ޢަބްދުއްރަޝީދު ޙުސައިން
މިނިވަން މަގޭ ޤައުމޭ މިއީ މިނިވަން ކަމާއެކުވާނަމޭ
މިނިވަން ރަމްޒު ފެއްސާ ރަތާ ހުދާ ދެ އަތުގެ ކޮޅަށް އުފުލާނަމޭ
ފަސްދީ އެދާ ޢިބްރަތްތަކާ، ވިސްނައިބަލަައި މާޒީ އަށާ
މުސްތަޤުބަލަށް ޢަޒުމާއެކީ ގޮސްލަން ދަތުރު ފައްޓާނަމޭ
ކުދި ރަށްރަށާ މީހުން އުޅޭ ބައިބޯ ބޮޑެތި ބިޔަ ރަށްރަށާ
ފުދިގެން އުޅުން ފަރަގެއް ނުވާ ތަންތަން ކަމަށް ދައްކާނަމޭ
ތަރުބިއްޔަތުގެ ތަނބުތައް މަތީ ހުނަރާއެކީ ތަޢުލީމުދީ
ކުރިމަގުގެ އުއްމީދާއެކީ އައު ޖީލުތައް ނެރެދޭނަމޭ
ބުރަޔަސް އެކަން ޙާޞިލުކުރަން ޞިއްޙީ އެހީ ބޭނުން ވުމުން
ހުރިނަމަ ރަށަކު މީހުން އުޅޭ ޚިދުމަތް އެތާކުން ދޭނަމޭ
އެއްވެސް ރަށަކު މަގުމަތިވެފައި ހުންނަން އެކަކު ދޫކޮށްނުލައި
އެންމެން ގެދޮރުވެރި ކުރުމުގައި އާ ގޮތްތަކެއް ހޯދާނަމޭ
ދެކިގެން މަސައްކަތް އިސްނަގައި އެކަމެއް މުރާލިވެ ކުރުމުގައި
ވަކި ކަހަލަ ކަމެކޭ ބުނެފައެއް ނުކޮށެއް ދުލެއް ނުކުރާނަމޭ
ޖިސްމާ ނަފްސު ބައިވެރިކުރާ އިސްކޮށް ފިކުރު ޚިދުމަތް ކުރާ
ހިއްސާވެގެން ކަންތައް ކުރާ ދުޅަހެޔޮ ދަރިންނަށް ވާނަމޭ
ތަނަކަށް ބަރޯސާނުވެއުޅޭ ކޮށްގެން މަސައްކަތް ފުދި އުޅޭ
ތަނަވަސްކަމާއެކު ދިރިއުޅޭ ބަޔަކަށް އަހަރެމެން ވާނަމޭ
ދައްކާ ދިވެހި ހިތް ހެޔޮކަމުން، އެއްފަހަރު އައި މީހަކު ވިޔަސް
ރައްޓެހި އެތައް ބަޔަކާ އެކީ އެތަކެއް ފަހަރު ގެންނާނަމޭ
ތާރީޚު ފޮހެވޭ ކުޅިބަލަން އާޘާރު ނެތިދާއިރު ނިދަން
ދާކަށް އޮޔާލައި ދިވެހިބަސް ދޫކޮށްގެނެއް ނުތިބޭނަމޭ
މިތަނުގެ ތިމާވެއްޓަށް ކުރާ ނޭދޭ އަސަރުތައް ކުޑަކުރަން
ގޮތަކަށް ޖިހާދޭ ހީވިޔަސް އެގޮތަށް ވިޔަސް އުޅެދޭނަމޭ
އިވެމުން ދިޔަސް ބަދު ބަސްތަކާ ކުރިޔަށް ބޮޑެތި ގޯނާތަކާ
ދިވެހިންނަކީ އިސްލާމުނޭ ދީނެއް ދުލެއް ނުކުރާނަމޭ
ވެރިކަމުގެ ޢިއްޒަތް އުފުލުމުން ޤާނޫނާ ހިފަހައްޓައި ދެމުން
ދިރިހުރި ހިނދަކު ނޭވާލަމުން ޤައުމަށް ވަފާތެރި ވާނަމޭ
ބަރަކާތުގައި ރައްބީގެ މާތް ލެއްވުން އަދައި ދީނީވަޠަން
ކުރަމުން ދުޢާ އަތްތައް އެކީގައި އަބަދުވެސް އުފުލާނަމޭ
ދިވެހިންގެ މިނިވަންކަން މަތީ ސާބިތުވެ ތާއަބަދަށްވުމާ
ދިވެހިން ދިވެހި ބިމުގައި އަބަދު ދިވެހިންގެ ގޮތުގައި ވާނަމޭ
