ޑރ. ޙުސައިން ޙަލީމް
ސިފައިން ތިބޭނީ އަބަދުވެސް ތައްޔާރީ ހާލަތުގައެވެ. 24 ގަޑިއިރެވެ. 365 ދުވަހެވެ. ޤައުމަށް ދިމާވާ ޤުދުރަތީ ކާރިސާތަކުގައި އެންމެ ކުރީސަފުގައި މަސައްކަތް ކުރާނީ ދިވެހި ސިފައިންނެވެ. ދުވަހުން ދުވަހަށް ދިމާވާ އެކި ކަންކަމުގައި ވެސް ދިވެހި ސިފައިން ތިބެނީ ޤައުމީ ޚިދުމަތުގައެވެ. އަލިފާނުގެ ހާދިސާއެއް ވިއަސް، ކަނޑުމަތީގެ ހާދިސާއެއް ވިއަސް އެންމެ ކުރީސަފުގައި ތިބޭ ބަޔަކީ ހަމަ ދިވެހި ސިފައިންނެވެ. ވަކިން ޚާއްޞަކޮށް ޤައުމަށް އަތުވެދާނެ ޓެރަރިސްޓުންގެ ޙަމަލާތަކުން ދިވެހި ރައްޔިތުން ސަލާމަތްކުރުމަށް، އެންމެ ފަހު ނޭވަޔަށް ދާންދެން ޖިހާދުކުރުމުގައި އަބަދުވެސް ސިފައިން ތިބޭނީ ތައްޔާރަށެވެ. ކުރުކޮށް ދަންނަވަނީނަމަ ޤައުމަށް ބޭނުންވެއްޖެ ހިނދެއްގައި ކޮންމެފަދަ ނުރައްކަލަކަށް ނަފުސު ޤުރުބާންކުރުމަށް ތައްޔާރަށް ތިބި ބަޔަކީ ދިވެހި ސިފައިންނެވެ. ސިފައިންނަކީ ޤައުމުގެ އައްޑަނައެވެ.
ސިފައިން ހުވާކޮށްގެން ތިބެނީ ޖާނާއި ފުރާނައިން ޤުރުބާންވުމަށެވެ. މިފަދަ ބޮޑު ޒިންމާއެއް އުފުލަން ތިބޭ ބަޔަކު، ތިބެން ވާނީ ފިސާރި ސާބިތުކަމާ އެކު އަބަދުވެސް ތައްޔާރަށެވެ. ސިފައިންނަކީ މިފަދަ ކަންކަމަށް ތައްޔާރުވެ، ގިނަގުނަ މަސައްކަތްތަކެއް ކުރަންޖެހޭ ބައެކެވެ. ހަނގުރާމައެއް އަތުވެއްޖެނަމަ، ޤައުމު ދިފާޢުކުރުމުގެ ޢިލްމާއި ހުނަރު ދަސްކުރުން ސިފައިންނަށް މުހިންމެވެ. ހަމައެހެންމެ އެކި ފަންނުގެ ތަޢުލީމީ މީހުން ވެސް އުފެއްދުމަކީ މުހިންމު ކަމެކެވެ. މިފަދަ ޙާލަތަކަށް ތައްޔާރުވުމުގެގޮތުން ހަނގުރާމައިގެ އުކުޅުތަކުގެ ތެރެއިން ބަޑިޖެހުމުގެ ހުނަރު ވެސް ފަރިތަކުރުން ސިފައިންނަށް އެހާމެ މުހިންމެވެ.
އެހެންކަމުން، މަދަނީ މުއައްސަސާއަކާއި އަޅާބަލާއިރު، ސިފައިން އަދާކުރަންޖެހޭ މަސްއޫލިއްޔަތު ވަރަށް ވެސް ތަފާތެވެ. ހަމައެހެންމެ ނުރައްކާތެރިކަން ވެސް ބޮޑެވެ.
