ޙުސައިން ޢަލީ
އެކުވެރިކަމަކީ ގަދަފަދަ ބާރެކޭ، ވަކިވެގަތުމަކީ ނިކަމެތިކަމެކޭ ބުނާ ވާހަކައަކީ ޒަމާނުއްސުރެ އަޅުގަނޑުމެންގެ ތެރޭގައި ވަރަށް އާންމު މުޙާވިރާއެކެވެ. މި ބަހުގެ މުރާދަށް ވިސްނާލާއިރު ދޭހަވަނީ އެކުއުޅުމުގެ ބޭނުންތެރިކަމެވެ. އަދި ވަކިވަކިން އުޅުމަކީ ނިކަމެތިކޮށްލާ ކަމެއްކަމެވެ. މިއީ ދޭހަވުމަށް ކިތަންމެ ފަސޭހަ ބަސްކޮޅެއްކަމުގައި ވިއަސް، ޢަމަލީގޮތުން މިކަންކަމާ ކުރިމަތިލައިފިނަމަ، އެކަމުން އުފާވެރިކަމާއި ހިނިތުންވުން ގެނެސްދޭފަދަ ކަމެކެވެ. އަދި ހިތާމައާއި ވޭނާއި ހާސްކަމުން މުޅިމީހާ ވީރާނާކޮށްލުވާ ފަދަ އެއްޗެއް ވެސް މެއެވެ. މިއީ ފަރުދީ ގޮތުން ވިއަސް، އަދި ޖަމާޢަތުގެ ނަޒަރަކުން ބެލިކަމުގައި ވިއަސް މިކަން އޮތްގޮތެވެ. މި ކަމަކީ މުޅި އިންސާނިއްޔަތަށް އެކަމުގެ އަސަރުކުރާ ކަމެކެވެ. އެހެންނަމަވެސް މި ކަމުގެ އަސަރުކުރާ ނިސްބަތް ތަފާތެވެ. މި އަސަރު އެކި މީހުންނަށް ކުރަނީ އެކި ވަރަށެވެ. އަދި ހާލާތާ ގުޅޭގޮތުން މިކަމުގެ އަސަރުކުރާ މިންވަރު ވެސް ތަފާތެވެ. ދެބަސްވެވެން ނެތް ކަމަކީ އެކުވެރިކަމުގައި ހުރި އާރާއިބާރު ވަރުގަދަކަމެވެ. އެކުވެރިކަމާއި ކާމިޔާބާ ހުރި ގުޅުމުގެ ހަރުދަނާކަމެވެ. އެކުވެރިކަމުގެ ގަދަފަދަކަމަކީ އެކަތައަށް ވެސް ނުގުޑާފަދަ ގަދަފަދަ ކަމެކެވެ.
އަސްކަރިއްޔާގައި އެކުވެރިކަން
ދުނިޔޭގެ ހުރިހާ މުއައްސަސާތަކަށްވުރެ، އަސްކަރިއްޔާގައި ދޭދޭ މީހުންގެ މެދުގައި އޮންނަ ގުޅުން ހަރުދަނާވެފައި ބަދައްސެވެ. އަސްކަރިއްޔާތަކުގައި މިކަން ފެށިގެން އަންނަނީ އެމީހުންގެ ތަމްރީނުގެ އެންމެ ފުރަތަމަ މަރުޙަލާއިން ފެށިގެންނެވެ. އަދި ޚިދުމަތުގައި ދެމިހުރިހާ ދުވަހަކު އެ ގުޅުން ދެމެހެއްޓުމަށް ޓަކައި މަގުފަހިވެފައިވެއެވެ. އަދި ޚިދުމަތުން ޝަރަފުވެރިކަމާއެކު ވަކިވާ ފަރާތްތައް ވެސް އަސްކަރިއްޔާގެ ޗޭނުން ވަނީ ގުޅާލެވިފައެވެ. އަދި މި ޗޭނުގެ ސަބަބުން މި ދެންނެވި ގުޅުން ބަދަހިކޮށް ދެމެހެއްޓޭނެ ގޮތްތައް ވަނީ ހޯދައިދީފައެވެ.
