މުޙައްމަދު އިޝާން ޙުސައިން
1999 ވަނަ އަހަރުގެ ސެޕްޓެންބަރު 30 ވަނަ ދުވަހު، ޖަޕާނުގައި ހުރި ނިއުކްލިއަރ ކޮންވާޝަން ޕްލާންޓްގައި ވަރަށް ނުރައްކާތެރި ހާދިސާއެއް ހިނގިއެވެ. މި ނުރައްކާތެރި ނިއުކްލިއަރ ހާދިސާގައި ދެ މީހަކު މަރުވިއެވެ. އޭގެތެރެއިން އެކަކަށް ކިޔާ ނަމަކީ، ހިސާޝީ އައޯޗީއެވެ.
މި ލިޔުމުގައި މި ބަލާލަނީ އެ ހާދިސާގައި ހިސާޝީ އައޯޗީއަށް ލިބުނު ޒަޚަމްތަކާއި، އަޅަމުންދިޔަ ވޭނާއެކު ވެސް، ސައިންޓިފިކް ތަޙުޤީޤުތަކެއް ކުރުމަށް އޭނާގެ ދިރިހުރި، އެހެނަސް މަރުވެފައި އޮތް ހަށިގަނޑު ބޭނުންކުރި ގޮތުގެ ވާހަކައެވެ.
ހިސާޝީ އައޯޗީއަކީ ޖޭސީއޯ (ޖަޕާން ނިޔުކްލިއަރ ފިޔުލް ކޮންވާޝަން ކޮންޕެނީ) ގެ ނިއުކްލިއަރ ކޮންވާޝަން ޕްލާންޓުގައި މަސައްކަތް ކުރަމުންދިޔަ ޓެކްނީޝަނެކެވެ. މި ނިއުކްލިއަރ ކޮންވާޝަން ޕްލާންޓުގައި ހިނގި ނުރައްކާތެރި ނިއުކްލިއަރ ހާދިސާގައި މަރުވި ހިސާޝީ އައޯޗީއަކީ މިހާތަނަށް އަދި ދުނިޔޭގައި ރޭޑިއޭޝަންގެ އެންމެ ގިނަ އަދަދުތަކަށް ހުށަހެޅުނު މީހާއެވެ. ހާދިސާގެ ސަބަބުން އޭނާ އެތަކެއް ވޭނެއް ތަހައްމަލު ކުރިއެވެ. އެ ވޭނާއި ރިހުން ތަހައްމަލުކުރަމުން ދިޔަ އިރު، ރިސާޗު ކުރުމުގެ ބޭނުމަށް، އޭނާގެ ނުރުހުމުގައި ޑޮކްޓަރުންގެ ޓީމެއް ވަނީ އޭނާ ދުނިޔޭގައި ބެހެއްޓެން ހުރި ހުރިހާ މަސައްކަތެއްކޮށް، ރަހުމެއްނެތް އެތައް ކަމެއް ކޮށްފައެވެ.
މި ހާދިސާއަކީ ޖަޕާނުގައި މިހާތަނަށް ހިނގާފައިވާ އެންމެ ނުރައްކާތެރި ސިވިލިއަން ނިއުކްލިއަރ ހާދިސާގެ ގޮތުގައި ސިފަކުރާ ހާދިސާއެކެވެ. މި ހާދިސާ ހިނގަން މެދުވެރިވީ ގޮތް ކުރު ގޮތަކަށް ދެންނެވޭތޯ ބަލާނަމެވެ.
އާދެ، ޕްލާންޓުގައި އެ ދުވަހު މަސައްކަތް ކުރި ހިސާޝީ އައޯޗީއާއި އިތުރު ދެ މީހަކު ޕްލާންޓުގައި ހުންނަ ޕްރިސިޕިޓޭޝަން ޓޭންކަށް 7 ބާލިދީގެ އޭކުޔެސް ޔޫރެނިލް ނައިޓްރޭޓް އެޅިއެވެ. އޭކުޔެސް ޔޫރެނިލް ނައިޓްރޭޓް މިހާގިނަ އަދަދަކަށް އެޅުމާއެކު ޓޭންކުން ވަގުތުން ނުރައްކާތެރި ރަނގަބީލު އަޅަން ފެށިއެވެ. ޓޭންކު ތެރޭގައި ސެލްފް ސަސްޓެއިނިންގ ނިއުކްލިއަރ ފިޝަން ޗެއިން ރިއެކްޝަނެއް އުފެދި، ގެމާ އަދި ނިއުޓްރޮން ރޭޑިއޭޝަންގެ ގިނަ މިންވަރުތަކެއް ބޭރުކުރަން ފެށިއެވެ.
