ޙުސައިން ޢަލީ
އަޅުގަނޑުމެންގެ ހަންހާރަ ދިވެހި ޤައުމަކީ ވަރަށް ކުޑަ ޤައުމެކެވެ. އެހާމެ ނާޒުކު ޤައުމެކެވެ. ގޮންޖެހުންތައް ނުހަނު ބޮޑު ޤައުމެކެވެ. ރާއްޖޭގައި ގިނަ ރަށްތަކެއް އޮތް ނަމަވެސް، ރާއްޖޭގެ ހިކިފަސް ސަރަހައްދަކީ އެންމެ 298 އަކަ ކިލޯމީޓަރެވެ. 99.7 އިންސައްތަ އަކީ ކަނޑުގެ ސަރަހައްދެވެ. ރާއްޖޭގެ ސަރަހައްދަކީ ގާތްގަނޑަކަށް ނުވަދިހަ ހާސް އަކަ ކިލޯމީޓަރެވެ. މި ނަންބަރުތައް މިހެން ހުރުމާއެކު އަޅުގަނޑުމެންގެ ޤައުމިއްޔަތުގެ އެންމެ މުހިންމު ބަހާތައް ކަމުގައިވާ ރާއްޖޭގެ ސިޔާދަތާއި އިސްތިގުލާލު ހިމާޔަތްކޮށް ރައްކާތެރި ކުރުމަކީ ވަރަށް ބޮޑު ގޮންޖެހުމެކެވެ. އެހެނަސް ޤައުމީ އަދި ސަލާމަތީ ނަޒަރުން ބަލާއިރު، މިކަމަކީ އެންމެ މުހިންމު ކަންކަން ކަމަށް ދެންނެވިދާނެއެވެ. އަދި ހަމަ އެހެންމެ، މުސްތަގިއްލު ޤައުމެއްގެ ގޮތުގައި އޮންނަން ބޭނުންވާނަމަ، ޤައުމުގެ ސިޔާދަތާއި އިސްތިޤްލާލު ރައްކާތެރިކުމަކީ ޤައުމުގެ މިނިވަންކަން ދެމެހެއްޓުމަށްވުރެ ވަކި މުހިންމުކަން ކުޑަ ކަމެއް ނޫނެނެވެ. މިނިވަންކަން އޮވެމެ، ޤައުމުގެ ސިޔާދަތާއި އިސްތިގުލާލު ފުރިހަމަ މާނައިގައި ރައްކާތެރިކޮށް ހާސިލު ނުކުރެވޭނަމަ، ޙަޤީޤީ މިނިވަންކަމުގެ މައުނަވީ ސިފަވަތައް ފުރިހަމަ ނޫންކަމަށްވެސް ދެންނެވިދާނެއެވެ.
މި މުހިންމު، އަދި ގޮންޖެހުން ބޮޑު މަސައްކަތް ކުރުމަށްޓަކައި އެންމެ މުހިންމު ޒިންމާއެއް އަދާކުރަންޖެހޭ ބަޔަކީ ދިވެހި ޤައުމުގެ ސިފައިންނެވެ. ޝައްކެއްނެތެވެ. ދިވެހި ސިފައިންނަކީ ރާއްޖެއަށް ކުރިމަތި ވެދާނެ ކޮންމެ ކަމަކާއި ކުރިމަތިލުމަށްޓަކައި ތައްޔާރަށް އޮތް އަސްކަރީ ފައުޖެވެ. މާޒީގައިވެސް ރާއްޖެއަށް ކުރިމަތިވެފައިވާ ތަފާތު ހާލަތްތަކުގައި ދިވެހި ސިފައިން ކުރިމަތިލާފައި ވަނީ ހިތްވަރާއި ފަންވަރާއެކުއެވެ. އެއިރަކު އަސްކަރިއްޔާގައި އޮތް އާރަކާއި ބާރަކާއި އެކުއެވެ. 