މުޙައްމަދު ޔަޒީދު ސަޢީދު
މިއީ، މިހާތަނަށް ރާއްޖޭގައި ހިނގި އެންމެ ހިތާމަވެރި އަލިފާނުގެ ހާދިސާއެވެ. މި ހާދިސާގައި، ނިރުފެހިގޭގައި ދިރިއުޅުނު މީހުންގެ ތެރެއިން 10 ބިދޭސީއަކު މަރުވިއެވެ. އޭގެ ތެރޭގައި ހިމެނެނީ އިންޑިއާގެ އަށް މީހަކާއި ބަންގްލަދޭޝްގެ ދެ ރައްޔިތެކެވެ.
އަލިފާނުގެ ހާދިސާގައި ހާލުގައި ޖެހުނު 33 މީހަކު ވަގުތީ ބޯހިޔާވަހިތަކަށް ގެންދެވުނެވެ. ބޯހިޔާވަހިކަން ފޯރުކޮށްދެމުން އަންނަނީ 15 ބިދޭސީންނާއި 18 ދިވެހިންނަށެވެ. އޭގެތެރޭގައި ދިވެހި ޢާއިލާތަކަށް ނިސްބަތްވާ ހަތް ކުޑަކުދިން ވެސް ހިމެނެއެވެ. މި ހާދިސާއާ ގުޅިގެން އެންޑީއެމްއޭގެ ބެލުމުގެ ދަށުގައި ތިބި މީހުންގެ ތެރޭގައި ހިމެނެނީ އަނދާ ހުލިވި ނިރުފެހިގޭގައި ދިރިއުޅެމުން ދިޔަ މީހުންނާއި, އެ ގެއާ އިންވެގެން ހުރި ގެތަކުގައި ދިރިއުޅެމުން ދިޔަ ބައެއް މީހުންނެވެ.
މި ހާދިސާގައި، އެ ގެއާ އިންވެގެން ކައިރީގައި ހުރި އެހެން ގޭގެއަށް ބޮޑެތި ގެއްލުންތައް ލިބުމުގެ ކުރިން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރމަނުން އަލިފާން ކޮންޓްރޯލް ކުރިއެވެ. ނަމަވެސް މިހާ ގިނަ ބަޔަކު މަރުވުމުގެ ސަބަބަކީ ރޯވި އަލިފާންގަނޑު އިމާރާތަށް ފެތުރުނުލެއް އަވަސްކަމާއި ގަރާޖުގައި ހުރި އެއްޗެހިން ބޭރުވި ވިހަ ދުމެވެ.
ނޮވެންބަރު 9 ވަނަ ދުވަހުގެރޭ ދަންވަރު، މ. ނިރުފެހިގޭގައި ހިނގި އަލިފާނުގެ ހާދިސާގައި އެންމެ ފުރަތަމަ އަލިފާން ރޯވި ކަމަށް ބެލެވެނީ އެގޭ ތިރީގައި ހުރި ގަރާޖުގައެވެ. މި އަލިފާނުގެ ހާދިސާ ހިނގި ވަގުތު، ގަރާޖުގެ މައިދޮރު ހުރީ ބޭރުން ތަޅުލާފައެވެ. އަދި އަލިފާނުގެ ހާދިސާ ހިނގާފައިވަނީ ކުއްލިއަކަށް ބާރު އަޑުފަށްގަނޑަކާއެކު ގަރާޖުގެ ތެރެއިން ހުޅު ފަޅައިގެން ގޮސްގެންނެވެ. އެ އިމާރާތުގެ އެހެން ބައިތަކަށް އަލިފާންގަނޑު ފެތުރިގެން ގޮސްފައިވަނީ ދޮޅު މިނެޓްހާއިރުގެ ކުޑަ ވަގުތުކޮޅެއްގެ ތެރޭގައެވެ. ފިލައިން އެތެރެ ހަދާފައި ހުރި އިމާރާތުގެ އެއް ފަންގިފިލާގައި 4 ކޮޓަރި، އަދި އަނެއް ފަންގިފިލާގައި 8 ކޮޓަރި ހަދާފައިވެއެވެ. އެ ތަންތަން ވެސް ވަކިކޮށްފައި ހުރީ ފިލައިންނެވެ.
މި ހާދިސާ ހިނގައިގެން އުޅޭކަމުގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުނީ، ނޮވެންބަރު 9 ވަނަ ދުވަހުގެ ރޭ ދަންވަރު 00:30 ހާއިރުއެވެ.
