އަޙްމަދު ނާފިޢު
ނޯޓް: މިއީ ހަގީގީ ވާހަކަތަކެއްގެ މައްޗަށް ބިނާކޮށް ލިޔެފައިވާ ވާހަކައެކެވެ. މި ވާހަކައިގައި ބޭނުންކޮށްފައިވާ ނަންނަމާއި ތަންތަނަކީ އަސްލެއް ނޫނެވެ.
މީހަކު ބާރަށް ގިސްލާ ރޮމުންދާ އަޑު އަހަރެންގެ ކަންފަތަށް އިވިއްޖެ ނަމަ ޚަބަރު ބަލާލުމަށް އަހަރެންގެ ކެތްމަދުވެއެވެ. މިގޮތުން އެއްރެއެއްގެ އިރާކޮޅު ހުޅުމާލެ ހޮސްޕިޓަލް ކައިރިން އަހަރެން ސައިކަލްގައި ދަނިކޮށް އާދަޔާ ޚިލާފަށް އެ ހޮސްޕިޓަލް ދޮށުގައި މީހުން ގިނަކަމުން ސައިކަލް ޕާކްކޮށްފައި އެ ދިމާލަށް މިސްރާބު ޖެހީމެވެ. އޭރު ވަރަށް ބާރަށް އަންހެނަކު ރޮއެގެންފައި ”މަގޭ ދަރި މަރުވެއްޖެ” މިހެން ބުނިއަޑު އިވުނެވެ. އެ ވަގުތު އެންމެންގެ ދުލުން “إِنَّا لِلّهِ وَإِنَّـا إِلَيْهِ رَاجِعونَ” މިހެން ކިޔާލިއެވެ. ދެން ފެނުނީ އެ އަންހެން މީހާ ހޭނެތިގެން ބިންމައްޗަށް ވެއްޓުނު މަންޒަރެވެ. އެ ވަގުތު އެތާ ތިބި އެންމެން އެއްފަހަރާ އެ ދިމާލަށް ބަލާލިއެވެ. އަދި އެ މީހާގެ ކައިރީގައި ތިބި މީހުން ހޭނެތިފައި އޮތް އެ އަންހެން މީހާ ނަގައިގަނެގެން ވަގުތުން ހޮސްޕިޓަލަށް ވެއްދިއެވެ. އެހެންކަމުން ވެގެން އުޅޭގޮތް ހޯދުމަށް އެތަނުގައި ހުރި މުސްކުޅި އުމުރުގެ އަންހެނަކާ އަހަރެން ވާހަކަ ދައްކާލީމެވެ. ކަންދިމާކުރި ގޮތުން އަހަރެންނަށް ވާހަކަ ދައްކާ މިލެވެނީ ހޭނެތިގެން ވެއްޓުނު އަންހެންމީހާގެ ބޮޑުދައިތައަކާއެވެ. އެ މީހާއަށް ވެސް ހުރީ ރޮވިފައެވެ. އެއީ ޙަދީޖާމަނިކެއެވެ.
ޙަދީޖާމަނިކެ އަހަންނާ ވާހަކަ ދައްކަމުން ދިޔައީ ލޮލުން ފައިބަމުން ދިޔަ ކަރުނަތައް ފޮހެމުންނެވެ. ދެރަވެފައި ހުރި ވަރުން ވާހަކަ ދެއްކެނީ ވެސް ހަމަ ކިރިޔާއެވެ. ނަމަވެސް ޙަދީޖާމަނިކެގެ ވާހަކަތައް މަޑުމަޑުން ކުރިއަށް ގެންދިޔައެވެ. ޙަދީޖާމަނިކެ ކިޔައިދިން ގޮތުގައި ހޭނެތިގެން އެ ގެންދިޔައީ ކަމަނައެވެ. މަރުވެގެން އުޅެނީ ކަމަނަގެ ހުރި ހަމައެކަނި ފިރިހެން ދަރިފުޅެވެ. ދަރިފުޅު މަރުވީ ސިނަމާލެ ބުރިޖާ ގުޅިފައިވާ ހައިވޭގައި ހިނގި އެކްސިޑެންޓެއްގައި ބޯފަޅައިގެން ގޮސްގެންނެވެ. އެވަގުތު އަހަރެން ބޭނުންވީ ހިނގާދިޔަ އެ ހާދިސާއާއި ކަމަނަގެ ދިރިއުޅުމުގެ ވާހަކަ އަހާލުމަށެވެ. އަހަރެން އެ ވާހަކަ އެހުމުން ޙަދީޖާމަނިކެ އަސަރާއެކު ކިޔައިދޭން ފެށިއެވެ.
