ޢަބްދުﷲ ސަޢީދު
ޝަހީދު އިސްމާޢީލް ޙަލީމް / މ.ރޯޒްބުސް، މާލެ
ޝަހީދު އިސްމާޢީލް ޙަލީމަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ދިވެހިރާއްޖޭގެ އަޑުގެ އޮޕަރޭޓަރެއްގެ މަޤާމުގައި ހުންނެވި ބޭކަލެކެވެ. ޝަހީދު އިސްމާޢީލް ޙަލީމް ޝަހީދުވީ 1988 ނޮވެންބަރު 3 ވަނަ ދުވަހުގެ ފަތިހު ދިވެހިރާއްޖޭގެ އަޑު ހުޅުވުމަށް ޓަކައި ބަނޑޭރިގޭގައި (ސިފައިންގެ މައިމަރުކަޒުގައި) އޮތް ދިވެހިރާއްޖޭގެ އަޑުގެ ތަޅުގަނޑި ނެންގެވުމަށް ބަނޑޭރިގެއަށް ދުރުވަނިކޮށް ދުޝްމަނުން ބަޑިން ދިން ހަމަލާތަކުގައި ވަޒަން އަރައިގެންނެވެ.
ޝަހީދު އިސްމާޢީލް ޙަލީމަށް ދުޝްމަނުން ހަމަލާދިނީ ބައިސްކަލުގައި އަމީރުއަޙްމަދުމަގުން ހުޅަނގުން އިރަށް ދުރުވަނިކޮށް ސިފައިންގެ މައިގޭޓުގެ ހުޅަނގުން ގާތްގަނޑަކަށް ފަންސާހަކަށް ފޫޓު ދުރުންނެވެ. ދުޝްމަނުން ދިން ހަމަލާތަކުގައި ބައިސްކަލާއެކު ސިފައިންގެ ކުރިމައްޗަށް އަމީރު އަޙްމަދުމަގަށް ވެއްޓުނެވެ. ވަޒަން އެރި ތަންތަނުން ލޭތައް ފައިބަމުން ދަނިކޮށް ބައިސްކަލު ދޫކޮށްލައްވައި ތެދުވެ އަމީރުއަޙްމަދުމަގުން އިރަށް ހިންގަވާފައި ދުރުވިއެވެ. ޑިފެންސް މަގުމަތީ ގޭޓުގެ އެތެރެއަށް ވަންނަވާފައި އެ ތަނުގައި މަޑުނުކުރައްވައި އަމީރުއަޙްމަދުމަގަށް ނުކުންނަވައި ސިފައިންގެ އިރުމަތިން އޮންނަ ބަނޑޭރިގޭހިނގުމުން ދެކުނަށް ދުރުވެ މެދުޒިޔާރަތްމަގު ހުރަސްކުރެއްވިއެވެ. މުލީއާގޭ ހުޅަނގުން އޮންނަ އަލިމަސްގޯޅިން ދެކުނަށް ދުރުވެވުނުތަނާ މަލިންގެ ކަންމައްޗަށް ވެއްޓުނީއެވެ.
އޭރު އިސްމާޢީލް ޙަލީމު އެދިލައްވަމުން ގެންދެވީ ބޯފެންފޮދަކަށެވެ. އެ މަންޒަރު އެ ވަގުތު ސިފައިންގެއަށް ވަންނަން ދިޔަ ޕްރައިވެޓް މުޙުތާރު މޫސާއަށާއި މަލިންގޭ އަލްފާޟިލް އާދަމް ޝަރީފަށް ފެނިލެއްވިއެވެ. އެ ދެ ބޭކަލުން އިސްމާޢީލް ޙަލީމަށް ފެންދެއްވުމަށްފަހު މަލިންގެއަށް ވައްދަން މަސައްކަތް ކުރެއްވި ވަގުތު ޕޯސްޓަލް ބިލްޑިންގ ކައިރީގައި ހަރަކާތްތެރިވި ދުޝްމަނުން ބަޑިތަޅައިގަތެވެ. ދުޝްމަނުން ބަޑިޖަހާތީ އިސްމާޢީލް ޙަލީމް މަލިންގެއަށް ވެއްދޭގޮތެއް ނުވިއެވެ.
އިސްމާޢީލް ޙަލީމް ޝަހީދުވެފައިއޮތީ ގ. މަލިންގެ ކަންމަތީގައެވެ. ޝަހީދު އިސްމާޢީލް ޙަލީމް ޝަހީދުވީ އިރު ޢުމުރަކީ 33 އަހަރެވެ. ޝަހީދުވި އިރު 3 ދަރީންނާއި އަނތްބަކު ދުނިޔޭގައި އިންނެވިއެވެ.
ޝަހީދު އިބްރާހީމް ހަމީޒު / މ. ބީޗްސައިޑް، މާލެ
ޝަހީދު އިބްރާހީމް ޙަމީޒަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ޓެލެކޮމިއުނިކޭޝަން ޑިޕާރޓްމަންޓް (ޓީސީޑީ)ގެ ޓްރޭނީ ގްރޭޑް 2 ގެ މަޤާމުގައި ހުންނެވި ބޭކަލެކެވެ. ކުޅިވަރުގެ ދަނޑުގައި ނަން މަޝްހޫރު ފުޓްބޯޅަ ކުޅުންތެރިއެކެވެ. ޔަންގް ސްޓާރ ކްލަބަށް ކުޅެމުންދިޔަ ހުނަވެރި ގޯލްކީޕަރެކެވެ. ޝަހީދު އިބްރާހީމް ޙަމީޒަށް ދުޝްމަނުން ބަޑިން ހަމަލާދިނީ 1988 ނޮވެންބަރު ތިންވަނަ ދުވަހުގެ ފަތިހު ފުޓްބޯޅަ ޕްރެކްޓިސްއަށް ހެންވޭރު ދަނޑަށް ދުރުވި މަގުމަތީގައެވެ.
