ދުނިޔޭގެ ތާރީޚަށް ނަޒަރު ހިނގާލާއިރު، ނިއުކްލިއަރ ހަތިޔާރު އެންމެ ފުރަތަމަ އުފެއްދި އަދި ބޭނުންކުރި ހަމައެކަނި ގައުމަކީ އެމެރިކާއެވެ. އެމެރިކާއިން 1945 ވަނަ އަހަރުގެ އޮގަސްޓް މަހުގެ 6 ވަނަ ދުވަހު “ލިޓްލް ބޯއީ” ގެ ނަމުން ނަންދެވިފައިވާ އެޓޮމިކް ބޮން ޖަޕާނުގެ ހީރޯސީމާއަށް ވައްޓާލިއެވެ. މިއީ، ދުނިޔޭގެ ތާރީޚުގައި އެންމެ ފުރަތަމަ ބޭނުންކުރި ނިއުކްލިއަރ ހަތިޔާރެވެ. އަދި 1945 ވަނަ އަހަރުގެ އޮގަސްޓް މަހުގެ 9 ވަނަ ދުވަހު “ފެޓް މޭން” ގެ ނަމުން ނަން ދެވިފަައިވާ އެޓޮމިކް ބޮން ޖަޕާނުގެ ނަގަސާކީއަށް ވައްޓާލިއެވެ.

މި ނިއުކްލިއަރ ހަމަލާތަކުގެ ސަބަބުން މުޅި ދުނިޔެ ސިއްސުވާލައި، ބިރުވެރިކަމާއި ނާމާންކަން ގެނުވިއެވެ. އެމެރިކާއިން ނިއުކްލިއަރ ހަތިޔާރު އުފެއްދުމަށް ރޫސްވެލްޓްގެ ވެރިކަމުގެ ދުވަސްވަރު “މެންހަޓަން ޕްރޮޖެކްޓް” ގެ ނަމުގައި ޓޮޕް ސީކްރެޓް ޕްރޮޖެކްޓެއް ފެށިއެވެ. މި ދެންނެވުނު ސިއްރު ޕްރޮޖެކްޓްގެ މޭސްތިރިއަކީ، ޖޫލިއަސް ރޮބަރޓް އޮޕެންހައިމަރއެވެ. އޭނާ ސިފަކުރެވިފައިވަނީ އެޓޮމް ބޮމްގެ ބައްޕަގެ ގޮތުގައެވެ.

އޮޕެންހައިމަރއަކީ އެމެރިކާގެ ތިއަރެޓިކަލް ފިޒީސްޓެކެވެ. ކުޅަދާނަ ސައިންޓިސްޓެކެވެ. އޮޕެންހައިމަރ މަޝްހޫރުވެފައިވަނީ، ދެވަނަ ބޮޑު ހަނގުރާމައިގެ ދުވަސްވަރު، އެމެރިކާއިން ނިއުކްލިއަރ ބޮން އުފެއްދުމަށް ކުރިއަށްގެންދިޔަ ޓޮޕް ސީކްރެޓް ޕްރޮޖެކްޓްގެ ލެބޯޓްރީގެ ޑައިރެކްޓަރގެ ގޮތުގައި ނިއުކްލިއަރ ހަތިޔާރު އުފެއްދި ސައިންޓިސްޓްގެ ގޮތުގައެވެ. ޖަޕާނަށް ދިން ނިއުކްލިއަރ ހަމަލާގައި ބޭނުންކުރި އެޓޮމް ބޮމް ޑިޒައިންކޮށް ތައްޔާރުކޮށްފައިވަނީ މި ލެބޯޓްރީން ކުރިއަށްގެންދިޔަ ގޮންޖެހުންތައް ގިނަ ދިރާސާތަކަށްފަހުއެވެ.

