ފަޒީލާ މޫސާ
2008 ޑިސެންބަރުން ފެށިގެން ހައްދުންމަތީގައި ހަލުވިކަމާއެކު ގަދަ ހުމުގެ ރޯގާއެއް ފެތުރިގެންދާކަމުގެ މަޢުލޫމާތު ލިބުމާ ގުޅިގެން މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ، އޮނަރަބަލް އަލްފާޟިލް އަމީން ފައިޞަލްގެ އެންގެވުމަކަށް އެމްއެންޑީއެފްގެ މެޑިކަލް ޓީމެއް ވަނީ 2009 ޖަނަވަރީ 9 އިން 28 ލ. އަތޮޅުގައި ހަރަކާތްތެރިވެފައެވެ. ހައްދުންމަތީގައި ހަރަކާތްތެރިވި މި ޓީމުގައި ހިމެނިފައިވަނީ އެމްއެންޑީއެފްގެ ޑޮކްޓަރ، ލެފްޓިނަންޓް ޑރ. އާއިމިނަތު ޝުމްރާއާއި ސްޓާފް ނާރސް، ލެފްޓިނެންޓް ފަޟީލާ މޫސާއެވެ.
މި ޓީމު ކައްދޫއަށް ދިއުމުން މިނިސްޓަރ އޮނަރަބަލް އަމީން ފައިޞަލް ވަނީ ޓީމުގެ މެންބަރުންނަށް މަރުޙަބާ ކިޔައި ބައްދަލުކުރައްވާފައެވެ. މިނިސްޓަރގެ އިތުރުން މި ބައްދަލުކުރެއްވުމުގައި އެމްއެންޑީއެފް ލ.ކައްދޫ ރީޖަނަލް ހެޑްކްއޯޓަރޒްގެ ވެރިންނާއި ހައްދުންމަތީ ގަން ރީޖަނަލް ހޮސްޕިޓަލްގެ އިސްބޭފުޅުން ބައިވެރިވެ ލެއްވިއެވެ. މިނިސްޓަރގެ މި ބައްދަލުކުރެއްވުމުގައި މި ދަތުރުގެ ބޭނުމާއި މަޤުޞަދު، އަދި މެޑިކަލް ޓީމުގެ ދައުރާއި، ޕްރޮގްރާމް ރާވާހިންގާނެ ގޮތުގެ ޚިޔާލު ދެއްވެވިއެވެ. މިނިސްޓަރގެ މި ބައްދަލުކުރެއްވުމުގައި މެންބަރުންނަށް ދެއްވެވި އިރުޝާދާއި ހިތްވަރު، ވެގެންދިޔައީ ޓީމުގެ މަސައްކަތް ފޯރިއާ އެކު އެއްވެސް ވަރުބަލިވުމެއްނެތި ކުރިއަށްގެންދެވުނު މައިގަނޑު ސަބަބުކަމަށް މި ޓީމުގެ މެންބަރުން ފާހަގަކުރެއެވެ.