“ކަމަނަގެ ހުންނަނީ އެންމެ ދަރިއެކެވެ. އެއީ 20 އަހަރުގެ ފިރިހެން ކުއްޖެއެކެވެ. ކަމަނަ އެ ދަރިފުޅު ބަލައިބޮޑުކުރީ މައިވަންތަ ލޯތްބާއި ކުލުނު އިންތިހާއަށް ދީގެންނެވެ. ކަމަނަގެ ދެލޯ ފަދައިން އެ ދަރިފުޅުދެކެ ވަރަށް ލޯބިވެއެވެ. އެ ދަރިފުޅު ވެސް ކަމަނަ ދެކެ އިންތިހާއަށް ލޯބިވެއެވެ. އެންމެ ކުޑައިރުން ފެށިގެން ބަފަޔަކާ ނުލައި އެ ދަރިފުޅު ބަލައިބޮޑުކުރަމުން ދިޔައީ ނުހަނު ލޯތްބާއެކުއެވެ. އެ ދަރިފުޅަށް ކަމެއް ވެއްޖެނަމަ ކަމަނަ އިންތިހާއަށް ކަންބޮޑުވެއެވެ. ބޭރަށް ގޮސްފިނަމަ ހުންނާނީ އެ ދަރިފުޅު ގެއަށް އަންނާނެ އިރެއްގެ އިންތިޒާރުގައެވެ. މިގޮތުން މިރޭ ކަންތައްވީ ގޮތަކީ، ކަމަނަ އިންތިހާއަށް ލޯބިވާ އެ ދަރިފުޅު ރައްޓެއްސަކާއެކު ކޮފީއަކަށް ހުޅުމާލެއަށް ދިޔައީއެވެ. ނަމަވެސް ކަމަނަގެ ދަރިފުޅަކީ ސައިކަލު ދުއްވާ ކުއްޖެއް ނޫންކަމުން ސައިކަލް ދުއްވަން އިނީ އެ ދަރިފުޅުގެ ގާތް ރަހުމަތްތެރިއެކެވެ.
ހުޅުމާލެއަށް ދިއުމަށް ކަމަނަގެ އިޒުނަ ހޯދުމަށް އެ ދަރިފުޅު ކަމަނަ ގާތު އެހުމުން ހުޅުމާލެއަށް ގޮސް އެނބުރި އަވަހަށް ގެއަށް އައުމަށް ދަރިފުޅުގެ ކިބައިން އެދުނެވެ. އެ ވަގުތު ދަރިފުޅު ބުނަމުން ދިޔައެވެ. މަންމާއެވެ. ދެރަނުވާށެވެ. ވަރަށް އަވަހަށް އެނބުރި މަންމަ ގާތަށް އަންނާނަމެވެ. މި ދަނީ ހުޅުމާލެއަށް ކޮފީއެއް ބޯލާށެވެ. މާގިނައިރެއް ނުވާނެއެވެ. މިހެން ބުނެ އެ ދަރިފުޅު ގެއިން ނިކުމެގެން ދިޔަތާ ގާތްގަނޑަކަށް 10 ވަރަކަށް މިނެޓް ފަހުން ކަމަނައަށް ލިބުނު ޚަބަރަކީ އެ ދަރިފުޅު އެކްސިޑެންޓްވެގެން ހުޅުމާލެ ހޮސްޕިޓަލަށް ގެންދިޔަ ޚަބަރެވެ. މި ޚަބަރު ލިބުމާއެކު ހީވީ ކަމަނަގެ ފައިދަށުން ބިންގަނޑު ދެމިގެން ހެނެވެ. ވީ ދެރައިން ކަމަނައަށް ބާރަށް ރޮވެން ފެށުނެވެ. އަދި އާއިލާގެ މީހުންނާ އެކު ޓެކްސީއެއްގައި ހުޅުމާލެ ހޮސްޕިޓަލަށް އާދެވުމާ އެކު ލިބުނު ޚަބަރަކީ އެ ދަރިފުޅު މަރުވި ޚަބަރެވެ. ކަމަނަގެ ހިތް ފަޅައިގެން ދިޔަ ކަހަލައެވެ. ހިތް ކުދިކުދިވި ކަހަލައެވެ. އެ ހިނދު ކަމަނަ ހޭނެތިގެން ވެއްޓުނީއެވެ. މިހެން ބުނެވުމާ އެކު ޚަދީޖާމަނިކެގެ ލޮލުން ހޯސްލާފައި ކަރުނަތައް ފައިބަން ފެށިއެވެ. އެހެންކަމުން ޚަދީޖާމަނިކެއަށް ހިތްވަރު ދިނުމަށްފަހު އެކްސިޑެންޓް ހިނގައި ދިޔަގޮތް އެހެން މީހެއްގެ ކިބައިން އަހަރެން ސާފުކުރީމެވެ.
