ޢަބްދުﷲ ސަޢީދު
“ޤައުމުގެ މަސްލަހަތާއި ދައުލަތުގެ ކަރާމާތާ އިދިކޮޅަށް އުފެދޭ ކޮންމެ ހަރަކާތެއް ހުލިވެގެންދާނީ ރާޅުގެ ފޮނުތައް ހުލިވެގެންދާ މިސާލުގައެވެ.” އިބްރާހީމް ޝިހާބު ވިދާޅުވެފައިވެއެވެ. ޝިހާބު ވިދާޅުވެފައި އެވަނީ ޤައުމުގެ މަސްލަހަތާއި ދަޢުލަތުގެ ކަރާމާތާ އިދިކޮޅަށް ހިންގާ އެއްވެސް ކަމެއް އެ ހަރަކާތް ހިންގާ ބަޔަކު ބޭނުންވާ ގޮތަކަށް ނުނިމޭނެ ކަމަށެވެ. ދިވެހި ތާރީޚުން މިފަދަ އެތައް މިސާލުތަކެއް ފެންނަން އެބަހުއްޓެވެ. ޙަސަން ތާޖުއްދީނުގެ ދެ ދަރިކަލުން ކަނޑުފެއްތި ހާދިސާއަކީ މީގެ ވަރަށް ފުރިހަމަ މިސާލެކެވެ.
ކަންނަންނޫރު ޢަލީ ރާޖާ ފޮނުވީމާ އައި ހޮޅީންގެ ބަޔަކު މާލެ އަރައި އެތެރެ ކޯލާއި 63 ގޯއްޗާއި 3 މިސްކިތާއި 3 ގަނޑުވަރުގައި ހުޅުޖަހައި، ހިޖުރައިން 1166 ވަނަ އަހަރުގެ ޞަފަރު މަހުގެ 13 ވީ ބުދަ ވިލޭރޭ ދިވެހިންގެ މިނިވަންކަން ފޭރިގަތެވެ. ހޮޅީންގެ މީހުން މި ދިން ގެއްލުމުގެ އަޑީގައި ތިބީ ދިވެހިންގެ ތެރެއިން ޚިޔާނާތްތެރިންގެ ބައެކެވެ. އެއީ މަޝްހޫރު އަލްޤާޟީ ޙަސަން ތާޖުއްދީނުގެ ދެ ދަރިކަލުންނެވެ. އަލްޤާޟީ މުޙައްމަދު ޝަމްސުއްދީނާއި އަލްހަތީބް އަޙްމަދު މުޙްޔިއްދީނެވެ. މަލަބާރީންނަށް ރާއްޖެ ހިތަކަށް ލިބުމުން އެންމެ ފަހުން މި ދެބެން ކަނޑު ފައްތައި މެރީއެވެ. ރާއްޖޭގެ މިނިވަންކަމާއި އަމިއްލަ ވެރިކަން ދިވެހިންގެ އަތުން ގެއްލިގެންދިޔަ ކޮންމެ ފަހަރަކު އަޅުގަނޑުމެންގެ ތެރެއިން ޤައުމަށް ލޯތްބެއް ނެތް ޚާއިނުންގެ ބައެއްގެ ބައިވެރިވުން ފެނިގެން ގޮސްފައިވެއެވެ. ވަޠަނަށް ޓަކައި އަދާކުރަންޖެހޭ ޚިދުމަތްތަކަށް ތެދުވެރިކަމެއް ނެތް، އަމާނަތްތެރިކަމެއް ނެތް ބައެއްގެ އެހީތެރިކަމާއެކު ނޫނީ މި ޤައުމުގެ މިނިވަންކަމުގައި ކޫރުމެއް ވެސް އަޅުވާލެވިފައެއް ނުވެއެވެ. ފަހުގެ ތާރީޚަށް ބަލާއިރު ނޮވެންބަރު 3 ގެ ޢުދުވާނީ ހަމަލާގައި ވެސް ފެންނަންހުރި ޙަޤީޤަތަކީ އެޔެވެ.
1988 ނޮވެންބަރު 3 ގައި ޤައުމަށްޓަކައި ޖިހާދުކުރި ދިވެހި ސިފައިން ދައްކައިދިނީ ދީނީ، ޤައުމީ ވާޖިބަށް ދުވަހަކު ވެސް ދިވެހި ސިފައިންނަކީ ފަސްޖެހޭނެ ބައެއް ނޫން ކަމެވެ. އެ ދުވަހު ފުރާނައިން ޤުރުބާންވި ކޮންމެ ސިފައިންގެ މީހަކީ އަޅުގަނޑުމެން މިއަދުގެ ސިފައިންނަށް ވަރަށް ފުރިހަމަ ނަމޫނާއަކާއި މިސާލެއް ދައްކައިދިން ބަޠަލެކެވެ. ދިވެހިރާއްޖެ ދެމިއޮތްހާ ދުވަހަކު އެ ޢިއްޒަތްތެރިންނަށް މި ޤައުމު ފަޚުރުވެރިވާނެއެވެ. އިސްލާމްދީން މަތިވެރިކުރުމަށް އިސްލާމްދީނަށް ނަޞްރާއި ފަތަހަ ހޯދައި ދިނުމަށް ނިކުމެވަޑައިގެންނެވި މުޖާހިދުންނެވެ. އެބޭފުޅުން ޤައުމަށް ކުރެއްވި އިލްތިމާސަކީ އިސްލާމްދީނަށް ޙުރުމަތްތެރިކޮށް ހިތުންމަތީ ދެމިތިބުމެވެ. ވަޠަނަށް ޓަކައި އަދާކުރައްވަންވީ ޚިދުމަތްތައް ތެދުވެރިކަމާއެކުގައި އަދާކުރަމުން ގެންދިޔުމަށެވެ.
ޤައުމީ މިނިވަންކަމާއި އަމިއްލަ ވެރިކަން ރައްކާތެރިކޮށް އަންނަނިވި ދަރިފަސްކޮޅަށް ރައްދުކޮށްދިނުމަކީ އަޅުގަނޑުމެން މި ޖީލުގެ ދިވެހިންގެ ކޮނޑުގައި އެޅިފައިވާ ވަރަށް ބޮޑު އަމާނާތެކެވެ. ކުރީގެ އަބުޠާލުން ހޯއްދަވައިދެއްވައި، އަޅުގަނޑުމެންނާ ހަމައަށް ގެނެސްދެއްވާފައިވާ މިނިވަންކަމުގެ އުފާ އަންނަން އޮތް ޖީލުތަކަށް ރައްދުކުރެވޭނީ ރާއްޖޭގެ މިއަދުގެ ޒުވާނުންގައި ހުރި ތެދުވެރިކަމަކުންނެވެ. ޤައުމަށް ޓަކައި ހިތުގައި އޮތް ކުލުނާއި ކެރުމާއި ހީވާގިކަމެއްގެ ސަބަބުންނެވެ.
