ނަޞްރުގެ ދުވަސް

މީގެ 34 އަހަރު ކުރީގެ ދުވަހެއްގެ ހަނދާންތައް މިއަދު އައުކުރަން ޖެހެއެވެ. ސަބަބަކީ، މާތްﷲ ގެ ރަހުމަތްފުޅުން ޢުދުވާނަކުން ރާއްޖެ ސަލާމަތްވި ދުވަސްކަމަށް ވާތީއެވެ.

އާދޭހެވެ! 1988 ވަނަ އަހަރުގެ ނޮވެންބަރު 3 ގައި ޓެރަރިސްޓުންގެ އަށްޑިހަ ވަރަކަށް މީހުން މާލެ ހިފުމަށް ދިން ހަމަލާއަކީ ބިރުވެރި ނުރައްކާތެރި ހަމަލާއެކެވެ. މި ޒަމާނުގެ ހަތިޔާރާއެކު ފަތިހު އެބައިމީހުން މާލެ އަރައި ސިފައިންގެ މައިމަރުކަޒަށް ހަމަލާ ދިނީއެވެ.

އެއީ، ދިވެހީންގެ އެކުވެރިކަމާއި އެއްބައެއްވަންތަކަން ނަގައިލުމަށް ދިން ހަމަލާއެކެވެ. ދިވެހީންގެ މިނިވަންކަމާއި އިސްތިގުލާލަށް ލޮޅުން އަރުވައިލުމަށް ދިން ހަމަލާއެކެވެ. ސިފައިންގެ ހިތްވަރާއި އަޒުމާއެކު، ކުރި ޖިހާދުންނާއި އަޅުގަނޑުމެންގެ އަވަށްޓެރި ޤައުމަކުން ލިބުނު އެހީގައި އަޅުގަނޑުމެން ސަލާމަތްވީ ކަމުގެ މައްޗަށް ޙަމްދުކޮށް ޝުކުރު ކުރަމެވެ.

ނަޞްރުގެ ދުވަހަކީ، އެ ދުވަހު ޝަހީދުވި ދިވެހީންގެ 19 މީހުންގެ މަތީން ހަނދާންކޮށް އެބައިމީހުންނަށް ހެޔޮ ދުޢާ ކުރުމުގެ ދުވަހެވެ.

މިއަދަކީ، ސިފައިންގެ މައިމަރުކަޒުގެ ޑިއުޓީގައި ހުރި ހދ. ކުޅުދުއްފުށީ މާވާގޭ ނޮޅިއާދަނުގެ ޙުސައިން ކުރި ޖިހާދުގެ މަތީން ހަނދާން އާކުރާ ދުވަހެވެ. ޕްރައިވެޓް ޙުސައިން އާދަމް ޝަހީދުވެގެން ދިޔައީ ޤައުމަށް ޓަކައި އަމިއްލަ ވަޒަނަށް ޓަކައި ދުޝްމަނުންނާ ހަނގުރާމަކުރަމުން ގެންދަނިކޮށެވެ.

މިއަދަކީ، ކުލީ ސިފައިން ދެމުންގެންދިޔަ ހަމަލާތަކަށް ރައްދު ދިނުމަށް ސިފައިންގެ މަރުކަޒުން ނިކުތް 10 ފަހުލަވާނުންގެ ހިތްވަރާއި ކެރުމާއި ޢަޒުމުގެ މަތީން ހަނދާންކޮށް އެ ފަހުލަވާނުންނަށް ޝުކުރުގެ ޖިޒީއެއް ރައްދުކުރާންޖެހޭ ދުވަހެވެ.