ޝަހީދު އިބްރާހީމް ޙަމީޒަށް ހަމަލާ ދިނީ އިސްލާމީ މަރުކަޒުގެ ދެކުނު ފަރާތުގައި ސިފައިންގެއަށް ހަމަލާދިނުމަށް ހަރަކާތްތެރިވި ދުޝްމަނުންނެވެ. ޝަހީދު އިބްރާހީމް ޙަމީޒު ސައިކަލުގައި ދުރުވީ ފަރީދީމަގުން ހުޅަނގުން އިރަށެވެ. ބަގީޗާގޭ އިރުއުތުރު ކަންމައްޗާ އަރާހަމަވިތަނާ ދުޝްމަނުން ދިން ބަޑީގެ ހަމަލާތަކުގައި ވަޒަން އަރައިގެން ޝަހީދު އިބްރާހީމް ޙަމީޒު ސައިކަލާއެކު ވެއްޓުނީ ބަގީޗާގޭ އިރުއުތުރު ކަންމައްޗަށް ޗާންދަނީމަގަށެވެ. އެ ވަގުތު އެ ސަރަޙައްދަށް އަންނަން މަސައްކަތްކުރި އާންމު ރައްޔިތުންނަށް އެ ސަރަޙައްދަށް ނައުމަށް އަތުން އިޝާރާތްކޮށް އެ ސަރަޙައްދުގައި ދުޝްމަނުން އުޅޭ ވާހަކަ ގޮވައިހަދަމުން ގެންދިޔަ އެވެ. ވަޒަން އެރުމުގެ ސަބަބުން ބޮޑެތި ޒަޚަމުތަކަކާއެކު ވެއްޓިފައި އޮވެގެން މަސައްކަތް ކުރެއްވީ ދުޝްމަނުންގެ ހަމަލާތަކުން އެހެން މީހުން ސަލާމަތްކުރެއްވުމަށެވެ.
ޝަހީދު އިބްރާހީމް ޙަމީޒު ޝަހީދުވެފައި އޮތީ ބަގީޗާގޭ އިރު އުތުރު ކަންމަތީގައި ޗާންދަނީމަގުގަ އެވެ. ޝަހީދު އިބްރާހީމް ޙަމީޒު ޝަހީދުވީއިރު އުމުރަކީ 22 އަހަރެވެ.
ޝަހީދު އަލްމަރުޙޫމް އަޙްމަދު ލަބީބު / އޯކިޑުމާގެ، ސ.ހިތަދޫ
ޝަހީދު އަޙްމަދު ލަބީބަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ޗާންދަނީމަގު 18 ނަންބަރު ފިހާރައިގައި ސޭޓެއްގެ ގޮތުގައި މަސައްކަތް ކުރައްވަމުން ގެންދެވި ބޭކަލެކެވެ. ޝަހީދު އަޙްމަދު ލަބީބު ޝަހީދުކޮށްލީ ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓަށް މާލެއިން ރަހީނުކޮށްގެން ގެންދިޔަ ދިވެހީންގެ ތެރޭގައި ގެންގޮސް، ދުޝްމަނުން ފިލައިގެންދާން ކުރި މަސައްކަތުގެ ތެރޭގައި އެ ބޯޓުގައެވެ.
ޝަހީދު އަޙްމަދު ލަބީބު އާދައިގެ މަތިން 1988 ނޮވެންބަރު ތިންވަނަ ދުވަހު ހެނދުނު ފިހާރަ ހުޅުވި އިރު ވެސް ބަޑީގެ އަޑު އިވެމުން ދިޔައެވެ. އެ ދުވަހު އެހެން ގިނަ މީހުންނެކޭ އެއްގޮތަށް ޝަހީދު އަޙްމަދު ލަބީބު ވެސް ހީކުރެއްވީ ސިފައިން ފަރިތަކުރުންތަކެއް ކުރިއަށް ގެންދަނީ ކަމަށެވެ. އެހެން ނަމަވެސް ނުރައްކާތެރި ކަންތައްތަކެއް ހިނގަމުންދާކަން ފަހުން ގަބޫލުކުރެއްވިގެން ފިހާރައިން ނުނިކުންނަވައި ފިހާރައިގައި މަޑުކުރެއްވީއެވެ. އެހެން އިންނަވަނިކޮށް މެންދުރުފަހު ދުޝްމަނުންގެ ބަޔަކު ހަތިޔާރާއެކު ފިހާރައަށް ވަދެ ބަޑިން ބިރުދައްކައި އެ ފިހާރައިގައި ހުރި ކޮމިއުނިކޭޝަން ސެޓެއް ދިނުމަށް އެދުނެވެ. އެކަމަށް ޝަހީދު އަޙްމަދު ލަބީބު އިންކާރުކުރެއްވުމުން ދުޝްމަނުން ބަޑިޖައްސައިގެން ރަހީނުކޮށްގެން ފިހާރައިން ނެރުނެވެ. އެއަށްފަހު ދުޝްމަނުން ބަލިވެގެން ފިލައިގެންދާން މަސައްކަތްކުރި އެމްވީ ޕްރޮގްރެސްލައިޓަށް މާލެއިން ގެންދިޔަ ރަހީނުންގެ ތެރޭގައި ޝަހީދު އަޙްމަދު ލަބީބު އެ ބޯޓަށް ގެންދިޔައެވެ.
ޝަހީދު އަޙްމަދު ލަބީބު ޝަހީދުކޮށްލީ ދުޝްމަނުން ފިލައިގެންދާން މަސައްކަތްކުރި އެމްވީ ޕްރޮގްރެސްލައިޓާ އިންޑިއާ ސިފައިންގެ މަނަވަރު އައިއެންއެސް ގޯދާވަރީ، 1988 ނޮވެންބަރު 5 ވަނަ ދުވަހު ކައިރިކުރަން ފެށުމުންނެވެ. ޝަހީދު އަޙްމަދު ލަބީބަށް ވަޅިން ހަމަލާދީ ޝަހީދުކޮށް ކަނޑަށް އެއްލާލުމަށްފަހު އިންޑިއާގެ މަނަވަރު ކައިރިކުރާނަމަ ފަހަރަކު ރަހީނަކު މަރާލުމަށްފަހު ކަނޑަށް އެއްލާލާނެކަމަށް ދުޝްމަނުން އިންޑިއާގެ މަނަވަރަށް އެންގިއެވެ.
