މުޙައްމަދު ޒަކަރިއްޔާ
ދުނިޔޭގެ ކޮންމެ ޤައުމެއްގައި ވެސް އަސްކަރިއްޔާއަކީ ޤައުމުގެ ދިފާޢީ އައްޑަނައެވެ. ދިވެހި އަސްކަރިއްޔާ ނުވަތަ ދިވެހި ސިފައިންނަކީ ޖުމްހޫރިއްޔާގެ ޤާނޫނު އަސާސީއާއި، އިސްލާމްދީނާއި، ދިވެހިރާއްޖެ ދިފާޢު ކުރުމަށް ހަށިގަނޑާއި ފުރާނައިން ވާންޖެހުނު ކޮންމެ ޤުރުބާނީއެއްވުމަށް މާތްﷲ ގަންދީ ހުވާކޮށްގެންތިބި، ޤައުމު ފަޚުރުވެރިވާ ބިޔަ ބޮޑު ލަޝްކަރެކެވެ. ސިފައިންނާއި ދިވެހި ރައްޔިތުން ޙަވާލުކޮށްފައިވާ މަތިވެރި ޒިންމާ ނަގަހައްޓައި، ދެމެހެއްޓޭނީ ސިފައިންނަކީ ފުރިހަމަ ޞިއްޙަތެއްގައި ތިބޭ ބަޔަކަށް ވެގެންކަމީ ޝައްކެއް އޮތްކަމެއް ނޫނެވެ.
ދިވެހި ސިފައިންނާ ޙަވާލު ކުރެވިފައިވާ މަސްއޫލިއްޔަތާއި ޒިންމާ އެންމެ ފުރިހަމަ ގޮތުގައި އަދާކުރުމަށް އެންމެ ބޮޑު އިސްކަމެއް ދޭންޖެހޭ އެއް ކަމަކީ ފުރިހަމަ، ދުޅަހެޔޮ ޞިއްޙަތެކެވެ. ޝައްކެއް ނެތް ގޮތުގައި ސިފައިންނަކީ ޤައުމުގެ ދިފާޢީ އައްޑަނައެވެ. މި ދެންނެވުނު ދިފާޢީ އައްޑަނައިގެ ދިފާޢެއް ނެތްނަމަ، ޤައުމަށް ކުރިމަތިވެދާނެ ގެއްލުންތަކުގެ ކޮޅެއް ނޯންނާނެއެވެ. އެހެންކަމުން، ސިފައިންނަކީ ފަރުދީ ގޮތުން ވެސް އަދި ލަޝްކަރެއްގެ ގޮތުގައި ވެސް ޞިއްޙަތު ރަނގަޅު ދުޅަހެޔޮ ލަޝްކަރަކަށް ވުމީ ލާޒިމު ކަމެކެވެ.
އިސްލާމްދީނަށް ނަޒަރު ހިންގާލާއިރު، އިންސާނާ ފުރިހަމަ ޞިއްޙަތެއްގައި ލައްވާފައި ވުމަކީ އަގުނުކުރޭފަދަ ބޮޑު އަދި އެހާމެ މަތިވެރި ނިޢުމަތެކެވެ. މުޖުތަމަޢުގެ ބައެއް އަފުރާދުންނަށް ޤަބޫލުކުރެވޭ ގޮތުގައި ދުޅަހެޔޮ ޞިއްޙަތެއްގައި ހުރެވޭނީ ގިނަގިނައިން ކައިބޮއެ ހަދައިގެންނެވެ. އެހެންނަމަވެސް، ފުރިހަމަ ޞިއްޙަތެއްގައި އިންސާނާއަށް ދެމިހުރެވޭނީ ކެއިންބުއިމުގެ ކަންކަން ވެސް ކަނޑައެޅޭ ވަކި ހުދޫދެއްގެ ތެރޭގައި ބަހައްޓައިގެންކަމީ އެއްވެސް މީހަކަށް ދެބަސްވެވެން ނެތް ޙަޤީޤަތެކެވެ. ކެއިންބުއިމުގައި އެއްވެސް ހައްދެއްނެތި، ކައިބޮއެ އުޅެފިނަމަ ހެލިފެލިވެ އުޅުމުގައި ދަތި އުނދަގޫތައް އިޙުސާސް ކުރެވޭނެއެވެ. މިއީ، ދިވެހި ސިފައިން ވެސް ނުހަނު ބޮޑު ސަމާލުކަމެއް ދޭންޖެހިފައިވާ ކަމެކެވެ. އެހެންކަމުން، ދިވެހި ސިފައިން ވާންޖެހޭނީ އަބަދުވެސް ދުޅަހެޔޮ ޞިއްޙަތެއްގައި ތިބޭ، ދިމާވާ ނުރައްކާތެރި ހާދިސާތަކުގައި ރައްޔިތުންގެ ދިފާޢުގައި ހަރަކާތްތެރި ވެވޭފަދަ ދުޅަހެޔޮ ބަޔަކަށެވެ. މިއީ، ދިވެހި ރައްޔިތުންގެ އިތުބާރާއި ޔަޤީންކަން ސިފައިންނާމެދު އިތުރުވެގެންދާނެ ކަމެކެވެ.
ދިވެހި ސިފައިންގެ 130 އަހަރުވީ ދިގު އަދި އެހާމެ އަގުހުރި ޤައުމީ ޚިދުމަތަށް ނަޒަރު ހިންގާލާއިރު، ބަލާލި ކޮންމެ ދިމާލަކުން ފެންނަނީ ސިފައިންގެ މަތިވެރި ޤުރުބާނީއެވެ. ޤައުމަށް ދިމާވާ ހުރިހާ ކަމެއްގައި ވެސް ހަރަކާތްތެރިވާ ބަޔަކީ ހަމަ ފަޚުރުވެރި ދިވެހި ސިފައިންނެވެ. ކަނޑުމަތީގެ ހާދިސާތަކާއި އަދި އަލިފާނުގެ ހާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމުގައި ވެސް ހަރަކާތްތެރިވަނީ ހަމަ ސިފައިންނެވެ. މިފަދަ ޚިދުމަތްތެރި ބަޔަކު، އަބަދުވެސް ތިބެންޖެހޭނީ ދުޅަހެޔޮ، ހަށިހެޔޮ ބައެއްގެ ގޮތުގައެވެ. އެހެން ނޫންނަމަ، ޤައުމީ ޚިދުމަތް ފޯރުކޮށްދިނުމުގައި ބުރަހެލިކަން ކުރިމަތިވެދާނެއެވެ. އެހެންކަމުން، ސިފައިންނަކީ ޞިއްޙަތުގެ ދިފާޢުގައި އަބަދުވެސް ހޭލާތިބެންޖެހޭ ލަޝްކަރެކެވެ.
ތަނެއް ތަހުޒީބުވެވި ކުރިއަށް ނުކުންނާނީ، ކަމެއް ކުރެވޭނެ ޞިއްޙަތެއްގައި ތިބި ދަރީން އެ ތަނެއްގައި އުފެދިގެންނެވެ.