ތަމްރީނުތަކުގެ ފުރަތަމަ މަރުޙަލާގައި ވެސް ސިފައިންނަށް އެންމެބޮޑަށް ބާރުއަޅައިދޭ އެއްކަމަކީ ކޮންމެ ކަމެއް ކުރިކަމުގައި ވިއަސް އެކަމެއް ކުރާ ބައެއްގެ މެދުގައި އެކުވެރިކަމުގެ ރޫޙު އަށަގެއްނެވުމާއެކު އެކުވެރިކުރުމަށެވެ. އަދި ލީޑަރުން މިކަމަށްދޭ އަހައްމިއްޔަތު ވަރަށް ބޮޑެވެ. ލީޑަރޝިޕްގެ އަސާސްތަކުގެ ތެރެއިން އެއް އަސާސެއްގައި ބުނަނީ، އަބަދުވެސް ޓީމެއްގެ ގޮތުގައި ތަމްރީނުކުރުމަށެވެ. އެއީ އެކަމުގެ މުހިންމުކަމާއި ބޭނުންތެރިކަމުގެ ބޮޑުކަމުންނެވެ. އެކަމުގެ ސަބަބުން ނަތީޖާ ޙާޞިލުކުރުމުގެ މަގު ތަނަވަސްވެގެންދާތީއެވެ.
އަސްކަރިއްޔާއާ ގުޅުމަށްފަހު އޭނާގެ ވެށިން ލިބޭ ރައްޓެހި ރަޙުމަތްތެރިން، ނުވަތަ އެކުގައި މަސައްކަތްކުރާ މީހުންނަކީ ޢާއިލާއެއްގެ ގޮތުގައި ދެމިތިބޭ މީހުންނެވެ. އެއްބަޑުއެއްބަފާ ބައެއްގެ ގޮތުގައި ކުރިއަށްދާ މީހުންނެވެ. ކުރިމަތިވާ ކޮންމެ އޮޅިއެއް ވެސް ގިރާކުރަނީ އެކުގައެވެ. އުފުލަންޖެހޭ ކިތަންމެ ބޮޑު ވޭނެއް ވިއަސް އެންމެން އެއްކޮށް ޙިއްސާކުރެއެވެ.
ތާރީޚުން ލިބޭ ޢިބުރަތް
މާތްވެގެންވާ އިސްލާމްދީނަކީ އެކުވެރިކަމާއި އެއްބައިވަންތަކަމަށް ގޮވާލާ ދީނެކެވެ. އަދި ދިވެހިންނަކީ އެކުވެރިކަމާއި އެއްބައިވަންތަކަމަށް ލޯބިކުރާ ބައެކެވެ. އިސްލާމީ ތާރީޚުންނާއި ދިވެހި ތާރީޚުން ވަރަށް ރަނގަޅު ފިލާވަޅުތައް ލިބެން އެބަހުއްޓެވެ. މަޝްހޫރު ބަދުރު ހަނގުރާމައިގައި ކާފިރުންގެ ޢަދަދު އެހާ ގިނަވެ، މުސްލިމުންގެ ޢަދަދު ކިތަންމެ މަދުނަމަވެސް، މުސްލިމުންނަށް ލިބުނު ނަޞްރާއި ފަތަޙައަކީ މުސްލިމުންގެ މެދުގައި އޮތް ގުޅުމެވެ. އެމީހުންގެ މެދުގައި އޮތް އެކުވެރިކަމުގެ ވަރުގަދަ ރޫޙެވެ. ގުޅިގެން މަސައްކަތްކުރުމުގެ ޖޯޝާއި ފޯރިއެވެ.
މަދީނާގައި ކީރިތި ރަސޫލާ ޤާއިމު ކުރެއްވި ޤައުމިއްޔަތަކީ އެފަދަ ދެވަނައެއް ނެތް ފަދަ ޤައުމިއްޔަތެކެވެ. މިހާތަނަށް ވެސް ދުނިޔޭގައި އެފަދަ ޤައުމިއްޔަތެއް ބިނާކުރެވިފައެއް ނުވެއެވެ. މިކަމުގެ ސިއްރަކީ މާތް ރަސޫލާ ގެންގުޅުއްވި ހަރުދަނާ ސިޔާސަތާއި މުސްލިމުންގެ މެދުގައި އޮތް ބަދަހި އެކުވެރިކަމެވެ. އޭރުވެސް އަދި މިހާރު ވެސް އެފަދަ ޤައުމިއްޔަތެއް ދުނިޔޭގެ އެއްވެސް ޤައުމަކުން ފެންނަމުން ނުދާކަމީ ޤަބޫލުކުރަންޖެހޭ ޙަޤީޤަތެކެވެ.
