ޢަބްދުﷲ ސަޢީދު
ދުނިޔޭގެ ހުރިހާ ހިސާބެެއްގައި ވެސް ހަނގުރާމަ ދަނީ ކުރެވެމުންނެވެ. ބައެއް ހިސާބުތަކުގައި ކުރެވޭ ހަނގުރާމަތަކުގެ އަޑު ގަދައެވެ. އަނެއްބައި ހިސާބުތަކުގައި ކުރެވޭ ހަނގުރާމަތަކުގެ އަޑު މަޑެވެ. އަދި ބައެއް ހަނގުރާމަތަކުގެ އަޑު އެއްގޮތަކަށް ވެސް ދުނިޔެއަށް ނީވުން ވެސް އެކަށީގެންވެއެވެ. ދުނިޔޭގައި ހަނގުރާމަ ކުރެވެމުން އަންނަ ގޮތަށް ބަލާއިރު އެއްދުވަހުން އަނެއްދުވަހަށް ކުރެވޭ ހަނގުރާމަތަކުގެ ނުރައްކާތެރިކަމާއި ބިރުވެރިކަން ބޮޑުވަމުންދާކަން ފާހަގަކުރެވެއެވެ. އަދި ހަމައެއާއެކު ހަނގުރާމަތަކާ ދެކޮޅަށް ނުވަތަ ލޭއޮހޮރުވުންތަކާ ދެކޮޅަށް އެކުލަވާލެވޭ މުއާހަދާތަކާއި އެއްބަސްވުންތައް ވެސް އިތުރުވަމުންދެއެވެ. ދުނިޔޭގައި ކުރެވޭ ކޮންމެ ހަނގުރާމައަކުން ވެސް ލިބެމުންދަނީ ފޫނުބެއްދޭވަރުގެ ބޮޑެތި ގެއްލުންތަކެވެ. އިންސާނުން އަމިއްލަައަށް އުފައްދާ ތަރައްޤީކުރާ ހަތިޔާރުން އިންސާނުން ފަނާކުރަމުން ދާދިއުމަކީ އިންސާނުންނަށް ދެއްވާފައިވާ ބުއްދީގެ ނިޢުމަތުގެ ބޭނުން އިންސާނުން ނުހިފާ ކަމުގެ ދަލީލެކެވެ.
ފުރަތަަމަ ބޮޑުހަނގުރާމަ ނިމުމުން ދެވަނަ ފަހަރަށް އެފަދަ ބިރުވެރި ހަނގުރާމައަކަށް ފުރުޞަތު ނުދިނުމަށް ދުނިޔޭގެ ޤަައުމުތަކުން ވައުދުވިއެެވެ. ނަމަވެސް އެ ވައުދުގެ މަތީގައި ދުނިޔެއަކަށް ނޯވެވުނެވެ. ފުރަތަމަ ބޮޑުހަނގުރާމައަށް ވުރެ އެތައް ގުނައެއް ބިރުވެރިކޮށް ދެވަނަ ބޮޑުހަނގުރާމައިގެ ތަޖުރިބާ ދުނިޔެ ކުރިއެވެ. ހަނގުރާމައިގެ ޖަރީމާތަކާއި އިންސާނިއްޔަތުކަން އިންސާނާ ދުވަހަކު ވެސް ނުދެކޭފަދަ ދަށު ދަރަޖައިގެ މަންޒަރުތަކެއް އެ ހަނގުރާމައިން ފެނިގެން ދިޔައެވެ.
ދެވަަނަ ބޮޑުހަނގުރާމަ ނިމުމުން ދުނިޔޭގެ ޤައުމުތައް ކުރިޔަށްވުރެ ވަަރުގަދަ އަޒުމެއް ކަނޑައެޅިއެވެ. ޔުނައިޓެޑް ނޭޝަންސްގެ ނަމުގައި ބައިނަލްއަގުވާމީ އިދާރާއެއް ޤާޢިމްކުރެވި އިންސާނިއްޔަތަށް ފެން ދެވެން ފެށުމުން ދުނިޔެ ހީކުރީ ދުނިޔޭގެ ބިމުން ލޭކޯރުތައް ދެމުން ހުއްޓުނީ ކަމަށެވެ. ނަމަވެސް އެކަންވީ އެހެނެއް ނޫނެވެ. ފާޑުފާޑުގެ މުއާހަދާތަކާއި ކޮންވެންޝަންތަކާއި ޤަރާރުތަކާއި ހަމަތަކާއި އުޞޫލުތައް ހަމަޖެއްސި، އެގޮތްގޮތް ގިނަ ޤައުމުތަކުން ޤަބޫލުކުރިޔަސް އެ ކަންތައްތަކަކަށް ޢަމަލުކުރެވޭތީއެއް ނުފެނެއެވެ. ދެވަނަ ބޮޑުހަނގުރާމައިގެ ފަހުން ހިނގާފައިވާ ލޭއޮހޮރުވުންތަކާއި ނަޞްލު ނައްތާލުމުގެ މަސައްކަތްތަކަށް ބަލާއިރު ދުނިޔޭގައި އެއްދުވަހުން އަނެއްދުވަހަށް ލޭއޮހޮރުވުން އަންނަނީ ބޮޑުވަމުން، ބިރުވެރި ވަމުންކަން އެނގެއެވެ.
