އަޙްމަދު ނިލާމް
ބަލަބަލާތިއްބާ ވަގުތު ފާއިތުވެގެން ދާލެއް ކިތަންމެހާ ވެސް އަވަހެވެ. ކުއްލިއަކަށް މި އިވުނީ ސިފައިންގެ ޚިދުމަތަށް 116 އަހަރު ފުރޭ ވާހަކައެވެ. ކޮންމެއަކަސް ދިވެހި ސިފައިންގެ މި މުއައްސަސާއަކީ މިހާ ދިގު މުއްދަތެއް ވޭތުކޮށްފައިވާ މުއައްސަސާއެއް ކަމުގައިވާއިރު، ޔަޤީނުން ވެސް ލައްކަ ގިނަ ކަންތައްތަކެއް ތަޖުރިބާކުރެވި، މާޒީއާ އެކުވެފައި ވާނެއެވެ. ކުރީގެ ތާރީޚު މާ ސާފުކޮށް އެނގެން ނެތްކަމުގައި ވީނަމަވެސް ސިފައިންގެ މި ދިގު ތާރީޚުގެ އެކި ދުވަސްވަރު ފަހަނައަޅައި މި ހިސާބަށް މިއައި ދިގު މުއްދަތުގައި، އެތައް ކަމެއް ފަހަށް ނޯޓުކުރެވި ރައްކާކުރެވިފައިވާކަން ކަށަވަރުކުރެއެވެ.
މި މުއްދަތު ގުނަމުން މި ހިސާބަށް އައިއިރު، ރާއްޖެއިން ބޭރުންނާއި ރާއްޖެއިން ކުރިމަތިކުރުވި އެތަކެއް ކަންތައްތަކެއް ހިނގައިގޮސް، އެ ކަންކަމުގައި ޤައުމީ މަޞްލަޙަތު ދެމެހެއްޓުމަށް މި އިދާރާއިން އެތައް ކަމެއް ކޮށްފައިވާނޭކަމާ މެދު އެއްވެސް ފަރާތަކުން ޝައްކެއް ނުކުރާނެއެވެ. އާދެ! އެ ކަންތައްތައް ލިޔުމެއްގެ ނުވަތަ ފޮތެއްގެ ސިފާގައި ގިނަ އަދަދަކަށް އެންމެންގެ ކުރިމައްޗަށް ނެރެވިފައި މިހާތަނަށް ނެތްނަމަވެސް ދާދި އަވަހަށް އެކަން ދިރާސާކުރައްވާ ފަރާތްތަކުންނާއި ލިޔުންތެރީންގެ ފަރާތުން އެފަދަ ލިޔުންތައް އެކި ސިފަސިފާގައި ނެރޭނޭކަމާ މެދު ޔަގީން ކުރެވެއެވެ.
މާބޮޑެތި ހަނގުރާމަތަކެއް އަވަށްޓެރީންނާއި ނުވަތަ އެހެން ބަޔަކާ ވެސް ކޮށްފައި ނެތްނަމަވެސް، ތާރީޚަށް ވަދެގޮސްފައިވާ ހުރިހާ ނުރައްކާތެރި ޙާލަތްތަކުގައި، ދިވެހި އަސްކަރީންނާއި ކުރިމަތިވި ކޮންމެ ކަމެއް އަދާކޮށްފައިވަނީ ވަރަށް ލާމަސީލު ނަމޫނާއެއްގެ ގޮތުގައެވެ. މިކަމަކީ އެކަކު ވެސް ދެބަހެއް ވާނޭ ކަމެއް ނޫނެވެ. އަދި، އެފަދަ ކަންތައްތަކާއި ދިވެހި އަސްކަރީ ސިފައިން ކުރިމަތިލާފައި ވަނީ ފިސާރި ކެރިގެންނެވެ. ވަރަށް ވެސް ސާބިތުކަންމަތީ ތިބެގެންނެވެ.
ސިފައިން މިހާތަނަށް ކުރިމަތިލާފައިވާ ކުރިމަތިލުންތަކުގައި މިހާތަނަށް ކުރިމަތިލާފައި ވަނީ އެ ވަގުތަކު ލިބެންހުރި ވަޞީލަތްތަކުގެ ބޭނުން ފުރިހަމައަށް ހިފައިގެން ފަސްޖެހުމެއްނެތި، ހުޝިޔާރު ކަންމަތީއެވެ. ތިމާއަށް ވުރެ ވާޖިބަށް އިސްކަންދީގެންނެވެ. ލިބިދާނެ ފައިދާއަކަށް ވުރެ ބޮޑަށް ކުރިމަތިވެދާނެ ނުރައްކަލަކަށް ވިސްނައިގެންނެވެ. ކޮންމެއަކަސް ވަރަށް ސާބިތުކަމާއެކުގައެވެ.
