ޢަބްދުއްސަލާމް ޙަފީޒް
އާދޭހެވެ! ދީނީ ލޯތްބާއި ޤައުމީ ލޯބީގެ ވާހަކައަކީ، އަޅުގަނޑުމެން އަބަދުހެން އަހަމުން އަންނަ ވާހަކަތަކެކެވެ. ދީނަށް ޚިޔާނާތްތެރިނުވުމާއި، ދީން ދިފާޢުކުރުމާއި، ޤައުމު ސަލާމަތުގެ މަގަށް ގެންދިއުމުގެ ވާހަކައާއި، ޤައުމަށް ޣައްދާރުނުވުމުގެ ވާހަކައެވެ. އެއްބަޔަކު މި ކަންކަން ދެކެނީ ސިޔާސީ ވާހަކަތަކެއްގެ ގޮތުގައެވެ. އަނެއްބަޔަކު ދެކެނީ، މިއީ ކޮންމެހެން ވެސް ދައްކަންޖެހޭ ވާހަކަތަކެއްކަމުގައެވެ. އަދި އަޅުގަނޑުމެންގެ ޅަދަރީންގެ ހިތްތަކުގައި، ކޮންމެހެން އަށަގަންނުވަންޖެހޭ ކަމެއްގެ ގޮތުގައެވެ. ތަޢުލީމީ ނިޒާމުގެ ތެރެއިން ވިޔަސް، ދައުލަތުގެ ސިޔާސަތުތަކުގެ ތެރެއިން ވިޔަސް، ދީނީ ޝިޢާރުތަކާއި އިސްލާމީ ތާރީޚުގެ އަގުހުރި ޞަފުޙާތަކުގެ އަލީގައިކަމުގައި ވިޔަސް، ދީނީ ލޯތްބާއި ޤައުމީ ލޯބީގެ ވާހަކައަކީ، އަޅުގަނޑުގެ ނަޒަރުގައި، ކޮންމެހެން ވެސް ދައްކަންޖެހިފައިވާ ވާހަކައަކަށް މިއަދު މިވަނީ ވެފައެވެ.
އަޅުގަނޑުމެންގެ ޤައުމަށް މިއަދު ޖެހިފައިވާ އެންމެ ބޮޑު ވަބާއަކީ، މުޚުލިޞުން މަދުވުމެވެ. ކުރާކަމެއްގައި، މާތް ﷲ ގެ ރުއްސެވުން އަދައިގެން، އިޚްލާޞްތެރި ހިތަކުން ޢަމަލުކުރާ ފަރުދުން މަދުވުމެވެ. އަޅުގަނޑު ދެކޭގޮތުގައި، އެންމެ ބޮޑު ޤައުމީ މައްސަލައަކީ މިއެވެ. ޤައުމުގެ ތަރައްޤީއާއި ކުރިމަގަށާއި، ޤައުމު ބިނާކުރުމުގެ މަސައްކަތްތަކުގައާއި، ރައްޔިތުންގެ ލާބަޔާއި މަންފާއަށް ކުރެވޭ ކަންކަމުގައާއި، މިނޫންވެސް، ތިމާއާއި ތިމާގެ އަހުލުވެރީން ބަނޑުފުރާނަ މުއްތިކުރުމަށާއި އުނުއޮރިޔާން ނިވާކުރުމަށްޓަކައި ޢާމްދަނީ ހޯދުމަށް ކުރެވޭ މަސައްކަތްތަކުގައި ވެސް، ޙަލާލު މިންވަރުން ބޭރުން އަމިއްލަ މަންފާއެއްނެތި ކުރާކަމެއް ކުރާމީހަކު މިއަދު މަދުވުމުގެ މައްސަލައަކީ އެންމެ ބޮޑު ޤައުމީ މައްސަލައެވެ. މި މައްސަލައަށް ރިޢާޔަތްކޮށްގެން މެނުވީ، ދިވެހި ޤައުމު މި ހުރިވަރުން ކުރިއަށް ހިނގައިދާނެ ތަނެއް އަޅުގަނޑުގެ ތަޞައްވުރަކަށް ނުވިސްނެއެވެ.
