ޙުސައިން ޢަލީ
ނަވާރަސަތޭކަ އަށްޑިހަ އަށްވަނަ އަހަރުގެ ނޮވެންބަރު މަހުގެ ތިންވަނަ ދުވަހަކީ ދިވެހިރާއްޖެއަށް ވަރަށް ޚާއްޞަ ދުވަހެކެވެ. އެ ދުވަހު ކުރިމަތިވި ބިރުވެރިކަމާއި ނާމާންކަމަކީ އަބަދުވެސް އަޅުގަނޑުމެންގެ ހިތު ތެރޭގައި ބިންވަޅު ނެގިފައި ހުންނާނެ ކަންކަމެވެ. ވަކިން ޚާއްޞަކޮށް އެ ދުވަހު ކުރިމަތިވި ނުރައްކާތެރި ހަމަލާގެ ހާލަތުގައި ޢަމަލީގޮތުން ހަރަކާތްތެރިވެ، ފުރާނަ އަތްމައްޗަށް ލައިގެން ދުވަހުގެ ނާމާންކަން ތަޖުރިބާ ކޮށްފައިވާ ފަރާތްތަކަށް މި ދެންނެވި ބިރުވެރިކަން އިހުސާސް ކުރެވޭ ވަރު ބޮޑުވާނެކަން ޔަޤީނެވެ. ރާއްޖެއަކީ ޤުދުރަތީ ހިތްގައިމުކަން ލިބިފައިވާ ރާއްޖެއަކަށް ވުމާއެކު، ކޮންމެ ދުވަހެއްގެ ފަތިހަކީ ވެސް ޤުދުރަތުގެ ފުރިހަމަކަން ގެނެސްދޭ ދުވަހެކެވެ. ހަމަ މި ބީދައިން ނޮވެންބަރު މަހުގެ ތިންވަނަ ދުވަހުގެ ފަތިހަށް އަލިވިލިގެންދާނީ ވެސް ހިތްގައިމުކަމާއި އަމާންކަމާއި އެކުގައިކަމަށް ދިވެހީން އޮތީ ޔަޤީންކޮށްފައެވެ. އެހެނަސް އާޚިރުގައި ކަންވެގެން ދިޔައީ ދިވެހީންގެ ހިތަށް ދުވަހަކު ވެސް ނާރާހާ ނާމާންކަމާއި ބިރުވެރިކަމާ އެކުގައެވެ. އެފަދަ ފަތިހަކަށް އަލިވިލޭކަށް ޤައުމަށް ހެޔޮ އެދޭ ހަމަ އެކަކު ވެސް ނޭދެއެވެ. އެ ފަތިހަކީ ދިވެހީން ދެކެން ބޭނުންވާ ފަދަ ފަތިހެއް ނޫނެވެ. އެރޭގެ ފަތިހު އިވުނީކީ ހާ ގޮވާ އަޑެއް ނޫނެވެ. އަދި ދިވެހީންނަށް އިވުނީ ދިވެހީން އަހަން ބޭނުންވާ އަޑުތަކެއް ވެސް ނޫނެވެ. އަދި އިވުނީކީ ދިވެހީންގެ ކަންފަތްތަކަށް ފަރިތަ އަޑުތަކެއް ވެސް ނުމެނޫންމެއެވެ. ކޮންމެއަކަސް ލޮލުންދެކި، އަތުން ހިފި މީހަކަށް ވެސް އެ ދުވަހުގެ ބިރުވެރިކަން ގަލަމަކުންވިއަސް އަދި ދުލަކުން ވެސް ބަޔާންކޮށްދޭކަށް ފަސޭހައެއް ނުވާނެއެވެ.
