ޙަސަން އަކްރަމް
1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހަކީ، ދިވެހިރާއްޖޭގެ ތާރީޚުގައި ކަޅު ސަފުހާއެއް ހުޅުވިގެންދިޔަ ބިރުވެރި އަދި އެހާމެ ނުރައްކާތެރި ދުވަހެކެވެ. އެ ދުވަހަކީ، ސްރީލަންކާގެ ކުލީ ސިފައިންނާ ގުޅިގެން، މި ބިމަށް އުފަން ދިވެހިންގެ ބަޔަކު، ދިވެހިރާއްޖެއަށް ދިން އުދުވާނީ ހަމަލާއިން ދިވެހި ގައުމާއި ރައްޔިތުންނަށް ނަޞްރާއި ކާމިޔާބީ މާތްﷲ މިންވަރު ކުރެއްވި ދުވަހެވެ. އެ ދުވަހަކީ، މާތްވެގެންވާ އިސްލާމްދީނާއި މި ލޮބުވެތި ވަޠަންގެ މިނިވަންކަމާއި ސިޔާދަތާއި އިސްތިޤުލާލުގެ ދިފާޢުގައި ހިތްވަރާއި އަޒުމާއެކު ޖިހާދުކޮށް ސިފައިން ވަރަށް މަތިވެރި ޤުރުބާނީއެއް ވީދުވަސް ވެސް މެއެވެ. އެ ދުވަހުގެ ހަމަލާގައި 19 ދިވެހިންގެ ޠާހިރު ލޭ، މި ފަސްގަނޑަށް އޮހޮރިގެންދިޔައިރު، ޝަހީދު ކޯޕްރަލް ޙުސައިން އާދަމަކީ، ސިފައިންގެ 8 ބޭކަލުންގެ ތެރެއިން ޝަހީދުވި، މި ފަސްގަނޑު އެ ދަރިއަކަށް ޓަކައި ތާބައަދަށް ފަޚުރުވެރިވާ ދިވެހި ދަރިއެކެވެ. އަދި ދިވެހި ސިފައިން އެ ބަޠަލަކަށް ޓަކައި ފަޚުރުވެރިވާ ސޯލްޖަރެކެވެ.
ތިނެއް ނޮވެންބަރުގެ އުދުވާނީ ހަމަލާގައި، ސިފައިންގެ މައިމަރުކަޒަށް ހަމަލާދިން ވަގުތު މައިގޭޓުގައި ޓާސްކް ފޯސް ޑިއުޓީގައި ހުންނެވި ދެ ބޭކަލުންގެ ތެރެއިން އެއްބޭކަލަކީ، ޝަހީދު ކޯޕްރަލް ޙުސައިން އާދަމެވެ. ތިނެއް ނޮވެންބަރުގެ އުދުވާނީ ހަމަލާގައި، ސިފައިންގެ މައިގޭޓަށް ވަސަންތީގެ ގުރޫޕުން ދެމުންދިޔަ ހަމަލާތަކުގެ ރައްދުގައި، ފިސާރި ހިތްވަރާއެކު ވަރުގަދަ ރައްދު ހަމަލާތަކެއް ދިން ބޭކަލަކީ ވެސް މިއީއެވެ. ޝަހީދު ކޯޕްރަލް ޙުސައިން އާދަމްގެ ވަރުގަދަ ރައްދު ހަމަލާތައް ވެގެންދިޔައީ، ދުޝްމަނުން ކުރިއަށް އައުމަށް ކުރިމަތިވި އެންމެ ބޮޑު ހުރަސްކަމުގައެވެ. ހަމަލާ ބަދަލުކުރެވެން ފެށިތާ ދިވަހަރަކަށް މިނެޓް ފަހުން ޝަހީދު ކޯޕްރަލް ޙުސައިން އާދަމްގެ އަތަށް ފުރަތަމަ ވަޒަން އެރިއެވެ. ފުރަތަމަ މެގަޒިން ހުސްވެ، ދެވަނަ މެގަޒިން ލޯޑް ކުރިއެވެ. ވަޒަން ހުސްވާތީ ވަޒަން ހޯދުމަށް އެދެމުން ދިޔައެވެ. ދުޝްމިނުން ދިން ހަމަލާތަކުން ބަޑީގެ މެގަޒިނަށް ވަޒަނެއް އަރައި، މެގަޒިން ތެރޭގައި ވަޒަން ތާށިވެ، ރައްދު ހަމަލާތައް ހުއްޓިގެން ދިޔައެވެ. މި