ޢަބްދުﷲ ސަޢީދު
މޭޖަރ ޖެނެރަލް (ރޓ) މުޙައްމަދު ޒާހިރު ސިފައިންގެ ޚިދުމަތާ ގުޅިވަޑައިގެންނެވީ 1978 ވަނަ އަހަރުގެ ނޮވެންބަރު މަހުގެ 11 ވަނަ ދުވަހުއެވެ. ސާޖަންޓް ރޭންކުގައި ސިފައިންގެ ޚިދުމަތާ ގުޅިވަޑައިގެންނެވި، މޭޖަރ ޖެނެރަލް (ރޓ) މުޙައްމަދު ޒާހިރަށް 6 ޖޫން 1979 ގައި ފަސްޓް ލެފްޓިނެންޓްކަން ލިބިވަޑައިގެންނެވިއެވެ. 11 ޑިސެންބަރު 1979 ގައި ލީބިއާއަށް މިލިޓަރީ ޓްރޭނިންގއަށް ވަޑައިގެންނެވި 7 ބޭފުޅުންގެ ތެރޭގައި އިސްބޭފުޅެއްގެ ގޮތުގައި ވަޑައިގެން އެ ޓްރޭނިންގ ފުރިހަމަ ކުރެއްވިއެވެ. 2 އެޕްރީލު 1981 ގައި ތަމްރީނު ހޯއްދެވުމަށް ކުވައިތަށް ވަޑައިގެންނެވިއެވެ. 5 ޖުލައި 1986 ގައި ގިރިފުށި ޓްރޭނިންގ ކޭމްޕް ހުޅުވައިދެއްވައި، ޓްރޭނިންގ ސެކްޝަންގެ ފުރަތަމަ ކޮމާންޑިންގ އޮފިސަރެއްގެ ހައިސިއްޔަތުން މަސައްކަތް ކުރެއްވިއެވެ. 21 މާރިޗު 1992 ގައި ސިފައިންގޭގައި އުފެއްދެވި ޕްރޮމޯޝަން ބޯޑުގެ ޗެއަރމަންކަން ފުރަތަމަ އަދާކުރެއްވި ބޭފުޅަކީ ވެސް އެމަނިކުފާނެވެ.
އެމަނިކުފާނަށް ލެފްޓިނެންޓް ކާނަލްގެ ރޭންކުން ކާނަލްގެ ރޭންކަށް މަޤާމުގެ ކުރިއެރުން ލިބިވަޑައިގެންނެވީ 21 އެޕްރީލު 1992 ގައެވެ. 11 ނޮވެންބަރު 1993 ގައި ބްރިގޭޑިއަރ ރޭންކު ދެއްވައި، ޑެޕިޔުޓީ ޗީފް އޮފް ސްޓާފުގެ މަޤާމަށް އެމަނިކުފާނު ހަމަޖެއްސެވިއެވެ. 1 ޖަނަވަރީ 1996 ގައި ޗީފް އޮފް ސްޓާފްގެ މަޤާމަށް ހަމަޖެއްސެވިއެވެ. 29 އެޕްރީލު 2004 ގައި ބްރިގޭޑިއަރގެ މަޤާމުން މޭޖަރ ޖެނެރަލްގެ މަޤާމަށް ބަދަލުކުރެއްވިއެވެ.
ޤައުމީ ރޫޙާއި ޤައުމީ ލޯބީގައި މޭޖަރ ޖެނެރަލް (ރޓ) މުޙައްމަދު ޒާހިރު ސިފައިންގޭގައި މަސައްކަތް ކުރައްވާފައިވަނީ ހުޝިޔާރުކަމާއި ޤާބިލުކަމާއެކު ހުރިހާ ސިފައިންގެ ލޯތްބާއި ޤަދަރު ލިބިވަޑައިގެންނެވެ. އެމަނިކުފާނުގެ ސިފައިންގެ ޚިދުމަތަށް ބަލާލާއިރު 1988 ނޮވެންބަރު 3 ގެ ޢުދުވާނީ ޙަމަލާގައި ދިވެހިރާއްޖޭގެ މިނިވަންކަމާއި އިސްތިޤުލާލާއި ސިޔާދަތު ދިފާޢުކޮށް ރައްކާތެރިކޮށް ވަޠަނަށް ނަޞްރު ހޯދައިދިނުމަށް ޓަކައި ފަސްޖެހިވަޑައިގަތުމެއްނެތި ކެރިގެން ކުރިމަތިލައްވާ ދައްކަވައިދެއްވި ހިތްވަރަށް ޓަކައި ދިވެހި ސިފައިން ފަޚުރުވެރިވެއެވެ.