މެޑިކަލް ޓީމު މަސައްކަތްކުރުމަށް ހަމަޖެހިފައިވަނީ ލ. ގަން ރީޖަނަލް ހޮސްޕިޓަލްއާ ގުޅިގެންކަމުން އެ ހޮސްޕިޓަލްގެ ވެރިންނާއި މެޑިކަލް ޓީމެއް އަދި އާރުއެޗްކިޔޫ ލ.ކައްދޫގައި އިސްކޮށް ތިއްބެވި ވެރިންނާއި އެމްއެންޑީއެފް މެޑިކަލް ޓީމު ބައްދަލުކޮށް، ފެތުރެމުންދާ ހުމުގެ ރޯގާ ކޮންޓްރޯލްކުރުމަށް މަސައްކަތް ފަށާނެ ގޮތުގެ ތާވަލެއް އެކުލަވާލެވި އިސްކަންދޭ ތަރުތީބުން ރަށްރަށުގައި މަސައްކަތް ކުރިއަށް ގެންދާނެގޮތް ރާވައިލެވުނެވެ. އަދި ހަމަ އެހެންމެ، މަސައްކަތް ފަށާ ގަޑިއާއި ނިންމާގަޑި ކަނޑައަޅައި މައިގަނޑު ގޮތެއްގައި ރަށްރަށުގައި ހިންގާނެ ހަރަކާތްތަކަކީ ކޮބައިކަން ކަނޑައެޅުނެވެ. މިގޮތުން ކޮންމެ ރަށެއްގައި ވެސް ހިންގުނު ހަރަކާތްތަކަކީ ބަލިމީހުން ބެލުމާއި، މި ރޯގާ ޖެހިގެން ފަރުވާ ހޯދަން އަންނަ ކޮންމެ ފަރުދަކަށް ވެސް އެމްއެންޑީއެފްގެ ފަރާތުން ހިލޭ ބޭސް ފޯރުކޮށްދިނުމާއި، ބަލިހާލު ބޮޑުވެގެން ހެލްތްޕޯސްޓަށް / ޞިއްޙީ މަރުކަޒަށް ނާދެވޭ މީހުންގެ ގޭގެއަށް ޑޮކްޓަރ ގޮސް ބަލިމީހުން ބެލުމާއި ބޭސްފަރުވާގެ ޚިދުމަތް ފޯރުކޮށްދިނުމެވެ. އަދި މީގެއިތުރުން ޞިއްޙީ ހޭލުންތެރިކަން އިތުރުކުރުމުގެ ކުލާސްތަކެއް ރަށްރަށުގެ ރައްޔިތުންނަށް އަމާޒުކޮށްގެން ހިންގިފައިވެއެވެ. މަދިރި ކޮންޓްރޯލްކުރުމަށް ރަށުތެރެއަށް ފޮގުކުރުމާއި، ރަށްރަށުގެ ރައްޔިތުންނާއި ސިފައިން ގުޅިގެން ނިކުމެ ރަށުތެރެ ސާފުކުރުން ވެސް ހިމެނިގެން ދިޔައީ މި އަތޮޅުގައި ހިންގި މުހިންމު ހަރަކާތްތަކުގެ ތެރޭގައެވެ. މިގޮތުން ލ.އަތޮޅުގެ އެންމެ ރަށެއް ފިޔަވައި އެހެން ހުރިހާ ރަށެއްގައި މި ޓީމު ވަނީ ޙަރަކާތްތެރިވެފައެވެ. އަދި ޖުމްލަ 333 މީހަކަށް ޑޮކްޓަރަށް ދެއްކުމާއި ބޭސްފަރުވާގެ އެހީތެރިކަން ވަނީ ފޯރުކޮށްދެވިފައެވެ.
މި ޓީމުގެ މަސައްކަތް ފަށަނީ ކޮންމެ ދުވަހެއްގެ ވެސް ހެނދުނު 09:00 އިން ފެށިގެންނެވެ. އަދި ރޭވިފައިވާ ގޮތަށް މަސައްކަތް ކުރަމުންދިޔައީ ރަށްރަށަށް ގޮސް ކޮންމެ ރަށެއްގެ ވެސް ހެލްތު ޕޯސްޓް ނުވަތަ ޞިއްޙީ މަރުކަޒުގައެވެ. މިގޮތުން ލ.ގަން ރީޖަނަލް ހޮސްޕިޓަލާ ގުޅިގެން ހިންގި މި ޕްރޮގްރާމްގައި ފުރަތަމަ ދަތުރު ކުރެވުނީ ޑޮކްޓަރުންނާއި ބޭސްފިހާރައެއް ނެތް ރަށްރަށަށެވެ. މި ޓީމުގެ މަސައްކަތް ލ.އަތޮޅުގެ ރައްޔިތުން ބަލައިގަނެ އެކަމަށް ވަރަށްބޮޑު ތަރުހީބު ލިބިގެން ދިޔައެވެ. މިގޮތުން ލ.އަތޮޅުގައި ޑޮކްޓަރުންނާއި ބޭސްފިހާރަ ހުރި ރަށްތަކުން ވެސް އެމްއެންޑީއެފްގެ މެޑިކަލް ޓީމު ގޮސް އެ ރަށްރަށުގައި ވެސް ބަލިމީހުން ބަލާ ބޭސްފަރުވާ ކޮށްދިނުމަށް ގަން ރީޖަނަލް ހޮސްޕިޓަލްގައި އެދެމުންދާތީ މިފަދަ ރަށްރަށަށް ވެސް މި ޓީމު ގޮސް ރައްޔިތުންނަށް ބޭސްފަރުވާގެ ކަންތައްތައް ކުރިޔަށް ގެންގޮސްފައިވެއެވެ. މީގެ އިތުރުން ވެސް ލ.އަތޮޅުގައި މެޑިކަލް ޓީމު ހަރަކާތްތެރިވި ބައެއް ރަށްރަށުން އެދިގެން މިފަދަ ރަށްރަށަށް ތަކުރާރުކޮށް ގޮސް ރައްޔިތުންގެ ތެރެއިން މި ހުމުގެ ރޯގާ ޖެހިފައިވާ މީހުންނަށް ފަރުވާ ދެވުނެވެ.