ވަގުތު ދުޝްމަނުންނަށް ފުރުސަތު ލިބި، ވަރުގަދަ ހަމަލާތަކެއް ދިނެވެ. އަދި ހަށިގަނޑުގެ އެތަން މިތަނަށް ވަޒަން އަރައި، އެދުވަހުގެ ފަތިހު ގާތްގަނޑަކަށް 04:40 ހާއިރު، ޝަހީދުވެގެން ސެނގަރުތެރެއަށް ވެއްޓިވަޑައިގަތެވެ. ދުޝްމަނުންގެ ހަމަލާތަކުން ސިފައިންގެ މައިމަރުކަޒު ސަލާމަތްކޮށްދީ، ސިފައިންނަށް އިތުރު ވަގުތު ލިބިގެންދިޔައީ ޝަހީދު ކޯޕްރަލް ޙުސައިން އާދަމްގެ އަވަސް ރައްދު ހަމަލާއެވެ. ސެނގަރު ލެއިން ތަތްތަޅުވާލައި، ޝަހީދުވީ މައިމަރުކަޒު ދިފާޢު ކުރާނޭ ފުރުސަތު އޭނާގެ ފުރާނައިން ޤުރުބާންވެގެން ހޯއްދަވާދެއްވާފައެވެ. ތިނެއް ނޮވެންބަރުގެ އުދުވާނީ ހަމަލާގެ ވާހަކަ ދެކެވޭ ކޮންމެ ފަހަރަކުމެ، ޝަހީދު ކޯޕްރަލް ޙުސައިން އާދަމްގެ ގައުމީ ޚިދުމަތުގެ ވާހަކަ ދެކެވެނީ، ދިވެހިރާއްޖޭގެ މިނިވަންކަމާއި ސިޔާދަތާއި އިސްތިޤުލާލުގެ ދިފާޢުގައި އަމިއްލަ ފުރާނައިން ވެވަޑައިގެންނެވި މަތިވެރި ޤުރުބާނީގެ ސަބަބުންނެވެ. މި ދުނިޔެ ޝަހީދެއްގެ ގޮތުގައި ދޫކުރެއްވީ، އިސްލާމްދީނާއި، ދިވެހިރާއްޖޭގެ މިނިވަންކަމާއި، ސިޔާދަތާއި އިސްތިޤުލާލު ހިމާޔަތްކުރުމަށް އަމިއްލަ ފުރާނަ ދިވެހި އުއްމަތަށް ހަދިޔާ ކުރައްވާފައެވެ.
ތިނެއް ނޮވެންބަރުގެ އުދުވާނީ ހަމަލާގައި، ދުޝްމަނުން ސިއްސުވާލީ މުޅި ދިވެހި އުއްމަތް އެ ބަޠަލަކަށް ޓަކައި ފަޚުރުވެރިވާ ހދ.ކުޅުދުއްފުށީ މާވާގޭ ޝަހީދު ކޯޕްރަލް ޙުސައިން އާދަމްގެ ހިތްވަރާއި ސާބިތު ކަމެކެވެ. ހަމަޔަޤީނުން ވެސް މިއީ، ދިވެހިރާއްޖެ ދެމިއޮތްހާ ދުވަހަކު، ދެމި އޮންނާނެ، ދުވަހަކު ވެސް ފަނޑުވުމެއްނެތް މަތިވެރި ގައުމީ ޤުރުބާނީއެކެވެ. ޝައްކެއް ވެސް ނެތްގޮތުގައި، ޝަހީދު ކޯޕްރަލް ޙުސައިން ޢާދަމަކީ، ގައުމީ ބަޠަލެކެވެ. ޝަހީދު ކޯޕްރަލް ޙުސައިން އާދަމް އެދުވަހު، ދައްކުވައިދިން އާދަޔާއި ޚިލާފު ހިތްވަރާއި ސާބިތުކަމަށް މުޅި ގައުމު ފަޚުރުވެރިވެއެވެ. އުމުރުން އެންމެ 20 އަހަރުގައި، އަމިއްލަ ފުރާނައިން ގައުމަށް ޓަކައި ވެވަޑައިގެންނެވި ޤުރުބާނީގެ ޒިކުރާ އަށް ނިމުމެއް ނެތެވެ. މި ހިތްވަރާއި، ބިރުކުޑަކަމާއި، ގައުމީ ލޯބި އޭނާ އަށް ދަސްކޮށްދިން މަދަރުސާއަކީ، މައިންބަފައިންގެ މަތިވެރި ތަރުބިއްޔަތެވެ. އަދި އަސްކަރީ ތަމްރީނުގައި ލައިދިން އަސްކަރީ އަޚްލާޤެވެ.
