ގައުމީ ސޮރު

ގައުމީ ޖޯޝް އެ ހިތެއްގައި އަބަދުމެ ވިންދު ޖަހަޖަހާ ހުންނަ ދަރިއެއްގެ ބެލެނިވެރިއަކަށް ވެވުމަކީ ކޮންފަދަ އުފަލަކާއި ނަސީބެއްތޯއެވެ! އާދެ، މި ފަހަރު އަޅުގަނޑުގެ މި ލިޔުން މި ހިއްސާކޮށްލަނީ ކުޑައިރުން ފެށިގެން ގައުމީ ކަންކަމުގައި އިންތިހާއަށް ލޯބި ޖެހިފައިވާ، މީހެއްގެ ހުރި ހަމައެކަނި ފިރިހެން ދަރިއެއްގެ ހަޔާތުގެ މައްޗަށެވެ.

އެންމެ ކުޑައިރުން ފެށިގެން ވެސް ހައިކަލް (އަސްލު ނަމެއް ނޫން) އަކީ ވަރަށް މަޑުމައިތިރި މިޒާޖެއްގެ ސޮރެކެވެ. ހިމޭން މާހައުލެއްގައި އަބަދުވެސް ވަގުތު ހޭދަކުރަން ބޭނުންވާ ހައިކަލްއަކީ އުފެއްދުންތެރި ކުރެހުންތަކަށް ލޯބިކުރާ އެކަމުގެ ހުނަރު ލިބިފައިވާ ސޮރެއް ވެސް މެއެވެ. އެގޮތުން އެންމެ ކުޑައިރުން ފެށިގެން ވެސް ދިވެހި ގައުމީ ދިފާއީބާރުގެ ލޯގޯއާއި ދިވެހި ފުލުހުންގެ ލޯގޯގެ އިތުރުން އެ މުއައްސަސާތަކުގެ ޔުނިފޯމްގައި ތިބޭ ސިފައިން ނުވަތަ ފުލުހުންގެ ތަސްވީރު ކުރެހުމުގައި އެ ސޮރު އަވަދިނެތި އުޅެއެވެ. ސިފައިންނާއި ފުލުހުން އެކިކަންކަމުގައި ހަރަކާތްތެރިވާ ވީޑިއޯތައް ބެލުމަށްފަހު، ކޮޓަރީގައި އެކަނި އުޅޭއިރު ކުޅޭކުޅޭ ބަޑި ހިފައިގެން ނުވަތަ ތަހުލީލެއް ކުރުމުގައި އަވަދިނެދި އުޅޭފަހަރު ވެސް އާދެއެވެ. ހައިކަލްގެ ޢަމަލުތައް މިހެން ހުރިއިރު، ތަޢުލީމު ހާސިލުކުރުމަށްފަހު ފުލުހަކަށް ނުވަތަ ސިފައިންގެ މީހަކަށް ވުމަކީ އެ ސޮރު އަބަދުވެސް ދެކެމުން އަންނަ ހުވަފެނެކެވެ.

ގައުމީ އެކިއެކި މުނާސަބަތުތަކުގައި، ސިފައިންނާއި ފުލުހުން ނުވަތަ ގައުމުގެ މިނިވަންކަމަށް ޓަކައި ހަނގުރާމަކޮށް ޝަހީދުވެފައިވާ ބަޠަލުންގެ ވާހަކަތައް ދައްކާއިރު ވެސް ހައިކަލް ވަރަށް ޝައުޤުވެރިކަމާއެކު އެ ވާހަކަތައް ކަނުލާ އަޑުއަހާ ހަދައެވެ. އަދި އެ ކަންކަމަށް ލޯބި ޖެހި، ޝައުޤުވެރިވެފައި ހުންނަވަރުން އެ މަޢުލޫމާތުތައް އެ ސޮރަށް ވަރަށް ރަނގަޅަށް އެނގެއެވެ. އަދި މީގެ އިތުރުން އެ ސޮރުގެ ގޭގައި، އަހަރުމެން ދިވެހިން ފާހަގަކުރާ ބައެއް ދުވަސްތަކުގެ މަޢުލޫމާތު ގެއަށް އަންނަ މީހުންނަށް ފެންނަހެން ބަހައްޓާފައި ހުރެއެވެ. ގެއަށް ޒިޔާރަތްކުރާ މީހުން ވެސް ވަރަށް ޝައުޤުވެރިކަމާއެކު އެ ލިޔުންތައް ކިޔައި، “މީ މިގޭ ގައުމީ ސޮރުގެ މަސައްކަތް ދޯ އޭ” ބުނެ ތަޢުރީފުކޮށް ހަދަައެވެ.