ޝަހީދު އަޙްމަދު ލަބީބު ޝަހީދުވީ އިރު އުމުރަކީ 52 އަހަރެވެ. ޝަހީދުވީ އިރު 5 ދަރީންނާއި އަނތްބަކު ދުނިޔޭގައި އިންނެވިއެވެ.
ޝަހީދު ޢަލްމަރުޙޫމް ޢުމަރު އަޙްމަދު / ޗާންދަނީއާގެ، ހއ. ދިއްދޫ
ޝަހީދު ޢުމަރު އަޙްމަދަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު މަސްޖިދުލްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) ގައި ޑިއުޓީގައި ހުންނެވި ގާޑެކެވެ. ޝަހީދު ޢުމަރު އަޙްމަދު ޝަހީދުވީ ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓަށް މާލެއިން ރަހީނުކޮށްގެން ގެންދިޔަ ދިވެހީންގެ ތެރޭގައި ގެންގޮސް، އިންސާނީ އައްޑަނައެއްގެ ގޮތުގައި ބޭނުންކުރުމުގެ ތެރޭގައެވެ.
ނޮވެންބަރު ތިންވަނަ ދުވަހު ޝަހީދު ޢުމަރު އަޙްމަދު އިންނެވީ ފަތިސް ނަމާދުކުރައްވައިގެން، އިސްލާމީ މަރުކަޒު ހިމެނޭ ސަރަޙައްދުގައި ދުޝްމަނުން ހަރަކާތްތެރިވާތީ މިސްކިތުން ނުފޭބިފައި އިސްލާމީ މަރުކަޒުގެ އެތެރޭގައި ތިއްބެވި ބޭކަލުންނާ އެކުގައެވެ. އެގޮތުގައި ގިނައިރުތަކެއް ވަންދެން އިންނެވުމަށްފަހު އެ ދުވަހުގެ ހަވީރު އިސްލާމީ މަރުކަޒުން ނުކުންނެވި ތަނުން ދުޝްމަނުން ބަޑިން ބިރުދައްކައިގެން ރަހީނުކުރިއެވެ. އަދި އެއަށްފަހު ދުޝްމަނުން ބަލިވެގެން ފިލައިގެން ދިއުމަށް ޓަކައި ހައިޖެކްކުރި އެމްވީ ޕްރޮގްރެސްލައިޓަށް ގަދަކަމުން ގެންދިޔައެވެ.
ޝަހީދު ޢުމަރު އަޙްމަދު ޝަހީދުވީ ދުޝްމަނުން ރަހީނުން ގޮވައިގެން ފިލައިގެން ދިއުމަށް މަސައްކަތްކުރި އެމްވީ ޕްރޮގްރެސްލައިޓް މަޑުކުރުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ފިލައިގެން ދިއުމަށް މަސައްކަތްކުރުމުން އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސްލައިޓަށް ދިން ހަމަލާތަކުގެ ތެރޭގައި 1988 ނޮވެންބަރު 6 ވަނަ ދުވަހުއެވެ. ޝަހީދު ޢުމަރު އަޙްމަދު ޝަހީދުވީ ޕްރޮގްރެސްލައިޓުގެ ވީލްހައުސް މައްޗަށް ނަގައި ދުޝްމަނުންގެ ކުރިމަތީގައި އިންސާނީ އައްޑަނައެއްގެ ގޮތުގައި ބައިތިއްބާފައި ތިއްބައެވެ.
ޝަހީދު ޢުމަރު އަޙްމަދު ޝަހީދުވީ އިރު ޢުމުރަކީ 45 އަހަރެވެ. ޝަހީދުވީ އިރު 7 ދަރީންނާއި އަނތްބަކު ދުނިޔޭގައި އިންނެވިއެވެ.
ޝަހީދު އަލްމްރުޙޫމް އިބްރާހީމް ޙުސައިން / ސޯސަން، ހއ.ބާރަށް (މއ.އަންނާރުމާގެ)
ޝަހީދު އިބްރާހީމް ޙުސައިންއަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ދިވެހި ސިފައިންގެ ހެޑްކުއޯރޓަރުގައި އާންމު މުވައްޒަފެއްގެ ގޮތުގައި އެއްނަންބަރު ކައްކާގެ މަޤާމުގައި ވަޒީފާ އަދާކުރައްވަމުން ގެންދެވި ބޭކަލެކެވެ. ޝަހީދު އިބްރާހީމް ޙުސައިން ޝަހީދުވީ ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓަށް މާލެއިން ރަހީނުކޮށްގެން ގެންދިޔަ ދިވެހީންގެ ތެރޭގައި ގެންގޮސް، އިންސާނީ އައްޑަނައެއްގެ ގޮތުގައި ބޭނުންކުރުމުގެ ތެރޭގައެވެ.