ހުމުގެ ރޯގާ ފެތުރެމުންދިޔަ މި ދުވަސްވަރު ގަން ރީޖަނަލް ހޮސްޕިޓަލުގައި ހުރީ އާންމު ބަލިތަކާ ބެހޭ އެންމެ ޑޮކްޓަރެކެވެ. ވީމާ ލ.އަތޮޅުގެ ހުރިހާ ރަށްރަށަކުން ގަން ރީޖަނަލް ހޮސްޕިޓަލުން ފަރުވާ ލިބިގަތުމަށް އަންނަ ބަލިމީހުންނަށް އެކަށޭނަ ގޮތަކަށް ބޭސްފަރުވާގެ ޚިދުމަތް ދިނުން ވެގެންދިޔައީ ވަރަށް ދަތި އުނދަގޫކަމެއް ކަމުގައެވެ. ހަމަމިއާއެކު އެމްއެންޑީއެފްގެ މެޑިކަލް ޓީމު މި އަތޮޅު ތެރޭގައި ހަރަކާތްތެރިވާން ފެށުމާ ގުޅިގެން ރަށްރަށުން ޑޮކްޓަރަށް ދެއްކުމަށް ގަން ރީޖަނަލް ހޮސްޕިޓަލަށް އަންނަ މީހުންގެ އަދަދު އެތައް އިންސައްތައެއް މަދުވެގެން ދިޔަކަމަށް އެ ހޮސްޕިޓަލްގެ މެނޭޖްމަންޓުން މަޢުލޫމާތު ދެއްވިއެވެ. މިއިން ދޭހަކޮށްދެނީ އެމްއެންޑީއެފުން ލ.އަތޮޅުގައި ފެތުރެމުންދިޔަ ހުމުގެ ރޯގާ ކޮންޓްރޯލްކުރުމަށް ކުރެވުނު މަސައްކަތަކީ ލ.އަތޮޅުގެ ރައްޔިތުންނަށް އެތަކެއް ލާބައާއި މަންފާއެއް އެއިން ލިއްބައިދިން އަދި އެބައިމީހުން ބަލައިގަތް ހަރަކާތްތަކެއްކަމެވެ. ސިފައިންގެ މެޑިކަލް ޓީމުގެ މި މަސައްކަތާ ދޭތެރޭގައި ވަރަށް ހިތްހަމަޖެހޭކަން ލ.އަތޮޅުގެ ގިނަ ރައްޔިތުން ވަރަށް އުފަލާއެކު ފާހަގަކުރެއެވެ. މީގެ އިތުރުން ރައްޔިތުންގެ ހިތްތަކުގައި ސިފައިންނާ ދޭތެރޭ އޮންނަ އިތުބާރާއި ދެއްވާ އެއްބާރުލުން ހާމަވެގެންދިޔައެވެ.