1988 ވަނަ އަހަރުގެ ނޮވެންބަރު 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ހަމަލާގައިވެސް، މާތް ﷲ ގެ ވާގިފުޅާއެކު ދިވެހި ސިފައިންގެ ހިންމަތާއި މިންނަތުން ޤައުމުގެ މިނިވަންކަން ދިވެހީންގެ އަތުން ބީވިޔަ ނުދީ ހިފެހެއްޓިއެވެ. އެދުވަސްވަރުގެ ހާލަތާއި މިހާރާއި ވަރަށް ތަފާތެވެ. ނޮވެންބަރު ތިނެއްގެ ހާދިސާއަކީ ދިވެހި ސިފައިންގެ ޤާބިލުކަން އިތުރުކުރުމަށްޓަކައި އިންގިލާބީ މަސައްކަތްތަކެއް ކުރުމާއި ދިމާލަށް ދީލާލި މުހިންމު ހާދިސާއެކެވެ. އޭގެ ފަހުން މިއަދާއި ހަމައަށް ދިވެހި ސިފައިންގެ ތަރައްޤީގައި މުހިންމު ހަރުފަތްތަކެއް ވަނީ ގިރާކޮށްފައެވެ. އެހެނަސް، އަދިވެސް ވަރަށް މުހިންމު، ވަރަށް ގިނަ މަސައްކަތްތައް ކުރަން ހުރިކަން ޤަބޫލު ކުރަންޖެހެއެވެ. ވަކިން ޚާއްސަކޮށް، ދުނިޔެއާއި ސަރަހައްދީ ސަލާމަތީ މަސްރަޙަށް އަންނަމުންދާ ބަދަލުތަކާއެކު، ޤައުމުގެ ރައްކާތެރިކަމުގައި އަސްކަރިއްޔާއިން ކުރަންޖެހޭ މަސައްކަތްތަކުގައި ކުރިމަތިލާންޖެހޭ ގޮންޖެހުންތަކަށް، އިތުބާރާއި ސާބިތުކަމާއެކު ކުރިމަތިލާން ބޭނުންވާފަދަ ފައުޖަކަށް ހެދުމަށްޓަކައި ގިނަ މަސައްކަތްތަކެއް ކުރަން ޖެހެއެވެ. މިފަދަ މަސައްކަތުގައި، ޖުމްލަގޮތެއްގައި ހުރިހާ އަސްކަރިއްޔާތަކުންވެސް ކުރަމުން އަންނަ މައިގަނޑު ދެމަސައްކަތަކީ ފައުޖުގެ ސިފައިންގެ ޤާބިލުކަން އިތުރުކުރުމާއި، ފައުޖު ބޭނުންކުރާ އާލާތްތަކާއި ވަސީލަތްތައް އިތުރުކޮށް ތަރައްޤީ ކުރުމެވެ. ވަކިން ޚާއްސަކޮށް މިޒަމާނުގައި ޤައުމުތަކުން އެންމެ އިސްކަންދެނީ އެޤައުމެއްގެ އަސްކަރިއްޔާގައި ބޭނުން ކުރާ އާލާތްތައް އިޖާދީ ގިންތީގައި ގުނާލެވޭފަދަ ސާމާނުތަކަށް ބަދަލުކޮށް، އިތުރު ކުރުމަށެވެ. މިގޮތުން ބައެއް ޤައުމުތަކުން ދަނީ އެކަންކަން ހާސިލު ކުރުމަށްޓަކައި ބޮޑެތި އަދަދުތަކުން ހޭދަވެސް ކުރަމުންނެވެ. ކުރިން ދެންނެވި ދެ ދާއިރާއިން އަސްކަރިއްޔާ ފުރިހަމަވެގެންދާނަމަ، އެފަދަ އަސްކަރިއްޔާއެއްގެ ޤާބިލުކަން ދާނީ ދުވަހުން ދުވަހަށް ތަރައްޤީވެ ކުރިއަރަމުންނެވެ. ދިވެހި އަސްކަރިއްޔާވެސް ތަރައްޤީ ކުރުމަށްޓަކައި މަސައްކަތް ކުރަމުން ދަނީ މި މަގުންނެވެ.