ނޮވެންބަރު ތިންވަނަ ދުވަހުގެ ބިރުވެރިކަން އޮތީކީ ހަމައެކަނި ތިމާގެ ފުރާނަ ހިނގާދާނެތީކީ ނޫނެވެ. ނުވަތަ، އާންމު އުސޫލުން ރަށުތެރޭގައި ހެލިފެލިވެ ނޫޅެވޭނެތީކީ ވެސް ނޫނެވެ. ޤައުމީ ނަޒަރަކުން ބަލާލާއިރު، އެ ދުވަހުގެ ބިރުވެރިކަމާއި ނާމާންކަން އާންމު މީހެއްގެ ސިކުނޑިއަށް ވިސްނޭވަރަށް ވުރެ އެތައްހާސް ގުނައެއް ބޮޑެވެ. އެހާވެސް ނުރައްކާތެރިއެވެ. އެ ނުރައްކާތަކަކީ ކޮބާތޯއެވެ. ގައުމުގެ ސިޔާދަތާއި އިސްތިޤުލާލު ގެއްލިގެން ހިނގާދާނެކަމުގެ ބިރެވެ. މާތްވެގެންވާ އިސްލާމް ދީން ދިވެހީންގެ އަތުން ބީވެގެން ހިނގާދާނެ ކަމުގެ ބިރެވެ. ދިވެހީންގެ މިނިވަންކަން ގެއްލިގެން ހިނގާދާނެ ކަމުގެ ބިރެވެ. މިކަން މިހެން އޮތް އިރު، ހާލަތުގެ ހައްސާސްކަމާއި ނާޒުކުކަން ވަޒަން ކުރައްވަމާތޯއެވެ.
ދުވަސް ކިތަންމެ ނާމާންވެ ބިރުވެރިވިއަސް، އަދި ހާލަތު ކިތަންމެ އުނދަގޫވިއަސް، ތާރީޚު ހެކިދޭ ފަދައިން ދިވެހީންނަކީ އެއްވެސް ޒަމާނެއްގައި ގައުމުގެ ޙައްޤުގައި މަސައްކަތްކުރަން ފަސްޖެހޭ ބައެއް ނޫނެވެ. އަދި ދަތި އުނދަގޫ ހާލަތްތަކުގައި ކީރިތި ﷲ ގެ ހެޔޮ ރަޙްމަތާއެކު ދިވެހީންގެ ތެރެއިން އަބަދުވެސް ހިތްވަރުގަދަ ދަރިއަކު އުދަރެހުން ފާޅުވެއެވެ. މި ދުވަހު ވެސް ތަކުރާރުވެގެން ދިޔައީ މި ދެންނެވި ހާލަތެވެ. މާތް ﷲ ގެ ވާގިފުޅާއެކު ނޮވެންބަރު ތިންވަނަ ދުވަހު ދިވެހީންނަށް ލިބިގެން ދިޔަ މަތިވެރި ނަޞްރު ލިބުމުގައި ގައުމު ދެކެ ލޯބިވާ ދިވެހި ދަރިއެއްގެ މުޤައްދަސް ޤުރުބާނުގެ ހިއްސާ ވަރަށް ބޮޑެވެ. ޝައްކެއްނެތް ގޮތުގައި އެ ދުވަހު ދިވެހީންނަށް މިންވަރު ކުރެއްވި ނަޞްރުގެ ޙަޤީޤީ ބަޠަލަކީ ކޯޕްރަލް ޝަހީދު ޙުސައިން އާދަމެވެ.
ކޯޕްރަލް ޝަހީދު ޙުސައިން އާދަމް ފޯރިއަށް ހުރީ ވަރަށް މުހިންމު މަޤާމެއްގައެވެ. ވަރަށް މުހިންމު މަސްއޫލިއްޔަތަކާއި ޒިންމާއެއް ކޮނޑުގައި އަޅައިގެންނެވެ. އެއީ ދިވެހިރާއްޖޭގެ ދިފާޢީ މައިމަރުކަޒު ކަމުގައިވާ ބަންޑާރަކޮށީގެ ދޮރުފާރަވެރި އަކަށެވެ. އަސްކަރީގޮތުން މާބޮޑު ހުނަރެއް ނުވަތަ އަސްކަރީ ޢިލްމަކާއި އުކުޅުތަކެއް ދަސްވެފައެއް ނެތެވެ. އެހެނަސް ލިބިފައިހުރި ތަރުބިއްޔަތަކީ ނަމޫނާ ތަރުބިއްޔަތެކެވެ. ހަވާލުކުރާ މަސައްކަތްކުރުމުގައި ލާމަސީލު ނަމޫނާއެކެވެ. އަސްކަރީ އަޚްލާޤާއި ސުލޫކުގެ ސާލު ލައްވައިގެން ހުންނެވި ފުރިހަމަ ސިފައިންގެ މީހެކެވެ. ދުޝްމަނުންގެ ފުރަތަމަ ވަޒަނާއެކު ފޮނުވާލި ރައްދު ހަމަލާ މިކަމަށް ހެކި ދެއެވެ. ބާޣީންގެ ފުރަތަމަ ހަމަލާއާ އެކު، މަޤާމު ދޫކޮށް ދިއުމުގެ ފުރުސަތު ކޯޕްރަލް ޝަހީދު ޙުސައިން އާދަމަށް އޮތެވެ. އެހެންނަމަވެސް އެފަދަ ވިސްނުމެއް ކޯޕްރަލް ޙުސައިން އާދަމްގެ ނެތެވެ. އޭނާ ޚިޔާރު ކުރީ މަޤާމުގައި ހުރެ، ފުރާނަ ޤުރުބާން ކުރަން ޖެހުނަސް، ސިފައިންގެ މައިމަރުކަޒު ދިފާޢު ކުރުމަށެވެ. އެހެނީ އޭނާއާ ހަވާލުކުރާ މަސައްކަތްތައް އަބަދުވެސް ކަމަށްކަމޭހިތައިގެން ފަރުވާތެރިކަމާއެކު ކުރާ މީހަކަށް ވާތީއެވެ. އިޚުލާސްތެރިކަމާއެކު މަސައްކަތް ކުރުމަކީ ކޯޕްރަލް ޝަހީދު ޙުސައިން އާދަމްގެ ޒާތީ ސިފައެކެވެ. ކޮންމެ އަކަސް ބާޣީންގެ ފުރަތަމަ ހަމަލާއާ އެކު ކޯޕްރަލް ޝަހީދު ޙުސައިން އާދަމް ރައްދުގައި ހަމަލާ ދިނެވެ. މިފަދަ ގޮތަކަށް މި ބާވަތުގެ ޢަމަލެއް ކުރެވޭނީ އަޚުލާޤީ މިންގަނޑު އާދަޔާ ޚިލާފު މިންވަރެއްގައި ހިފެހެއްޓިގެންނެވެ. މީގެން ދޭހަކޮށްދެނީ ކޯޕްރަލް ޝަހީދު ޙުސައިން އާދަމްގެ ޖެހިލުންކުޑަ ކަމެވެ. އޭނާގެ ހުޝިޔާރު ކަމެވެ. އޭނާގެ ހޭލުންތެރިކަމެވެ. ނަފުސަށް ބާއްވަމުން ދިޔަ ބޮޑު އިތުބާރެވެ.
ކޯޕްރަލް ޝަހީދު ޙުސައިން އާދަމް ފޮނުވާލި ރައްދު ހަމަލާގެ ސަބަބުން ބާޣީންނަށް ވަރަށް ގިނަ ކަންކަމާ ކުރިމަތިލާން ޖެހުނެވެ. އެ ހަމަލާގެ ސަބަބުން ބާޣީންގެ ހަމަލާގެ “މޮމެންޓަމް” ގެއްލުނެވެ. ކުއްލި ސިހުމާއި ހައިރާންކޮށްލުމަކާއެކު ވަރުގަދަ ހަމަލާއެއް ދެވޭނެކަމަށް އުންމީދުކޮށް، ރާވައިގެން އައި ރޭވުން ވިއްސިވިހާލިވެގެން ދިޔައެވެ. ބާޣީންގެ ގްރޫޕްތައް ބައިބައިވެގެން ދިޔައެވެ. މުޅި ހަމަލާގެ “ކޮމާންޑް އެންޑް ކޮންޓްރޯލް” ގެއްލި، ހަނގުރާމައިގެ މިސްރާބު އެއްކޮށް ބަދަލުވެގެން ދިޔައެވެ. ޝައްކެއްނެތެވެ. ކޯޕްރަލް ޝަހީދު ޙުސައިން އާދަމްގެ ރައްދު ހަމަލާގެ ސަބަބުންނެވެ. ކޯޕްރަލް ޝަހީދު ޙުސައިން އާދަމްގެ ރައްދު ހަމަލާގެ ސަބަބުން ސިފައިންގެ މައިމަރުކަޒު ދިފާޢު ކުރުމުގެ މަގު ވެސް ތަނަވަސްވެގެން ދިޔައެވެ. މަރުކަޒުގެ ތެރޭގައި ދިވެހި ސިފައިންގެ ލަޝްކަރު ރުކުރުވާލުމުގެ ފުރުސަތު ފަހިވެގެން ދިޔައެވެ. ސިފައިންގެ އެތެރޭގައި ތިއްބެވި އަސްކަރީ ކޮމާންޑަރުންނަށް ރައްދު ހަމަލާ ތަރުތީބުކޮށް ވަރުގަދަކުރުމުގެ ފުރުސަތު ލިބުނެވެ. އެހެންކަމުން ކޯޕްރަލް ޝަހީދު ޙުސައިން އާދަމްއަކީ އެ ދުވަހުގެ ހަމަލާ ދިފާޢުކުރުމުގައި އެންމެ މުހިންމު ދައުރު އަދާކުރެއްވި ފަރާތްކަމަށް ދެންނެވުމަކީ އެކަމުގައި ޝާމިލުވި އެހެން ބޭފުޅުންނަށް ދެންނެވޭ ކުޑައިމީސް ބަހެއް ކަމަކަށް ނުދެކެމެވެ.
