އަޙްމަދު ޝާޒް
ދައުވާކުރެވޭ މުޙިންމު ނުކުތާތައް:
- އެތައް ހާސް ފުރާނައެއް ދުނިޔެއަށް އައުމުގެ ކުރިން ދުނިޔެއާ ވަކިކުރުމުގެ ކުށުގެ ދައުވާ
- ގަވާއިދާ ޚިލާފަށް ޕާސްޕޯޓެއް، ވިސާއެއް ނެތި ޤައުމުތަކަށް އަރާ ފޭބުމުގެ ކުށުގެ ދައުވާ
- އިންސާނުން އަޅުވެތިކުރުމުގެ ކުށުގެ ދައުވާ
- ގަވާއިދާ ޚިލާފަށް ތަންތާގައި ހުޅުޖަހައި ރޯކުރުމުގެ ކުށުގެ ދައުވާ
- ޓީބީއާއި ކެންސަރު އިންސާނުންނަށް ހަދިޔާކުރުމުގެ ކުށުގެ ދައުވާ
ދައުވާ ލިބޭ ފަރާތުން 12 އޮކްޓޫބަރު 1997މ. ދުވަހު ތަޙްޤީޤަށް ދީފައިވާ ބަޔާން
އަޅުގަނޑު ދުންފަތް (ޓޮބެކޯ) އަކީ އުމުރުން ވަރަށް ދުވަސްވެފައިވާ މީހަކީމެވެ. އަޅުގަނޑުގެ އަސްލު ވަޒަނަކީ އެމެރިކާއެވެ. އޭރު އަޅުގަނޑު އުމުރުން ވަރަށް ހަގުވާނެއެވެ. އަދި ދުނިޔެއަށް ވެސް ވަރަށް އާވާނެއެވެ. އޭރު އަޅުގަނޑުގެ ފުށުން އަރާމާއި އުފާ ލިބިގަންނަމުން ދިޔައީ އެ ޤައުމުގައި އުޅުނު ރެޑް އިންޑިއަންސްއޭ ކިޔާ ބަޔަކު އެކަންޏެވެ. އެމީހުންނަށް އޭރު ހީވެފައި އޮތީ އަޅުގަނޑުގެ ސަބަބުން ބަލިތަކުން ސަލާމަތްވާ ކަމަށެވެ. މި މީހުން އަޅުގަނޑު ރަށުން ބޭރަށް ނުގެންދާތީ ވަރަށް ދެރަވެ ފިކުރު ބޮޑުވެގެން އުޅެނިކޮށް 1518 ގައި އަޅުގަނޑު ސްޕޭންއަށް ގެންގޮސްދީފިއެވެ. ދެން އަޅުގަނޑަށް އިންސާނުންގެ ފިކުރާ ކުޅެވޭނުކުޅެވޭ ހާލެއްގައި އުޅެނިކޮށް ޕޯޗްގީޒްގައި ހުންނެވި ފަރަންސޭސި ސަފީރު މރ. ޖޭ. ނިކޮޓް 1560 ގައި ގޭގެ ބަގީޗާގައި އިންދަވައިގެން މިކަލޭގެ ފަރުވާއަކަށް އަޅުގަނޑުގެ ބޭނުންކުރައްވަން ފަށްޓަވައިފިއެވެ. އަދި މީނާގެ އެހީގައި މިއީ ފަރުވާއެއްކަން ދައްކައިގެން ބައެއްގެ ބޯކާލާނެ ފުރުސަތު އަޅުގަނޑަށް ލިބިއްޖެއެވެ. ދެން އަޅުގަނޑު ވެސް ހަޔާތް ކެނޑިއްޖެއެވެ. ސުއްޓާ، ސިގިރޭޓް، ކަށިގަނޑުފަދަ ރީތި ނަންނަމުގައި އަޅުގަނޑުގެ ދަރިން މުޅި ޔޫރަޕުގައި ވަޒަންވެރި ކުރުވައިފީމެވެ. ދަނޑުތައް ހެދިއްޖެއެވެ. ފެކްޓްރީތައް އުފެދިއްޖެއެވެ. މީހުންތައް މިލިބޭ އަރާމެކޭ ގޮވަގޮވާފައި ހަމަދަމަނީއެވެ. އަތްމަތި ހުސްވަނީއެވެ. އޭރު އެއް ބަޔަކު ކެންސަރުގެ ޝިކާރައަކަށްވެގެން ހިނގައްޖެއެވެ.