ދިވެހި ތާރީޚުން ވެސް މިކަމުގެ އަލިގަދަ މިސާލުތައް ފެންނަން އެބަހުއްޓެވެ. ދިވެހިންގެ މިނިވަންކަން ދެމެހެއްޓުމުގައި ދިވެހިންގެ އެކުވެރިކަމާއި އެއްބައިވަންތަކަމަކީ ދިވެހިން ބޭނުންކުރަމުން އަންނަ އެންމެ ވަރުގަދަ ހަތިޔާރެވެ. އަދި ދިވެހިންގެ މިނިވަންކަން ގެއްލިފައިވާ ޙާލަތްތަކުގައި، އެ މިނިވަންކަން އަލުން އަނބުރާ ހޯދުމުގައި ވެސް ދިވެހިން ދައްކައިދީފައިވަނީ އެކުވެރިކަމާއެކު މަސައްކަތްކޮށްފިނަމަ، އެކުވެރިކަމަކީ ކާމިޔާބުގެ އެންމެ ބޮޑު ރަޙުމަތްތެރިޔާ ކަމެވެ. މަލަބާރީންނާއި ހޮޅީންގެ ކިބައިން ރާއްޖެ ސަލާމަތްކުރުމުގައި ދިވެހިންގެ އެއްބައިވަންތަކަން ހާމަވެފައިވެއެވެ. ޕޯޗްގީޒުން ރާއްޖޭގައި ކުރި އަނިޔާވެރި ވެރިކަމުން ސަލާމަތްކުރުމަށް ޓަކައި ބޮޑުތަކުރުފާނު ކުރެއްވި ޤައުމީ ޖިހާދުގައި ދިވެހި ރައްޔިތުން ތަމުސީލުކޮށްދީފައި ވަނީ ކެތްތެރިކަމާއި އެއްބައިވަންތަކަމުގެ ހަރުދަނާ އުޞޫލުތަކެވެ. ދިވެހިންގެ މިނިވަންކަމާއި ސިޔާދަތާއި އިސްތިޤުލާލު ރައްކާތެރިކުރުމަށް ޓަކައި ދިވެހިން ފެންބޮވައިގެންފައިވާ މިންވަރެވެ. އަދި އެ ކަންކަން އަނބުރާ ހޯދުމަށް ޓަކައި ދިވެހިން އެކަތިގަނޑެއްގެ ގޮތުގައި ދައްކުވައިދީފައިވާ ފުރިހަމަ ނަމޫނާއެވެ.
ސިފައިންގެ ތާރީޚުން
ސިފައިންނަކީ ވަރަށް ދިގު ތާރީޚެއް އޮތް ބައެކެވެ. 116 ވަނަ އަހަރުގެ އުފާވެރި މުނާސަބާ ފާހަގަކުރަމުންދާއިރު ސިފައިންގެ މާޒީގައި ވަރަށް ގިނަގުނަ ކާމިޔާބީތަކެއް ޙާޞިލުކޮށްފައިވެއެވެ. މި ކާމިޔާބީތަކުގެ އަސާސަކީ ވެސް އަދި ސިއްރަކީ ވެސް ގުޅިގެން މަސައްކަތްކުރުމެވެ. މަޤްޞަދު ޙާޞިލުކުރުމަށް ޓަކައި ކޮށްފައިވާ ކޮންމެ މަސައްކަތަކުން ވެސް ފާޅުވެގެން ގޮސްފައިވަނީ ސިފައިންގެ ތެރޭގައި އޮންނަ އެކުވެރިކަމާއި އެއްބައިވަންތަކަމެވެ. އެއީ ސިފައިންގެ މަސްޢޫލިއްޔަތާއި ވާޖިބާއި ސީދާ ގުޅުންހުރި ކަމެއްކަމުގައި ވިއަސް، އަދި ޖަމާޢަތުގެ ފައިދާއަށް ކުރާކަމެއް ކަމުގައި ވިއަސްމެއެވެ. މިގޮތުން ތާރީޚުން މިކަހަލަ ވަރަށް ގިނަ ކަންތައްތައް ފެންނަން އެބަހުއްޓެވެ.