ޤައުމީ ދިފާޢީ އިސްތިރާޖީ އާއި ޤައުމީ ސަލާމަތީ ލަނޑުދަނޑިތައް ހާސިލުކުރުމަށްޓަކައި ޤައުމުގެ ސަލާމަތީ ގުނަވަންތައް ކުރިއަރާ ތަރައްޤީ ވާންޖެހެއެވެ. ހަމައެކަނި ސިފައިންގެ ފައުޖެއް ނޫނެވެ. ޤައުމުގެ ސަލާމަތީ ހިޔާވަހިކަން ލިއްބައިދޭ ކުޑައިގެ ކޮންމެ ދުންޏެއްވެސް ކުރިއަރާ ތަރައްޤީވެގެން ނޫނީ ވަށާޖެހޭގޮތެއްގައި ރާއްޖޭގެ ސަލާމަތާއި ރައްކާތެރިކަން ކަށަވަރު ކުރުމަކީ ބޮޑު ގޮންޖެހުމެކެވެ. މީގެ ތެރޭގައި ރާއްޖޭގެ ސިޔާދަތާއި އިސްތިޤްލާލުވެސް ހިމެނެއެވެ. ސަލާމަތީ ނަޒަރުން ބަލާއިރު، އަޅުގަނޑުމެން ވެއަތު ކުރަމުން މިދަނީ މީގެ ކުރިން ދުވަހަކުވެސް ނުދެކޭފަދަ މާހައުލެއްގައިކަން ކަށަވަރެވެ. ނުރައްކާތަކުގެ ބާވަތާއި ހާލަތާއި ވައްތަރުތައް ބަދަލުވެއްޖެއެވެ. ސަލާމަތީ ދާއިރާގައި “ހަނގުރާމަ” މާނަ ކުރުމުގައިވެސް، ދާއިރާގެ ޢިލްމީ މާހިރުންގެ ތެރޭގައި ވަނީ ޚިލާފު އުފެދިފައެވެ. އަންޒަމާނުންސުރެ ދެކެމުން އައި ހަނގުރާމަ ކުރާގޮތާއި، ހަނގުރާމައިގައި ބޭނުންކުރާ ގިނަ އުކުޅުތަކާއި ގޮތްތައް މިއަދު ވަނީ މާޒީވެފައެވެ. ދުނިޔޭގެ އެންމެ ކުރިއަރާފައިވާ އަސްކަރިއްޔާތަކުންވެސް އެމީހުންގެ ތަޢުލީމާއި ތަމްރީނާއި، ބޭނުންކުރާ އާލާތްތަކާއި ވަސީލަތްތައް އަދާހަމަ ދިރާސާތަކުގެ އަލީގައި ދަނީ ބަދަލުކުރަމުންނެވެ. އެފަދަ ޤައުމުތަކުގެ އަސްކަރިއްޔާތަކަށް ކުރާ ބޮޑެތި ހޭދަތަކުންވެސް އެކަން ދަނީ ފެންނަމުންނެވެ. ސަލާމަތީ މަސްރަޙަށް އަންނަމުންދާ ހަލުވި ބަދަލުތަކާއި ކުރިމަތިލެވޭގޮތައް، އެބައިމީހުންގެ ކަންކަން ބައްޓަން ކުރުމަށް ދަނީ މަސައްކަތް ކުރަމުންނެވެ. ދުނިޔޭގެ ސަލާމަތީ މަސްރަޙަށް އަންނަމުންދާ އުދަނގޫ ގޮންޖެހުންތަކުގެ ސަބަބުންނެވެ. އަޅުގަނޑުމެންގެ އަމާޒަކަށް ވާންޖެހޭނީވެސް މިގޮތް ކަމަށް ދެކެމެވެ. މިއީ ތަންފީޒުކުރަން އެހާ ފަސޭހަ ކަމަކަށް ނުވެދާނެއެވެ. އެހެނަސް ނުކުރެވޭނެ ކަމެއް ނޫންކަންވެސް ގަބޫލުކުރަން ޖެހެއެވެ. ހުރިހާ ޤައުމެއްގައިވެސް މިބާވަތުގެ ކަންކަމުގައި އެންމެ މުހިންމު ދައުރެއް އަދާކުރާ ފަރާތްތަކަކީ ޤައުމި ކަންކަމުގައި ގޮތް ނިންމުމުގެ ހަރުފަތްތަކުގައި ތިއްބަވާ ފަރާތްތަކެވެ. އިސްކުރަން ޖެހެނީ ޤައުމީ ވިސްނުމެވެ. ސަމާލުވާންވީ ރާއްޖޭގެ ނާޒުކު ކަން ތަސައްވުރު ކުރުމާއެކު، ބަދަލުވަމުންދާ ސަލާމަތީ މަސްރަޙާއިއެކު، ކުރިމަތިލާންޖެހިދާނެ ނުހަނު ބޮޑެތި ގޮންޖެހުންތަކާއެވެ. ހަމައެއާއެކު މިފަދަ ކަންކަން ބިނާވެފައި އޮންނަނީ ޤައުމުގެ އިގްތިސާދީ ފުދުންތެރިކަމާއި ޤައުމީ ނަޒަރުގައި ސަލާމީގޮތުން ޤައުމު ކުރިމަތިލާންޖެހިދާނެފަދަ ހާލަތްތަކާއެކެވެ. މިހުރިހާ ކަމަކާއެކު ޤަބޫލުކުރަންޖެހޭ ޙަޤީޤަތަކީ ހަރުދަނާ އަމާޒަކާއެކު، މަރުޙަލާތަކަކަށް ބަހާލައިގެން ވިއަސް، ޤައުމީ ފިކުރެއްގައި ކޮށްފިނަމަ، މިއީ ހާސިލުކުރެވިދާނެ ކަމެއް ކަމެވެ. އެމަންޒަރު މިއަދު މިދަނީ ފެންނަމުންނެވެ.