ޑޮކްޓަރުންނާއި ޓެކްނީޝަނުން ޝައްކުގެ ނަޒަރަކުން ބަލަން ފަށައިފިއެވެ. ސައިންޓިސްޓުންނާއި ހަކީމުން ކަޅިއަޅަން ފަށައިފިއެވެ. ޝައްކުތައް ޔަޤީންކުރުމަށް އެވެރިން މަސައްކަތް ވެސް ފަށައިފިއެވެ. އަޅުގަނޑުގެ ޙަޤީޤަތް މީހުންނަށް މަޑުމަޑުން އެނގެން ފަށައިފިއެވެ. މިކަމާ އަޅުގަނޑު ހުރީ ވަރަށް ބިރުންނެވެ. އެއީ އަޅުގަނޑުގެ ދުވަސް ދުއްވާލަފާނެތީއެވެ. އެކަމަކު އެހެނެއް ނުވިއެވެ. މިކަމަކީ ބޮޑު ފައިދާ ބޮނޑިއެއް ލިބޭ ވިޔަފާރިއެއްކަން މީހުންނަށް އެނގިއްޖެއެވެ. އޭޝިޔާއަށާއި އެފްރިކާއަށް އަތްގަދަކޮށްލުމުގެ ބާރު ވިޔަފާރިވެރިން ދީފިއެވެ. ޤައުމުތަކަށް އަރައި ފޭބުމުގައި ޕާސްޕޯޓެއް، ވިސާއެއް، ހުއްދައެއް ނެތެއް ކަމަކު މުޅި ދުނިޔޭގައި އަޅުގަނޑު ބުރުއަޅަނީ ފުރިހަމަ މިނިވަނެއްގެ ގޮތުގައެވެ. އެއް ބަޔަކު އެ ތިބެނީ ސަޖިދަކުރާ ހިސާބުގައެވެ. މީހުންގެ ފުރާނައާ ވެސް އަޅުގަނޑު ކުޅެލަނީ ބޭނުން ގޮތަކަށެވެ. ދުނިޔޭގެ ބޮޑެތި ރަސްރަސްކަލުންނާއި ވެރިން ވެސް އެއީ އަޅުގަނޑުގެ އަޅުންނެވެ. މި ދުވަސްވަރު ކެންސަރުގެ ބަލި މީހުން ގިނަވާން ފެށުމުން މިއުޅޭ ސައިންސްވެރިން ތެޅިގެންފައި 1900މ. އަހަރުތަކުގައި ދުންފަތުގެ އިސްތިޢުމާލު ކުރުމާއި، ފުއްޕާމޭގެ ކެންސަރާ ގުޅުމެއް ހުރިކަން ޔަޤީންކޮށްދީފިއެވެ. ދެން ނިކަމެތިކަން ލިބިދާނެޔޭ ހީކޮށް ކަރުއެލިފައި ހުއްޓާ ކަލޭމެން ދެރަ ނުވާށޭ އަހަރެމެންނަށް މިލާރި ބޮނޑި ލިބެންޏާ ލާހިކެއް ނޫނޭ ކަލޭމެންގެ ވަސް ދުނިޔޭން ފޮހެލާކަށް ބުނެ މިއުޅޭ ވިޔަފާރިވެރިން އިސްތިހާރުތައް ކޮށްގެން އަޅުގަނޑުގެ އިސްތިޢުމާލުކުރާ މީހުން ގިނަކޮށްދީފިއެވެ.