ހާދިސާ ހިނގި ވަގުތު ނިއުކްލިއަރ ފެސިލިޓީގައި އެ ދުވަހު މަސައްކަތް ކުރަމުންދިޔަ މީހުންނަކީ ހިސާޝީ އައޯޗީއާއި، މަސާޓޯ ޝިނޮހަރާ، އަދި ޔުޓާކާ ޔޮކޮކާވާއެވެ. އެ މީހުންގެ މަސައްކަތަކަށް އެ ދުވަހުވީ ޖޯޔޯ އެކްސްޕެރިމެންޓަލް ފާސްޓް ބްރީޑަރ ރިއެކްޓަރަށް ބޭނުންވާ މަދު މިންވަރެއްގެ ތެޔޮ އުފެއްދުމެވެ. ވޭތުވެދިޔަ ތިން އަހަރުގެ ތެރޭގައި ފުރަތަމަ ފަހަރަށް މި ގޮތަށް ތެޔޮ އުފައްދަން އެމީހުން މަސައްކަތް ކުރަމުން ދިޔައިރު، ޕްރިސިޕިޓޭޝަން ޓޭންކާ އެންމެ ގާތުގައި ހުރީ އައޯޗީއެވެ. ޝިނޮހަރާ އޭރު ހުރީ ތަންކޮޅެއް ދުރުގައި ހުރި ޕްލެޓްފޯމެއް މަތީގައެވެ. އަދި ޔޮކޮކާވާ ހުރީ 4 މީޓަރު ދުރުގައި ހުރި މޭޒެއް ދޮށުގައި އިށީނދެލައިގެންނެވެ. ޕްރިސިޕިޓޭޝަން ޓޭންކު ނުރައްކާތެރި ހާލަތަކަށް ހުށަހެޅުމާއެކު، ޝިރެންކޯވް ރޭޑިއޭޝަންގެ ނޫ ކުލައިގެ ވިދުވަރެއް ފެނުނު ކަމަށްވެއެވެ.
މިއީ ޖަޕާނުގައި މި ފަދައިން ހިނގި ދެވަނަ ނިއުކްލިއަރ ހާދިސާއެވެ. އޭގެކުރިން ހިނގި ފުކިޝީމާ ޑައިޗީ ނިއުކްލިއަރ ހާދިސާއަށް ފަހު އަނެއްކާ ވެސް މިފަދަ ކަމެއް ތަކުރާރުވުމުން، ނިއުކްލިއަރ ޕްލާންޓުތަކުގައި މަސައްކަތްކުރާ މީހުންނަށް އެކަށޭނަ ތަމްރީނުތައް ނުދެވޭ ކަމުގެ އަޑުތައް ގަދަވެގެން ގޮސްފައިވެއެވެ.
ކޮންމެއަކަސް، ޕްރިސިޕިޓޭޝަން ޓޭންކަށް އެދުވަހު އެޅި އޭކުޔެސް ސޮލިއުޝަންގެ ބާލިދީގައި 16 ކިލޯގްރާމުގެ ޔުރޭނިއަމް ހުރިކަމަށް ވެއެވެ. ޕްރިސިޕިޓޭޝަން ޓޭންކަކަށް ޔުރޭނިއަމް އެޅޭ އެންމެ ގިނަ އަދަދަކީ 2.4 ކިލޯގްރާމެވެ. އެ ޕްލާންޓުގައި އެ ދުވަހު ހިނގި ހާދިސާގައި އައޯޗީއަށް ވަނީ 17 ސީވަޓްގެ ރޭޑިއޭޝަންގެ އަސަރުކޮށްފައެވެ. ޝިނޮހަރާއަށް 10 ސީވަޓްގެ ރޭޑިއޭޝަންގެ އަސަރުކުރިއެވެ. އަދި ޔޮކޮކާވާއަށް 3 ސީވަޓްގެ ރޭޑިއޭޝަންގެ އަސަރު ކުރިއެވެ.
ރޭޑިއޭޝަންގެ އަސަރުތައް ކުރަން ފެށުމުން ނޭވާ ހާސްވުމާއި، ހޮޑުލެވުމާއި، ތަދު އިހުސާސްކުރެވުމާއެކު ޑިކޮންޓެމިނޭޝަން ޗެމްބަރު ތެރެއަށް އައޯޗީ ވަގުތުން ހޭނެތިގެން ވެއްޓުނެވެ. މި ހާދިސާގައި ޕްލާންޓު ތެރޭގައި ގޮވުމެއް ގޮވާފައި ނުވިނަމަވެސް، އެތަކެއް ވިހަ މާއްދާއެއް އޮތީ ބޭރުވެގެން ގޮސްފައެވެ. ހަމައެއާއެކު މި ޗެއިން ރިއެކްޝަން 20 ގަޑިއިރަށް ދެމިގެން ދިޔައެވެ.