ޝަހީދު އިބްރާހީމް ޙުސައިންއަކީ 1988 ނޮވެންބަރު ތިންވަނަ ދުވަހު ފަތިސް ނަމާދަށް މަސްޖިދުލްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) އަށް ދުރުވެ ފަތިސް ނަމާދުކުރައްވައިގެން، އިސްލާމީ މަރުކަޒު ހިމެނޭ ސަރަޙައްދުގައި ދުޝްމަނުން ހަރަކާތްތެރިވާތީ މިސްކިތުން ނުފޭބިފައި އިސްލާމީ މަރުކަޒުގެ އެތެރޭގައި ތިއްބެވި ބޭކަލުންގެ ތެރެއިން ބޭކަލެކެވެ. އެގޮތުގައި ގިނައިރުތަކެއް ވަންދެން އިންނެވުމަށްފަހު އެ ދުވަހުގެ ހަވީރު އިސްލާމީ މަރުކަޒުން ނުކުންނެވި ތަނުން ދުޝްމަނުން ބަޑިން ބިރުދައްކައިގެން ރަހީނުކުރިއެވެ. އަދި އެއަށްފަހު ދުޝްމަނުން ފިލައިގެން ދިއުމަށް ޓަކައި ހައިޖެކްކުރި އެމްވީ ޕްރޮގްރެސްލައިޓަށް ގަދަކަމުން ގެންދިޔައެވެ.
ޝަހީދު އިބްރާހީމް ޙުސައިން ޝަހީދުވީ ދުޝްމަނުން ރަހީނުން ގޮވައިގެން ފިލައިގެން ދިއުމަށް މަސައްކަތްކުރި އެމްވީ ޕްރޮގްރެސްލައިޓް މަޑުކުރުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ފިލައިގެން ދިއުމަށް މަސައްކަތްކުރުމުން އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސްލައިޓަށް ދިން ހަމަލާގެ ތެރޭގައި 1988 ނޮވެންބަރު 6 ވަނަ ދުވަހުއެވެ. ޝަހީދު އިބްރާހީމް ޙުސައިން ޝަހީދުވީ ޕްރޮގްރެސްލައިޓުގެ ވީލްހައުސް މައްޗަށް ނަގައި ދުޝްމަނުންގެ ކުރިމަތީގައި އިންސާނީ އައްޑަނައެއްގެ ގޮތުގައި ބައިތިއްބާފައި ތިއްބައެވެ.
ޝަހީދު އިބްރާހިމް ޙުސައިން ޝަހީދުވި އިރު އުމުރަކީ 52 އަހަރެވެ. ޝަހީދުވި އިރު 5 ދަރީންނާއި އަނތްބަކު ދުނިޔޭގައި އިންނެވިއެވެ.
ޝަހީދު އަލްމަރުޙޫމް ޢަބްދުއްސައްތާރު އާދަމް / ހ.މެރިހާނާ، މާލެ
ޝަހީދު ޢަބްދުއްސައްތާރު އާދަމަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު މަސްޖިދުލްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) ގައި ޑިއުޓީގައި ހުންނެވި ވޮޗަރެކެވެ. ޝަހީދު ޢަބްދުއްސައްތާރު އާދަމް ޝަހީދުކޮށްލީ ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓަށް މާލެއިން ރަހީނުކޮށްގެން ގެންދިޔަ ދިވެހީންގެ ތެރޭގައި ގެންގޮސް، ދުޝްމަނުން ފިލައިގެންދާން ކުރި މަސައްކަތުގެ ތެރޭގައި އެ ބޯޓުގައެވެ.
ޝަހީދު ޢަބްދުއްސައްތާރު އާދަމް ނޮވެންބަރު ތިންވަނަ ދުވަހު ފަތިސް ނަމާދުކުރައްވައިގެން އިންނެވީ އިސްލާމީ މަރުކަޒު ހިމެނޭ ސަރަޙައްދުގައި ދުޝްމަނުން ހަރަކާތްތެރިވާތީ މިސްކިތުން ނުފޭބިފައި އިސްލާމީ މަރުކަޒުގެ އެތެރޭގައި ތިއްބެވި ބޭކަލުންނާ އެކުގައެވެ. އެގޮތުގައި ގިނައިރުތަކެއް ވަންދެން އިންނެވުމަށްފަހު އެ ދުވަހުގެ ހަވީރު އިސްލާމީ މަރުކަޒުން ނުކުންނެވި ތަނުން ދުޝްމަނުން ބަޑިން ބިރުދައްކައިގެން ރަހީނުކުރިއެވެ. އަދި އެއަށްފަހު ދުޝްމަނުން ފިލައިގެން ދިއުމަށް ޓަކައި ހައިޖެކްކުރި އެމްވީ ޕްރޮގްރެސްލައިޓަށް ގަދަކަމުން ގެންދިޔައެވެ.
ޝަހީދު ޢަބްދުއްސައްތާރު އާދަމް ޝަހީދުކޮށްލީ ދުޝްމަނުން ފިލައިގެންދާން މަސައްކަތްކުރި އެމްވީ ޕްރޮގްރެސްލައިޓާ އިންޑިއާ ސިފައިންގެ މަނަވަރު އައިއެންއެސް ގޯދާވަރީ ނޮވެންބަރު 5 ވަނަ ދުވަހު ކައިރިކުރަން ފެށުމުންނެވެ. ޝަހީދު ޢަބްދުއްސައްޔާރު އާދަމް ބަހައްޓާފައި ހުރީ އެމްވީ ޕްރޮގްރެސްލައިޓުގެ ވީލްހައުސް މަތީގައި ދުޝްމަނުންގެ ނިވައިފަތްގަނޑެއްގެ ގޮތުގައި، އިންސާނީ އައްޑަނައެއްގެ ގޮތުގައި ތިބި ރަހީނުންގެ ތެރޭގައެވެ. އެތަނުން ގެންގޮސް ލައިފްޖެކެޓް އަޅުވައި ކަނުބަނުމަށްފަހު ޝަހީދުކޮށްލީ ބޮލަށް ބަޑިޖަހައިގެންނެވެ. ނިރުބަވެރިންގެ ތެރެއިން ބާބޫގެ އޯޑަރަށް ޝަހީދު ޢަބްދުއްސައްތާރު އާދަމުގެ ބޮލުގެ ފުއްކިބައަށް ބަޑިޖަހައި ޝަހީދުކޮށްލީ ސިވަމްއެވެ. ބަޑިޖެހުމާއެކު ޝަހީދު ޢަބްދުއްސަތާރު އާދަމް ޑެކްމައްޗަށް ވެއްޓުނެވެ. އެވަގުތު ލޭތައް ފައިބަމުންދަނިކޮށް ކަނޑަށް އެއްލާލީ ޕާޕާގެ އޯޑަރަށް ސިވަމްއާއި ޗިންނަޝަންކަރެވެ. އެ ހިތްދަތި ބިރުވެރި މަންޒަރު ރަހީނުންގެ ތެރެއިން ގިނަ ބަޔަކަށް ފެނުނެވެ.
