ރިފާޢު މުޙައްމަދު
ފެންނަފެނުމާއި، ކުރެވޭ އިޙުސާސްތައް އޭގެ އެންމެ ފުރިހަމަ ގޮތުގައި ހިތަށް ގެނެވޭ ހިނދު، ދެރަވެ މާޔޫސްކަންމަތީ ހަދާނެ ގޮތެއް ނެތި ތިބޭ ހާލުގައާއި، ގޮތް ހުސްވެ، އުންމީދު ކަނޑާލާ ވަގުތުތަކުގައި، އެ އުންމީދުތައް އާކޮށްދޭ ބަޔަކީ އަލިފާންނިވާ މީހުންކަމީ އެއްވެސް ޝައްކެއް އޮތްކަމެއް ނޫނެވެ. އާދެ! މިއީ، އަލިފާނުގެ ހާދިސާއެއް ހިނގައިގެން އުޅޭއިރު، އެކަމެއް ތަހައްމަލު ކުރަމުންދާ މީހާގެ ޝުޢޫރުތަކެވެ.
އަލިފާންނިވާ މީހުންނަކީ، އެހެން މީހުންނެކޭ އެއްފަދައިން، ހަމަ އާދައިގެ އިންސާނުންނެވެ. ބަލާބެލުމަށް، އެއްވެސް ތަފާތެއް ނެތެވެ. ނަމަވެސް، އެހެން މީހުންނާ، ފަޔަރމަނުންނާ ހުންނަ ތަފާތަކީ، އަމިއްލަ ނަފުސަށްވުރެ، އަނެކާގެ ފުރާނަ އިސްކުރުމެވެ. ދެގޮތެއްނުވާ، ގަދަފަދަ ހިތްވަރެވެ. ކުޅަދާނަ ކަމެކެވެ. ފަޔަރމަނެއްގެ ކިބައިގައި ހުންނަ މި ހުރިހާ ސިފަތަކެއްގެ އަސްލަކީ، ފުރިހަމަކުރާ ތަމްރީނުތަކެވެ. އަދި ތަޖުރިބާކާރު ފަޔަރމަނުންގެ ކިބައިން ލައިދެވޭ ފިލާވަޅުތަކެވެ.
އަލިފާންނިވާ މީހުންގެ ވަޒީފާ ގިންތި ކުރެވިފައިވަނީ ބުރަ އަދި ނުރައްކާތެރި ވަޒީފާއެއްގެ ގޮތުގައެވެ. އަދި އަލިފާންނިވާ މީހުންނަކީ ޖިސްމާނީ ގޮތުންނާއި ނަފުސާނީގޮތުން ވެސް އެހާމެ ބުރަ، އުސްތަންތަނަށް އެރުމާއި، ވިހަދުމުގެ ތެރޭގައި މަސައްކަތްކުރުމާއި، ބިރުކުޑަކަމާއި ޖެހިލުންކުޑަކަމާއެކު ތިމާގެ ނަފުސު ނުރައްކަލުގެ ތެރެއަށް ވައްޓާލުމަށްފަހު އެހެން މީހުން ސަލާމަތް ކުރުމަށް މަސައްކަތްކުރާ ބައެކެވެ. އެހެންކަމުން މީހުން އަޅުގަނޑުމެންނަން “ސްޕަރ ހީރޯ” އޭވެސް ކިޔައެވެ. ނަމަވެސް އަޅުގަނޑުމެން އަދާކުރާ ވަޒީފާއަކީ ހަމަ އާދައިގެ ވަޒީފާއެކެވެ. ނަފުސާނީ ގޮތުންނާއި ޖިސްމާނީ ގޮތުން ތަފާތުކަމެއް ހުއްޓަސް އަލިފާންނިވާ މީހުންނަކީ އުޅޭއުޅުމުގައި އެހެން މީހުންނާ އެއްވެސް ތަފާތުކަމެއް ނެތް ބައެކެވެ. އެހެންކަމުން، އަލިފާންނިވާ މީހަކަށްވުމަކީ ލިބޭ ވަރަށްބޮޑު އުފަލެކެވެ.
ލިބޭ އުފަލާއި ހިތްހަމަޖެހުމާއި އެއްވަރަށް ނުރައްކާތެރި އަލިފާނުގެ ހާދިސާތަކުގައި ފަޅިސިކުންތަކުން ވެސް މަރުވެދާނެއެވެ. އެފަދަ ހާލަތްތައް ކުރިމަތިވާ ދަނޑިވަޅުތައް ވަރަށް ގިނައިން އަލިފާންނިވާ މީހުންނާ ކުރިމަތިވެއެވެ. އަލިފާން ނިއްވަނިއްވާ ތިއްބާ މުޅި ފުރާޅު ވެއްޓިދާނެއެވެ. ފާރު ވެއްޓިދާނެއެވެ. ސީލިންގ ވެއްޓިދާނެއެވެ. މުޅި މީހާގެ މާހައުލު އަލިފާނުން ބައްދާލަފާނެއެވެ. ނިކުންނާނެ ގޮތެއްނެތި ނޭވާ ހިފަހައްޓާލަންޖެހޭ އެތައް ވަގުތުތަކެއް އާދެއެވެ. އަލިފާނުގެ މާހައުލުން ނިކުތުމަށް ލިބޭ ފަޅިސިކުންތުގެ ބޭނުން ފުރިހަމަގޮތުގައި ނުހިފިއްޖެނަމަ ދުނިޔެއާ އަލްވަދާޢު ކިޔަންޖެހޭ އެތައް ދަނޑިވަޅެއް އަލިފާންނިވާ މީހުންނަން ކުރިމަތި ކުރުވައެވެ. އަދި ހަދާނެ ގޮތެއްނެތި މަދަދަށްއެދި އާދޭސްކުރާތަން ފެންނަހިނދު، ގަދަ އަލިފާނުގެ ތެރެއަށް ވަދެ އެހީތެރިކަމުގެ އަތް ދިއްކޮށްލާ ބަޔަކީ އަލިފާންނިވާ މީހުންނެވެ. އެހެންކަމުން މިފަދަ ނުރައްކާތެރި ދަނޑިވަޅުންތަކާ އެކުވެސް މީހުން ސަލާމަތް ކުރުމަށް ލިބޭ މަދު ފުރުސަތަކީ ހިތުން ބަޔާންކުރާން ނޭނގޭ އުފަލަކާއި އިހުސާސެއް ކުރެވޭ ކަމެކެވެ. އެހެންކަމުން އަލިފާންނިވާ މީހަކަށް ވުމަކީ ލިބޭ ފަޚުރެކެވެ. ޝަރަފެކެވެ.
