އަޙްމަދު ނިޒާރު
އިންސާނުންނަކީ ޒަމާނުއްސުރެ ވަކިވަކި ގަބީލާތަކަށާއި އެކި ނަސްލުތަކަށް ނިސްބަތްވާ އަދި އެއް ބަޔަކު އަނެއް ބަޔަކަށް ސަރަޙައްދުތަކެއް ކަނޑައަޅައިގެން ދިރިއުޅެމުން އަންނަ ބައެކެވެ. ތިމާ ނިދާ ކޮޓަރިން ފެށިގެން އާއިލާއާ އެކު ދިރިއުޅޭ ގެއާއި ތިމާ ނިސްބަތްވާ އަވަށްގަނޑު އަދި ރަށާއި ޤައުމު މީގައި ހިމެނެއެވެ. އާދެ ޤައުމަކީ މި ހުރިހާ ސަރަޙައްދަކާއި މި ސަރަޙައްދުތަކުގައި ހިމެނޭ ހުރިހާ ތަކެއްޗަކާއި އެންމެހާ މީހުންނެވެ. މި އެންމެން ހިމެނޭ ގޮތަށް އަޅުގަނޑުމެން މި ކިޔައި އުޅެނީ “ރައްޔިތުން”ނެވެ. އާދެ ރައްޔިތުންގެ ތެރެއިން އެބައިމީހުންގެ މިނިވަންކަމާއި އަމިއްލަވަންތަ ގޮތް ދެމެހެއްޓުމަށާއި މުޅި ޤައުމުގެ ތަރިކަ ދެމެހެއްޓުމަށް ޓަކައި ބަޔަކު އައްޔަންކޮށް ރައްޔިތުންގެ ޚާއްޞަ ޚާދިމުންކަމުގައި އެކުލަވާލައި އެބައިމީހުން ނަފުސާނީ އަދި ޖިސްމާނީ ގޮތުން މި ޚާއްޞަ ޚިދުމަތަށް ތައްޔާރުކުރެވެއެވެ. އާދެ، މި ބައިމީހުންނަށް އަޅުގަނޑުމެން މި ކިޔަނީ “ސިފައިން”ނެވެ.
ސިފައިންނަކީ އެބައިމީހުންނަށް ދެވޭ ޚާއްޞަ ތަމްރީނާއި ތަރުބިއްޔަތުތަކެއްގެ ސަބަބުން ޤައުމާއި ރައްޔިތުން ދެކެ ނުހަނު ލޯބިވާ އެހާމެ އޯގާތެރި ބަޔެކެވެ. އާދެ، އެބައިމީހުންނަކީ ރައްޔިތުންގެ ޙައްޤުގައި ފުރާނައިން ޤުރުބާންވާން ތައްޔާރަށް ތިބި ބައެކެވެ. މިކަން މިގޮތުގައި އަދާކުރުމުގައި ސިފައިން ފަހަށް ނުޖެހޭނެކަށް ޒަމާނުއްސުރެ ސިފައިން ދަނީ ސާބިތުކަމާ އެކު ހާމަކޮށްދެމުންނެވެ. މި ރާއްޖެއަށް ދިމާވާ ޢުދުުވާންތަކާއި އަދި ޤުދުރަތީ ކާރިިސާތަކުގައި ސިފައިން ދަނީ އެކަން ވަރަށް ރަނގަޅަށް ސާބިތުކޮށްދެމުންނެވެ. މިކަން މިހެން ނުވާންވީ ސަބަބެއް ވެސް ނެތެވެ. އެހެނީ ސިފައިން މިގޮތުގައި ތިބުމަށް އައްޔަން ކުރި ބަޔަކީ ހަމަ އަޅުގަނޑުމެންގެ މައިންބަފައިންނެވެ. އާދެ ދަރިފުޅ ބަނޑުގައި ޤަރުބަގަތް ހިސާބުން ފެށިގެން ތުއްތު ދަރިފުޅަށް ނުހަނު އޯގާވެރިކަމާއި، ލޯތްބާއި އަޅާލުންދީ މައިންބަފައިންނަށް ކެރި ކުޅަދާނަވި އެންމެ މަތީ ދަރަޖައަކަށް ކިޔަވައިދީ ބޮޑު މީހަކަށްވުމަށްފަހު ތިމާގެ ދަރިފުޅު ފުރާނައިން ޤުރުބާންވުމަށް މާތްﷲ ގަންދީ ވައުދުވުމަށް ރުހި ފޮނުވީ އެބައިމީހުންކަމަށް ވާތީއެވެ. ވީމާ ސިފައިންގެ ކެރުމާއި ހިތްވަރު އެގޮތުގައި ސާބިތުކޮށް، މިކަމުގައި ދެމިތިބުމަށް ބޭނުންވާ ބުންވަރު ލިބިގަތުމަށް ހަތަރު އުދެރެހުން ވެސް ސިފައިންނަށް ވާޖިބުކުރެއެވެ. އަދި މިގޮތުގައި ދިވެހި ސިފައިން ދެމި ތިބޭކަމުގެ އެންމެ ސާބިތު އަދި ފަޚުރުވެރި ދިރިދެމިގެންވާ ހެއްކަކީ މި ޤައުމުގެ އަމަންއަމާންކަމާއި ސިޔާދަތު ރައްކާތެރިކޮށް ދެމެހެއްޓުމަށް ޓަކައި ހަނގުރާމަކޮށް އެބައިމީހުންގެ ފުރާނައިން ޤުރުބާންވެގެންދިޔަ މި ޤައުމުގެ ލޮބުވެތި ޝަހީދުންނެވެ.