އެހެންކަމުން، ސިފައިން، އަބަދުވެސް ދުޅަހެޔޮ ބައެއްގެ ގޮތުގައި ތިބެންޖެހެއެވެ. ދުވަން ޖެހުނަސް، ފަތަން ޖެހުނަސް، ބަރުތަކެއް އުފުލަން ޖެހުނަސް ސިފައިން، ތިބެންޖެހޭނީ އާންމު މީހަކަށް ވުރެ އެތައް ގުނައެއް ދުޅަހެޔޮކޮށެވެ. މި ފުރުޞަތުގައި ދުޅަހެޔޮވުމަކީ ކޮބައިކަން އެނގުން ރަނގަޅުވާނެއެވެ. ޖިސްމާނީގޮތުން ދުޅަހެޔޮ މީހެއްނަމަ، އެންޑިއުރަންސް (ބުންވަރު)، ފްލެކްސިބިލިޓީ، ސްޓްރެންތު، ސްޓްރެންތު އެންޑިއުރަންސް ފަދަ ބައިތަކުން ފިޓުވާނެއެވެ. ދުވުން، ފެތުން، ބައިސްކަލްދުއްވުން ފަދަ ހަރަކާތްތަކުން ބުންވަރު ގަދަކުރެވޭނެއެވެ. ވެއިޓް ޓްރޭނިންގ، އަދި ބަރުހިފައިގެން ދުވުމާއި، ހިނގުމުގެ އިތުރުން ޕެކްމާޗް ފަދަ ހަރަކާތްތަކުން ސްޓްރެންތު، އަދި ސްޓްރެންތު އެންޑިއުރަންސް ރަނގަޅުކުރެވޭނެއެވެ. ޔޯގާ އަދި ބައެއްކަހަލަ އާދައިގެ އެކްސަސައިޒްތަކުން ފްލެކްސިބިލިޓީ އިތުރުކުރެވިދާނެއެވެ.
ނަފުސާނީ ގޮތުން ދުޅަހެޔޮ މީހެއް ނަމަ، ކަންކަމުގައި ފަސްނުޖެހި، ބިރުކުޑަކަމާއެކު ކުރިމަތިލާނެއެވެ. ނަފުސާނީގޮތުން ހަށިގަނޑު ތަރައްގީކުރުމުގައި، ސިފައިން ހަދާ ޓްރޭނިންގތަކުގެ ތެރެއިން ސްޕެޝަލް ޓާސްކް ފޯސް ފަދަ ޓްރޭނިންގތަކުން މި ހުނަރު އިތުރަށް ހަރުދަނާ ކުރެވިދާނެއެވެ.
ޤަވާޢިދުން ކަސްރަތުކުރުމުން ދުޅަހެޔޮކަން އެތައް ގުނައެއް ރަނގަޅުވާނެއެވެ. ޤަވާޢިދުން ކަސްރަތު ކުރުމަކީ، ކޮންމެ ހަފުތާއަކު ވެސް ތިނެއް ނުވަތަ ހަތަރު ދުވަހު ކަސްރަތު ކުރުމެވެ. ކަސްރަތުކުރުމުގައި ކޮންމެ ފަހަރަކު 45-60 މިނެޓު ވާންދެން ކަސްރަތުކުރުމުން ފުދޭނެއެވެ. މިގޮތުން އެކި ފަހަރުތަކުގައި އެކިކަހަލަ ކަސްރަތުތައް ކުރުން ބުއްދިވެރިއެވެ. މިގޮތުން ދުވުން، ފެތުން، ބައިސްކަލު ދުއްވުން، ފަލިޖެހުންފަދަ ކަންތައްތައް ހިމެނިދާނެއެވެ. އަދި ހަމައެހެންމެ، ވެއިޓް ޓްރޭނިންގ ހެދުން، ސިޓްއަޕްސް، ޕުޝްއަޕްސް، ޗިންއަޕްސް، ރޯޕް ކްލައިންބިން ފަދަ ހަރަކާތްތަކަކީ ސިފައިންނަށް ކުރެވިދާނެ ވަރަށް ރަނގަޅު ކަސްރަތުތަކެވެ. ހަމައެހެންމެ، ކަސްރަތު ޕްރޮގްރާމެއް ފަށައިގެން ކުރިއަށްގެންދާއިރު، ކެއުމަށް ބެލުން ވެސް އެހާމެ މުހިންމެވެ. ތަރުކާރީއާއި މޭވާ ފަދަތަކެތި ކެއުން އާދަކުރުމާއި، ތެލުގެ ބާވަތްތައް މަދުކުރުމަކީ ކަސްރަތު ޕްރޮގްރާމެއް ފަށައިގެން ކުރިއަަށްދާއިރު ކުރެވިދާނެ ކަމެކެވެ.