އިޖުތިމާޢީ ތަރައްޤީއާއި ޖަމާޢަތުގެ ފައިދާއަށް ސިފައިން ކޮށްފައިވާ ވަރަށްގިނަ ކަންތައްތަކެއް އެބަހުއްޓެވެ. މިގޮތުން 1950 ގައި ރާއްޖެއަށް ކުރިމަތިވި ބޮޑުރޯގާގައި ރައްޔިތުންނަށް އެހީތެރިވުމަށް ޓަކައި ސިފައިން ކޮށްފައިވާ މަސައްކަތްތަކާއި، މާލޭގެ ބިން ހިއްކުމަށްޓަކައި 1979 ވަނައަހަރު ވެލި ހަދިޔާކުރުމަށް ސިފައިން ކޮށްފައިވާ މަސައްކަތް ފާހަގަކޮށްލަމެވެ. އަދި މާލޭގެ މަގުތައް ހެދުމަށްޓަކައި 1987 ވަނަ އަހަރު އަކިރި ހަދިޔާކުރުމަށް ކުރެވުނު މަސައްކަތުގެ އިތުރުން، ރާއްޖޭގެ އެއަރޕޯރޓްތައް ހެދުމުގައި ވެސް ދިވެހި ސިފައިން ވަނީ ވަރަށްބޮޑު ދައުރެއް އަދާކޮށްފައެވެ. މީގެ އިތުރުން އެއިޑްސްއާއި މަސްތުވާތަކެތީން ޒުވާނުން ހޭލުންތެރިކުރުމަށް ޓަކައި 1992 ވަނައަހަރު ހިންގި ޕްރޮގްރާމްތަކާއި، އާސާސްކަފަށް މަރުޙަބާކިއުމުގެ ގޮތުން 1999 ވަނަ އަހަރުގެ ފަހުކޮޅު ހިންގުނު ޕްރޮގްރާމްތަކާއި، ލޭ ހަދިޔާކުރުމަށް ޓަކައި 2000 ވަނައަހަރު ހިންގުނު ޙަރަކާތްތައް ޚާއްޞަގޮތެއްގައި ފާހަގަކޮށްލަން ޖެހެއެވެ. މީގެ އިތުރުން ވެސް އިޖުތިމާޢީ ވަރަށްގިނަ ކަންތައްތަކެއްގައި ސިފައިން ވަނީ ރައްޔިތުންގެ ލާބައާއި މަންފާއަށް ޓަކައި ރައްޔިތުންނާ ގުޅިގެން ކޮށްފައެވެ. އަދި ގުޅިގެން ކުރި މަސައްކަތްތަކުގެ ނަތީޖާއިން އެ މަސައްކަތްތަކުގެ މަޤްޞަދު ވެސް ސިފައިން ވަނީ ވަރަށް ފުރިހަމައަށް ޙާޞިލުކޮށްފައެވެ.
ތަމްރީނުތަކުގައި ދެވޭ އަހުމިއްޔަތު
ފުރިހަމަ ސިފައިންގެ މީހަކަށް ވެގެން ދަނީ އަސާސީ ތަމްރީނު ހަދާ ހިސާބުން ފެށިގެންނެވެ. ތަފާތު ވިސްނުމާއި ޚިޔާލާތުގެ ކުދިންތަކެއް އެއް ތަނަކުން، އެއް މުޤައްރަރަކަށް، އެއް މިންގަނޑަކުން ކިޔަވައިދީ އެ ކުދިންގެ ވިސްނުން އެއް ދިމާލަކަށް އަމާޒުކުރުމަށް ޓަކައި ދެވޭ ތަމްރީނުތަކަކީ ފުރިހަމަ ސިފައިންގެ މީހެއްގެ އެންމެ ފުރަތަމަ ބިންގާއެވެ. މި ތަމްރީނުގައި އަސްކަރީ ޢިލްމާއި ޙިލްމުގެ އިތުރުން އަދަބު އަޚުލާޤާއި ސުލޫކު ވެސް ދަސްކޮށްދެވެއެވެ. މިކަމުގެ ސަބަބުން ސިފައިންގެ މީހާއަށް ފައިދާވެގެން ދަނީކީ ހަމައެކަނި އޭނާގެ ސިފައިންގެ ޙަޔާތަކަށް ނޫނެވެ. އަމިއްލަ ދިރިއުޅުމުގައި ވެސް އޭނާއަކީ ހަރުދަނާ މީހަކަށް ވުމުގެ މަގު ކޮށިގެންދެއެވެ. ނަތީޖާއެއްގެ ގޮތުން މުޖުތަމަޢުގައި ޤަދަރުވެރި މީހަކަށް ވެސް ވެގެންދެއެވެ. މި ހުރިހާ ކަމެއް މިހެން ހުރިއިރު، އެކުވެރިކަމާއެކު، ގުޅިގެން އުޅުމުގެ ރޫޙު އަށަގެންނެވުމަށް ތަމްރީނުތަކުގައި ވަރަށް ބޮޑު އަހުމިއްޔަތެއް ދެވެއެވެ. ތަމްރީނުގެ އެންމެ ފުރަތަމަ މަރުޙަލާގައި ވެސް، ގެމައާއި ބިސީތައް ހަދާ، އެކަކު އަނެކަކަށް އެހީތެރިވެ، ބަރޯސާވުމުގެ ފުރުޞަތު ތަނަވަސްކޮށްދެއެވެ. އަދި ގުޅިގެން މަސައްކަތް ކުރުމުގެ ރޫޙާއި ޖޯޝް އުފެއްދުމަށް ޓަކައި ތަފާތު ޙަރަކާތްތައް ރާވައިގެން ކުރިއަށް ގެންދެއެވެ. މިކަމުގެ ނަތީޖާ ވެސް އިންތިހާއަށް ރަނގަޅެވެ.