އަހަރެން ބެލިބެލުމުން މި އެކްސިޑެންޓް ހިނގައިފައިވަނީ ސިނަމާލެ ބުރިޖުމަތިން މާލެއިން ހުޅުމާލެއަށް ދަތުރުކުރަމުންދިޔަ ސައިކަލެއް ކަހާލައިގެން ގޮސް ވޭނެއްގެ ފަހަތުގައި ޖެހިގެންނެވެ. އެކްސިޑެންޓްގައި އަނިޔާވެގެން ހޮސްޕިޓަލުގައި ފަރުވާދެމުން ދަނިކޮށް ނިޔާވެފައި ވަނީ ސައިކަލްގެ ފަހަތުގައި އިން ކަމަނަގެ ދެލޯފަދަ ލޯބިވާ ދަރިފުޅެވެ. އަނިޔާވެގެން ހޮސްޕިޓަލުގައި ފަރުވާދެމުންދަނީ ސައިކަލްދުއްވަން އިން ކުއްޖާކަމަށް މި އެކްސިޑެންޓް ހިނގިވަގުތު އެ މަންޒަރު ދުށް މީހެއްގެ ފަރާތުން އަހަރެންނަށް އެނގުނެވެ. އެ މީހާ ސިފަކޮށްދިން ގޮތުގައި މި އެކްސިޑެންޓް ހިނގި ވަގުތު ހީވީ ބުރިޖުމަތީގައި ލޭގެ ކޯރެއް ފާއްދާލިހެންނެވެ. ދެން ފެނުނީ ކަމަނަގެ ލޯބިވާ ދަރިފުޅުގެ ބޯ ފަޅައިގެން ގޮސް ހޯސްލާފައި ލޭތައް ފައިބަމުން ދިޔަ މަންޒަރެވެ. އެ ކުއްޖާގެ އަތާއި ފައި ވަނީ ޗިސްޗިސްވެފައެވެ. އަނެއް ކުއްޖާގެ ގައިގެ އެކިތަންތަން މަށައިގެން ގޮސް ލޭ އަންނަތަން ދުށްކަމަށާއި މި ވަރުގެ އެކްސިޑެންޓެއް އަދި މިވީހާތާކަށް ނުދެކޭކަމަށް ވެސް އެ މީހާ ބުންޏެވެ. އެވަގުތު އަހަރެންގެ ހިތަށް އެރިއެވެ. ސައިކަލް މަޑުން ދުއްވި ނަމަ މިވަރެއް ނުވީހެވެ.
ފުލުހުންގެ ވެބްސައިޓްގައި ޢާންމުކޮށްފައިވާ ތަފާސްހިސާބުތަކަށް ބަލާއިރު، 2023 ވަނަ އަހަރު ޓްރެފިކް އެކްސިޑެންޓްގެ 2300 މައްސަލައެއް ފުލުހުންނަށް ހުށަހެޅިފައިވެއެވެ. އަދި މި އަހަރުގެ ސެޕްޓެންބަރު މަހުގެ ނިޔަލަށް ޓްރެފިކް އެކްސިޑެންޓްގެ 2005 މައްސަލައެއް ހުށަހެޅި ފުލުހުންދަނީ ތަހުގީގުކުރަމުންނެވެ. ދެ އަހަރު ވެސް އެންމެ ގިނަ އެކްސިޑެންޓުތައް ރިޕޯޓުކޮށްފައި ވަނީ މާލޭ، ހުޅުމާލެ، އަދި ވިލިމާލޭގެ ޕޮލިސް ސްޓޭޝަންތަކަށެވެ. އެގޮތުން މި އަހަރުގެ މިހާތަނަށް މާލެ ސަރަހައްދުގެ ޕޮލިސް ސްޓޭޝަންތަކަށް 1،171 އެކްސިޑެންޓު ރިޕޯޓުކޮށްފައިވާ އިރު، މިދިޔަ އަހަރު މި މުއްދަތުގައި 1،071 އެކްސިޑެންޓު ރިޕޯޓުކޮށްފައި ވަނީ ވެސް މި ސަރަހައްދުގައެވެ.