އަޅުގަނޑުމެންގެ ބައެއް މީހުންގެ ޙާލަތަކީމިއެވެ. ވަޒީފާއެއްގައިނަމަ “އަމިއްލަ ބާލީހަށް ބަންޑާރަ ކަފަ އެޅުމާއި”، ފައިސާފޮއްޗެއް ލިބޭނެގޮތެއް އޮތްނަމަ ކޮންމެގޮތެއް ހެޔޮވެ ވަރިހަމަވުމާއި، ވަޒީފާއެއްގައިނަމަ މުސާރަކޮޅު ވެސް ޙަލާލުވާ މިންވަރަށް މަސައްކަތްނުކޮށް، މަސްއޫލިއްޔަތުތަކަށް ފަރުވާކުޑަކުރުމާއި، ކޮންމެކަމެއްގައި ތިމާއަށް މަންފާކުރާނެ ނާޖާއިޒު މަގުތައް ޚިޔާރުކޮށް ތިމާގެ އަނބިދަރީންނާއި އެންމެހައި އަހުލުންނަށް އަނގުރު އަލިފާން ކާންދިނުމަކީ ކުޑަކަމެއްކަމުގައި ދެކުމެވެ. މިއީ، ދުނިޔަވީ ވަގުތީ އުފަލަށް ޓަކައި، ދީނަށާއި ދަޢުލަތަށާއި، މުޖުތަމަޢަށާއި، ތިމާގެ ޢާއިލާއަށާއި އަމިއްލަ ނަފުސަށް ދެވޭ ކޮންފަދަ އަނިޔާއެއްތޯއެވެ؟ މިއީ، އެތައް ބައެއްގެ ޙައްޤުތައް އެކުލެވިގެންވާ އަމާނާތަކަށް ވެވޭ ކޮންފަދަ ބޮޑު ޚިޔާނާތެއްތޯއެވެ؟
އަޅުގަނޑުމެންގެ މާތްވެގެންވާ އިސްލާމްދީނަކީ، ކޮރަޕްޝަނާއި ފަސާދައާއި، އަނެކުންގެ ޙައްޤުތަކަށް އަރައިގަނެވޭނެ އެންމެހައި ދޮރުތަކެއް ބަންދުކުރެވޭނޭ މަތިވެރި ނިޒާމެއްވާ ފުރިހަމަ ދީނެކެވެ. ދީން ޙިމާޔަތްކުރުމުގެ ވާހަކަ އަޅުގަނޑުމެން ދައްކާއިރު، މިފަދަ ނޭދެވޭ ކަންކަމަށް އަޅުގަނޑުމެން އަރައިގަންނަކީ ފަހެ ކީއްވެތޯ ސުވާލު އުފެދެއެވެ. އިސްލާމް ދީނަކީ ހަމައެކަނި، މިސްކިތުގެ ހަތަރު ފާރުގެ ތެރޭގައި ކުރެވޭ ފަސް ނަމާދެއް ނޫނެވެ. އިސްލާމް ދީނަކީ، އިންސާނާގެ މުޅި ދިރިއުޅުން އެންމެ ރަނގަޅަށް ޕްރޮގްރާމް ކުރެވިފައިވާ (އިންސާނާ އުޅެންވީ ގޮތް އެންމެ ރަނގަޅަށް ބަޔާންކޮށްދީފައިވާ) އެންމެ ފުރިހަމަ “ސޮފްޓްވެއަރ” އެވެ. މިސާލެއް ނަގަނީނަމަ، އިންސާނާ، ކާއެތިކޮޅު ހޯދަންވީ ގޮތާއި، އެ ކާއެތިކޮޅު ނަގައި އަނގަޔަށް ލާންވީގޮތާއި، ކާއެތިކޮޅުގެ ރާހަތު ލިބުމުން ޢަމަލުކުރަންވީ ގޮތާއި، އެ ޙަޖަމުވުމުން ޤަޟާޙާޖާކުރަންވީ ގޮތާއި، ފާޚާނާއަށް ވަދެ ނުކުންނަންވީ ގޮތުންފެށިގެން އެންމެހައި ކަންތައްތައް މިހާ ފުރިހަމައަށް ލައްވާފައިވާ ދީނެއް އިސްލާމްދީން ނޫނީ މި ބިންމަތީގައި ނެތެވެ. އެހެންކަމުން، މިއަށްވުރެ މާބޮޑެތި އަދި މުޖުތަމަޢާއި ފަރުދުންގެ މަޞްލަޙަތު ހުރި ކަންކަމުގައި، ދީނުގައި އަންގަވާފައިވާ ގޮތުގެމަތީން ތިމާގެ ޢަމަލުތައް ބެހެއްޓުން މާ އަޢުލާކަން ބޮޑުނޫންތޯއެވެ؟ މިފަދަ ކަންކަމުގައި، ތިމާ ޢަމަލުކުރާގޮތުން، އަޅުގަނޑުމެން މިކިޔާ ދީނީ ލޯތްބާއި ޤައުމީ ލޯބި ފެންނަނަމައީ، އަޅުގަނޑުމެންގެ ޤައުމުގެ މުސްތަޤުބަލު ހާދަހާ އުޖާލާވާނެތާއޭ އަޅުގަނޑުގެ ހިތަށް އަރައެވެ.