އޮޕެންހައިމަރ އުފަންވެފައިވަނީ 1904 ވަނަ އަހަރު އެމެރިކާގެ ނިއުޔޯކް ސިޓީއަށެވެ. އޭނާ ނިޞްބަތްވަނީ މުއްސަނދި ޢާއިލާއަކަށެވެ. އޮޕެންހައިމަރ ތަޢުލީމީ ހަޔާތް ފެށީ ނިއުޔޯކްގެ އެތިކަލް ކޯޗަސް ކޮލެޖުންނެވެ. ސްކޫލް ދުވަސްވަރު، އޭނާ ފާހަގަވެފައިވަނީ ވިސްނުންތޫނު، ކިޔެވުމަށް މޮޅު ދަރިވަރެއްގެ ގޮތުގައެވެ. މިގޮތުން، 1925 ވަނަ އަހަރު ހަވަރޑް ޔުނިވާރސިޓީން ކެމިސްޓްރީގެ ދާއިރާއިން ފުރަތަމަ ޑިގްރީ ޙާޞިލްކުރިއެވެ. ފިޒިކްސް އަށް އޮޕެންހައިމަރގެ ޝައުޤުވެރިކަން އުފެދިގެންދިޔައީ ހާވަޑް ޔުނިވަރސިޓީގައި ތަޢުލީމު ހާސިލްކުރި ދުވަސްވަރު އެވެ. މިއަށްފަހު، އިތުރަށް ތަޢުލީމް ޙާޞިލްކުރުމަށް އިންގްލެންޑްގެ ކެމްބްރިޖް ޔުނިވަރސިޓީގައި، ދުނިޔޭގެ މޮޅެތި ސައިންޓިސްޓުންނާއެކު ދުވަސްތައް ހޭދަކުރިއެވެ. އަދި ނިއުކްލިއަރ ފިޒިކްސްގެ ދާއިރާއިން ތަޢުލީމް ހޯއްދެވިއެވެ. ކެމްބްރިޖް ޔުނިވަރސިޓީގައި ތަޢުލީމް ހާސިލްކުރެއްވި ދުވަސްވަރު، ސައިންސްގެ ދާއިރާގައި އޭނާގެ ކުޅަދާނަކަމާއި ޤާބިލްކަން ވަނީ ސާބިތުކޮށްދީފައެވެ. އަދި  1927 ވަނަ އަހަރު، އުމުުރުން އެންމެ 23 އަހަރުގައި ފިޒިކްސްގެ ދާއިރާ އިން ޕީއެޗްޑީ ހާޞިލް ކުރެއްވިއެވެ. ފިޒިކްސް އަށް އޮޕެންހައިމަރގެ ހިތުގައި އޮތް ލޯބި ފާހަގަވެގެންދިޔައީ، ހާވަޑް ޔުނިވަރސިޓީގައި ތަޢުލީމި ހާސިލްކުރެއްވި ދުވަސްވަރު އެވެ. ތަޢުލީމީ ހަޔާތަށްފަހު ކެލެފޯނިޔާގެ އިންސްޓިޓިއުޓް އޮފް ޓެކްނޮލޮޖީ އަދި ޔުނިވަރސިޓީ އޮފް ކެލެފޯނިއާގައި ފިޒިކްސް ޕްރޮފެސަރެއްގެ ގޮތުގައި އުނގަންނައިދިނުމުގެ ދާއިރާގާއި އަގުހުރި ޚިދުމަތްތަކެއް ކޮށްދީފައި ވެއެވެ. މި ދުވަސްވަރު ކްއެންޓަމް ފިޒިކްސްގެ ދާއިރާއިން އެތައް ލެކްޗަރތަކެއްދީފައިވާއިރު، މިއީ ގިނަބައެއްގެ މަޤްބޫލުކަން ލިބިގެންދިޔަ ލެކްޗަރތަކެކެވެ.

1963 ވަނަ އަހަރު، އޮޕެންހައިމަރ އަށް އެމެރިކާގެ ރައީސް ލިންޑަން ޖޯންޝަން އެރުވި އެވޯޑް ޙަވާލު ކޮށްދެއްވުން.