މޭޖަރ ޖެނެރަލް (ރޓ) މުޙައްމަދު ޒާހިރު ދިވެހި ސިފައިންގެ ޤައުމީ ޚިދުމަތުގައި ހަރަކާތްތެރިވެ ދައްކަވައި ދެއްވާފައިވަނީ އިޚުލާޞްތެރިކަމާއި ވަފާތެރިކަމުގެ ވަރަށް ފުރިހަމަ މިސާލެކެވެ. ސިފައިންގެ ކަންތައްތައް އެއް ދުވަހުން އަނެއް ދުވަހަށް ރަނގަޅުކޮށް ތަރައްޤީ ކުރެއްވުމަށް އެމަނިކުފާނު ކުރެއްވި އަގުހުރި މިންނަތް މަސައްކަތްޕުޅު ފާހަގަކޮށްލަން ޖެހެނީ މިއަދު ދިވެހި ސިފައިންނަށް ލިބިފައިވާ ކުރިއެރުންތަކުގެ އެއް ސަބަބު ކަމުގައެވެ. ދިވެހި ސިފައިންގެ އިންސާނީ ވަސީލަތް ތަރައްޤީ ކުރެއްވުމާއި، ރާއްޖޭގެ ކަންކޮޅުތަކުގައި ސިފައިންގެ ޚިދުމަތް ފުޅާކުރެއްވުމާއި ސިފައިންގެ ޢުމުރާނީ ތަރައްޤީއަށް ވޭތުވެދިޔަ ތަނުގައި ހެޔޮ ބަދަލުތަކެއް ވަނީ ގެންނަވާފައެވެ. ސިފައިންގެ ޚިދުމަތް ވީހާވެސް ރަނގަޅަކަށް ރައްޔިތުންނަށް ފޯރުކޮށް ދެއްވުމަށްޓަކައި ކޯސްޓްގާޑްގެ ޚިދުމަތާއި އަލިފާން ނިއްވުމުގެ ޚިދުމަތް ފުޅާ ކުރެއްވުމަށް ދެއްވި އިސްކަމާއި ދިވެހި ސިފައިންގެ ތަސައްވުރު ރަނގަޅުކުރެއްވުމަށް އެމަނިކުފާނު ކުރެއްވި މަސައްކަތްތަކީ ވަރަށް އަގުހުރި މަސައްކަތްޕުޅުތަކެކެވެ. މިއަދު ދިވެހި ސިފައިން މިވަނީ އުފެއްދުންތެރި ބަޔަކަށްވެފައެވެ. ޤައުމީ ޚިދުމަތަށް ޤާބިލު ބަޔަކަށްވެފައެވެ. ސިފައިންގޭގައި ދެވޭ ތަމްރީނުތައް ވަނީ ބޭރުގެ ޤައުމުތަކުގައި ވެސް ދެވޭ ފެންވަރުގެ އަސްކަރީ ތަމްރީނުތަކަކަށް ބަދަލުކުރައްވާފައެވެ. ސިފައިންގެ އެންމެހާ ކަންތައްތައް އިންތިޒާމު ކުރެއްވުމަށް އުފެއްދެވި ބޯޑުތަކާއި ކޮމެޓީތަކާއި ހެއްދެވި ޤަވާޢިދުތައް ހައްދަވާ ހިންގެވުމުގައާއި ސިފައިންގެ ޤާނޫނު ވުޖޫދަށް ގެނައުމުގައި އެމަނިކުފާނު ކުރައްވާފައިވާ މަސައްކަތްޕުޅު ފާހަގަކޮށްލަންޖެހެނީ ޝުކުރުވެރިކަމާއެކުއެވެ.
މޭޖަރ ޖެނަރަލް (ރޓ) މުޙައްމަދު ޒާހިރަކީ، ސިފައިންގެ ގޮތުން ކޮންމެ ކަމެއް ކުރިއަސް އެކަމެއް ދުރާގާތުން ޢަމަލީގޮތުން ބައްލަވަމުން ގެންދެވި ބޭފުޅެކެވެ. ސިފައިންގެ ޤައުމީ ވާޖިބާއި މަސްއޫލިއްޔަތު އަދާކުރެއްވުމުގައި ސިފައިން ކުރާ ކޮންމެ ކަމަކަށް ވެސް ވަރަށް ބޮޑު އިސްކަމަކާއި ސަމާލުކަމެއް ދެއްވި ބޭފުޅެކެވެ. ސިފައިން ކޮށްފައިވާ ޚާއްޞަ މަސައްކަތްތައް ކުރެވެމުންދިޔަ ކޮންމެ ވަގުތަކު ވެސް އެ ތަންތަނަށް ވަޑައިގެން ބައްލަވައި އިރުޝާދު ދެއްވަމުން ގެންދަވާފައިވެއެވެ. ޚާއްޞަ ރަސްމިއްޔާތުތަކަށާއި ތަފާތު ގިނަގުނަ މުނާސަބާ ފާހަގަ ކުރުމުގައި ސިފައިން އަދާކޮށްފައިވާ ކޮންމެ ދައުރަކީ ވެސް އެމަނިކުފާނުގެ ބެއްލެވުމާއި އިރުޝާދު ލިބިގެން ކުރެވިފައިވާ މަސައްކަތްޕުޅުތަކެއްކަން ފާހަގަ ކުރެވެއެވެ.
