ކޮލޯސިއަމް

އިޓަލީގެ ވެރިރަށް ރޯމްގައި ހުންނަ ކޮލޯސިއަމްއަކީ ދުނިޔޭގެ ހަތް އަޖައިބުގެ ތެރެއިން އަޖައިބެއްގެ ގޮތުގައި ހިމަނާފައިވާ ބިނާއެކެވެ. “ފްލޭވިއަން އެމްފިތިއޭޓަރ” ގެ ނަމުން ވެސް ނަންކިޔޭ މި ބިނާއަކީ ފްލޭވިއަން އެމްޕެރަރގެ ރަސްކަމުގައި، ރޯމަނުންނަށް ވެދުންކުރި ހަދިޔާއެއްގެ ގޮތުގައި ބިނާކުރި، ރޯމުގައި ހުރި މިފަދަ އެންމެ ބޮޑު އެމްފިތިއޭޓަރއެވެ.

ކޮލޯސިއަމް އިމާރާތްކުރުމުގެ މަސައްކަތް ރޯމުގެ އޭރުގެ އެމްޕެރަރ ވެސްޕޭސިއަންގެ ރަސްކަމުގައި، ކޮމަން އީރާ 70 އާއި 72 ދެމެދު ފެށިގެންދިޔައިރު، ކޮލޯސިއަމް ނިމި އާންމުންނަށް ހުޅުވާލާފައިވަނީ އޭގެ ގާތްގަނޑަކަށް ދިހަ އަހަރު ފަހުންނެވެ. އޭގެ ފަހުން ވޭތުވި އަހަރުތަކުގައި އެތަކެއް ބަދަލުތަކެއް ކޮލޯސިއަމްގެ ބިނާއަށް ގެނެވިފައިވާއިރު، މި ބިނާގެ ބޮޑު މިނުގައި 620 ގުނަ 513 ފޫޓު ހުރެއެވެ. ހަތަރު ބުރިއަށް އިމާރާތްކޮށްފައިހުރި މި ބިނާގައި 80 ދޮރާށި ހުންނައިރު، މީގެތެރެއިން 76 ދޮރާށި ޚާއްޞަކުރެވިފައި ހުންނަނީ ކޮލޯސިއަމް ތެރޭގައި ކުޅެވޭ ކުޅިވަރުތައް ބަލަން ވަންނަ އާންމުންނަށެވެ. އަދި، ދެ ދޮރާށި މި ކުޅިވަރުތަކުގެ ބައިވެރީންނަށް ޚާއްޞަކުރެވިފައިވާއިރު، އަނެއް ދެ ދޮރާށި ޚާއްޞަކުރެވިފައި ހުންނަނީ ހަމައެކަނި އެމްޕެރަރއަށެވެ. ކޮލޯސިއަމްގައި ކުޅެވޭ ކުޅިވަރުތައް ބަލާލުމަށް، މި ބިނާގައި 50،000 މީހުންނަށް އެއްފަހަރާ ވަދެ ތިބުމުގެ ޖާގަ ތަނަވަހެވެ.

ކޮލޯސިއަމް ހުޅުވިގެން ދިޔައީ އެކަމުގެ މުނާސަބަތުގައި އެމްޕެރަރ ޓައިޓަސް އިންތިޒާމުކުރި، 100 ދުވަހަށް ދެމިގެންދިޔަ ގްލޭޑިއޭޓަރަލް ގޭމުތަކާއެކުއެވެ. ކޮލޯސިއަމްގައި ބޭއްވޭ ކުޅިވަރުތައް ބަލާލުމަށް ރޯމުގެ އެމްޕެރަރއިން އެތަނަށް އަބަދުވެސް ޒިޔާރަތްކުރާއިރު، އެމްޕެރަރ ކޮމޯޑަސް ފާހަގަކުރެވެނީ ގްލޭޑިއޭޓަރަލް ކުޅިވަރުތަކުގައި އަމަލީގޮތުން ބައިވެރިވާ ފަރާތެއްގެ ގޮތުގައެވެ. ބުނެވޭ ގޮތުން އެމްޕެރަރ ކޮމޯޑަސް ވަނީ ގާތްގަނޑަކަށް 735 ގްލޭޑިއޭޓަރަލް ކޮންޓެސްޓްގައި ބައިވެރިވެފައެވެ.

މިފަދަ ކުޅިވަރުތަކުގެ އިތުރުން ކޮލޯސިއަމްއަކީ އެތަނުގައި ޑްރާމާގެ ހަރަކާތްތަކާއި، ހިސްޓޯރިކަލް ރީއެނެކްމަންޓްތަކާއި، އަދި މަރުގެ ހުކުމް ތަންފީޒުކުރުމަށް ވެސް ބޭނުންކުރެވުނު ތަނެކެވެ. އަހަރުތައް ފާއިތުވެ ރޯމަނުންގެ ހިތްތަކުގައި މި ކުޅިވަރުތަކަށް އޮތް ޝައުޤުވެރިކަން ފަނޑުވެ ދިއުމުގެ އިތުރުން، ވެސްޓަރން ރޯމަން އެމްޕަޔަރުގެ ނިމިދިޔުމާއެކު ކޮލޯސިއަމްގެ ބިނާ މަޑުމަޑުން ވިރާނާވާން ފެށިއެވެ. އަޅާނުލައި ދޫކޮށްލާފައިހުރުމުންނާއި، ކޮމަން އީރާގެ ފަސްވަނަ ގަރުނުގައި ރޯމަށް ކުރިމަތިވި ބިން ހެލުންތަކުގައި މި ބިނާއަށް ގެއްލުންތައް ލިބިފައިވާއިރު، 20 ވަނަ ގަރުނު އައިސް ޖެހުނުއިރު މި ބިނާގެ ތިންބައިކުޅަ ދެބައި ހުރީ ހަލާކުވެގޮސްފައެވެ.

ކުރީންހުރި ގޮތަށް ކޮލޯސިއަމް އިޔާދަކުރުމަށް 1990 ގެ އަހަރުތަކުގެ ތެރޭގައި ހިންގި ޕްރޮޖެކްޓާއެކު މަރާމާތުގެ އެތަކެއް މަސައްކަތެއް ކުރެވި، މި ބިނާ މިހާރު ފާހަގަކުރެވެނީ ދުނިޔޭގެ ހަތް އަޖައިބުގެ ލިސްޓުގައި ހިމެނޭ ތަނެއްެގެ ގޮތުގައެވެ. އެއް ޒަމާނުގައި މުނިފޫހިފިލުވުމަށް ހިންގި ނާއިންސާފު ގަތުލުތަކުންނާއި، ލޭގެ ކޯރުތަކުން ފުރިފައިވި މި ތަނަކީ މިހާރު އެތަކެއް މިލިއަން މީހުން ޒިޔާރަތްކުރާ، ރޯމުގެ އެންމެ މަޤުބޫލު ޓުއަރިސްޓް އެޓްރެކްޝަނެވެ.