ލ.ގަން ރީޖަނަލް ހޮސްޕިޓަލާ ގުޅިގެން ހިންގި މި ޕްރޮގްރާމް، އަތޮޅުތެރޭގައި މަސައްކަތްކުރުމަށް އެކުލަވާލެވުނު ތާވަލާ އެއްގޮތަށް ވަރަށް އަމާންކަމާއި އޮމާންކަމާ އެކު އެކުވެރި މާހައުލެއްގައި ނިންމާލެވުން ވެގެންދިޔައީ ހަމަ ޔަގީނުން ވެސް މެޑިކަލް ޓީމުގެ ފަހަތުގައި އެ މަސައްކަތަށް ދުރާއިގާތުން އެތައް ބައެއްގެ ފަރާތުން ލިބިގެންދިޔަ އެއްބާރުލުމުންނެވެ. މިގޮތުން މަސައްކަތްކުރަމުން ދިޔަ ތިން ހަފުތާއެއްހާ ދުވަހުގެ ތެރޭގައި އެމްއެންޑީއެފްގެ އިސްވެރިން ޚާއްޞަކޮށް ޗީފް އޮފް ޑިފެންސް ފޯސް، މޭޖަރ ޖެނެރަލް މޫސާ ޢަލީ ޖަލީލް، ދުރާއި ގާތުން މި މަސައްކަތް ކުރިޔަށްދާގޮތް ބައްލަވައި ޓީމުގެ މެންބަރުންނަށް ދެއްވަމުން ގެންދެވި ހިތްވަރު ވަރަށް ބޮޑަށް ފާހަގަ ކުރެވިގެންދިޔައެވެ. ހަމަމިއާއިއެކު ލ.އަތޮޅުގެ ހުރިހާ ރަށެއްގެ ވެރިންނާއި ރައްޔިތުން އަދި ޚާއްޞަކޮށް ގަން ރީޖަނަލް ހޮސްޕިޓަލުގެ މެނޭޖްމަންޓުން ދެއްވި ފުރިހަމަ އެއްބާރުލުން ފާހަގަކޮށްލެވެއެވެ. އަދި ހަމަ އެހެންމެ، އާރުއެޗްކިޔު ކައްދޫގެ ވެރިންނާއި މުވައްޒަފުން އަދި މެޑިކަލް ސާރވިސްގެ ވެރިންނާއި ހީވާގި މުވައްޒަފުންގެ ފަރާތުން ލިބިގެންދިޔަ ފުރިހަމަ އެއްބާރުލުން ހިމެނިގެންދިޔައެވެ.
މީގެ އިތުރުން ވެސް މިޓީމު އެނބުރި މާލެއައުމުން ޗީފް އޮފް ޑިފެންސް ފޯސް މޭޖަރ ޖެނެރަލް މޫސާ ޢަލީ ޖަލީލު ވަނީ ޓީމުގެ މެންބަރުންނާ ބައްދަލުކުރައްވައި ހާލުއަހުވާލު އައްސަވައި އަދި ދިމާވި ދަތިތަކަކީ ކޮބައިތޯ އައްސަވައި އޮޅުންފިލުއްވާފައެވެ. އަދި މަސައްކަތް ކުރިއަށްް ދިޔަގޮތާ ބެހޭގޮތުން އޮޅުންފިލުއްވައި ކުރިމަގުގައި މިފަދަ ހަރަކާތެއް ހިންގާނަމަ ސަމާލުކަންދޭންވީ ކަންތައްތަކާ ބެހޭ ގޮތުންވަނީ ފުޅާ ދާއިރާއެއްގައި މަޝްވަރާކުރައްވާފައެވެ. އަދި ޓީމުގެ މަސައްކަތާއި ދޭތެރޭ ހިތްހަމަޖެހޭކަން ފާހަގަ ކުުރެއްވެވިއެވެ. މިބައްދަލު ކުރެއްވުމުގައި މެޑިކަލް ސާރވިސްގެ އޮފިސަރ އިންޗާޖް، މޭޖަރ ޑރ. ޢަލީ ޝާހިދު މުޙައްމަދު ބައިވެރިވެލެއްވިއެވެ.