ސިނަމާލެ ބުރިޖާއި ހައިވޭތަކުގައި އާންމުކޮށް ހިނގާ އެކްސިޑެންޓުތަކުގެ ތެރޭގައި ބާރު ސްޕީޑުގައި ދުއްވާފައިދާ ސައިކަލާއި ކާރު ފަދަ އުޅަނދުތައް ރޭސްޖެހުން ހިމެނެއެވެ. ސިނަމާލެ ބުރިޖު މަތީގައި ވެސް އެކްސިޑެންޓުތައް ގިނަވެ، ބައެއް ފަހަރު މީހުންގެ ފުރާނަ ގެއްލޭ ފަދަ، ބޮޑެތި އަނިޔާތައް ވެފައިވެއެވެ. އަދި ބައެއް އެކްސިޑެންޓްތަކުގައި މީހުންގެ ފުރާނަ ގެއްލިފައި ވެސް އެބަހުއްޓެވެ. މިފަދަ އެކްސިޑެންޓްތަކުގައި ފުރާނަ ގެއްލިގެން ދަނީ ކަމަނަ ފަދަ މައިންގެ ލޯބިވާ ދަރިއެކެވެ. ނުވަތަ ބަފައެކެވެ. ކޮންމެ ވެސް މީހެއްގެ ބޭބެއެއް، ދައްތައެއް ނުވަތަ ކޮއްކޮއެއް، ނުވަތަ ކޮންމެ ވެސް މީހެއްގެ ގާތްތިމާގެ މީހެކެވެ. އެހެންކަމުން، މި އެކްސިޑެންޓްތަކާ ގުޅިގެން ބާރު ސްޕީޑުގައި ދުއްވުމުގެ ސަބަބުން ހިނގާ އެކްސިޑެންޓުތައް މަދުކުރުމަށް ޓަކައި ހަރުކަށި ފިޔަވަޅުތައް އަޅައި ތަންފީޒު ކުރުމުގެ މަސައްކަތް ސަރުކާރުގެ ކަމާބެހޭ މުއައްސަސާތަކުން ދަނީ ހުއްޓުމެެއް ނެތި ކުރަމުންނެވެ.
ވަކިން ހާއްޞަކޮށް މާލެ، ހުޅުމާލެ އަދި ބްރިޖުގައި ހިނގާ އެކްސިޑެންޓުތައް މިވަނީ ވަރަށް ބޮޑަށް އިތުރުވެފައެެވެ. އެހެންކަމުން ބާރު ސްޕީޑުގައި ދުއްވުމުން ތިމާއަށް ލިބޭ ގެއްލުމާ އެއްވަރަށް އަނެކާގެ ފުރާނައާ މެދު ވެސް ވިސްނާލުން މުހިންމެވެ. ހަމައެހެންމެ، ތިބާގެ އަމިއްލަ އަތްތަކުން ކުރާ ނުރަނގަޅު ކަންތައް، އަލުން ރަނގަޅުކުރަން ދެވަނަ ފުރުޞަތެއް ނުލިބިދާނެކަން ހަނދާންކޮށް، މަގުތަކަކީ އެންމެންނަށް އަމާން ރައްކާތެރި ތަނަކަށް ހެދުމަށް ޤާނޫނާއި ގަވާއިދުތަކަށް ބޯލަބައި، ފަރުދުންގެ ފަރުދީ ޒިންމާ ނެގުން މުހިންމެވެ. އެހެނީ، އިންސާނެއްގެ ފުރާނައަށްވުރެ އަގުބޮޑު އެއްޗެއް ނުވެއެވެ.
