވާޖިބާއި މަސްޢޫލިއްޔަތަކީ ކިހާ މުހިންމު ކަމެއް ކަމަކަށް ޤަބޫލެއް ނުކުރެއެވެ. ނަތީޖާއަކަށް ވެގެންދިޔައީ ސިފައިންގެ ޚިދުމަތަށް އަންނާނެ ތަޢުލީމީ މީހުން ނުވުމެވެ. ބެލެނިވެރިންނާއި މައިންބަފައިން ރުހޭ ކަމަކަށް ނުވުމެވެ. މިއަދު މިވަނީ އެ ވިސްނުން އެކޮޅުކޮޅުން ޖެހިފައެވެ. ގަދަކަމުން ބޮންޑު ފުރިހަމަކުރުމަށް މީހުން ވެއްދުމުގެ ބަދަލުގައި ސިފައިންގެ ވަޒީފާއަކީ އަމިއްލަައަށް އެދިގެން މީހުން ވަނުމަށް ފުރުޞަތު ހުޅުވާލެވިފައިވާ އަދި ވަޒީފާއަށް އެދޭ ފަރާތްތައް ގިނަކަމުން އެންމެ ރަނގަޅު ފަރާތްތައް ހޮވައިގެން ވަޒީފާ ހަމަޖައްސަންޖެހޭ ތަނަކަށް ވެފައެވެ. މިކަމުން ދޭހަކޮށްދެނީ ދިވެހި ރައްޔިތުންގެ ކުރިމަތީގައި ސިފައިންގެ ތަޞައްވުރު ރަނގަޅުވެފައިވާ މިންވަރާއި އަދި ސިފައިންގެ ވާޖިބާއި މަސްޢޫލިއްޔަތަކީ ކިހާމުހިންމު ކަމެއްކަން ދެނެތިބި މިންވަރެވެ.
އަޅުގަނޑުމެންގެ ޤައުމުގެ އަމާންކަމާއި ސުލްޙަވެރިކަމާއި މިނިވަންކަމާއި އަދި މިޤައުމުގައި މިވާ މާތްވެގެންވާ އިސްލާމްދީން ރައްކާތެރިކޮށް ހިމާޔަތްކުރުމުގައި އެންމެބޮޑު ޤުރުބާނީއެއް ވާންޖެހޭނީ މި ޤައުމުގެ ދަރިންނަށެވެ. މި ކަންކަމަކީ ހިލޭ ލިބޭ ކަންކަމަށް ނުވެފައި އަދި ޤުރުބާނީތަކަކާ ލައިގެން ނޫނީ ދެމެހެއްޓޭ ކަންކަން ނޫންކަން މިއަދުގެ ދުނިޔޭގެ ކޮންމެ ދިމާލަކަށް ނަޒަރު ހިންގާލިޔަސް އެނގޭނެއެވެ. ކޮންމެ ޤައުމެއްގައި ވެސް އެ ޤައުމެއްގެ މިނިވަންކަމާއި އިސްތިޤުލާލު ރައްކާތެރި ކުރުމުގައި އެންމެ ކުރީސަފުގައި ތިބެނީ އެ ޤައުމެއްގެ ހިތްވަރުގަދަ، އަޒުމްވަރުގަދަ ސިފައިންނެވެ. ޤައުމަށް ކުރިމަތިވާ ކޮންމެ ނުރައްކަލަކާ އެންމެ ފުރަތަމަ ކުރިމަތިލާން ޖެހޭނީ އެ ޤައުމެއްގެ ސިފައިންނަށެވެ. ޤައުމުގެ މިނިވަންކަމާއި ސިޔާދަތަށް ބުރޫއަރުވާލަން ދެވޭ ޙަމަލާތަކުގެ އިތުރުން ޤުދުރަތީ ހާދިސާތަކުން ޢާންމު ރައްޔިތުންނާއި މުދާ ސަލާމަތްކޮށްދީ އެހީތެރިވުމުގެ ސަފުގަައި ވެސް އެންމެކުރީގައި ޙަރަކާތްތެރިވާން ޖެހިފައިވަނީ ސިފައިންނަށެވެ. މިކަމުގެ ވަރަށް ފުރިހަމަ ހެކިތަކެއް 1988 ނޮވެންބަރ 3 ގެ ޢުދުވާނީ ޙަމަލާގަޔާއި، 2004 ޑިސެންބަރ 26 ގެ ސުނާމީ ކާރިސާއިން ފެނިގެން ދިޔައެވެ. މިފަދަ ކޮންމެ ކަމަކުން އެނގި ފާޅުވާ ޙަޤީޤަތަކީ ސިފައިންގެ މުހިންމުކަމާއި ސިފައިންގެ ވާޖިބާ މަސްޢޫލިއްޔަތު ބޮޑުކަމެވެ. މިއީ ދެބަސްވެވެންނެތް ޙަޤީޤަތެކެވެ.