އައޯޗީއަކީ އެންމެ ކުޑަ ވަގުތުކޮޅެއްގެ ތެރޭގައި މިހާ ގިނަ އަދަދެއްގެ ރޭޑިއޭޝަނަށް ހުށަހެޅިގެން ޖަޕާނުގައި މަރުވި ފުރަތަމަ މީހާއެވެ. އައޯޗީއަށް ކޮށްފައިވާ ރޭޑިއޭޝަންގެ އަސަރުގެ ސަބަބުން އޭނާގެ ހަށިގަނޑުގެ ވައިޓް ބްލަޑް ސެލްތައް އެއްކޮށް ނައްތާލައި، ކްރޮމޮސޯމްސް މުޅިން ހަލާކުކޮށްލިއެވެ. އޭނާގެ ހަށިގަނޑުގެ ހުރިހާ ތަނެއް ކަހަލަ ގޮތަކަށް ފިހުނެވެ. އެތެރެ ހަށީގެ ގުނަވަންތަކަށް ވަރަށް ބޮޑަށް ގެއްލުން ލިބިފައި ހުއްޓެވެ.
އައޯޗީގެ މި ނިކަމެތި އަދި ވޭނުން ފުރިގެންވީ ހާލުގައި ވަނިކޮށް، ޑޮކްޓަރުންގެ ޓީމަކުން ވަނީ އޭނާގެ ނުރުހުމުގައި އޭނާ ދުނިޔޭގައި ބަހައްޓަން މަސައްކަތްކޮށްފައެވެ. އެގޮތުން 83 ދުވަސް ވާންދެން ޑޮކްޓަރުންގެ ޓީމުން އޭނާގެ ވޭނުން ފުރިފައިވީ ހަށިގަނޑު ގެންގުޅެފައިވެއެވެ. ޑޮކްޓަރުންގެ ޓީމުން ކުރި ތަހުޤީޤުތަކުގައި، ހާދިސާ ހިނގިތާ 59 ވަނައަށް ވީދުވަހު، 49 މިނެޓުގެ ތެރޭގައި ތިން ފަހަރަކަށް އައޯޗީގެ ހިތް ހުއްޓުނެވެ. ނަމަވެސް މީގެއިން ކޮންމެ ފަހަރަކު ވެސް ޑޮކްޓަރުންގެ ޓީމުން ވަނީ އައޯޗީގެ ވިންދު އަނބުރާ ހޯދާފައެވެ. އައޯޗީގެ ނުރުހުމުގައެވެ. އޭނާގެ އެދުމަކަށްވީ އޭނާ ތަހައްމަލު ކުރަމުންދިޔަ ވޭނަށް ނިމުމެއް ގެނެސްދިނުމަށެވެ.
ދުވަސްތައް ފާއިތުވަމުން ދިޔަ ވަރަކަށް އައޯޗީގެ ހާލު ދިޔައީ ގޯސްވަމުންނެވެ. އެންމެފަހުން، ޔުނިވަރސިޓީ އޮފް ޓޯކްޔޯ ހޮސްޕިޓަލަށް އޭނާގެ ދިރިހުރި ވޭނުން ފުރިފައިވާ ހަށިގަނޑު ބަދަލުކޮށް، ދުނިޔޭގެ އެންމެ ފުރަތަމަ ޕެރިފެރަލް ސްޓެމް ސެލްސްގެ ޓްރާންސްފިއުޝަން ވެސް އޭނާ ތަހައްމަލު ކުރަން ޖެހުނެވެ. މީގެއިތުރުން އެތަކެއް ބްލަޑް ޓްރާންސްފިއުޝަންތަކާއި، ޖަޕާނުގައި ލިބެން ނުހުންނަ ބޭސްތަކުގެ އިތުރުން އެތަކެއް ސިކިން ޓްރާންސްޕްލާންޓުތަކެއް އައޯޗީއަށް ދެވިގެން ދިޔައެވެ. މިގޮތަށް ތަހުޤީޤުތަކުގައި ބޭނުންކުރަމުންދިޔަތާ ހަފުތާއެއް ފަހުން، ދެން އޭނާއަށް ކެތެއް ނުވާނެކަމާއި، އޭނާއަކީ ރިސާޗުކުރަން އެމީހުން ގެންގުޅޭ ގިނީ އޫރެއް ނޫން ކަމުގައި، އައޯޗީ ޑޮކްޓަރުންގެ ގާތުގައި ބުންޏެވެ.
އެ ތަޙުޤީޤުތައް ކުރަމުންދިޔަ ފަހަރެއްގައި، 1999 ނޮވެމްބަރު 27 ވަނަ ދުވަހު، 70 މިނެޓަށް އައޯޗީގެ ހިތް ހުއްޓިފައިވެއެވެ. އެފަހަރު ވެސް އޭނާގެ ހިތުގެ ހިނގުން އަލުން ހޯދީ، ބޭސްތަކާއި ބްލަޑް ޓްރާންސްފިއުޝަންގެ ޒަރިއްޔާއިންނެވެ. އައޯޗީގެ ނުރުހުމުގައި ފަރުވާ ދެމުންގޮސް، ވޭންހުރި އަނިޔާވެރި މަރަކުން އޭނާ މަރުވެގެން ދިޔައީ 1999 ވަނަ އަހަރުގެ ޑިސެންބަރުު 21 ވަނަ ދުވަހުއެވެ.