ޝަހީދު ޢަބްދުއްސައްތާރު އާދަމް ޝަހީދުވީ އިރު އުމުރަކީ 49 އަހަރެވެ. ޝަހީދުވީ އިރު 5 ދަރީންނާއި އަނތްބަކު ދުނިޔޭގައި އިންނެވިއެވެ. ޝަހީދު ޢަބްދުއްސައްތާރު އާދަމަކީ އޭނާގެ ޒުވާން ދުވަސްވަރު ދިވެހި އަސްކަރިއްޔާގައި ޚިދުމަތްކުރެއްވި ސިފައިންގެ ބޭކަލެކެވެ.
ޝަހީދު އަލްމަރުޙޫމް ޢަބްދުއްރަޙްމާން އާދަމް / މ. ޑްރީމީލައިޓް، މާލެ
ޝަހީދު ޢަބްދުއްރަޙުމާން އާދަމަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު މަސްޖިދުލްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) ގެ އިމާމުކަމުގެ މަޤާމުގައި ހުންނެވި ބޭކަލެކެވެ. ޝަހީދު ޢަބްދުއްރަޙުމާން އާދަމް ޝަހީދުވީ ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓަށް މާލެއިން ރަހީނުކޮށްގެން ގެންދިޔަ ދިވެހީންގެ ތެރޭގައި ގެންގޮސް، އިންސާނީ އައްޑަނައެއްގެ ގޮތުގައި ބޭނުންކުރުމުގެ ތެރޭގައެވެ.
އާދައިގެ މަތީން 1988 ނޮވެންބަރު ތިންވަނަ ދުވަހުގެ ފަތިހު ވެސް ޝަހީދު ޢަބްދުއްރަޙުމާން އާދަމް ގެއިން ތައްޔާރުވެލައްވައިގެން ފަތިސްވުމުގެ ތަންކޮޅެއް ކުރިން މިސްކިތަށް ދުރުވިއެވެ. ދުޝްމަނުން ސިފައިންގެ މައިމަރުކަޒަށް ހަމަލާދޭން ފެށީ ޝަހީދު ޢަބްދުއްރަޙުމާން އާދަމް މިސްކިތުގައި އިންނަވަނިކޮށެވެ. ދުޝްމަނުން ހަމަލާދޭން ފެށުމާއެކު ސިފައިން ވެސް ރައްދުގައި ހަމަލާދޭން ފެށިއެވެ. ދެ ފަރާތުން ބަދަލުކުރަމުންދާ ބަޑީގެ ހަމަލާތަކާއި ސިފައިންގެ ތެރެއިން އިވެމުންދާ އަޑުތަކާއި ސިފައިންގެ ސައިރަންގެ އަޑާއެކު ހިނގަމުން މިދަނީ އާދައިގެ ކަމެއް ނޫންކަން ޝަހީދު ޢަބްދުއްރަޙުމާން އާދަމަށް ޤަބޫލުކުރެއްވުނެވެ. އެހެން ނަމަވެސް ފަތިސް ވަގުތު ވަނުމާއެކު އިސްލާމީ މަރުކަޒުގެ މައިކު ޖައްސައި ބަންގި ގޮވަން ފެށްޓެވިއެވެ. އެ ބިރުވެރި ވަގުތުގައި ވެސް ވަޒީފާގެ ޒިންމާ އަދާކުރެއްވުމުގައި ސާބިތުކަން ދެއްކެވިއެވެ. ފަތިސްނަމާދު ކުރައްވައިގެން ޝަހީދު ޢަބްދުއްރަޙުމާން އާދަމް އިންނެވީ އިސްލާމީ މަރުކަޒު ހިމެނޭ ސަރަޙައްދުގައި ދުޝްމަނުން ހަރަކާތްތެރިވާތީ މިސްކިތުން ނުފޭބިފައި އިސްލާމީ މަރުކަޒުގެ އެތެރޭގައި ތިއްބެވި ބޭކަލުންނާއެކުގައެވެ. އެގޮތުގައި ގިނައިރުތަކެއް ވަންދެން އިންނެވުމަށްފަހު އެ ދުވަހުގެ ހަވީރު އިސްލާމީ މަރުކަޒުން ނުކުންނެވި ތަނުން ދުޝްމަނުން ބަޑިން ބިރުދައްކައިގެން ރަހީނުކުރިއެވެ. އަދި އެއަށްފަހު ދުޝްމަނުން ފިލައިގެން ދިއުމަށް ޓަކައި ހައިޖެކްކުރި އެމްވީ ޕްރޮގްރެސްލައިޓަށް ގަދަކަމުން ގެންދިޔައެވެ.
ޝަހީދު ޢަބްދުއްރަޙުމާން އާދަމް ޝަހީދުވީ ދުޝްމަނުން ރަހީނުން ގޮވައިގެން ފިލައިގެން ދިއުމަށް މަސައްކަތްކުރި ޕްރޮގްރެސްލައިޓް މަޑުކުރުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ފިލައިގެން ދިއުމަށް މަސައްކަތްކުރުމުން އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސްލައިޓަށް ދިން ހަމަލާގެ ތެރޭގައި 1988 ނޮވެންބަރު 6 ވަނަ ދުވަހުއެވެ. ޝަހީދު ޢަބްދުއްރަޙުމާން އާދަމް ޝަހީދުވީ ޕްރޮގްރެސްލައިޓުގެ ވީލްހައުސް މައްޗަށް ނަގައި ދުޝްމަނުންގެ ކުރިމަތީގައި އިންސާނީ އައްޑަނައެއްގެ ގޮތުގައި ބައިތިއްބާފައި ތިއްބައެވެ.