ތިނެއް ނޮވެންބަރުގެ އުދުވާނީ ހަމަލާގައި، ޝަހީދު ކޯޕްރަލް ޙުސައިން އާދަމް އެ ދައްކުވައިދިނީ، މި ލޮބުވެތި ވަޠަންގެ ދިފާއުގައި އަމިއްލަ ފުރާނަ ދޫކޮށްލަން ޖެހުނު ކަމުގައިވިޔަސް، އެއްވެސް ފަސްޖެހުމެއް ނެތް ކަމެކެވެ. އަދި އެ ހިތްވަރާއި މަތިވެރި ރޫޙެވެ. މިއީ ކޮންމެ ދިވެހި ދަރިއެއްގެ ހިތުގައި ވެސް، އަށަގަންނުވަންޖެހޭ ވަރަށް މުހިންމު ސިފައެކެވެ. ޝަހީދު ޙުސައިން އާދަމް، ޒުވާން އުމުރުގައި، ގައުމަށް ޓަކައި އެފަދަ ޤުރުބާނީއެއް ވެވަޑައިގަތީ ގައުމީ ލޯތްބާއި އަދި މި ފަސްގަނޑު ދިފާޢުކޮށް ރައްކާތެރިކުރުމުގެ މަތިވެރި ރޫޙު އޭނާގެ ހިތްޕުޅުގައި އަށަގެންފައި އޮތް މިންވަރުގެ ބޮޑުކަމުންނެވެ. އޭނާގެ ހިތްޕުޅުގައި އޮތީ ހަމައެކަނި ޤައުމެވެ. ގައުމީ ޚިދުމަތުގައި އަމިއްލަ ނަފުސަށްވުރެ އިސްކުރެއްވީ ގައުމީ ޚިދުމަތެވެ.
ޝަހީދު ކޯޕްރަލް ޙުސައިން އާދަމްގެ ފަރާތުން މިއަދުގެ ޖީލަށް ލިބޭ އެންމެ ބޮޑު ފިލާވަޅަކީ ގައުމީ ލޯބި ހިތުގައި އަށަގަންނުވައި، ގައުމަށް ޓަކައި ކޮންމެ ވަގުތެއްގައި ވެސް ޤުރުބާންވުމަށް ތައްޔާރަށް ތިބުމެވެ. އަދި ހަމައެހެންމެ، ގައުމުގެ މިނިވަންކަމާއި ސިޔާދަތާއި އިސްތިޤުލާލު ދެމެހެއްޓުމަށް ޓަކައި ކުރަންޖެހޭ ކޮންމެ ކަމެއް ކުރުމަށް އެއްވެސް މީހަކު ފަސްޖެހިގެން ނުވާނެ ކަމެވެ. ޝައްކެއްވެސް ނެތް ގޮތުގައި، ޝަހީދު ޙުސައިން އާދަމްގެ ޤުރުބާނީއަކީ ދިވެހި ކޮންމެ ރައްޔިތެއްގެ ހިތުގައި އަބަދުމެ ދިރިހުންނާނެ ހަނދާނެކެވެ.