މިހާރަކަށްއައިސް ކަނޑުމަތީގެ ހާދިސާތައް އަންނަނީ ދުވަހެއްދުވަހަކަށް އިތުރުވަމުންނެވެ. އެހެންކަމުން ފެތުމުގެ އުކުޅުތައް ތަރައްޤީކުރުމާއި، ލައިފްސޭވިންގ ސްކިލްސް އިތުރުކުރުން ވެސް ސިފައިންނަށް އެހާމެ މުހިންމެވެ. ހަމައެހެންމެ، އަލިފާނުގެ ހާދިސާތައް ވެސް ހިނގަނީ މަދެއްކޮށެއް ނޫނެވެ. މިފަދަ ހާދިސާތަކުން ރައްޔިތުން ސަލާމަތްކުރުމަށް ޓަކައި، ބިރުކުޑަވުމުގެ އިތުރުން، ތަންތަނަށް ހަލުވިކަމާއެކު އެރުމާއި، ބަރުސާމާނު އުފުލަންޖެހެއެވެ. އެހެންކަމުން ބުންވަރާއި، ސްޓްރެންތު އަދި އެޖިލިޓީ ރަނގަޅުވާން ޖެހެއެވެ. ޖުމުލަކޮށް ބުނާނަމަ ސިފައިންނަކީ، އޯވަރޯލްކޮށް ހުރިހާ ގުނަވަނެއް ވެސް ފިޓުކޮށް ތިބެންޖެހޭ ބައެކެވެ. އެހެންނޫންނަމަ، ދުއްވައިގަންނަން ބަލާއިރު ފައި ހަލާކުވެދާނެއެވެ. ނުވަތަ ބުންވަރު ނުހުރެދާނެއެވެ. ފަތަންބަލާއިރު ފިޓްނޫން މީހަކަށް ފެނުގެ މަތީގައި އޮވެވޭނީ މަދު ވަގުތުކޮޅަކުއެވެ. ކަންމިހެންއޮތްއިރު، މި ޤައުމު ދިފާޢު ކުރުމަށް އެންމެ މުހިންމީ ދުޅަހެޔޮ ސިފައިންނެވެ.
ކޮންމެ ސިފައިންގެ މީހަކީ ދުޅަހެޔޮ މީހަކަށް ވާންޖެހެއެވެ. އޭރުން މި ޤައުމުގެ ދިފާޢުގައި ދުޝްމިނުންގެ ކުރިމަތީގައި އައްޑަނައެއްގެ ގޮތުގައި މޭދިއްކޮށްލަން ތިބި ދިވެހި ސިފައިންނަކީ މުޅި ޤައުމު އެބައެއް ދެކެ ލޯބިވާ ބަޔަކަށް ވާނެއެވެ. ކަންމިހެން އޮތްއިރު ހުރިހާ ސިފައިން އަތާއި އަތް ގުޅާލައި، ފިޓް ބަޔަކަށް ވަމާތޯއެވެ!
