ޙަސަން އަކްރަމް
- ޖިންސީ ގޯނާ ކުރުމަށްފަހު، އެތައް ބަޔަކު މަރާލި!
- މުނިފޫހިފިލުވައި ދިނުމަށް “ކްލޯން” ކެރެކްޓަރގައި ހަރަކާތްތެރިވި!
- 33 މީހުން މަރާލިކަމުގެ ކުށް ސާބިތުވި!
- މަރުގެ 12 ޙުކުމް އިއްވުނު!
- އިންޖެކްޝަން ބޭނުންކޮށްގެން މަރުގެ ހުކުމް ތަންފީޒު ކުރެވުނު!
ޖޯން ވޭން ގެސީއަކީ އެމެރިކާއަށް އުފަން މީހެކެވެ. މީނާއަކީ ކުޑަކުދިންނާއި އަދި ޒުވާނުންނަށް ޖިންސީ ގޯނާކުރުމަށްފަހު މަރާލުމުގެ ކުށް ސާބިތުބެ، މަރާލެވުނު ރަހުމުކުޑަ ޤާތިލެކެވެ. މީނާ އެކި ދުވަސްވަރު ކުޑަކުދިންނާއި އަދި ޒުވާނުން ހިމެނޭހެން 33 މީހަކު މަރާލާފައިވާކަމަށް އެމެރިކާގެ ކަމާބެހޭ ފަރާތްތަކުން އަންދާޒާ ކުރެއެވެ. ގެސީއަކީ ކުޑަކުދިންގެ ހޮސްޕިޓަލުތަކާއި އަދި އެކި އިވެންޓުތަކުގައި “ޕޯގޯ ދަ ކްލޯން” ގެ ކޮސްޓިއުމްގައި ކުޑަކުދިން މުނިފޫހިފިލުވުމުގައި އުޅުނު މީހެކެވެ. ގެސީ ދުނިޔޭގައި މަޝްހޫރު ވެގެން ދިޔައީ “ކްލޯން ކިލަރ” ގެ ނަމުންނެވެ. މި ނަމުން އޭނާ މަޝްހޫރުވެގެން ދިޔައީ، އޭނާ މުނިފޫހިލުވައި ދިނުމުގައި ކުޅުނު ކްލޯން ރޯލެވެ.
ގެސީ ގިނަ އަދަދެއްގެ ބަޔަކު މަރާލިއިރު، މި ހުރިހާ މީހުން މަރާލާފައިވަނީ އޭނާ ދިރިއުޅޭ ގޭގެ ތެރޭގައެވެ. އާންމު ގޮތެއްގައި މީހުން މެރުމުގައި އޭނާ ބޭނުންކޮށްފައިހުރީ އެއް އުކުޅުތަކެކެވެ. ފުރަތަމަ ދަޢުވަތު ދީގެން ގެއަށް ގެނެއެވެ. އެއަށްފަހު، “ޖާދޫ” ދެއްކުމަށް ކަމަށް ބުނެ ބިޑިއަޅުވައި، ރޭޕްކޮށް މަރާލައެވެ.
1978 ވަނަ އަހަރުގެ ޑިސެމްބަރު މަހު ގެސީ ދިރިއުޅެމުން ދިޔައީ، އެމެރިކާގެ ސިޓީއެއް ކަމަށްވާ އިލޮނޮއިސްއަށް ނިސްބަތްވާ ޗިކާގޯގައެވެ. އެ ސަރަޙައްދުގެ އަވަށްޓެރިން އަބަދުވެސް އޭނާ ދިރިއުޅޭ ގެ ހިމެނޭ ސަރަޙައްދުން ނުބައިވަސް ދުވާކަމުގެ ޝަކުވާތައް ދިޔައީ މެދުކެނޑުމެއްނެތި ކުރަމުންނެވެ. މި ޝަކުވާތަކާ ގުޅިގެން އަބަދުވެސް ގެސީ ދޭ ޖަވާބަކީ، އެއީ ޖަންގްޝަން ވަޅުތަކުން ދުވާ ނުބައި ވަހެއް ކަމުގައެވެ. އެހެން ނަމަވެސް، މި ދުވާ ނުބައި ވަހުގެ އަސްލަކީ ކޮބައިކަން ފުލުހުންނަށް ދެނެގަނެވުނީ އޭނާ ދިރިއުޅޭ ގެ، ކޯޓު އަމުރެއްގެ ދަށުން ބަލާ ފާސްކުރުމުންނެވެ.