ދިވެހިރާއްޖޭގެ ޤައުމީ ދިފާޢީ ބާރަކީ ރާއްޖޭގައި އުފެދިފައިވާ މުއައްސަސާތަކުގެ ތެރެއިން އެންމެ ދުވަސްވީ އެއް މުއައްސަސާއެވެ. އަދި ޤައުމީ ސަލާމަތާއި ގުޅޭ އެންމެ މުހިންމު، އަދި އެންމެ ގިނަ ޒިންމާތަކާއި ހަވާލުވެގެން އޮތް މުއައްސަސާ ކަމަށްވެސް ދެންނެވިދާނެއެވެ. ސަލާމަތީ މަސްރަޙާއި ޤައުމީ ފުދުންތެރިކަމުގެ ތެރެއިން ސިފައިންގެ ފައުޖު ކުރިއަރުވާ ތަރައްޤީ ކުރުމަށްޓަކައި މުހިންމު ގިނަ މަސައްކަތްތަކެއް އަބަދުވެސް އަންނަނީ ކުރަމުންނެވެ. އެކި ދުވަސްވަރު އެކި މިންވަރަށެވެ. އެހެންނަމަވެސް ދާދި ފަހުން ދިވެހި ސިފައިންގެ ފައުޖުގެ ތެރެއަށް “އެއަރ ކޯރ” އިތުރުކޮށް، ޒަމާނީ ޓެކްނޮލޮޖީގެ އެންމެ ކުރީސަފުގައި އެއްހަމަކުރަމުން އަންނަ އާލާތްތައް އިތުރު ކުރެވިގެން ދިޔަކަމީ ނުހަނު ބޮޑު އިންގިލާބީ ބަދަލެކެވެ. ޤައުމުގެ ސަލާމަތާއި ރައްކާތެރިކަމަށްޓަކައި ސިފައިން ރެއާއި ދުވާލު ކުރަމުންދާ މަސައްކަތައް ލިބުނު އިންތިހާ ބޮޑު ކުރިއެރުމެކެވެ. މި އާލާތްތަކާއެކު ވަށާޖެހޭގޮތައް ވަރަށް ގިނަ ކަންކަމަށް ކުރިއެރުން ލިބިގެންދާނެކަން ކަށަވަރެވެ. ދިވެހީންގެ ޤައުމިއްޔަތު ދެމެހެއްޓުމުގައި ދިވެހި ސިފައިން ކުރަމުން އަންނަ ބުރަ މަސައްކަތައް ލިބުނު ނުހަނު ބޮޑު ފުރިހަމަ ކަމެކެވެ. ސިފައިންގެ ފައުޖުގެ މަސައްކަތްތައް ޒަމާނީ އާ އީޖާދު ހިމެނިގެން ތަރުތީބު ވެގެން ދިއުމަކީ އަސްކަރިއްޔާގެ ހަކަތަ ގުނަވެގެން ދާނެ ކަމެކެވެ. ހަމަ މިބީދައިން މިއީ ހަމައެކަނި ސިފައިންނަށް، ނުވަތަ ދިވެހި ރާއްޖޭގެ ޤައުމީ ދިފާޢީ ބާރަށް ލިބުނު ކުރިއެރުމެއްވެސް ނޫނެވެ. މިއީ މުޅި ޤައުމަށް ލިބުނު ކުރިއެރުމެކެވެ. ޤައުމުގެ ލޮބުވެތި އެންމެހާ ރައްޔިތުންނަށް ލިބުނު ކުރިއެރުމެކެވެ. ޤައުމުގެ ކޮންމެ މުވާޠިނަކުވެސް މިލިބުނު ކުރިއެރުމާއި މެދު ފަޚުރުވެރިވެ، އުފާކުރަންޖެހޭ ކަމަށް އަޅުގަނޑު ދެކެމެވެ.