މި ހާދިސާގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސް ކޮންޓްރޯލް ރޫމަށް ލިބުމާއެކު އަލިފާން ނިއްވާ ލޮރީ އެކޯ-39 ހާދިސާ ހިނގައިގެން އުޅޭ ސަރަހައްދަށް ފޮނުވާލެވުނެވެ. މިގޮތުން ހާދިސާ ހިނގި ސަރަހަށްދަށް އެ ވެހިކަލަށް ދެވިފައިވަނީ އެރޭ 00:33 ހާއިރުއެވެ. އެފްއާރުއެސްގެ ޓީމް ހާދިސާ ހިނގި ސަރަހައްދަށް ދިޔައިރު ވެސް މ.ނިރުފެހިގޭގައި ވަރަށް ބޮޑަށް އަލިފާން ރޯވެ، ހުޅު ފަޅައިގެން ގޮސް، ޕްރެޝަރުގައި ހުޅުގަނޑު ބޭރަށް ނުކުންނަމުން ދެއެވެ.
މިނެޓެއްހާއިރު ތެރޭގައި ޑެލިވަރީ ހޮޅި އަޅައި، ޕަންޕު ބޭނުންކޮށްގެން ފެން ޖަހައި، އަލިފާން ނިއްވުމުގެ މަސައްކަތް ފަޔަރ ފައިޓަރުން ފެށިއެވެ. އަދި، އެ ވަގުތު އިމާރާތުގެ ތެރޭގައި ބަޔަކު ތާށިވެފައިވާ ކަމުގެ މަޢުލޫމާތު ފަޔަރ ފައިޓަރުންނަށް ލިބުނެވެ. މި މަޢުލޫމާތު ލިބުމާއެކު އެ ވަގުތުން ފެށިގެން އިމާރާތުގައި ތާށިވެފައިތިބި މީހުން ރެސްކިޔު ކުރުމުގެ މަސައްކަތް ފަށައިގަތެވެ. މިގޮތުން އަޅާފައިހުރި ހޮޅިލައިންގައި ޑިވައިޑިންގއެއް ގުޅުމަށްފަހު ފެންދީފައިވާ ހޮޅިލައިނާއެކު ފުރަތަމަ ފަންގިފިލާއަށް ވަނުމުގެ މަސައްކަތް ރެސްކިޔު ޓީމުން ފެށިއެވެ. މީގެ އިތުރުން އަލިފާން ނިއްވާ އިތުރު ވެހިކަލާއި ވޯޓަރ ބައުޒަރުގެ އިތުރުން ރެސްކިޔު ޓީމާއި އިތުރު ބެކްއަޕް ޓީމު ވެސް ހާދިސާ ހިނގައިގެން އުޅޭ ސަރަހައްދަަށް ދިޔައެވެ. މި އިމާރާތުގައި ރޯވެފައިހުރި އަލިފާން ކޮންޓްރޯލްވުމާއެކު، ސާޗް އެންޑް ރެސްކިޔު މަސައްކަތް ފަށައި، އިމާރާތުގެ ތެރެއަށް ވަނެވެ.
މި ހާދިސާގައި އިމާރާތުގެ ތެރެއިން ފުރަތަމަ ނެރުނު ދެމީހުން ފިޔަވައި ފަހުން ނެރުނު 9 މީހުން ވެސް ގެންދިޔައީ ގަލޮޅު މޯޗަރީއަށެވެ. ހޮސްޕިޓަލަށް ގެންދިޔަ ދެ މީހުންގެ ތެރެއިން ފަހުން ގެންދިޔަ އަންހެން މީހާ ވަނީ މަރުވެފައެވެ. މި ހާދިސާގައި ޖުމްލަ 10 މީހުން މަރުވިއިރު ހޮސްޕިޓަލުގައި އެކަކަށް ދަނީ ފަރުވާދެމުންނެވެ. ގ. ނިރުފެހި ގޭގައި ހިނގި އަލިފާނުގެ ހާދިސާއާ ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރަމުން އައި މަސައްކަތް ނިންމައި ހާދިސާ ހިނގި ސައިޓް މޯލްޑިވްސް ޕޮލިސް ސަރވިސްއާ ހަވާލުކުރެވިފައި ވަނީ ނޮވެންބަރު 10 ވަނަ ދުވަހުގެ މެންދުރު 12:15 ހާއިރުއެވެ.
މި ހިތާމަވެރި ހާދިސާ ހިނގުމާ ގުޅިގެން ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ އިބްރާހީމް މުޙައްމަދު ޞާލިހާއި، ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލްއާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް ވަނީ ހާދިސާ ހިނގި ސަރަހައްދަށް ވަޑައިގެން، މި ހާދިސާއާ ގުޅޭ މަޢުލޫމާތު އޮޅުންފިލުއްވާފައެވެ.