ގެސީ ދިރިއުޅެމުން ދިޔަ ސަރަޙައްދުން އެދުވަސްވަރު އުމުރުން 14 އަހަރާއި 21 އަހަރު ގިނަ އަދަދެއްގެ ކުޑަކުދިންނާއި ޒުވާނުން ގެއްލެމުން ދިޔައެވެ. މިކަން ހިނގަމުންދިޔައިރު، ގެސީ ދިރިއުޅޭ ގެއިން ނުބައި ވަސް ދުވާ ކަމުގެ ޝަކުވާތައް ދިޔައީ ލިބެމުންނެވެ. މި ސަބަބުތަކާހުރެ، ގެސީ ދިރިއުޅޭ ގެއާއި އަދި އެސަރަޙައްދު ބަލާ ފާސްކުރުމަށް ބޮޑު އޮޕަރޭޝަނެއް ކުރިއަށް ގެންދިޔައެވެ. މި ބަލާ ފާސްކުރުމުގެ ތެރެއިން ފުލުހުންނަށް ހައިރާން ކުރުވަނިވި ކަންތައްތަކަކާ ދިމާވިއެވެ. ފުލުހުންނަށް އެންމެ ބޮޑު ހައިރާންކަމެއް ގެނުވީ އޭނާ ދިރިއުޅެމުންދިޔަ ގޭގެ އަޑިން 26 މީހެއްގެ ހަށިގަނޑު ފެނުމުންނެވެ. މަރާލާފައިވާ މި މީހުންގެ ހަށިގަނޑު ފުލުހުން ހޯދީ، ގެ ބަލާފާސްކުރުމުގެ ތެރޭގައި މުޅި ގެ، ރޫޅާލައިގެން ހިންގި ސާޗު އޮޕަރޭޝަނުގައެވެ. އިތުރު ދެ މީހެއްގެ ހަށިގަނޑު އޭނާ ދިރިއުޅުނު ގޭގެ ބަގީޗާގެ ތެރެއިން ފެނުނުއިރު، ގަރާޖުގެ ކޮންކްރީޓް ފާރު ތެރެއިން ވެސް އިތުރު މީހެއްގެ ހަށިގަނޑު ފެނިފައި ވެއެވެ. މީގެ އިތުރުން، ހަތަރު މީހެއްގެ ހަށިގަނޑު އޭނާ ދިރިއުޅުނު ގެއާ ކައިރީގައިވާ ކޯރެއްގެ ތެރެއިން ވެސް ފުލުހުން ހޯދިއެވެ.
ގެސީއަކީ “ޕޯގޯ ދަ ކްލޯން” ކޮސްޓިއުމްގައި ކުޑަކުދިން މުނިފޫހިފިލުވައިދިނުމަށް ހުސްވަގުތުތަކުގައި ހަރަކާތްތެރިވި، ބަލާބެލުމަށް އެއްވެސް ކުށެއްނެތް، އަވަށްޓެރިންނަށް ވެސް ނުހަނު ހެޔޮ މީހެކެވެ. އާންމު ދިރިއުޅުމުގައި އޭނާއަކީ އަމިއްލަ ވިޔަފާރިއެއް ހިންގަމުންދިޔަ މީހެކެވެ. އެހެންކަމުން، ގިނަ އަދަދެއްގެ ހަށިގަނޑު އޭނާ ދިރިއުޅުނު ގެއިން ފެނުމަކީ ފުލުހުންނަށާއި އަދި އެ ސަރަޙައްދުގެ އަވަށްޓެރިންނަށް ވެސް ނުހަނު ބޮޑު ސިހުމެއް ގެނުވި އަދި ޤަބޫލުކުރަން ދަތިވި ކަމަކަށް ވިއެވެ. އެހެން ނަމަވެސް، އޭނާއަކީ ޒުވާން އުމުރުން ފެށިގެން ވެސް ކުށްތަކަށް އަރައިގަންނަމުންދިޔަ މީހެކެވެ.
ގެސީ ހުސްވަގުތުތައް ހޭދަކުރަމުން ދިޔައީ “ޕޯގޯ ދަ ކްލޯން” ކޮސްޓިއުމްގައި އެ ސަރަޙައްދުތަކުގެ ހޮސްޕިޓަލްތަކުގައި އެޑްމިޓްކޮށްފައިތިބި ބަލި ކުޑަކުދިން މުނިފޫހިފިލުވައި ދިނުމުގެ މަސައްކަތުގައެވެ. އެހެން ނަމަވެސް، އިރުއޮއްސުމަށްފަހު އޭނާއަކީ ތަފާތު މީހެކެވެ. މި ގޮތުން، ރޭގަނޑުގެ ވަގުތުތައް އޭނާ ހޭދަކުރަނީ މީހުން މެރުމަށެވެ. މި ގޮތުން އެ ސަރަޙައްދުގައިވާ ޕާކެއްގެ ކައިރީގައި ހަށިވިއްކާ މީހުން ހޯދުމުގައި ވަގުތު ހޭދަކުރެއެވެ. އަދި އެމީހުން ގެއަށް ގެނައުމަށްފަހު މަރާލައެވެ.