އަޅުގަނޑުމެންނަކީ މިހާރު ވެސް ކަމެއް ދިމާވާއިރު، ގުޅިގެން މަސައްކަތްކުރާ ބައެކެވެ. އަދި އެފަދަ ޙާލަތެއް ދިމާވެއްޖެނަމަ، އެ ވަގުތަކު މަސައްކަތްކުރުމަށް ހަމަޖެހިފައިވާ ބަޔަކާއެކު މަސައްކަތްކުރުމަކީ އެއްވެސް ދަތިކަމެއް ނުވަތަ ނުތަނަވަސްކަމެއް އިޙުސާސްކުރަންޖެހޭ ވެސް ކަމެއް ނޫނެވެ. އެކަމަކީ އަބަދުވެސް އަޅުގަނޑުމެން ހޭނިފައިވާ ކަމެކެވެ. އަދި އަޅުގަނޑުމެން އަބަދުވެސް ތިބެނީ އެފަދަ ކަމަކަށް ތައްޔާރުވެގެންނެވެ. އެއީ އަޅުގަނޑުމެން ހުރިހާ ސިފައިންގެ ވެސް އަމާޒަކީ އެއް އަމާޒެކެވެ. މަޤުޞަދަކީ އެއް މަޤުޞަދެކެވެ. އެއީ އަޅުގަނޑުމެންނަށް ޤައުމުން ޙަވާލުކޮށްފައިވާ މަސްއޫލިއްޔަތާއި ވާޖިބު އެންމެ ފުރިހަމަގޮތުގައި އަދާކުރުމެވެ. އަދި އަޅުގަނޑުމެން ހިތްވަރު ލިބިގަންނަނީ އަޅުގަނޑުމެންގެ ޤައުމު އަޅުގަނޑުމެންނަށް ދީފައިވާ ޢިއްޒަތާއި ޝަރަފުންނެވެ. އަދި ދިވެހި ލޮބުވެތި ރައްޔިތުން އަޅުގަނޑުމެންނަށް ދެއްވާފައިވާ ފުރިހަމަ އިތުބާރާއި ޔަޤީންކަމުންނެވެ.