ޝަހީދު ޙުސައިން އާދަމްގެ ޤުރުބާނީއަކީ، އެ ދުވަހަށްފަހު އަޅުގަނޑުމެންނާ ވަކިވެގެންދިޔަ ޤުރުބާނީއެއް ނޫނެވެ. އެއީ ދިވެހި ތާރީޚުގައި އަބަދަށް ދެމިގެންދާނެ ފަޚުރުވެރި ސަފުހާއެކެވެ. އަދި އަންނާން އޮތް ޖީލުތަކަށް ވެސް ދޫކުރެއްވި މަތިވެރި ނަމޫނާއެކެވެ. އަޅުގަނޑުމެން ކޮންމެ ދިވެއްސެއްގެ ވެސް ޢަޒުމަކަށް ނުވަތަ ރޫހަކަށް ވާންވާނީ، މިފަދަ ގައުމު ދެކެ ލޯބިވާ ދަރިއަކަށް ވުމުގެ މަތިވެރި ރޫހެވެ. އަމިއްލަ މަސްލަހަތަށްވުރެ، ގައުމީ މަސްލަހަތު އިސްކުރުމުގެ ރޫހެވެ. މިފަދަ ކޮންމެ ގައުމީ ބަޠަލެއްގެ ހިތްވަރާއި އަދި ގައުމަށް ޓަކައި ވެވަޑައިގެންނެވި ޤުރުބާނީން މިއަދު އަޅުގަނޑުމެން ފިލާވަޅުތަކެއް ލިބިގަންނަން ޖެހެއެވެ. ޝަހީދު ޙުސައިން އާދަމްގެ ޤުރުބާނީން އަޅުގަނޑުމެންނަށް ދަސްވާ އެންމެ މުހިންމު އެއް ފިލާވަޅަކީ ގައުމުގެ މިނިވަންކަމާއި، ސިޔާދަތާއި އަދި އިސްތިޤުލާލަށްވުރެ، އެހެން އެއްވެސް ކަމެއް އިސްނުވާނެ ކަމެވެ. ގައުމުގެ ސަލާމަތާއި ރައްކާތެރިކަމަށް ޓަކައި އަބަދުވެސް ވިސްނައި، ދުރާލާ ތައްޔާރުވެ ތިބުމުގެ މުހިންމު ކަމެވެ. އަދި ހަމައެހެންމެ، ގައުމަށް ކުރިމަތިވާ ކޮންމެ ގޮންޖެހުމެއްގައި ވެސް، ފިސާރި ކެރިގެން ކުރިމަތިލާން ކެރުމުގެ މަތިވެރި ސިފައާއި މަތިވެރި ރޫޙު މި ފަސްފަނޑަށް އުފަން ކޮންމެ ދިވެހި ދަރިއެއްގެ ކިބައިގައި ވެސް ހުރުން ލާޒިމް ކަމެވެ.
ޝަހީދު ކޯޕްރަލް ޙުސައިން އާދަމް، ގައުމީ ބަޠަލެއްގެ މަތިވެރި ދަރަޖަ ހޯއްދެވީ، އުދުވާނުގެ ވަގުތުގައި ދެއްކެވި ސާބިތުކަމާއި ހިތްވަރުންނެވެ. ހަނގުރާމައިގެ މައިދާނުގައި ސާބިތުކަން މަތީ ދެމިހުންނަވާ، ގައުމުގެ މިނިވަންކަމަށް ޓަކައި ކުރެއްވި މަތިވެރި ޖިހާދާއި އަދި ފުރާނައިން ވެވަޑައިގެންނެވި މަތިވެރި ޤުރުބާނީގެ ސަބަބުންނެވެ. ގައުމީ ޚިދުމަތަށް އެދިގޮވާލި ހިނދު، އައްޑަނައެއްގެ ގޮތުގައި ދިއްކުރެއްވީ މެއެވެ. ޝައްކެއްވެސް ނެތް ގޮތުގައި، މި މަތިވެރި ޤުރުބާނީ ތާއަބަދަށް ދެމި އޮންނާނެއެވެ. ދިވެހި ލޭ ހިނގާ ކޮންމެ ދަރިއެއްގެ ހިތުގައި އަބަދުމެ އަބަދަށް ދިރިހުންނާނެއެވެ. ޝަހީދު ކޯޕްރަލް ޙުސައިން އާދަމް ފަދައިން، ގައުމަށް ޓަކައި ޤުރުބާންވުމުގެ ރޫޙު އަޅުގަނޑުމެންގެ ހިތްތަކުގައި އަށަގަންނަވަމާ ހިންގަވާށެވެ.