ގެސީއަކީ ނުރައްކާތެރި ޤާތިލެއް ނަމަވެސް، އޭނާގެ އޯޑަރަށް ތަބާވާ އަދި އެއްބާރުލުންދޭ މީހުން ބައެއްފަހަރު ސަލާމަތްވެފައި އެބަހުއްޓެވެ. މީގެ ތެރޭގައި އުމުރުން 19 އަހަރުގެ ރޮބަޓް ޑޮނެލީ ކިޔާ ޒުވާނެއް ހިމެނެއެވެ. ގެސީ، މި ޒުވާނާ 1977 ވަނަ އަހަރުގެ ޑިސެމްބަރު މަހުގެ 30 ވަނަ ދުވަހު ކިޑްނެޕް ކުރިއެވެ. ކިޑްނެޕް ކުރުމަށްފަހު އޭނާ ރޭޕް ވެސް ކުރިއެވެ. މި ހުރިހާ ކަމެއް ކުރުމަށްފަހު ވެސް، ގެސީ މި ޒުވާނާ އިރުއެރުމުން ދޫކޮށްލިއެވެ. ދޫކޮށްލުމަށްފަހު، އެނބުރި އޭނާ އެ ދުވަސްވަރު އަދާކުރަމުންދިޔަ ވަޒީފާއަށް ނިކުމެފައި ވެއެވެ. ފުލުހުންނަށް ފަހުން އެނގުނު ގޮތުގައި ގެސީ މި ޒުވާނާ ދޫކޮށްލީ، އޭނާ ބޭނުންވި ގޮތަށް ކިޔަމަންތެރިކަމާއެކު ވަގުތުތައް ހޭދަކުރުމުންނެވެ. މި ހާދިސާއާ ގުޅިގެން 1978 ވަނަ އަހަރުގެ ޖަނަވަރީ މަހުގެ 6 ވަނަ ދުވަހު ރޮބަޓް މި މައްސަލަ ފުލުހުންނަށް ރިޕޯޓް ކުރިއެވެ. މި ހާދިސާއާ ގުޅިގެން ފުލުހުން ގެސީއާ ސުވާލު ކޮށްފައިވެއެވެ. އެހެން ނަމަވެސް، އެ ޒުވާނާއަކީ ހަށިވިއްޔާ މީހަކަށްވުމުން، މި ތުހުމަތުތަކާ ގުޅިގެން ފުލުހުން ބުރަވީ ގެސީގެ ބަހަށެވެ. އަދި މިއީ، ސީރިއަސް މައްސަލައަކަށްނުވެ، ފުލުހުން މި މައްސަލަ ބޭރުކޮށްލިއެވެ.
ގެސީއަކީ ބަލާބެލުމަށް މަޑުމައިތިރި މިޒާޖެއްގެ މީހަކަށް ވިޔަސް، އޭނާއަކީ ކުށުގެ ދިގު ރިކޯޑް އޮތް އަނިޔާވެރި ޤާތިލެކެވެ. ގެސީގެ ކުށުގެ ރެކޯޑަށް ބަލާއިރު، އެންމެ ފުރަތަމަ ހައްޔަރު ކޮށްފައިވަނީ ޖިންސީ އަނިޔާއާ ގުޅޭ މައްސަލައެއްގައި 1968 ވަނަ އަހަރުއެވެ. އޭރު އޭނާގެ އުމުރަކީ 26 އަހަރެވެ. މި މައްސަލަ ސާބިތުވެ، އޭނާގެ މައްޗަށް 10 އަހަރު ދުވަހުގެ ޖަލު ހުކުމެއް އިއްވާފައި ވެއެވެ. ޖަލުގައި ހޭދަކުރި ދުވަސްވަރު އޭނާއަކީ ގައިދީން މުނިފޫހިފިލުވައި ދިނުމަށް “ޗާރލީ ޗަޕްލިން” ގެ ރޯލުން ފެނިގެންދިޔަ ނުހަނު މީހުންނާގުޅޭ ހިތްހެޔޮ މީހެކެވެ. އެހެންކަމުން، އޭނާ ޖަލުގައި 21 މަސް ހޭދަކުރުމަށްފަހު، ޕެރޯލްގެ ދަށުން ދޫކޮށްލިއެވެ. މީގެ ފަހުން ތަފާތު އެކި ކުށްތަކުގައި އޭނާ ހައްޔަރުކުރުމަށްފަހު ދޫކޮށްލާފައިވާކަމަށް ފުލުހުންގެ ރިކޯޑްތަކުން ދައްކައެވެ.
މި މައްސަލާގައި އޭނާގެ މައްޗަށް 1980 ވަނަ އަހަރުގެ ފެބުރުވަރީ މަހުގެ 6 ވަނަ ދުވަހު ދަޢުވާ އުފުލުނެވެ. މި ދަޢުވާ އޭނާގެ މައްޗަށް އެއްވެސް ޝައްކެއްނެތް މިންވަރަށް ސާބިތުވާ ކަމަށް އެ އަހަރުގެ މާރިޗު މަހުގެ 12 ވަނަ ދުވަހު ޙުކުމް ކުރެވުނެވެ. އަދި އިންޖެކްޝަން ބޭނުންކޮށްގެން، 1994 ވަނަ އަހަރުގެ މާރިޗު 10 ވަނަ ދުވަހު އޭނާ މަރާލެވުނެވެ.