ދިވެހި ސިފައިން ކޮންމެ ދުވަހަކުވެސް ކުރަމުން ދަނީ ޤައުމީ މަސައްކަތް ތަކެކެވެ. އަޅުގަނޑުގެ ނަޒަރުގައި މި މަސައްކަތްތަކަކީ ދިވެހި ޤައުމިއްޔަތު ކުރިއަރުވާ، ދެމެހެއްޓުމަށްޓަކައި ކުރަމުންދާ ވަރަށް މުހިންމު މަސައްކަތްތަކެކެވެ. ސިފައިންގެ އިސް ޚިދުމަތްތެރިންވެސް މަސައްކަތް ކުރައްވާފައި ވަނީ ހަމަ މިފަދައިންނެވެ. މިމަސައްކަތް ކުރުމަށްޓަކައި އަޅުގަނޑުމެން އަސްކަރީ ތަޢުލީމާއި ތަމްރީނު ހާސިލު ކުރަމެވެ. ކަމާއި ގުޅޭ ވަސީލަތްތަކާއި އާލާތްތައް ބޭނުންކުރަމެވެ. މި މަސައްކަތް އަޅުގަނޑުމެން ކުރަނީ އިސްލާމީ ޢަޤީދާގައި ސާބިތުވެ ތިބެއެވެ. މި މަސައްކަތް އަޅުގަނޑުމެން ކުރަނީ އަމިއްލަ ނަފުސަށް ވުރެ ދިވެހި ޤައުމު އިސްކޮށްގެންނެވެ. މި މަސައްކަތް އަޅުގަނޑުމެން ކުރަނީ މާތް ﷲ ގަންދީ ހުވާކޮށްގެންނެވެ. މި މަސައްކަތް ކުރުމަށްޓަކައި އަޅުގަނޑުމެން މިތިބީ ފުރާނަ ޤުރުބާން ކުރަން ތައްޔާރަށެވެ. އަޅުގަނޑުމެންގެ މޮޓޯ އަކީ “ޤައުމީ ޚިދުމަތެވެ.” އަޅުގަނޑުމެން ފާޅުކުރާ ޝިޢާރަކީ “ޤައުމު”، “ތެދުވެރި”، “ވާޖިބު” އެވެ. ބޮޑުތަކުރު ފާނުގެ ޖިހާދުން ހިތްވަރު ލިބިގެން، ކޯޕްރަލް ޝަހީދު ޙުސައިން އާދަމްގެ ހުށިޔާރުކަމުން ފިލާވަޅު ލިބިގެން، މާތް ﷲ ގެ ވާގިފުޅާއެކު، ދިވެހި ސިފައިން ދެމިތިބޭނީ ޤައުމީ ޚިދުމަތުގައެވެ. ދިވެހީންގެ ފަޚުރުވެރި ޤައުމިއްޔަތު ދެމެހެއްޓުމުގައެވެ. ޝައްކެއް ނެތެވެ. ދިވެހި ސިފައިން ކުރަނީ ޤައުމީ މަސައްކަތެކެވެ. މިއީ ދިވެހީންގެ ޤައުމިއްޔަތު ދެމެހެއްޓުމަށްޓަކައި ކުރަމުންދާ ޤައުމީ މަސައްކަތެކެވެ. މި މަސައްކަތް ކުރުމުގެ ފުރުސަތު ދިވެހި ސިފައިންނަށް ލިބުމަކީ އިންތިހާ ބޮޑު ޝަރަފެކެވެ. އެއީ ދިވެއްސަކަށް ވީތީ ފަޚުރުވެރި ވާތީއެވެ.