ކުޑައިރު ގޭގައި ލިބޭ ހުސްވަގުތުތަކުގައި ކޮސްޓިއުމް އަޅައިގެން ޝަހީދު ކޯޕްރަލް ޙުސައިން އާދަމްއަށް ވެގެން ބަޑިޖަހާ ކުޅެން އުޅުނު އެ ސޮރުގެ އުންމީދު މިއަދު ވަރަށް އުޖާލާވެފައި ފޮނިކަމަށް ވެސް ބުނެވިދާނެއެވެ. ތަޢުލީމީ ހަޔާތް ނިންމާލުމަށްފަހު މިއަދު ވަޒީފާއަށް ނިކުންނަމުން އެ ގެންދަނީ ޝަހީދު ކޯޕްރަލް ޙުސައިން އާދަމްގެ ނަމުން ނަންދެވިފައިވާ އެ އިމާރާތުގައެވެ.

މީހެއްގެ ފުށުން އަނެކުންނަށް ކިތަންމެ ކުޑަމިންވަރެއް ވެސް އެނގުމަކީ ވަރަށް އަގުހުރި ކަމެކެވެ. އެގޮތުން ދެން މި ހިއްސާކޮށްލަނީ ހައިކަލްގެ ގެއަށް ޒިޔާރަތްކުރާ މީހުންނަށް ފެންނަހެން އެ ސޮރު ބަހައްޓާފައި ހުރި ލިޔުންކޮޅުތަކުން ބައެކެވެ.

ގައުމީ ފެންވަރުގައި ފާހަގަކުރާ ބައެއް ދުވަސްތައް

ހުރަވީ ދުވަސް: ހުރަވީ ދުވަހަކީ 3 ޖުމާދަލްއާޚިރާ މަހުގެ 3 ވަނަ ދުވަހެވެ. ހުރަވީ ދުވަސް ނިސްބަތްވެގެން ވަނީ އައްސުލްތާން ޣާޒީ ޙަސަން ޢިއްޒުއްދީން (1 ވަނަ) އަށެވެ. ހުރަވީ ދުވަސް ފާހަގަކުރަނީ ހޮޅިން ނުވަތަ މަލާބާރިންގެ އަޅުވެތިކަމުގެ ދަށުން ދިވެހިރާއްޖެ މިނިވަންކުރެއްވި ހަނދާން އާކުރުމުގެ ގޮތުންނެވެ. ހޮޅިންގެ އަޅުވެތިކަމުގައި ގާތްގަޑަކަށް 4 މަހެއްހާ ދުވަހުގެ ރާއްޖެ އޮތުމަށްފަހު، މުލީގޭ ދޮންޙަސަންމަނިކުފާނު ނުވަތަ ދޮންބަންޑާރައިން ކުރެއްވި ޖިހާދުގައި ދިވެހިރާއްޖެ މިނިވަންވީ، 3 ޖުމާދަލްއާޚިރާ 1166 (7 އެޕްރީލް 1753) ގައެވެ.

ނަޞްރުގެ ދުވަސް: ނަޞްރުގެ ދުވަހަކީ ނޮވެންބަރު މަހުގެ 3 ވަނަ ދުވަހެވެ. އެ ދުވަސް ނަޞްރުގެ ދުވަހުގެ ގޮތުގައި ފާހަގަކުރަނީ 1988 ނޮވެންބަރު 3 ވަނަ ދުވަހު ދިވެހިރާއްޖެއަށް ކުރިމަތިވި ޢުދުވާނުން ދިވެހިން ސަލާމަތްވެ ނަޞްރު ލިބުމާ ގުޅިގެންނެވެ. ދިވެހިންގެ ތެރެއިން ބަޔަކު ސްރީލަންކާގެ ޓެރަރިސްޓު ޖަމާޢަތަކާ ގުޅިގެން ހިންގި މި ނުރައްކާތެރި ޢުދުވާނުގައި ސިފައިންގެ ތެރެއިން 8 ބޭކަލަކާއި އާންމު ރައްޔިތުންގެ ތެރެއިން 11 ބޭކަލަކު ޝަހީދުވިއެވެ.