ޝަހީދު ޢަބްދުއްރަޙުމާން އާދަމް ޝަހީދުވިއިރު އުމުރަކީ 53 އަހަރެވެ. ޝަހީދުވި އިރު 12 ދަރީންނާއި އަނތްބަކު ދުނިޔޭގައި އިންނެވިއެވެ.
ޝަހީދު އަލްމަރުޙޫމް އަޙްމަދު ރަޝީދު / ހ.ވެލްގްރޯ، މާލެ
ޝަހީދު އަޙްމަދު ރަޝީދަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ޓެކްސީ ޑްރައިވަރެއްގެ ގޮތުގައި މަސައްކަތްކުރަމުން ގެންދެވި ބޭކަލެކެވެ. ޝަހީދު އަޙްމަދު ރަޝީދު ޝަހީދުކޮށްލީ ދުޝްމަނުން މާލެއަށް އަރައި ބަޑިޖަހަން ފެށުމުން ވެގެން އުޅޭގޮތެއް ބެއްލެވުމަށް ރަޙުމަތްތެރިއަކާއެކު މޮޓޯ ސައިކަލެއްގައި މެރިން ޑްރައިވުން ދުއްވާފައި ދަނިކޮށް ދުޝްމަނުން ބަޑިން ދިން ހަމަލާތަކެއްގައި ވަޒަން އަރައިގެންނެވެ.
ޝަހީދު އަޙްމަދު ރަޝީދާއި ހ. ރުމޭނިޔާ އަޙްމަދު ސަލީމާ ދެ ބޭކަލުން 1988 ނޮވެންބަރު 3 ވަނަ ދުވަހު ފަތިހު 4:30 ހާއިރު މެރިން ޑްރައިވުން އިރުން ހުޅަނގަށް މޮޓޯ ސައިކަލެއްގައި ދުރުވި އިރު ސައިކަލް ދުއްވަން އިންނެވީ އަޙްމަދު ސަލީމެވެ. ޝަހީދު އަޙްމަދު ރަޝީދު އިންނެވީ ސައިކަލުގެ ފަހަތުގައެވެ. ސައިކަލް ގޮސް ފާށަނާ ބިލްޑިންގގެ މެދަކާ ހަމައަށް ދިޔަތަނާ ކަނީރުހިނގުމުން ދުޝްމަނުން ބަޑިތަޅައިގަތް އަޑުއިވުނެވެ. އަދި ސިފައިންގެ ކުރިމަތިން އޮންނަ ކާރނޭޝަންހިނގުމުގެ އުތުރުކޮޅުގައި ވެސް ދުޝްމަނުން ޙަރަކާތްތެރިވާތަން ފެނުނެވެ. އެވަގުތު ޝަހީދު އަޙްމަދު ރަޝީދު “ތިޔަކޮޅަށް ދިޔުން ރަނގަޅެއް ނޫނޭ” ބުނުއްވުމުން އަޙްމަދު ސަލީމް ސައިކަލް އަނބުރާލައި އައިކޮޅަށް ވަރަށް ބާރަށް ދުއްވާލިއެވެ. އެވަގުތު ކާނޭޝަންހިނގުމުގައި ތިބި ދުޝްމަނުން މެރިން ޑްރައިވަށް ނިކުމެ ސައިކަލާ ދިމާލަށް ބަޑިޖަހަން ފެށިއެވެ. ދުޝްމަނުން ޖެހި ވަޒަންތަކުން ސައިކަލުގެ ފަހަތުގައި އިންނެވި ޝަހީދު އަޙްމަދު ރަޝީދުގެ ގަޔަށް ވަޒަންއަރައި ސައިކަލުން އޭނާ ވެއްޓުނެވެ. އަދި އޭގެފަހުން އަޙްމަދު ސަލީމުގެ ވާތުފަޔަށް ވެސް ވަޒަން އެރިއެވެ. އޭނާ ސައިކަލާއެކު ވެއްޓުނީ މެރިންޑްރައިވްގައި ހުންނަ ބީޗްކެފޭ ކުރިމައްޗަށެވެ.
ޝަހީދު އަޙްމަދު ރަޝީދު ޝަހީދުވެގެން ވެއްޓިފައި އޮތީ ފާށަނާބިލްޑިންގ ކުރިމައްޗަށް މެރިންޑްރައިވްއަށެވެ. ޝަހީދު އަޙްމަދު ރަޝީދު ޝަހީދުވީ އިރު އުމުރަކީ 24 އަހަރެވެ. ޝަހީދުވީ އިރު 3 މަހުގެ ތުއްތު ދަރިއަކާއި އަނތްބަކު ދުނިޔޭގައި އިންނެވިއެވެ.
ޝަހީދު އަލްމަރުޙޫމް ޙަސަން ޒަރީރު / އަލިމަސްގެ، ގއ.ވިލިނގިލި
ޝަހީދު ޙަސަން ޒަރީރަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން ދުޝްމަނުން ބަލިވެގެން ރާއްޖެ ދޫކޮށް ފިލައިގެން ދިއުމަށް ހައިޖެކްކުރި މާލޭ ބަނދަރުގައި އޮތް ދިވެހިރާއްޖޭގެ އާގުބޯޓެއްކަމުގައިވާ އެމްވީ ޕްރޮގްރެސްލައިޓްގައި ސީމަނެއްގެ ގޮތުގައި މަސައްކަތްކުރަމުން އައި ބޭކަލެކެވެ. ޝަހީދު ޙަސަން ޒަރީރު ޝަހީދުވީ ދުޝްމަނުން ފިލައިގެންދާން ކުރި މަސައްކަތުގެ ތެރޭގައި އެ ބޯޓުގައެވެ.
