ޝަހީދުންގެ ޒިކުރާ

ހިތުގެ ކަވި އެންމެ ހިމަ ނާރަށް އަސަރު ކުރުވާ މިއީ ޒިކުރާ
ސިކުނޑިއާ އަބަދު ގުޅި ލާމެހި ވަނީ އެ ހަނދާންތަކާ ފިކުރާ

ނޮވެންބަރުމަހު ތިނެއް އައްޑިހައަށެއްގެ ފަތިސް ގެނައި ނާމާން
ކަމެއްގެ ތެރޭ އެރި މި ބިމަށް ބޮމާ ބަޑިޔާ އެކި މަކަރާ

އެތެރެއިން ވާގިވެރިވި ޚާއިނުން ދިން މަޝްވަރާގެމަތީން
އެތުރިލީ ބޭރު ބާޢީންނޭ އެލީ އުންޑައިގެ އަޑު ފަތުރާ

ވިސާބިތުކަން މަތީ ގައުމުގެ ދިފާއަށް ހުރި އޭރުގެ ތަކުރު
އެސާހިތު ދެއްވިއޭ ހަމަލާ މިސާލުން އިހުގެ ބޮޑުތަކުރާ

ޙުސައިން އާދަމްގެ ހިތްވަރުފުޅު ފަވާލެވުނޭ އެ އުންޑަތަކުން
ނިޝާންތައް އަބަދު ދިރިދިރި ހުންނަހެން މިބިމުން އެކީ ފަޚުރާ

ދިފާޢަށް ހިންދަމާލެއްވެވި ވަފާތެރިކަންމަތީ ގައުމީ
ސިފައިންނަށް ހައްގުވޭ ތާރީފު ނިމުމެއް ނެތް އަބަދު ޝުކުރާ

ބިމުން ކުޑަ ވެލިފުކެއް ވެސް ދޫނުކުރުމަށް ކުރި އެ ހިތްވަރުގައި
ނިމުން ފާހަގަ ކުރީ އެދުވަހު ނަސީބާ ހެޔޮ އެކީ ނަޞްރާ

ޝަހީދުވީ ޢަސްކަރީންގެތެރޭން ފަޚުރުވެރި އަށް މުޖާހިދުނަށް
ވަޙީގައިވާ މަގުން ލިބިލިބި ވުމޭ އެދެނީ ރިޒުގު އަޖުރާ

ދިވެހި އާންމުންގެތެރެއިން ހެޔޮ އެގާރަ ދަރީން ޝަހީދުވުމުން
ދިވެހި މޭގާ ނުވޭ ވިންދެއް އެ އަސަރުން ހިތި ނުލައި ކުކުރާ

ދިވެހި ގައުމީ ޝަހީދުންނަށް ޓަކައި އެ މަޒާރުތަކުގެ ވަށައި
ރިވެތި ތާރީފުގައި ރަންމުތްތަކޭ ރޫޙީ ލަނީ އަތުރާ

އުޖާލާ ކުރިމަގެއްގެ މަތީ މިރާއްޖެ ސަލާމަތުން ލެއްވުން
އަދައިގެން ތިބެ އިޖާބަކުރައްވަވާނދޭ ހެޔޮ ދުޢާ މިކުރާ