ކޯޕްރަލް ޝަހީދު ޙުސައިން އާދަމް ނޮވެންބަރު ތިންވަނަ ދުވަހު ކުރިމަތިލީ ހަމަލާއަކީ ވަރުގަދަ ހަމަލާއެކެވެ. ދުޝްމަނުން ބޭނުންކޮށްފައިވާ ހަތިޔާރަކީ އޭރުގެ ނިސްބަތުން އެފަދަ ވަރުގަދަ ހަމަލާއެއް ދޭން އެންމެ އެކަށޭނަ ހަތިޔާރެވެ. އެހެންކަމުން އެފަދަ ހަމަލާއަކަށް ސިހުމާއި ހައިރާންކަމާއެކު ވެސް ކުރިމަތިލައި، ރައްދު ހަމަލާއެއް ކޯޕްރަލް ޙުސައިން އާދަމަށް ދެވުނީ ވަރަށް ހުޝިޔާރުވެގެން ޑިއުޓީގައި ހުރުމުންކަން ޔަޤީނެވެ. އަދި ގަދަފަދަ އެ ވަރުގަދަ ހަމަލާއާ ކުރިމަތިލައި، ޝަހީދުވުމާ ހަމައަށް ވެސް ސާބިތުކަމާއެކު ހުރެވުނީ ކޯޕްރަލް ޝަހީދު ޙުސައިން އާދަމްގެ ޖެހިލުންކުޑަކަމާއި ހިތްވަރުގަދަކަމުންކަން ކަށަވަރެވެ. ކޯޕްރަލް ޝަހީދު ޙުސައިން އާދަމް ޝަހީދުވެގެން ދިޔައީ ގައުމުގެ ދިފާޢުގައި ކުރި ހަނގުރާމައިގެ ދުޝްމަނުން އަނިޔާވެރި ޙަމަލާތަކުގައި ހަށިގަނޑަށް އެރި އުންޑަތަކުގެ ސަބަބުންނެވެ. އެންމެ ފަހުވަގުތާ ހަމައަށް ވެސް މަސައްކަތް ކުރައްވަމުން ގެންދެވީ ގައުމުގެ ޙައްޤު ގައެވެ. އޭނާއާ ހަވާލުކޮށްފައިވާ މަސްއޫލިއްޔަތާއި ވާޖިބު އެންމެ ފުރިހަމަގޮތުގައި އަދާކުރުމުގައެވެ. ލިބިފައިވާ މަތިވެރި އަޚުލާޤުގެ މޫރިތި ސިފަތަކުގެ މަތީގައި ސާބިތުވެ ހުރެއެވެ. ޝައްކެއްނެތެވެ. ކޯޕްރަލް ޝަހީދު ޙުސައިން އާދަމަކީ ހުޝިޔާރުކަމާއި ޖެހިލުންކުޑަކަމުގެ ނަމޫނާ އެކެވެ. ކޯޕްރަލް ޝަހީދު ޙުސައިން އާދަމާއި އެ ދުވަހު ޝަހީދުވި ހުރިހާ ބޭފުޅުންނަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށިއެވެ.