1930 ގެ ފަހުކޮޅަށް އައިއިރު، ހަނގުރާމައެއްގެ ބިރުވެރިކަން ވަނީ މުޅި ދުނިޔެ ވަށާލާފައެވެ. ސައިންސްގެ ދާއިރާއިން އޮޕެންހައިމަރ ހޯދާފައިވާ ކުރިއެރުންތަކަށް، އެމެރިކާގެ ސަރުކާރުގެ ނުފޫޒުގަދަ ބޭކަލުންގެ ސަމާލުކަން ލިބިގެންދިޔައީ މިދުވަސްވަރު އެވެ. ހަނގުރާމައެއްގެ ބިރު މުޅި ދުނިޔެއަށް ކުރިމަތިވަމުން ދިއުމާއެކު، އެމެރިކާ އިން ބޭނުންވީ، މުޅި ދުނިޔެ ބަދަލުކޮށްލާވަރުގެ ހަތިޔާރެއް އުފެއްދުމަށެވެ. ނަތީޖާއަކަށް ވެގެންދިޔައީ، އެމެރިކާގެ ރައީސްކަމުގެ މަޤާމުގައި އޭރު ހުންނެވި ފްރެންކްލިން ރޫސްވެލްޓް މަޝްހޫރު “މެންހަޓަން ޕްރޮޖެކްޓް” ފެށުމެވެ. މި ރިސާރޗް ޕްރޮޖެކްޓްގެ ބޭނުމަކީ ނިއުކްލިއަރ ހަތިޔާރެއް އުފެއްދުމެވެ. އަދި މި ޕްރޮޖެކްޓް ކާމިޔާބުކަމާއެކު ކުރިއަށްގެންދިއުމުގެ އިލްމާއި ޤާބިލްކަން ހުރި މަދުމީހުންގެ ތެރެއިން އެމެރިކާ ސަރުކާރުން އިޚްތިޔާރުކުރި ފަރާތަކީ، އޮޕެންހައިމަރއެވެ.

1942 ވަނަ އަހަރު އެމެރިކާގެ ނިއުކްލިއަރ ހަތިޔާރު އުފެއްދުމުގެ ޕްރޮޖެކްޓް “މެންހަޓަން ޕްރޮޖެކްޓް” ލީޑު ކުރުމަށް ޖެނެރަލް ލެސްލީ ގްރޫވްސް އޮޕެންހައިމަރގެ ކިބައިން އެދުނެވެ. 1943 ވަނަ އަހަރު މެންހަޓަން ޕްރޮޖެކްޓްގެ މަޝްހޫރު “ލޮސް އަލަމޮސް ލެބޯޓްރީ” ގެ ޑައިކެރްޓަރގެ މަޤާމަށް އޭނާ އައްޔަންކޮށް، ނިއުކްލިއަރ ހަތިޔާރު އުފެއްދުމުގެ މަސައްކަތް ހަވާލުކުރެވުނެވެ. މި ޕްރޮޖެކްޓްގައި އޭނާގެ ލީޑަރޝިޕާއި އިލްމު ވެގެންދިޔައީ، މި ޕްރޮޖެކްޓް ކާމިޔާބު ވުމުގެ މައިގަނޑު އެއް ސަބަބުކަމުގައެވެ. މި ޕްރޮޖެކްޓަކީ ގިނަ ގޮންޖެހުންތަކެއް ކުރިމަތިވި ޕްރޮޖެކްޓެއް ނަމަވެސް، ދުނިޔޭގައި އެދުވަސްވަރު ތިބި އެންމެ ކުޅަދާނަ ސައިންޓިސްޓުން ބޭނުންކޮށްގެން، އޮޕެންހައިމަރ އޭނާގެ މިޝަން ކާމިޔާބު ކުރިއެވެ. 1945 ވަނަ އަހަރުގެ ޖުލައި މަހުގެ 16 ވަނަ ދުވަހު، ފުރަތަމަ ފަހަރަށް އޭނާގެ ބެލުމުގެ ދަށުން އެޓޮމް ބޮމުގެ ފުރަތަމަ ޓެސްޓް ކުރިއެވެ. މި ޓެސްޓް ކުރި ދުވަހު، އެއްބަޔަކު އުފާފާޅުކުރިއިރު، އަނެއްބަޔަކު ތިބީ ހަމަހިމޭނުންނެވެ. އެކަމަކު، ނިއުކްލިއަރ ހަތިޔާރަށްފަހު، ދުނިޔެ ބަދަލުކޮށްލާނެކަން އޭނާ އަށް ވިސްނުނެވެ. 1945 ވަނަ އަހަރުގެ ޖަޕާނަށް ނިއުކްލިއަރ ހަމަލާ ދިނުމާއެކު، ދެވަނަ ބޮޑު ހަނގުރާމަ ނިމުމަކަށް އައެވެ. މި ހަމަލާގެ ސަބަބުން، 100،000 އާއި 200،000 އާ ދޭތެރޭ އަދަދަޖަށް މީހުން ވަނީ މަރުވެފައެވެ. ނިއުކްލިއަރ ހަމަލާގެ ސަބަބުން ލިބިގެންދިޔަ ފަނާކުރަނިވި ގެއްލުން ވެގެންދިޔައީ، އޮޕެންހައިމަރ މުޅި އުމުރު ދުވަހު މިކަމާމެދު ވިސްނާ ފިކުރުކުރަން ޖެހުނު ހިތްދަތި ކަމަކަށެވެ.