ގައުމީ ދުވަސް: ގައުމީ ދުވަހަކީ ރަބީޢުލްއައްވަލް މަހުގެ 1 ވަނަ ދުވަހެވެ. މި ދުވަސް ގައުމީ ދުވަހުގެ ގޮތުގައި ފާހަގަކުރަނީ އައްސުލްޠާން މުޙައްމަދު ތަކުރުފާނުލް އަޢުޒަމް، ޕޯޗްގީޒުންގެ އަތްދަށުން ދިވެހިރާއްޖެ ސަލާމަތްކުރެއްވި ޒިކުރާ އާކުރުމުގެ ގޮތުންނެވެ. 15 އަހަރާއި 6 މަސް ދުވަހުގެ ދިގު އަޅުވެތިކަމަކަށްފަހު ޕޯޗްގީޒުންގެ އަތްދަށުން ދިވެހިރާއްޖެ މިނިވަންވީ ހިޖުރައިން 981 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ވިލޭރެއެވެ. އެ މަތިވެރި ފަޚުރު ދިވެހީންނަށް ހާސިލުކޮށްދެއްވުމަށް މާތް ﷲ މެދުވެރިކޮށްދެއްވީ ތިލަދުންމަތީ އުތުރުބުރީ އަލްޚަތީބު ޙުސައިން ތަކުރުފާނަށާއި އައިމިނާގެ ދަރިކަލުން، އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޒަމް ސިރީސަވާދީއްތަ މަހާރަދުންނެވެ.

ޝަހީދުންގެ ދުވަސް: ޝަހީދުންގެ ދުވަހަކީ ޝަޢުބާން މަހުގެ 1 ވަނަ ދުވަހެވެ. ޝަހީދުންގެ ދުވަސް ނިސްބަތް ކުރެވެނީ 1 ޝަޢުބާން 965 ގައި، ޕޯޗްގީޒުން ރާއްޖެއަށް ދިން ވަރުގަދަ ޢުދުވާނުގައި، އައްސުލްޠާން ޢަލީ ސިރީ އައުދަ ސިއާކަ ކައްތިރި މަހާރަދުން (އަލިރަސްގެފާނު) ޕޯޗްގީޒު ލަޝްކަރާ ކުރިމަތިލައްވައި ކުރެއްވެވި ދީނީ ގައުމީ ޖިހާދުގައި ދީނާއި ގައުމަށް ޓަކައި ޝަހީދުވެވަޑައިގެންނެވި ތާރީޚީ ހާދިސާއަށެވެ. އަލިރަސްގެފާނު ޝަހީދު ކުރުމަށްފަހު 1 ޝަޢުބާން 965 (19 މޭ 1558) އިން 1 ރަބީޢުލްއައްވަލު 981 (1 ޖުލައި 1573) އަށް ޕޯޗްގީޒުން 15 އަހަރު ރާއްޖެ އިސްތިއުމާރުކުރިއެވެ.

މި ސޮރުގެ މި ވާހަކަތައް މިހާ ހިސާބުން ކުރުކޮށްލަން ގަސްތުކުރާ މި ހިނދު، ހިތަށް ވެރިވެގެންދަނީ އަންނަނިވި ޅެން ބައިތެވެ.

ދިވެހި ބިން މީ އުފަން މަގޭ ބިން / ލެވުނު ފުރަތަމަ ނޭވާ މަގޭ ބިން

އެ ބިމަކަށް އެންމެ ފަހުގެ ވިންދާ / ދޫކޮށްލަދޭނޭ ނޭވާ މަގޭ ބިން

ރިފަރެންސް:

• ދިވެހި ވިކިޕީޑިއާ
• ތިނެއް ނޮވެންބަރުު