ދެން އެއްބަޔަކު ފެޝަން ވާންވެގެން، އަނެއް ބަޔަކު ބޮޑޭ ވާންވެގެން، އަނެއް ބަޔަކު ހިތާމަ ފިލުވާލަންވެގެން، އަނެއްބަޔަކު ކަޓުވާލަން ވެގެން ބޮއި ނަގައެވެ. ހަމަ އެތެރެއަށް ދުންގަނޑު ދަމާލުމާ އެކު ނުރައްކާތެރި އެތައް ގޭހަކާއި ލޮލަށް ނުފެންނަވަރުގެ ތަފާތު ވައްތަރުގެ ކުދިކުދި އެތިކޮޅުތަކެއް ދުމާ އެކު ނޭވާހޮޅިއަށާއި ފުއްޕާމެޔަށް ގެންގޮސް ތަތްކޮށްލައިގެން ވަރަށް ބޮޑެތި ލޮޓި އިންސާނުންނަށް ދީފައިވާނެއެވެ. ޖައްވުގެ ވަޔާ އެކު ނޭފަތާއި އަނގައިން އެތެރެވާ ޖަރާސީމްތަކުން ފުއްޕާމޭ ދިފާޢުކުރާ ސީލިއާ ނަމަކަށް ކިޔާ އެތައްހާސް އުފުލުންތަކެއްގެ މައްޗަށް އެކުލެވިގެންވާ ސިސްޓަމްގައި ގެދަބުޅި ތަތްކޮށްލައިގެން ބާރުކަނޑުވައި ފުއްޕާމޭ ރަނގަޅު މާކެޓެއްގެ ގޮތުގައި ޖަރާސީމްތަކަށް ހުޅުވާލައިގެން ޓީބީ އެތައް ހާސް ބަޔަކަށް ޖައްސާފައިވާނެއެވެ. ނިއުމޯނިއާ، އިންފްލުއެންޒާ، ސާކޮއިޑޮސީޒް ފަދަ ބަލިތަކުގެ އިތުރުން ތުންފަތާއި އަނގަފަދަ ތަންތަނަށް ކެންސަރު ޖައްސާލުމަކީ އަޅުގަނޑުގެ ހޮބީއެކެވެ. ދުންފަތުގެ ސަބަބުން މީހަކު ދުނިޔެ ދޫކޮށްފިއޭ ބުނެފިނަމަ އުފަލުން އަޅުގަނޑަށް ނަށާލެވެއެވެ. މިއީ އިންސާނިއްޔަތަށް އަޅުގަނޑަށް އެނގިގެން ދީފައިވާ ގެއްލުމެކެވެ.
އަޅުގަނޑުގެ ހަށިގަނޑުގައި ހުންނަ ނިކޮޓިންގެ ސަބަބުން އިންސާނާގެ ހަންގަނޑުގައި ހުންނަ ހޫނުކަން ދަށްކޮށްލާ، ހަށިގަނޑުގައި އުފެދޭ ކާބަންޑައިއޮކްސައިޑް ބޭރުކޮށްލުމަށް ދަތިކޮށް، ލޭގައި މިބައި ގިނަ ކޮށްގެން ވެސް އިންސާނުންނަށް ވަރަށް ބޮޑެތި ގެއްލުންތައް ދީފައިވާނެއެވެ. މާބަނޑު އަންހެނުންގެ ބަނޑުގައި އޮންނަ ކުށެއްނެތް މަޢުސޫމް އެތައް ތުއްތުތުއްތު ފުރާނައެއް މި ދުނިޔެއާ ވަކިކޮށްލާފައި ވާނީ މި ރަހުމްކުޑަ ދެ އަތުންނެވެ. އަދި އެތައް ބަޔަކަށް ހިތުގެބަލި ޖެއްސުމާއި، މުޖުތަމަޢުތަަކަށް ގެއްލުންދިނުމާއި،. އެންމެ ފަގީރުމީހާ ބޯއަޅާ ކަންނެޔޮގަނޑުން ފެށިގެން ވިހިތިރީސް ބުރީގެ އިމާރާތްތަކުގައި ހުޅުޖަހާފައިވާނީ ވެސް މޮޔަ އިންސާނަކަށް ނިދޭ ވަގުތު ދެއިނގިލި ދޭތެރެއިން ފުންމާލައިގެން ގޮސް ވަރަށް ރަހުމުކުޑަ ގޮތެއްގައެވެ.
މަތީގައި އެވާ ބަޔާނަކީ އެއްވެސް މަޖުބޫރު ކަމެއްނެތި، ބުއްދި ސަލާމަތުންހުރެ، އަޅުގަނޑުގެ އަމިއްލަ ފިލްޓަރ ޕްރިންޓް ދީފައިވާ ތެދު ބަޔާނެކެވެ.
އިންސާނިއްޔަތަށް ބިރުހުރި
(ސޮއި)
ދުންފަތް