މެންހަޓަން ޕްރޮޖެކްޓްގެ ދުވަސްވަރު، އޮޕެންހައިމަރ ޖެނެރަލް ގްރޫވްސްއާއެކު.

މުޅި ދުނިޔެއަށް ނިއުކްލިއަރ ހަތިޔާރުގެ ނުރައްކާތެރިކަން ފެތުރިދާނެކަމުގެ ބިރުހީވެ، 1947 ވަނަ އަހަރު އުފެއްދި ޔޫއެންގެ ޔުނައިޓެޑް ސްޓޭޓަސް އެޓޮމިކް އެނަރޖީ ކޮމިޝަންގެ، ޖެނެރަލް އެޑްވައިސަރީ ކޮމެޓީންގެ ޗެއަރމަންގެ މަޤާމަށް އޮޕެންހައިމަރ އައްޔަން ކުރެވުނެވެ. މި ކޮމިޝަނަކީ، އެމެރިކާގެ ނިއުކްލިއަރ ހަތިޔާރުތަކާބެހޭ ޕްރޮގްރާމްގެ ކަންކަން ރާވާ ހިންގުމަށް އެކުލަވާލި ކޮމިޝަނެކެވެ. މި ކޮމިޝަންގެ ޗެއަރމަންގެ ހައިސިއްޔަތުން،ް އެމެރިކާގެ ނިއުކްލިއަރ އެނާރޖީއާ ގުޅޭ ސިޔާސަތުތައް އެކުލަވާލުމުގައި އޭނާ ވަނީ އިސް ދައުރެއް އަދާކުރައްވާފައެވެ. މި ކޮމިޝަންގައި އޮޕެންހައިމަރ މަސައްކަތްކުރި ދުވަސްވަރު، ކޮންޓްރޯލް ކުރެވިފައިވާ ނިޒާމެއްގެ ތެރެއިން ނިއުކްލިއަރ ހަތިޔާރު އުފެއްދުމަށް ވަރަށް ބޮޑަށް ބާރު އަޅުއްވައި ވަކާލާތުކޮށްފައި ވެއެވެ. މިގޮތުން، އެމެރިކާއިން އުފެއްދުމުގެ މަސައްކަތް ކުރަމުންދިޔަ ހައިޑްރޯޖަން ބޮމް އުފެއްދުމާ ދެކޮޅަށް ވެސް ވަރަށް ބޮޑަށް ވަކާލާތު ކޮށްފައި ވެއެވެ. އޮޕެންހައިމަރ ހައިޑްރޯޖެން ބޮމް އުފެއްދުމާ ދެކޮޅަށް ވަކާލާތުކޮށްފައިވަނީ، އެ ބޮމަކީ، ހީރޯޝީމާ އަދި ނަގަސާކީ އަށް ވައްޓާލި އެޓޮމް ބޮމަށްވުރެ އެއްހާސް ގުނަ ބާރުގަދަ ބޮމަކަށްވާތީއެވެ. އެހެން ނަމަވެސް، އެމެރިކާއިން 1952 ވަނަ އަހަރު ހައިޑްރޯޖެން ބޮމެއް އުފައްދައި ޓެސްޓް ކޮށްފައިވެއެވެ. ހައިޑްރޯޖެން ބޮމް އުފެއްދުމާ އޮޕެންހައިމަރ ދެކޮޅުހެދި އަނެއް ސަބަބަކީ، މި ބޮމުގެ ސަބަބުން ލިބިދާނެ ފަނާކުރަނިވި ގެއްލުމާއި އަދި ނިއުކްލިއަރ ހަތިޔާރުގެ ވާދަވެރިކަން މުޅި ދުނިޔެއަށް ކުރިމަތިވެ، އެއްބަޔަކު އަނެއްބަޔަކަށްވުރެ، ބާރުގަދަ ބޮން އުފެއްދުމަށް މަސައްކަތް ކުރާނެތީއެވެ. އެހެން ނަމަވެސް، އޮޕެންހައިމަރ އާ އޭނާގެ ޤަބޫލުކުރައްވާ ހަމަތަކުގެ މަތީގައި، އެޓޮމިކް އެނާރޖީ ކޮމެޓީގެ މެމްބަރެއްގެ ގޮތުގައި މާގިނަދުވަހު ވަކާލާތު ކުރެވޭ ގޮތެއް ނުވިއެވެ.