ދީނީ ލޯތްބާއި ޤައުމީ ލޯތްބާއި، ނަފުސަށްވުރެ ޤައުމު އިސްކުރުމުގެ ވާހަކަ އަޅުގަނޑުމެން ދައްކާއިރު، އެމީހެއްގެ އަމިއްލަ މަޞްލަޙަތު ހުރިކަމެއްގައިނަމަ މި ލޯބި އެއްފަރާތްކުރެވެނީ ކީއްވެގެންތޯ ކޮންމެ މީހަކު އަމިއްލަ ނަފުސާއި އަދި ތިމާގެ އަޚާއާއި ސުވާލުކޮށްލަންޖެހެއެވެ. ތިމާއާއި ތިމާގެ ޢާއިލާ ކައިބޮއެ އުޅެނީ ޙަލާލު މަސައްކަތުން ހޯދާ، ޙަލާލު ފައިސާއިންތޯ ކޮންމެ މީހަކު އަމިއްލަ ނަފުސާ ސުވާލުކޮށްލާށެވެ. ވަޒީފާގައި މުސާރަ ޙައްޤުވާވަރަށް މަސައްކަތް ކުރެވޭތޯއާއި، ދައުލަތުގެ އެއްވެސް މުދަލެއް ނަހަމަގޮތުގައި ބޭނުންކުރެވޭތޯއާއި، އެހެން މީހެއްގެ ޙައްޤަކަށް އަރައިގަނެވޭތޯއާއި، ތިމާ ކުރާ މަސައްކަތްތަކުގައި އިޚުލާޞްތެރިވެވޭތޯ ނަފުސާ ސުވާލުކޮށްލާށެވެ.
މިއަދު އަޅުގަނޑުމެންގެ ޤައުމަށް އެންމެ މުހިންމުވެފައި ވަނީ ގިނަ އިޚުލާޞްތެރި ރައްޔިތުންނެވެ. ތެދުވެރި އަމާނާތްތެރީންނެވެ. ޤައުމަށް ޖެހިފައިވާ ވަބާތަކުގެ ތެރެއިން، ކޮރަޕްޝަނާއި، ވަޢުދަށް ކަމޭނުހިތުމާއި، ބަހާއި ޢަމަލާއި ދިމާނުވުމާއި، ވައްކަންކުރުމާއި، މަސްތުވާތަކެތި ނައްތާލުމާއި، ޢިޖުތިމާޢީ ފޭރާން ވީދި ދިއުމުގެ ހިތިކަމަށް އޮތްފަރުވާއަކީ ބޮޑެތި ޖަރީމާތައް ނައްތާލުމަށް އަޅަންޖެހޭ ފިޔަވަޅުތައް އެޅުމުގައާއި، އެފަދަ މުއައްސަސާތަކުގައި މަސައްކަތްކުރާ ފަރާތްތައް ޒިންމާދާރުކުރުވުމުގައާއި، ޢަދުލު އިންޞާފު ޤާއިމްކުރުމުގެ ޒިންމާ ކޮނޑުގައި އަޅުއްވައިގެން ތިއްބެވި އެންމެހައި ފަރާތްތަކާއި ރައްޔިތުންގެ ފައިސާއިން މުސާރަ ނަންގަވައިގެން މަސައްކަތްކުރައްވާ އެންމެހައި ފަރާތްތައް ދީނަށާއި ޤައުމަށް އިޚްލާޞްތެރިވުމެވެ. ތެދުވެރިކަމާއި އަމާނާތްތެރިކަމާއިއެކު މަސައްކަތްކުރުމެވެ. ތިމާގެ ލޯބިވާ ދީނަށާއި، ޤައުމަށާއި، މުޖުތަމަޢަށާއި، ނަފުސަށް ވެސް ޙަޤީޤީ މާނާގައި އިޚްލާޞްތެރިވެ އަމާނާތްތެރިވާކަން ތިމާގެ ޢަމަލުތަކުން ފެނުމެވެ. ދީނަށާއި ޤައުމަށް ޚިޔާނާތްތެރިނުވުމެވެ. އޭރުން، ޙަޤީޤީ މާނާގައި ދީނާއި ޤައުމުދެކެ ލޯބިވެވުނީއެވެ. މޭފުއްޕާފައި، އަހުރެންގެ ދީނޭ، އަހުރެންގެ ޤައުމޭ، ދީނާއި ޤައުމުގެ ޙައްޤޭ، ދީނާއި ޤައުމު ދެކެ ލޯބިވެޔޭ ބުނާއިރު އެ ފުރާނައެއް ނޭވާލަނީ ޚިޔާނާތްތެރިކަމާއި ނުޙައްޤު މަގުތަކުން ހޯދި މަންފާއިން ކައިބޮއި މަސްޖަހާފައިހުރި ހަށްޓަކުންކަމުގައި ވަނީނަމަ، މިއީ އަދި މާނަހުރި މަގަކަށް ނުވެއެވެ. އަދި އެކަމުން، މި ޤައުމުގެ ކުރިމަގު އުޖާލާވުމަކަށް ނުފުދެއެވެ. އެހެންކަމުން، އަޅުގަނޑުމެންގެ ޤައުމުގެ ފަރުދުންނަކީ، ޤައުމުގެ ކުރިމަގަށް ޓަކައި، މާތްވެގެންވާ އިސްލާމްދީނުގެ މަތިވެރި އުޞޫލުތަކުގައި ހިފައިގެން ކުރިއަށްދާ، އިޚްލާޞްތެރި، އަމާނާތްތެރި ތެދުވެރި ބައެއްކަމުގައި ވުމުގެ ޢަޒުމު މިއަދު އައުކުރަމާ ހިނގާށެވެ!