އެމްވީ ޕްރޮގްރެސްލައިޓުގައި މަސައްކަތްކުރާ ފަޅުވެރިންގެ ތެރެއިން ނޮވެންބަރު ތިންވަނަ ދުވަހު ޝަހީދު ޙަސަން ޒަރީރު ތައްޔާރުވަމުން ދިޔައީ ޑިއުޓީ ނިންމުމަށްފަހު މާލެއަށް ފޭބުމަށެވެ. ދުޝްމަނުން އެމްވީ ޕްރޮގްރެސްލައިޓަށް އެ ދުވަހު މެންދުރު އަރައި، ބޯޓުގެ ކެޕްޓަނަށާއި ފަޅުވެރިންނަށް ބަޑިން ބިރުދައްކައިގެން އެ ބޯޓު ހައިޖެކްކުރިއިރު ޝަހީދު ޙަސަން ޒަރީރު ހުންނެވީ ބޯޓުގައެވެ. ބަޑިން ބިރުދައްކައިގެން ދުޝްމަނުން ބޭނުންވާ ގޮތަށް ބޯޓުތެރޭގައި ކަންތައްތައް ކުރުވައި، ބޯޓުން އެއްވެސް މީހަކު ފޭބިއަނުދީ ދުޝްމަނުން ހިފެހެއްޓިއެވެ. ދުޝްމަނުން އެމްވީ ޕްރޮގްރެސްލައިޓް ހައިޖެކްކޮށް ބޯޓުގައި ތިބި އެންމެން ރަހީނުކުރުމުން ޝަހީދު ޙަސަން ޒަރީރު ވެސް ރަހީނެއްގެ ގޮތުގައި ބޯޓުގައި ހުންނަން މަޖުބޫރުވީއެވެ.
ޝަހީދު ޙަސަން ޒަރީރު ޝަހީދުވީ ދުޝްމަނުން ރަހީނުން ގޮވައިގެން ފިލައިގެން ދިއުމަށް މަސައްކަތްކުރި ޕްރޮގްރެސްލައިޓް މަޑުކުރުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ފިލައިގެން ދިއުމަށް މަސައްކަތްކުރުމުން އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސްލައިޓަށް ދިން ހަމަލާގެ ތެރޭގައި 1988 ނޮވެންބަރު 6 ވަނަ ދުވަހުއެވެ. ޝަހީދު ޙަސަން ޒަރީރު ޝަހީދުވެގެން ވެއްޓިފައި އޮތީ އެމްވީ ޕްރޮގްރެސްލައިޓްގެ ޑެކްމަތީގައެވެ. ޝަހީދު ޙަސަން ޒަރީރު ޝަހީދުވީ އިރު އުމުރަކީ 20 އަހަރެވެ.
ޝަހީދު އަލްމަރުޙޫމް ޖަވާދު ޢުމަރު / ކާމިނީގެ، ތ. ދިޔަމިގިލި
ޝަހީދު ޖަވާދު ޢުމަރަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ހުޅުލެއާއި މާލެއާ ދެމެދުގައި ދުއްވާ “ފްރޮޑް” ދޯނީގެ ފަޅުވެރިއެއްގެ ގޮތުގައި މަސައްކަތްކުރައްވަމުން ގެންދެވި ޒުވާނެކެވެ. ޝަހީދު ޖަވާދު ޢުމަރު ޝަހީދުވީ އޭނާގެ މަސައްކަތްކުރާ ދޯނީގައި ހުންނަވަނިކޮށް ދުޝްމަނުން ބަޑިން ބިރުދައްކައިގެން ރަހީނުކޮށްގެން ގެންގޮސް އިންސާނީ އައްޑަނައެއްގެ ގޮތުގައި ބޭނުންކުރުމުގެ ތެރޭގައެވެ.
ޝަހީދު ޖަވާދު ޢުމަރު 1988 ނޮވެންބަރު 3 ވަނަ ދުވަހު ދުޝްމަނުން ގެންދިޔައީ އޭނާ މަސައްކަތް ކުރައްވާ ދޯނީގައި ހުންނަވަނިކޮށް ބަޑިން ބިރުދައްކައިގެންނެވެ. މާލޭގެ ފަޅުތެރޭގައި ހުރި އޮޑިދޯނިފަހަރުން މީހުން ރަހީނުކޮށްގެން ގެންގޮސް އިންސާނީ އައްޑަނައިގެ ގޮތުގައި ބައިތިއްބައި އެ މީހުންގެ ނިވަލުގައި ތިބެގެން ސިފައިންގެއަށް ދުޝްމަނުން ހަމަލާދިން އިރު ޝަހީދު ޖަވާދު ޢުމަރު ވެސް ބޭނުންކުރީ އެފަދަ އިންސާނީ އައްޑަނައެއްގެ ގޮތުގައެވެ. ޝަހީދު ޖަވާދު ޢުމަރު ހިމެނުނީ ރައީސުލްޖުމްހޫރިއްޔާގެ އޮފީހާއި ޣާޒީ ބިލްޑިންގއާ ދޭތެރޭގައި އޮންނަ ކަނީރުހިނގުމުގައި ދުޝްމަނުން އިންސާނީ އައްޑަނައިގެ ގޮތުގައި ގެންގުޅުނު 15 ވަރަކަށް ރަހީނުންގެ ތެރޭގައެވެ. ސިފައިންގެއިން ދުޝްމަނުންނަށް ދޭ ހަމަލާތައް މައިތިރިކުރުމަށް ކަނީރުހިނގުމުގައި ތިބި ރަހީނުން ކުރިއަށް ޖެއްސި ވަގުތު ޝަހީދު ޖަވާދު ޢުމަރު އޮތީ ހދ. ނޭކުރެންދޫ ވެޔޮދޮށުގޭ ޙަސަން ވަޙީދު ކައިރީގައެވެ. އުމުރުން ހަގުކަމާއެކު ޝަހީދު ޖަވާދު ޢުމަރު ބިރުން އުޅޭތީ އޭނާގެ ބޮލުގައި ޙަސަން ވަޙީދު އޮންނެވީ އަތުން ހިފަހައްޓާލައްވައިގެންނެވެ. އެހެންއޮއްވައި އައިވަޒަނެއް ޝަހީދު ޖަވާދު ޢުމަރުގެ ބޮލަށް އެރީ ޙަސަން ވަޙީދުގެ އަތް ފޫއަޅާފައެވެ. އެ ވަޒަން ބޮލުގެ ފުށްކިބައިން ވަދެގެން ނުކުމެފައި ހުރީ ނިތްކުރިންނެވެ. ވަޒަން އެރިވަގުތު “އައްދިޔޯ ބޭބޭ އޭ” ޖަވާދަށް ބުނުއްވިއެވެ. އެހެން ބުނުއްވުމާއެކު މާގިނައިރެއް ނުވެ ޝަހީދުވެއްޖެއެވެ.