1953 ވަނަ އަހަރު، އެޓޮމިކް އެނަރޖީ ކޮމިޝަން ޗެއަރމަންގެ މަޤާމަށް އެމެރިކާގެ ވިޔަފާރިވެރިއެއްކަމަށްވާ ލުވިސް ސްޓްރައުސް އައްޔަން ކުރެވުނެވެ. މީނާ އަކީ، އޮޕެންހައިމަރ ހައިޑްރޯޖެން ބޮމާމެދު ގެންގުޅުނު ވިސްނުންފުޅާ ދެކޮޅު ބޭފުޅެކެވެ. ނަތީޖާއެއްގެ ގޮތުން، އޮޕެންހައިމަރގެ އިޚްލާޞްތެރިކަމާމެދު ސުވާލު އުފައްދާ، ތަޙްޤީޤެއް ހިންގިއެވެ. މި ދުވަސްވަރަކީ، އެމެރިކާގެ ސަރުކާރުގެ އެތެރޭގައި ތިބި ކޮމިއުނިސްޓުންނަށް ވާގިވެރިވާ ފަރާތްތަކާ ދެކޮޅު އޮޕަރޭޝަންތައް ކުރިއަށްގެންދިޔަ ދުވަސްވަރެވެ. އެމެރިކާގެ އެފްބީއައިގެ އެހީގައި އޮޕެންހައިމަރގެ ފޯނު ޓެޕްކޮށް، ކޮމިއުނިސްޓުންނާ، އޭނާ ދެމެދު ގުޅުން އޮންނަ ކަމަށް ނިންމައި، އޭނާ އަކީ އެމެރިކާ ސަރުކާރަށް ހުރި ނުރައްކަލެއްކަމުގައި ނިންމިއެވެ. މިނިންމުމާއެކު، 1954 ވަނަ އަހަރު، އެމެރިކާ ސަރުކާރުން އޭނާ އަށް ދީފައިވާ ސެކިއުރިޓީ ކްލިއަރެންސް ބާޠިލްކޮށް، އޭނާ ބްލެކްލިސްޓް ކުރިއެވެ. މީގެ ސަބަބުން ސައިންޓިފިކް ޕްރޮގްރާމްތަކުގައި ހަަރަކާތްތެރިވުމާއި އަދި ޕޮލިސީ ލެވެލްގައި ކުރަމުންދިޔަ މަސައްކަތްތައް ހުއްޓުމަކަށް ގެނުވިއެވެ. އަދި އެޓޮމިކް އެނާރޖީ ކޮމިޝަންގައި މަސައްކަތް ކުރުމުގެ ފުރުޞަތު ގެއްލި، އޭނާގެ މަސައްކަތަށް ވެސް ހުރަސްތަކެއް އެޅިގެންދިޔައެވެ. ނިއުކްލިއަރ ހަތިޔާރު އުފެއްދުމުގެ ދާއިރާއިން އެމެރިކާ ފަޚުރުވެރިވި އެތައް ޚިދުމަތްތަކެއް ކޮށްދީފައިވާ އަދި އެމެރިކާގެ އެންމެ ވަރުގަދަ އަދި އެންމެ ނުފޫޒުގަދަ އެއް ސައިންޓިސްގެ އިއްޒަތާއި އަބުރު ކަތިލެވިގެން ދިޔައެވެ.