މިއީ ސިފައިންގެ އަސާސް
ދިވެހި ސިފައިންގެ އަސާސަކީ ގުޅިގެން މަސައްކަތްކުރުމެވެ. މިއީ އަޅުގަނޑުމެން އަބަދުވެސް އެ ކަމެއްގައި ޤާއިމުވެގެން ތިބޭނެ ކަމެކެވެ. އަދި މިއީ ސިފައިންގެ ހުރިހާ ފަންތިއެއްގައި ވެސް ހިތުގެ އަޑީން ޤަބޫލުކުރާނެ ކަމެކެވެ. އަޅުގަނޑުމެންގެ ތެރޭގައި އަބަދުވެސް އޮންނަންޖެހޭނީ ވަރަށް އެކުވެރި ބަދަހި ގުޅުމެކެވެ. އެއްވެސް ނުފޫޒަކަށް އަޅުގަނޑުމެންގެ ސަފުތައް ތޮރުފާލެވިގެން ނުވާނެއެވެ. އަޅުގަނޑުމެންގެ ސަފުތައް ވަރުގަދަ ބަދަހިގުޅުމަކުން ގުޅިގެން ތިބެއްޖެނަމަ، ކިތަންމެ ވަރުގަދަ ބާރަކަށް ވިއަސް، އަޅުގަނޑުމެންގެ ސަފުތަކުގެ ތެރެއަށް ވަދެގަތުމަކީ މުސްތަޙީލް ކަމަކަށް ނޫނީ ނުވާނެއެވެ. އެހެންނަމަވެސް މި ސަފުތަކުގެ ބަދަހިކަމަށް ފާރަލައިގެން ތިބި ހަހުރަޔާތައް ވަރަށް ގިނައެވެ. ފިކުރީ ހަނގުރާމައިގެ އޮއިވަރުގައި އަޅުގަނޑުމެން ޖައްސައިގެން އަޅުގަނޑުމެންގެ ސިކުނޑިއާ ކުޅެލަން މަސައްކަތްކުރާ މީހުން ތިބިކަން އަޅުގަނޑުމެން ދަންނަން ޖެހޭނެއެވެ. އެމީހުންނާ މެދު އަޅުގަނޑުމެން ތިބެންޖެހޭނީ ވަރަށް ހުޝިޔާރުވެގެންނެވެ. މި ކަންކަންމުން މިންޖުވެވޭނީ ގުޅިގެން މަސައްކަތްކުރުމުގެ ވަރުގަދަ އަސާސްގައި ސާބިތުކަމާއެކު ތިބެގެންނެވެ.
ނިންމުން
“ސަފުތަކުގެ ބަދަހިކަމަކީ ކާމިޔާބުގެ ސިއްރު”، މިއީ ސިފައިންގެ ސަތޭކަ ސޯޅަވަނަ އަހަރަށް ކަނޑައަޅާފައިވާ ޝިޢާރެވެ. މިއީ ސިފައިންނަށް ލިބިދޭ ވަރަށް މުހިންމު މެސެޖެކެވެ. ވަރަށް އަގުހުރި ދަރުސްތަކެއް ލިއްބައިދޭ މެސެޖެއް ވެސް މެއެވެ. ހަމައެއާއެކު މި ޝިޢާރު ސިފައިންގެ ތެރެއަށް މިއައީ އެކަމަށް އެންމެ އެކަށީގެންވާ ވަގުތުކަމުގައި ޤަބޫލުކުރަންޖެހެއެވެ. މި ދަނޑިވަޅުގައި މި ޝިޢާރު އަޅުގަނޑުމެންނަށް މިއައީ ވަރަށް މަތިވެރި މަޤްޞަދެއްގައި ކަމީ އެއްވެސް ޝައްކެއް އޮތް ކަމެއް ނޫނެވެ. އަދި މި ޝިއާރު ކަނޑައެޅުމަކީ ސިފައިންގެ އެންމެ ކުރީ ސަފުގައި ތިއްބެވި ބޭފުޅުންގެ ވަރަށްބޮޑު ޙިކުމަތު ޢަމަލީއެކެވެ. އެހެންކަމުން މި ޝިޢާރުން ޢިބްރަތް ލިބިގަނެ، މިއާ އެއްގޮތަށް އަޅުގަނޑުމެންގެ ޢަމަލުތައް ބައްޓަންކުރުމަކީ ކޮންމެހެން ލާޒިމު ކަމެކެވެ. އެއީ އަޅުގަނޑުމެންގެ މަސްޢޫލިއްޔަތާއި ވާޖިބު އަދާކުރުމުގައި ސާބިތުވެ ތިބުމަށް ޓަކައެވެ. ނަފުސަށްވުރެ ޤައުމު އިސްކޮށްގެން އަޅުގަނޑުމެންގެ މަސައްކަތުގައި އިޚުލާޞްތެރިކަންމަތީ ދެމިތިބުމަށް ޓަކައެވެ. އަޅުގަނޑުމެންގެ ހަހަރުވެތި ޤައުމާއި ރައްޔިތުންގެ ވަފާތެރި ޚާދިމުންގެ ގޮތުގައި ތަމުސީލުކޮށްދިނުމަށް ޓަކައެވެ. ދިވެހި ސިފައިންގެ ޝަރަފާއި ޝަޚުސިއްޔަތު ދެމެހެއްޓުމަށް ޓަކައެވެ.