ދިވެހިރާއްޖޭގައި ސިފައިންގެ ޚިދުމަތް ކޮންމެވެސް ސިފައެއްގައި ނެތްއިރެއް ނުދާނެކަން ކަށަވަރެވެ. ރާއްޖޭގެ މިނިވަންކަމުގެ ތާރީޚް އެހެންނޫނީ އެހާ ދިގެެއް ނުވީހެވެ. “ސިފައިން” މި ނަމުގައި ބަޔަކު ހަރަކާތްތެރި ނުވިއެއް ކަމަކު ސިފައިންގެ ވާޖިބާއި މަސްޢޫލިއްޔަތު ކޮނޑުގައި އަޅައިގެންނޫނީ މިނިވަން މުސްތަޤިއްލު އަމިއްލަ ވެރިކަމެއްކުރާ ޤައުމެއްގެ އިތުުރުން އެއް ދީނެއް ޙިއްސާކުރާ ބަޔަކަށް ދިވެހިން ނުވީހެވެ. މިކަމުން ދޭހަކޮށްދެނީ ކޮންމެވެސް ދަރިންތަކެއްގެ މަތިވެރި ޤުރުބާނީއެވެ. ފަންވަރާއި ހިތްވަރާއި އަޒުމާއި ކެރުމެވެ. ތާރީޚީ ގޮތުން ސިފައިން އުފެދުނުކަމަށް ބެލެވޭ ތާރީޚަށް ވެސް މިހާރުވަނީ 115 އަހަރު ފުރިފައެވެ.
ރަޢީސުލްޖުމްޙޫރިއްޔާ ފަށްޓަވާފައިވާ އިޞްލާޙީ އެޖެންޑާގެ ދަށުން ސިފައިންނާއި ފުލުހުން ވަކިވެގެން ހިނގައްޖެއެވެ. ފުލުހުންނަކީ މަދަނީ ބަޔަކަށްވެ ދެ މުއައްސަސާގެ މަސައްކަތް ތަފާތުވެއްޖެއެވެ. ސަރުކާރު ހިންގުމުގެ ނިޒާމަށް ވެސް ނުހަނު ބޮޑެތި އިޞްލާޙުތަކެއް ދަނީ އަންނަމުންނެވެ. ދައުލަތުގެ ބާރުތައް ވަކިވުމާއި ސިޔާސީ ޕާޓީތައް އުފެދުމާއި ސިވިލް ސަރވިސް، ސިޔާސީގޮތުން ވަކި ފަރާތަކަށް ނުޖެހޭ ފަރާތްތައް، ޤާނޫނީގޮތުން މިދަނީ އެނގެމުންނެެވެ. ޒަމާނީ ބަދަލުތައް އަންނަމުންދާއިރު، އެދެވޭ ކަންތައްތަކާއި ނޭދެވޭ ކަންތައްތަައް ފެންނާނެއެވެ. އަމިއްލަ ބޭނުންތައް ފުއްދުމަށް ޤައުމީ މަޞްލަޙަތާއި މިނިވަންކަމާއި ދީން ވިއްކާލަން ވެސް ޚިޔާނަތްތެރިން ރޭވުން އެކަށީގެންވެއެވެ. މިފަދަ ކަންތައްތަކާ ކުރިމަތިލުމަށް ވެސް ހިތްވަރާއި އަޒުމުގައި ކަމަރު ބާރުކުރަން ޖެހެއެވެ. މާޒީގައި އަބުޠާލުން ދެއްކެވި ނަމޫނާއާ އެއްގޮތަށެވެ.