ޝަހީދު ޖަވާދު ޢުމަރު ޝަހީދުވީއިރު ޢުމުރަކީ 16 އަހަރެވެ. މިއީ ތިނެއް ނޮވެންބަރުގެ ޢުދުވާނީ ޙަމަލާގައި ޝަހީދުވި އެންމެ ޒުވާން ޝަހީދެވެ.
ޝަހީދު އަލްމަރުޙޫމް ޙުސައިން ޢަބްދުއްރަޙުމާން (ދޮންމަނިކު) / ތަނބުރުމާގެ، ކ. ދިއްފުށި
ޝަހީދު ޙުސައިން ޢަބްދުއްރަޙުމާނު (ދޮންމަނިކު) އަކީ 1988 ނޮވެންބަރު ތިނެއްގެ ޢުދުވާނީ ހަމަލާދިން އިރު ދިއްފުށީ “ކޮއި” ދޯނީން މަހަށްދާ ހީވާގި މަސްވެރިއެކެވެ. ޝަހީދު ޙުސައިން ޢަބްދުއްރަޙުމާން ޝަހީދުވީ ދުޝްމަނުން މާލެއަރައި ހަމަލާދޭން ފެށުމާއެކު މާލޭން ފުރައިގެންދާން މަސައްކަތް ކުރަނިކޮށް ދުޝްމަނުން ބަޑިޖެހުމުގެ ސަބަބުން ވަޒަނެއް އަރައިގެން ފަރުވާ ދެމުން ދަނިކޮށް މާލޭ ސެންޓްރަލް ހޮސްޕިޓަލުގައެވެ.
ޝަހީދު ޙުސައިން ޢަބްދުއްރަޙުމާނު 1988 ނޮވެންބަރު ތިންވަނަ ދުވަހު ދުޝްމަނުން މާލެ އަރައި ހަމަލާދޭން ފެށިއިރު އޮންނެވީ މާލޭގެ މަސްމާރުކޭޓާދިމާ ފަޅުތެރޭގައިއޮތް، އޭނާ މަހަށްދާ ދޯނީގައެވެ. ދުޝްމަނުން ޙަމަލާދޭން ފެށުމުން އެރޭ ފަތިހު އެ ދޯނީގެ މީހުންނާއެކު އޭނާ ވެސް މަސައްކަތްކުރެއްވީ އަވަހަށް ފުރައިގެން ރަށަށް ދިއުމަށެވެ. ޝަހީދު ޙުސައިން ޢަބްދުއްރަޙުމާނަށް ދުޝްމަނުން ބަޑިން ހަމަލާދިނީ މާލެއިން ފުރައިގެން ދިއުމަށް ޓަކައި ދިރުނބާކޮޅުގައި ވަލަށް ދަމަން އޮންނަވަނިކޮށެވެ. މާލޭގެ ފަޅުތެރެއިން އޮޑިދޯނިފަހަރު ފުރިޔަނުދީ ހުއްޓުވުމަށް ދުޝްމަނުން ޖަހަމުންދިޔަ ވަޒަންތަކުގެ ތެރެއިން ވަޒަނެއް ޝަހީދު ޙުސައިން ޢަބްދުއްރަޙްމާނުގެ ކަރަށް އެރިއެވެ. ކަރުގެ ވާތްފަރާތަށް އެރި ވަޒަން ނިކުމެފައިވަނީ ކަނދުރައިގެ މައިބަދަތަކުގެ ތެރެއިންނެވެ.
ޝަހީދު ޙުސައިން ޢަބްދުއްރަޙުމާނުގެ ގަޔަށް ވަޒަންއަރައި ހާލު ދެރަވާން ފެށުމުން ދޯނީގައި ތިބި މީހުންނާއި އެ ސަރަޙައްދުގައި ޙަރަކާތްތެރިވި ދިވެހީންގެ އެހީތެރިކަމާއެކު ސެންޓްރަލް ހޮސްޕިޓަލަށް ގެންގޮސް ފަރުވާންދޭން ފެށިއެވެ. ޝަހީދު ޙުސައިން ޢަބްދުއްރަޙުމާން ޝަހީދުވީ މާލޭ ސެންޓްރަލް ހޮސްޕިޓަލްގައި ފަރުވާ ދެމުން ދަނިކޮށް 1988 ޑިސެންބަރު 22 ވަނަ ދުވަހުގެ ރޭ 7:45 ގައެވެ.
ޝަހީދު ޙުސައިން ޢަބްދުއްރަޙުމާން ޝަހީދުވީ އިރު ޢުމުރަކީ 70 އަހަރެވެ. ޝަހީދުވީ އިރު 4 ދަރީންނާއި އަނތްބަކު ދުނިޔޭގައި އިންނެވިއެވެ.