 

އޮޕެންހައިމަރ ސައިންސްގެ ދާއިރާއިން ކޮށްދީފައިވާ ޚިދުމަތްތަކުގެ އަގު ވަޒަން ކުރުމުގެ ގޮތުން، 1963 ވަނަ އަހަރު “ސައިންޓިފިކް އެޗީވްމަންޓް އެންޑް ލީޑަރޝިޕް” ގެ ދާއިރާ އިންދޭ އެވޯޑް ދީފައި ވެއެވެ. އެހެން ނަމަވެސް، ސެކިއުރިޓީ ކްލިއަރެންސް ލިބިފައި ނުވެއެވެ. 1967 ވަނަ އަހަރު އުމުރުފުޅުން 62 އަހަރުގައި އަވަހާރަވުމާ ހަމައަށް އޮޕެންހައިމަރ ދުވަސްތައް ހޭދަކޮށްފައިވަނީ، ސައިންސް އަދި ފިޒިކްސްގެ ދާއިރާއިން ޖީލެއް ބިނާކުރުމުގައެވެ. އެމެރިކާގެ ޑިޕާޓްމަންޓް އޮފް އެނާރޖީ އިން 2022 ވަނަ އަހަރު، އޮޕެންހައިމަރއާ މެދު ކުރެވުނު ތަޙްޤީޤަކީ، އިންސާފުވެރި ތަޙްޤީޤެއްނޫންކަމަށް ނިންމައި، އަލުން ސެކިއުރިޓީ ކްލިއަރެންސްގެ ހުއްދަ ދީފައިވެއެވެ. އެެހެން ނަމަވެސް، މި ހުއްދަ އޮޕެންހައިމަރ އަށް ލިބުނީ، އޭނާ އަވަހާރަވިތާ، 55 އަަހަރު ފަހުންނެވެ.

ރޮބަރޓް އޮޕެންހައިމަރއަކީ، ސައިންސްގެ ދާއިރާއިން ފާހަގަކޮށްލެވުނު ވިސްނުންތޫނު، އަދި އެހާމެ ކުޅަދާނަ ބޭފުޅެކެވެ. އޭނާގެ ހަޔާތުގައި ކާމިޔާބީއާއި ނާކާމިޔާބު އެކުލެވިގެން ވެއެވެ. އޮޕެންހައިމަރގެ މުޅި ހަޔާތް ހޭދަކޮށްފައިވަނީ ސަައިންސް އަދި ފިޒިކްސްގެ ދާއިރާގައެވެ. ނިއުކްލިއަރ ހަތިޔާރު އުފެއްދުމުގައި 3000 ވުރެ ގިނަ ސައިންސްވެރިންނާއެކު ރެއާއި ދުވާލު އޭނާ މަސައްކަތްކޮށްފައިވަނީ، ދެވަނަ ބޮޑު ހަނގުރާމަ ނިމުމަކަށް ގެނެސް، ސުލްޙަ ޤާއިމް ކުރުމުގެ ބޭނުމުގައެވެ.އެހެން ނަމަވެސް، އާންމުންނާ ދެކޮޅަށް، ނިއުކްލިއަރ އެޓޮމް ބޮމް ބޭނުން ކުރުމާއި އަދި އެބޮމުގެ ސަބަބުން ލިބިގެންދިޔަ ފަނާކުރަނިވި ގެއްލުން ވެގެންދިޔައީ އޭނާއަށްވެސް އެކަމުގެ ސަބަބުން ހިތްދަތިކަން އިޙްސާސްކުރަން ޖެހުނު ކަމަށެވެ. ކޮންމެއަކަސް، އެމެރިކާ ނިއުކްލިއަރ ޕްރޮޖެކްޓް “މެންހަޓަން ޕްރޮޖެކްޓް” ކާމިޔާބުވެ، އެމެރިކާ ދުނިޔޭގެ ފުރަތަމަ ނިއުކްލިއަރ ބާރަށް ވުމުގައި އޮޕެންހައިމަރ އަދާކޮށްފައިވާ ދައުރާމެދު އެއްވެސް ސުވާލެއްނެތެވެ. ދުނިޔެ ސިފަކުރާ ގޮތުގައި އޭނާ އަކީ، އެޓޮމް ބޮމްގެ ބައްޕައެވެ.

  • މަޢުލޫމާތު: ނިއުކްލިއަރ މިއުޒިއަމް، އެޓޮމިކް އާކައިވް، ފޭމަސް ސައިންޓިސްޓްސް

 

ޝެއަރކުރެއްވުމަށް
fb-share-icon
Tweet