ބަޔާން ކުރެވިފައިވާ މުއްދަތު ކެތްތެރިކަމާއެކު ކަޑައްތުކުރުމަށްފަހު މިއަދު މިވަނީ އެހެން މަރުހަލާއަކަށް އާދެވިފައެވެ. މި ހިސާބަށް އާދެވުނުއިރު، އާދެވިފައިވަނީ ސިފައިންގެ ކިބައިގައި ނުހުންނަންވީ ކިތަންމެ ސިފަތަކެއް އަދި އާދަތަކެއް ހިފައިގެންނެވެ. އެފަދަ ސިފަތަކަކާއި އަދި އާދަތަކަކީ އެއްވެސް ފައިދާއެއް ތިމާއަށް، މުއައްސަސާއަށް އަދި ކިއެއްތަ ޤައުމަށް ވެސް ލިބޭނޭ ސިފަތަކެއް ނޫނެވެ. އެއިން ކޮންމެ ސިފައެއްގެ ފަހަތުގައި ވަނީ ގެއްލުމާއި ހަލާކެވެ.
މި ވަޠަނީ އިދާރާގެ ކުރިމަގު އުޖާލާކުރުމަށް ބޭނުންނަމަ، ސިފައިންނާ ނުގުޅޭ އަދި ނޭދެވޭ ހުރިހާ ސިފަތަކަކާއި، ވަކިވާން އެބަޖެހެއެވެ. ސިފައިން މިއަދު ވިސްނަން ޖެހިފައިވާ އެންމެ މުހިންމު އެއް ކަމަކީ، އަމިއްލަ ބޭނުންތައް ހާސިލުކުރުމަށް، އެކި ސިފަސިފާގައި މި މުއައްސަސާގެ ސަފުތައް ބައިކޮށް ރޫޅާލުމަށް ކުރަމުންދާ ބަޔަކު އެބަތިބި ކަމެވެ. މިފަދަ ފަރާތްތަކުން ކުރާ ކަންކަމަކީ ދިވެހިންނަކަށް އަދި ދިވެހި ސިފައިންނަކަށް ހެވަކަށް އެދިގެން އުޅޭ ބަޔަކު ކުރާނޭ ކަންތައްތަކެއް ނޫނެވެ. އެފަދަ ވަކިތަކުން މި މުއައްސަސާ ދުރުކޮށް ތިމާގެ ލޮބުވެތި ވަޠަން ރައްކާތެރިކޮށް ދެމެހެއްޓުމަށް އަބަދުވެސް ތިބެންވާނީ ތައްޔާރަށެވެ. މިއީ މިއަދު މި ވަޒީފާގައި ތިބި ކޮންމެ މީހެއްގެ ވާޖިބެއްކަމުގައި ދެކެން ވާނެވެ. އެކަމަކާ ކުރިމަތިލާ މައިތިރިކުރުމަކީ، އެވަގުތަކު ތިބި ބައެއްގެ ޒިންމާއެއްކަމުގައި ވެސް ދެކެންވާނެއެވެ.
ދިވެހި ސިފައިންނަށް އަމާޒުކޮށް، މާހައުލުގެ އެކި ބާޒާރުތަކަށް ވިއްކަމުންދާ ބަސްތަކަކީ ދިވެހި ސިފައިންނަށް ލިބިފައިވާ ތަމްރީނުގެ ޢަލީގައި އެއާ އެއްގޮތަށް ބަލައިގަންނާނޭ ބަސްތަކެއް ނޫނެވެ. އަދި ރުހި ޤަބޫލުކުރާނޭ ބަސްތަކެއް ވެސް ނޫނެވެ. މި ސަފުތަކުގެ ބަދަހިކަން އެއީ އެންމެންގެ ރައްކަލެއްކަން މިހާރުގެ ޢިލްމުވެރީންނަށް އެއްވެސް ގޮތަކުން އޮޅިގެންވާނޭ ކަމެއްކަމަށް ޤަބޫލެއް ނުކުރެވެއެވެ.
ކޮންމެއަކަސް ދިވެހި ސިފައިން 117 ވަނަ އަހަރީ އުފާ ލިބިގަންނާނީ ވަރަށް ވެސް ގަޔާވެ ތިބެގެންނެވެ. ކުރެވިފައިވާ ކަންތައްތައް ތަޖުރިބާއަށް ދޫކޮށްލުމަށްފަހު، އައު ކުރިމަގަށް ބޭނުންވާގޮތަށް މަގުތައް ކޮށަމުންނެވެ. ކުރިއަށްދާން އޮތްމަގު ހިތްވަރުލާ ކޮށައި އަލިކުރަމުންނެވެ. އައު ވިސްނުންތަކާއި ތަސައްވުރުތަކުގެ ޢަލީގައި މަޑުޖައްސާލުމެއް ފަސްއެނބުރި ބެލުމެއް ނެތިއެވެ.