އެކާވީސް ވަނަ ޤަރުނަށް ދުނިޔެ ކުރިމަތިލީ ވަރަށް ފޮނި އުއްމީދުތަކާ އެކުގައެވެ. މިއީ “ސުލްޙައިގެ ޤަރުނު” ކަމަށް ބުނަމުން ދުނިޔޭގެ ލީޑަރުން މުޅިން އާ ސާސްކަފަކާ އެކު ފެށި އެކާވީސް ވަނަ ޤަރުނުގައި މިހާރު ތަމްސީލުވަމުންދާ ހަނގުރާމަތަކުން ފެންނަނީ ކުރިޔަށް ވުރެ ވެސް ބިރުވެރިކަމެވެ. ނާމާންކަމެވެ.
އިންސާނުން ދުނިޔޭގައި ހަނގުރާމަކުރަނީއެވެ. އިންސާނުންގެ އަތްތަކުން އެމީހުންގެ މަސައްކަތުން އިމާރާތްކުރި ބިނާތައް ސުންނާފަތި ކުރަނީއެވެ. އިންސާނުން އަމިއްލައަށް އިންސާނުން މަރަނީއެވެ. މި ކަންތައްތައް ލޮލުގެ ކުރިމަތީގައި ތަމުސީލުވަމުންދާއިރު އިންސާނާގެ ލޮލަކަށް އެ މަންޒަރުތަކެއް ފެންނަ ކަމަކަށް ނުވެއެވެ. ވަލުޖަނަވާރުތައް ލޯބިން އޮޅުކޮށްގެން ގެންގުޅޭއިރު އެ ތަކެތީގެ ގައިގައި ފިރުމަމުން ގޭގޭގެ ސިޓިންގރޫމްތަކުގައި ތިބެގެން ޓީވީތަކުން ބަލަނީ އިންސާނުން އިހާނެތި ގޮތްްގޮތަށް މަރާ މަންޒަރުތަކެވެ. ހަނގުރާމަކުރެވޭ މަންޒަރެވެ. ތިމާގެ ދަރިން ވިޔާނުދާ ކުދިންނަށްވެ މަގުގެއްލިގެން ދާއިރު އެ ކަންތައްތަކަށް ދެވޭ ސަމާލުކަން ކުޑަވެއެވެ. އެކަމަކު އޮޅުކޮށްގެން ގެންގުޅޭ ޖަނަވާރަށް ކިރިޔާ ކަމެއްވިޔަސް ދެރަވެ ހިތާމަކުރާނެއެވެ.
އިންސާނުން އިންސާނުންނާ މެދު ކަންތައްތައް ކުރާ ގޮތްތަކުގެ މަންޒަރު އަބަދާއިއަބަދު ދުނިޔޭގެ، ލޯތަކަށް ދަނީ ފެންނަމުންނެވެ. އެކަމަކު އެކަމުން އަސަރުކުރާ މީހުން ދުނިޔޭގައި މަދެވެ. ޚާއްޞަކޮށް މުސްލިމުންނާ ދެކޮޅަށް ހިންގޭ ޖަރީމާތައް ފެންނަ ލޯތައް މަދެވެ. ފަލަސްތީނާއި ކަޝްމީރާއި ޢިރާޤާއި އަފްޣާނިސްތާން އަދި ޗެޗްނިޔާފަދަ ޤައުމު ޤައުމުގައި ފެންނަމުންދާ މަންޒަރުތަކުން ދުނިޔޭގަައި އިންސާނުން ކުރަމުންއައި ހަނގުރާމައިން ލިބުނު ފިލާވަޅެއް ނެތްކަން އެނގެއެވެ.