މި ޕްރޮގްރާމްގައި ކުއްލިއަކަށް ފުރައިގެން ދާންޖެހުމުގެ ސަބަބުން ބައެއްކަހަލަ ބޭހާއި ބޭސްފަރުވާކުރުމަށް ބޭނުންވާނެ ބައެއްތަކެތި ހޯދުމަށް ދަތިތަކާ ކުރިމަތިލާންޖެހުނު ނަމަވެސް މި ކަންކަން ވަނީ ވަރަށް އަވަސް ފުރުޞަތެއްގެ ތެރޭގައި ހަމަޖެހިފައެވެ. މީގެ އިތުރުން މަސައްކަތްކުރުމަށް ބައެއް ރަށްރަށަށް ދިޔައިރު، އެމްއެންޑީއެފްގެ މެޑިކަލް ޓީމުން ކުރަން ހަމަޖެހިފައިވާ މަސައްކަތާ ބެހޭގޮތުން ފުރިހަމަ މަޢުލޫމާތު މި ރަށްރަށުގެ ރައްޔިތުންނަށް ފޯރުކޮށްދީފައި ނެތުމުގެ ސަބަބުން ބައެއްކަހަލަ ދަތިތަކާ ކުރިމަތިލާންޖެހުނުކަން ފާހަގަވެގެންދިޔަ ކަމުގައި ޓީމުގެ މެންބަރުން ފާހަގަކޮށްފައިވެއެވެ.
މިފަދަ ޕްރޮގްރާމްތައް މިއަށްވުރެ ވެސް ކާމިޔާބުކަމާ އެކު ކުރިއަށްގެންދިއުމަށް އެޅިދާނެ ފިޔަވަޅުތަކުގެ ތެރޭގައި ދުރާލާ މިފަދަ ކަންކަމަށް މީހުން ފޮނުވާނެ ވަކި އުސޫލެއް ކަނޑައަޅާފައި އޮތުމާއެކު، ކަމުގެ ކުޑަބޮޑުމިނަށް ބަލައި ފޮނުވާނީ ކިތައް މެންބަރުންގެ މައްޗަށް އެކުލެވޭ ޓީމެއްކަން އެނގެން އޮތުން، އަދި ސަރުކާރުގެ ކަމާބެހޭ އެހެނިހެން އިދާރާތަކާ ގުޅިގެން ކުރިއަށް ގެންދެވިއްޖެނަމަ މިފަދަ ޕްރޮގްރާމްތަކުގެ ނަތީޖާ އިތުރަށް ރަނގަޅުވެގެންދާނެ ކަމުގައި މި ޓީމުގެ މެންބަރުން ފާހަގަ ކުރެއެވެ. އެމްއެންޑީއެފުން ރާވާ ހިންގޭ މިފަދަ ކޮންމެ ޙަރަކާތަކީ އެއިން ތަފާތު އެތައްކަމެއް އެނގި ސިފައިންނަށް އާ ތަޖުރިބާތަކެއް ކުރެވިގެންދާ ކަންކަމެވެެ. ވުމާއިއެކު ލ.އަތޮޅުގައި ފެތުރެމުން ދިޔަ ހުމުގެ ރޯގާއާ ގުޅިގެން ހިންގި މި ހަރަކާތްތަކުން ވެސް އެތައް ކަމެއް ދަސްވެގެން ގޮސްފައިވާނެކަން ޔަޤީނެވެ. މިގޮތުން ލ.އަތޮޅުގެ ރައްޔިތުންގެ ދިރިއުޅުން ބައްޓަަންވެފައިވާ ގޮތާއި ދިރިއުޅުމުގެ ހާލަތު ވަރަށް ރަނގަޅަށް އެނގިގެންދިޔަ ޕްރޮގްރާމަކަށް، މި ޕްރޮގްރާމް ވެގެންގޮސްފައިވާ ކަމުގައި މެޑިކަލް ޓީމުން ފާހަގަކުރެއެވެ.