އާދެ ޤައުމާއި މި މާތްވެގެންވާ ދީނުގެ ޙައްޤުގައި ޖިހާދުކޮށް ޝަހީދުވެދިޔަ ޝަހީދުން އެ ދިޔައީ ދިރިތިބި ދިވެހިންނަށް އަމާނާތެއްގެ ގޮތުގައި މި ޤައުމު ހަވާލުކޮށްފައެވެ. ވީމާ މި މާތްވެގެންވާ ޝަހީދުންގެ ޙައްޤުގައި އަޅުގަނޑުމެންގެ ތެރެއިން ހަމަކޮންމެ ފަރުދަކީ ވެސް ދަރަންޏެއް ބޮލުގައި އެޅިފައިވާ މީހަކީމެވެ. އާދެ އެ ދަރަނި އަދާކުރުމަކީ ފަރުދީ ފެންވަރުގައި ވެސް ޤައުމުގެ އަމަންއަމާންކަމާއި ސިޔާދަތު ރައްކާތެރިކުރުމާއި، ކުރިއަށްއޮތް ޖީލުތަކަށް މިނިވަންކަމާ އެކު މި ޤައުމު ރައްދު ކޮށްދިނުމެވެ. ނަމަވެސް އަޅުގަނޑުމެން ސިފައިންނަކީ މިކަމަށް ޚާއްޞަކުރެވިފައިވާ ބަޔަކަށް ވީހިނދު އަޅުގަނޑުމެން ތި ލޮބުވެތި ރައްޔިތުންގެ ކިބައިން މި އެދެނީ ތިޔައިން ފަރުދެއްގެ ފުރާނައަށް ގެއްލުމެއް ލިބިދާނެ ހާލަތަކާ ކުރިމަތިލާން ޖެހިއްޖެ ހިނދެއްގައި އަވަހަށް ސަލާމަތްތެރިކަން ހޯދުމަށެވެ. އެހެނީ އަޅުގަނޑުމެން މިތިބީ ރައްޔިތުންގެ ޙައްޤުގައި ފުރާނައިން ޤުރުބާންވާން ވަޢުދުވެ އެކަމަށް ތައްޔާރަށެވެ. ތިޔަ ރައްޔިތުން އަޅުގަނޑުމެންނަށް އިތުބާރުކޮށް އަޅުގަނޑުމެންނާ ބަރުހަތިޔާރު ހަވާލުކޮށްގެން މިތިބީ މިކަމަށްޓަކައި ކަމަށްވާތީއެވެ. އާދެ އަޅުގަނޑުމެން މިތިބީ އެގޮތުގައެވެ. ނުގުޑާފަދަ ވަރުގަދަ ޢަޒުމުގައެވެ. ދުޝްމިނުން އަޅުގަނޑުމެންގެ މޭތައް ފޫއަޅުވާލިއަސް އެންމެ ރަނގަޅެވެ. މި ޤައުމުގެ ބިމުން އެންމެ ވެލިފުކެއް ހިސާބު ވެސް އަދި މި ކަނޑުތަކުން އެންމެ ލޮނުތިކެއްވަރު ވެސް އަޅުވެތިކަމަށް ދިޔަކަ ނުދޭނަމެވެ. ކަރުކަނޑާލައި ލެޔާއި ތަތް ތަޅުވާލިއަސް ފަރުވާލެއް ނެތެވެ. މި ޤައުމުގެ ދިދަ އުފުލާނަމެވެ. މި ލޮބުވެތި ޤައުމު މިނިވަންކަން މަތީ އަބަދަށް ލަހައްޓަވާށިއެވެ. – އާމީން.