މޭޖަރ ޖެނެރަލް (ރޓ) މުޙައްމަދު ޒާހިރަކީ ސިފައިންގޭގައި ކިތަންމެ އިސް މަޤާމުތަކެއް އަދާކުރެއްވި ބޭފުޅެއް ކަމަށްވިޔަސް އެމަނިކުފާނަކީ ޢަމަލީ ގޮތުން ވަރަށް ހަރަކާތްތެރި މަސައްކަތްޕުޅުތަކެއް ކުރެއްވި ބޭފުޅެކެވެ. 12 މޭ 1979 ގައި މާލެއަށް ވެލިހަދިޔާ ކުރުމަށް ސިފައިން ކުރި ބުރަ މަސައްކަތާއި، 10 އެޕްރީލު 1987 ގައި މާލެއަށް ބޮޑުރާޅު އެރި ހާދިސާއާ ގުޅިގެން އިސްސަފުގައި ހަރަކާތްތެރިވެވަޑައިގެންނެވުން ފާހަގަ ކޮށްލަން ޖެހެއެވެ. އަދި 17 މާރިޗު 2004 ގައި ދިމާވި އެނަމާ ބޯޓު ބަންޑުންޖަހާލި ހާދިސާއާ ގުޅިގެން އެ ސަރަޙައްދަށް ވަޑައިގެން ކުރެއްވި މަސައްކަތްޕުޅުތަކާއި، 26 ޑިސެންބަރު 2004 ގައި ރާއްޖެއަށް ކުރިމަތިވި ސުނާމީ ކާރިސާއާ ގުޅިގެން ސިފައިން ކުރަމުންދިޔަ ބުރަ މަސައްކަތުގައި މޭޖަރ ޖެނަރަލް (ރޓ) މުޙައްމަދު ޒާހިރު އަދާކުރައްވާފައިވާ ހަރަކާތްތެރި އިސްދައުރު ފާހަގަ ކުރެވެއެވެ.
ސިފައިންގެ ޚިދުމަތުގައި މޭޖަރ ޖެނެރަލް (ރޓ) މުޙައްމަދު ޒާހިރު އަދާކުރެއްވި މަތިވެރި ޤައުމީ ޚިދުމަތުގެ އަގު ވަޒަންކޮށް ޝަރަފުގެ ނިޝާންތައް ވަނީ ލިބިވަޑައިގެންފައެވެ. އޭގެ ތެރެއިން ވެސް 3 ނޮވެންބަރުގެ ޢުދުވާނީ ހަމަލާއާ ގުޅިގެން ދިވެހި ސިފައިން އެ ދުވަހު ކުރި ޖިހާދުގައި އެމަނިކުފާނު ދައްކަވައިދެއްވި ހިތްވަރުގަދަ ޢަމަލުގެ ސަބަބުން ލިބިވަޑައިގެންނެވި ހުރަވީ ރަންމެޑެލި ނުވަތަ މެޑަލް ފޯރ އެކްސެޕްޝަނަލް ބްރޭވަރީ ފާހަގަ ކޮށްލެވެއެވެ. މޭޖަރ ޖެނެރަލް (ރޓ) މުޙައްމަދު ޒާހިރަށް ވަނީ ސިފައިންނަށް ދެވޭ އެންމެ މަތީ އަސްކަރީ މެޑެލި ދިވެހި ސަރުކާރުން ދެއްވާފައެވެ. އެމަނިކުފާނުގެ ޤައުމީ މަތިވެރި ޚިދުމަތް ފާހަގަކުރައްވާ ޣާޒީގެ އެންމެ މަތިވެރި އަސްކަރީ ޝަރަފު ދެއްވާފައިވަނީ 3 ނޮވެންބަރު 2008 ގައެވެ.
2008 ނޮވެންބަރު 18 ވަނަ ދުވަހު ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ، އަލްފާޟިލް މުޙައްމަދު ނަޝީދު ވަނީ ނޭޝަނަލް ސެކިޔުރިޓީ އެޑްވައިޒަރުކަމުގެ މަޤާމަށް މޭޖަރ ޖެނެރަލް (ރޓ) މުޙައްމަދު ޒާހިރު ހަމަޖައްސަވާފައެވެ. އެމަނިކުފާނަކީ ޤައުމީ ރޫޙާއި ޤައުމީ ލޯބީގައި ޤައުމަށް ޚިދުމަތް ކުރެއްވުމުގެ ރީތި ނަމޫނާއެއް ދައްކަވައި ދެއްވާފައިވާ ލާމަސީލު މިސާލެކެވެ.