1988 ވަނަ އަހަރުގެ ނޮވެންބަރުު 3 އަކީ މާލޭގެ ރައްޔިތުންނަށް ވާނުވާ ނޭނގި ހައިރާންކަމެއްގެ ތެރޭގައި ތިބެން ޖެހުނު ދުވަހެކެވެ. އެ ހަނދާންތައް ދުވަސްވަމުންދާ ވަރަކަށް ފަނޑުވަމުން ދިޔަނަމަވެސް، އެ ދުވަހުގެ ބިރުވެރިކަން ހިތްމައްޗަށް ގެނެސް ޤައުމުގެ ދިފާޢުގައި ތައްޔާރަށް ތިބެންޖެހޭކަން ވިސްނާން ޖެހެއެވެ. އަޅުގަނޑުމެންގެ މަޢުސޫމުކަމާއި ނުރައްކަލެއް، ކޮންމެ ވަގުތަކުމެ، ކޮންމެ ދިމާލަކުން ވެސް އަތުވެދާނެކަމަށް ވިސްނާން ޖެހެއެވެ. މި ޤައުމު މިދަނީ ފިކުރީ ހަނގުރާމައިގެ އޮއިވަރުގައި ޖެހެމުންނެވެ. ޒުވާން ޖީލުގެ އަޤީދާ ބަލިކަށިވަމުންނެވެ. ޒުވާން ޖީލެއްގެ ގިނަ ބަޔަކު މަސްތުވާތަކެތީގެ ވަބާގައި އެ ދަނީ ޣަރަޤުވަމުންނެވެ. ޑުރަގުގެ ވިޔަފާރިކުރާ މީހުންނަށް މި ހަލާކު ކުރެވެނީ ތިމާމެންގެ ލޯބިވާ ވަޒަންކަމެއް ހަނދާން ވެސް ނުހުރެއެވެ.

ދިވެހިރާއްޖެއަކީ ދުނިޔޭގެ މެދުހުރަހުގެ މަތީގައިވާ ރީތި ޖަޒީރާތަކެއްގެ ޤައުމެކެވެ. ދިވެހިރާއްޖޭގެ ރީތިކަމުގެ ވާހަކަ މުޅި ދުނިޔޭގައި ވަނީ ފެތުރިފައެވެ. އެ ރީތިކަން މިހާރު ފަރުދާވަމުން ދަނީ ޑުރަގާއި ފޭރުމާއި މާރާމާރީގެ ބޯ ފަރުދާއަކުން ފަރުދާވަމުންނެވެ. މަގުމަތީން ހިނގާފައިދާ އަންހެންމީހާގެ ކަރުގިލަ ޖަހައިގަންނަތަން ފެނުމުން މިއީ އެހައި ރީތި ތަނަކަށް ނުވެއެވެ. ރައްޓެހިވެގެން އުޅޭ އަންހެންކުއްޖާގެ ކަރުބުރިކޮށްލައި ގުނަވަންތައް ބުރިބުރިކުރަން އުޅުމުން މިއީ ހިތްހެޔޮ ބަޔަކު ދިރިއުޅޭ، ބޭރު މީހުންނަށް މެހެމާންދާރީ އަދާކުރާ ބަޔަކު އުޅޭ ޤައުމެއް ކަމަކަށް ބުނާނެ ތަނެއް ނެތެވެ.

އެއްވެސް ޝައްކެއް ނެތެވެ. ހުރިހާ ނުބައި ކަމެއްގެ މަޔަކީ މަސްތުވާތަކެއްޗެވެ. ހުރިހާ އަނިޔާވެރިކަމާއި، ފޭރުމާއި، ވައްކަމުގެ މަރުކަޒަކަށް މި ޤައުމު ބަދަލުވަމުން މިދަނީ މަސްތުވާތަކެއްޗަށް އެނބުރޭ މީހުން ގިނަވަމުން ދާތީއެވެ.

މިއަދު އެންމެންމެ ހަތިޔާރުގައި ހިފަންވީ ޑުރަގުން މި ޤައުމު ސަލާމަތް ކުރެވޭތޯއެވެ. އެހެންނޫނީ ނަޞްރުގެ މަތިވެރި ނިޢުމަތަށް ޝުކުރުވެރި ނުވާ ބަޔަކަށް އަޅުގަނޑުމެން ވެދާނެއެވެ.